2 Kɔrɩntɩ Nɩaa 6
6
1Tɩntɩmɩɩ-la la sɩɩ tɩŋ, la dɩ Wɩa kala nɩɩ tɩŋ. Ŋɩɩ wɩaa laa sʋlma, má sɩ́ leŋe dɩ Wɩa lahɔrɩmɔ-la ʋ sɩ kɛnɛ ma teeŋ ŋaa wʋpɛɩba. 2Wɩa tɩtɩa bʋl wɩɩŋ deeŋ ʋ teniŋ tʋɔŋ. Ʋ sɩ,
“Bʋa-la lɛ mɩ sɩ cho nɛ mɩ jegile nɩɩ ma teeŋ.
Tapʋlɩɩ-la sɩ maga mɩ laama ta,
mɩ pɛ ma lɛ nɛ.”
Má bee na, lɛɛlɛ nɛ Wɩa chɛ ʋ dagɛ ʋ chonuŋ, jɩnɩŋ nɛ ŋaa tapʋlɩɩ-la Wɩa sɩɩ chɛ dɩ ʋ laama ta. 3La bɩ chɛ dɩ la joŋ kʋŋkala gɛrɛ nʋʋkala wombiiŋ lɛ dɩ ba sɩ́ wʋbɔŋ kala bɩɩnʋ a mʋ tɩgɛ tɩntɩmɩɩ-la la sɩɩ tɩŋ lɛ. La ŋaa Wɩa tɩntɩnnaa nɛ. 4Ŋɩɩ wɩaa wɩɩ-na kala la sɩɩ ŋaa lɛ, la yie dagɛ arɩ la ŋaa Wɩa tɩntɩnnaa nɛ. Wʋwalɩmaa yie jʋʋla, la nɩna hɛɛŋ, la tʋɔŋ faasa chei, ama la yie faasa nyalɩmɛ nɛ. 5Ba yie ŋmoola, a kɛnla tɔ dɩa, nɩaa hɛ yuosuŋ la nyuŋ, la yie faasa tɩtɩŋ nɛ, la bɩ doŋ pɩŋ, losuŋ ma kɛnla. 6La yie dagɛ arɩ la ŋaa Wɩa tɩntɩnnaa nɛ, bɛɛ wɩaa la bɩ disiniŋ kɛnɛ. La jɩŋ wɩaa nɛ, a kɛŋ kenyiri, a kɛŋ zile, a kɛŋ Wɩa Dɩŋ-zɔmʋŋ ma, a cho nɩaa arɩ wʋtɩtɩɩ. 7La yie bʋl wʋtɩtɩɩ nɛ a kɛŋ dol-la Wɩa sɩ pɩla a kaa tɩtɩŋ, a kɛŋ tʋɔpʋla ma Wɩa sɩpaaŋ. Tʋɔpʋla-la nagɛ huonuŋ nɛ la sɩ vɔɔ laalɛ la nadiiŋ arɩ la nagʋa nɩsaa lɛ a kɛŋ la tɩtɩa hɛ dɔŋɔ dɩ la pɔ la tɩtɩa lɛ. 8Nɩaa dɔnsʋŋ ka zilla, ka dɔnsʋŋ ma tʋtʋʋsɛla. Nɩaa dɔnsʋŋ bɩbɛsɛ la lɛ, ka dɔnsʋŋ ma bʋl wʋbɔŋŋɔɔ a tɩtɩgɛ la lɛ. Ba bɩɩna arɩ laa nyɩsɛ nɩaa nɛ, ama wʋtɩtɩɩ nɛ la bʋbʋl. 9Nuhuobiinee bɩ la jɩŋ, ama Wɩa-na jɩŋ-la nɛ. Nɩaa bɩɩna arɩ la sʋba nɛ, ama Wɩa teeŋ la weye nɛ. Baa dɔgɩsɛla nɛ, ama ba bɩ la kpʋa. 10La tʋɔŋ yie chei nɛ, aŋ ka la jʋjʋɔsɛ. La ŋaa summoo nɛ, ama la yie pɛ nɩaa lɛ dɩ ba kuori Wɩa teeŋ. La bɩ kʋŋkala kɛnɛ, ama la nɛ tɩɩ kʋŋkala.
11Ma Kɔrɩntɩ nɩaa, la chaasa bʋl wʋtɩtɩɩ nɛ a pɩma. La bɩ wɩɩkala kaa faama. 12La choma nɛ, ma nɛ bɩ la cho, ŋɩɩ nɛ tɩɩ ma bɩ chɛ dɩ ma suri ma tʋɔŋ pɩla. 13Ma nagɛ mɩ biiriŋ nɛ. Ŋɩɩ nɛ tɩɩ mɩ bʋl wɩaa ŋ-la a pɩpɩma. Má leŋ ma tʋɔŋ pʋllɛ a chola.
Pɔɔl chagɩlɛ nɩalɩŋ sɩ laa Yesu wɩaa dii a mʋ tɩgɛ nɩalɩŋ sɩ bɩ Wɩa wɩaa laa dii lɛ
14Má sɩ́ ma tɩtɩa kaa mɛrɛ nɩalɩŋ sɩ bɩ Yesu wɩaa laa dii lɛ. Tʋɔpʋl tɩŋŋaa arɩ nɩbɔŋŋɔɔ bɩ dɔŋɔ lɛ wuo mɛrɛ. Pʋlʋmʋŋ arɩ birimiŋ bɩ jaŋ wuo guoli dɔŋɔ lɛ. 15Kirisito arɩ Sɩtaanɩ bɩ jaŋ wuo kɛŋ nii-bala, ŋɩɩ tɩtɩa nɛ nɩɩ-la ma sɩ laa Yesu wɩaa dii arɩ nɩɩ-la sɩ bɩ ʋ wɩaa laa dii, ma bɩ jaŋ wuo tuto dɔŋɔ. 16La ŋaa Wɩa-la sɩ weye dɩa nɛ, ʋ hɛ la lɛ. Ŋ bɩ jaŋ wuo jʋʋ Wɩa dɩa a kpaarɛ vʋɩyaa nɩmɛ. Ŋ-la nɛ Wɩa tɩtɩa bʋl ʋ teniŋ tʋɔŋ. Ʋ sɩ,
“Mɩ jaŋ hɛ mɩ nɩaa tʋɔŋ
a gʋgɔllɛ.
Mɩ nɛ jaŋ ŋaa ba Wɩa,
dɩ ba ma ŋaa mɩ nɩaa.
17Ŋɩɩ wɩaa má lɩɩsɛ ma tɩtɩa nɩalɩŋ sɩ bɩ Yesu wɩaa laa dii tʋɔŋ,
a hɔŋ ma dʋndʋŋ.
Má sɩ́ kɩalɩŋ sɩ kɛŋ disiniŋ digu.
Dɩ ma nɛ lɩɩsɛ ma tɩtɩa wɩaa deemba lɛ, mɩ jaŋ laa ma.
18Mɩ jaŋ ŋaa ma Nyɩmma
dɩ ma ma ŋaa mɩ hambolibiisiŋ arɩ mɩ toloo.”
La Tɩɩna doluŋ kala Tɩɩna nɛ bʋl ŋɩɩ.
Currently Selected:
2 Kɔrɩntɩ Nɩaa 6: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
