Israelfɔ Ɩlʋ 94
94
Ɩkɔ Ɔkapʋ Bulu
1Oo ɩkɔ Ɔkapʋ Nana Bulu,
ɩkɔ Ɔkapʋ Bulu, kʋsʋ lɛ ɩwɩ ɔwan!
2Ɔyɩtɔ asʋn Ogyipʋ, kʋsʋ.
Kʋsʋ, afʋka ɩwɩ atsupʋ ɩkɔá ɩlɛkana.
3Oo Nana Bulu, ɔmɛnkɛ?
Ɔmɛnkɛ aha lalahɛ bési ansigyi nya?
4Bʋdɛ ɔnɔtɔ ka,
lalahɛ abwɛpʋ fɛ́ɛ́ bʋdɛ ɩwɩ tsu.
5Oo Nana Bulu, bʋdɛ fʋ aha mɔ,
bʋdɛ fʋ ogyikpa ɩtɔ sɩnsɩn bwɛ.
6Bʋdɛ asʋrapʋ mʋ́a afɔɔ tɩn,
mɔ awumbi.
7Bʋdɛblɩ bɛɛ, “Nana Bulu médewun,
Yakob Bulu mɛ́dɛbɩ.”
8Ɔmá amʋtɔ aha ánɩ́ amʋ́ agywɩɩn ɩma ɔsa,
aha mimlahɛ, ɔmɛnkɛ mlɛ́tɩn ansɩ?
9Buluá ɔlɔbwɛ asʋ, nkalɩ omóonu asʋn?
Mʋá ɔlɔbwɛ ansibi, nkalɩ omóowun atɔ?
10Mʋtotswii ɔmá fɛ́ɛ́,
nkalɩ ɔmɛ́ɛbɩtɩ amʋ́ ɩsʋ?
Mʋá otosuna aha atɔ, nkalɩ ɔmɛ́ɛbɩ asʋn?
11Nana Bulu yin nyankpʋsa asʋn susuhɛ,
ánɩ́ itepi ma labi.
12Oo Nana Bulu, ansɩ igyi ɔha ánɩ́ fabɩtɩ mʋ ɩsʋ,
pʋ fʋ atosunahɛ suna mʋ.
13Fótsu ipian kʋsʋ mʋsʋ ipian owunkɛ amʋ,
yɛfʋn brɛá bakwi ɔbɔ tswɩ ha aha lalahɛ.
14Nana Bulu méekina mʋ aha,
tswɩ mʋ ogyikpa anfɩ tsitsa,
15tsufɛ bɛ́lagyi asʋn ɔnɔkwalɩsʋ,
aha ánɩ́ amʋ́ asʋn da ɔkpa fɛ́ɛ́ bóbuo mʋ́.
16Ma ɔbɛ́lɩɩ mɩ ɔma nɩ aha lalahɛ bɔkʋsʋ lɩɩ mɩsʋ?
Ma ɔbɔ́kʋsʋ lɩɩ lalahɛ abwɛpʋsʋ ha mɩ?
17Nɩ megyi Nana Bulu gyi mɩ bʋalɛ ogyipʋ a,
tɛkɩ nayɔ nda ɔtɩnɛá ɔhaa tamatɔɩ.
18Brɛá mbɛɛ ansrɛɩ a,
oo Nana Bulu, fʋ ɔdwɛá ɩma ɔka tɛkɩta mɩ lɩɩ.
19Nɩ asʋn ɩdʋn mɩ a,
fʋteyia mɩ ɩklʋn, ansɩ tɛlagyi mɩ.
20Iwie ogyikpa ánɩ́ bʋtotsula asʋkpan, wa amandɩɛ lalahɛ a,
fʋa amʋ́nyɔ mlɛ́talɩ bwɛ ɩkʋlɛ?
21Babwɛ ɔnɔ-ɔkʋlɛ, kɩklɩ yile ɔbwɛpʋ nwunsʋ.
Bʋtɛha aha ánɩ́ ɔlala ɩma amʋ́ ɩwɩ lowu ɩpɔn.
22Tamɛ Nana Bulu gyi mɩ ɔtanʋkpa kinkin.
Mɩ Bulu gyi mɩ ɩbʋta kpikpli.
23Ɔbɛ́ka amʋ́ owuntɔlɩn amʋsʋ ɩkɔ.
Ɔbɔ́mɔ amʋ́ amʋ́ lalahɛ amʋ sʋ.
Nana Bulu anɩ Bulu amʋ ɔbɔ́mɔ amʋ́.
Currently Selected:
Israelfɔ Ɩlʋ 94: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
