Israelfɔ Ɩlʋ 85
85
Nkpa Ɔhɔpʋ Bulu, Yinkia Anɩ Ba Fʋ Wa
Kora abi kanfʋ-ɩlʋ ha ɩlʋ osunapʋ.
1Oo Nana Bulu, fagyi fʋ ɔsʋlʋ bʋalɛ.
Fʋlalɛ Yakob abi-aná ndountɔ.
2Fesi fʋ aha lalahɛ kie amʋ́,
bun ansibi amʋ́ lakpan fɛ́ɛ́sʋ. Ɩya.
3Fesi ɔblɔ fɛ́ɛ́,
si fʋ ɔblɔ kinkiinkin ɔmagya.
4Anɩ nkpa ɔhɔpʋ Bulu, yinkia anɩ ba fʋ wa,
afʋtswɩ anɩ ɩwɩ ɔblɔ tsalɩfwɩ.
5Fénya ɔblɔ anɩsʋ alɩɩ yɔ?
Fɛ́ha ɔblɔ bɛ́kɩta fʋ yɛtʋ anɩ abi-aná fɛ́ɛ́?
6Fʋmɛ́ɛlawa anɩ ɔwʋnlɩn,
mɛnɩ fʋ aha bénya fʋ ɩwɩ ansigyi?
7Oo Nana Bulu, ha fʋ ɔdwɛá ɩma ɔka ɩba anɩsʋ,
afʋhɔ anɩ nkpa.
8Ha mɩ annu asʋn ánɩ́ Nana Bulu ɔbɛ́blɩ,
tsufɛ ɔbɛ́bla mʋ aha ánɩ́ bʋtamakpa ɔma ha mʋ iwilwii asʋn,
tamɛ máha amʋ́ abʋtra bwɛ mimlala.
9Lɛlɛ, mʋ nkpahɔ ɩma ɩfɔ aha ánɩ́ bʋtenya mʋ ifu wa,
fówun mʋ numnyam bétsia anɩ ɔsʋlʋsʋ.
10Bulu ɔdwɛá ɩma ɔka mʋ́a mʋ aha ɔnɔkwalɩwa béfia aba.
Aha yilebwɛ mʋ́a Bulu iwilwii ɛ bɛ́lata aba puta.
11Aha bɔ́wa ɔnɔkwalɩ ha Bulu ɔsʋlʋsʋ,
yile Ɔbwɛpʋ Bulu ɔbɛ́kɩ amʋ́ tsu ɔsʋsʋ.
12Ee, Nana Bulu ɔbɔ́pʋ atoyile sɩsɩ,
anɩ ɔsʋlʋsʋ atɔ bɔ́wa alɛ.
13Yilebwɛ bégya mʋ nkpa,
ɩbɔ́tɔ ɔkpa ha mʋ yabi ɔtsakpa.
Currently Selected:
Israelfɔ Ɩlʋ 85: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
