Israelfɔ Ɩlʋ 66
66
Mlɩkanfʋ Bulu Numnyam
Kanfʋ-ɩlʋ ha ɩlʋ osunapʋ.
1Ɔyɩtɔ aha fɛ́ɛ́, mlɩtswɩ ope kanfʋ Bulu.
2Mlɩwa ɩlʋ wa mʋ ɩda numnyam.
Mlɩkanfʋ mʋ numnyam.
3Mlɩbla Bulu mlɩaa, “Fʋ atɔ bwɛhɛ ɩhɩɛ bʋ ifu, ɩbʋ wanwan!
Fʋ tumi lɛhɩɛ moni.
Mʋ́ sʋ fʋ alupʋ fɛ́ɛ́ bɔ́pʋ ifu da akpawunu fʋ ansɩtɔ.
4Ɔyɩtɔ aha fɛ́ɛ́ bósum fʋ.
Bɔ́wa ɩlʋ kanfʋ fʋ,
wa ɩlʋ kanfʋ fʋ ɩda.” Ɩya.
5Mlɩyɛkɩ tɔá Bulu labwɛ.
Alabwɛ ofula ha anyankpʋsa.
6Ɔlɛha ɔpʋ lɛdamli ɔsʋlʋ wʋlɩhɛ,
anɩ anain bɛfa mʋ́ ayabitɔ.
Ɩnʋ mʋ ɩwɩ lɔwa anɩ ansigyi.
7Ɔdɛ iwie gyi brɛ fɛ́ɛ́ mʋ tumitɔ.
Mʋ ansɩ dɩn ɔmá fɛ́ɛ́sʋ.
Mʋsʋ akʋsʋlɩɩpʋ bʋmátsu ɩwɩ. Ɩya.
8Ɔmá fɛ́ɛ́, mlɩkanfʋ anɩ Bulu.
Mlɩkanfʋ mʋ aha abʋnu.
9Mʋ sʋ anɩtsie nkpa,
ɔmɔkʋha anɩ ayabi ɩsrɛɩ.
10Oo Bulu, fʋlɔsɔ anɩ kɩ.
Fɔsɔ anɩ kɩ fɛ alɩá bʋtɔpʋ ogya
ŋlaɩn sika fututu, dɩnkɩ ipi lɛ mʋ́ ansɩtɔ.
11Fʋlɔpʋ mpʋsa lɛ anɩ,
fɔpʋ atodwindwin sʋra anɩ.
12Fɛha anɩ alupʋ bɛtsatsa anɩsʋ.
Anɩlɔtsʋn ntsutso, tsʋn ogyatɔ,
tamɛ séi fapʋ anɩ ba ɔtɩnɛá atɔ labusʋ.
13Nɔ́pʋ atɔtɔhɛ-afɔdɩɛ ba fʋ otsiakpa.
Nɛ́ka ɩkɔá notsula ha fʋ,
14tɔá nobwii ɔnɔ blɩ;
brɛá mbʋ ɩkplantɔ.
15Nɔ́bɔ mbwɩá bawa nfɔ bɔ atɔtɔhɛ-afɔdɩɛ,
pʋ nkpokpo ogyasi bɔ afɔdɩɛ ha fʋ.
Pʋ nnantswie yinhɛ mʋ́a atrʋkpa bɔ afɔdɩɛ ha fʋ.#Lew. 8:20-21 Ɩya.
16Bulu ifu anyapʋ fɛ́ɛ́, mlɩbonu.
Nɛ́blɩ tɔá alabwɛ ha mɩ.
17Nosu kpoli mʋ.
Mʋ kanfʋ ɩdɩn mɩ ɔnɔsʋ.
18Nɩ nesi lalahɛ wa mɩ ɩklʋntɔ a,
tɛkɩ mɩ Wie mónu mɩ isu,
19tamɛ lɛlɛ mʋ́ a, Bulu lanu mɩ isu,
sɔ mɩ ɔnɔ.
20Nɛ́kanfʋ mʋ, tsufɛ omekina mɩ isu nu,
ntɛ kina mʋ ɔdwɛá ɩma ɔka lɛ suna mɩ.
Currently Selected:
Israelfɔ Ɩlʋ 66: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
