Israelfɔ Ɩlʋ 59
59
Bulu, Lɛ Mɩ Lɛ Mɩ Alupʋ Ɩbɩtɔ
Ɩlʋ ha ɩlʋ osunapʋ. Dawid ɩlʋá bɔ́pʋ “Máyinta atɔ” ɔmɛ wa mʋ́. Ɔlɔwa mʋ́ brɛá Saul lɛha aha bogyo mʋ woyi, mɛ́nɩ bɔ́mɔ mʋ.
1Mɩ Bulu, lɛ mɩ lɛ mɩ alupʋ ɩbɩtɔ.
Gyi ɩban wa mɩ tsu mɩsʋ akʋsʋlɩɩpʋ ɩbɩtɔ.
2Lɛ mɩ lɛ lalahɛ abwɛpʋ ɩbɩ.
Hɔ mɩ lɛ obugya atsitsapʋ ɩbɩ.
3Kɩ, bʋgyoá bɔ́mɔ mɩ.
Awuntɔlɩnpʋ bafia mɩ nwunsʋ.
Nana Bulu, megyi lalahɛ kʋkʋ nabwɛ,
ntɛ asʋkpan ɩkʋ nagyi.
4Tsufɛ megyi mɩ bwɛhɛ kʋkʋ sʋ
bʋsrɩ bʋdɛ ɩwɩsʋ da.
Kʋsʋ kɩ tɔá ɩdɛ mʋ́sʋ yɔ, afʋbʋa mɩ.
5Ɩsa Ɔnɔ Ɔlɩɩpʋ Bulu, Nana Bulu, fʋgyi Israel Bulu!
Kʋsʋ afʋbɩtɩ ɔmá anfɩ fɛ́ɛ́ ɩsʋ.
Máwun aha atɔpʋ lalahɛ ɔkʋkʋ nwɛ. Ɩya.
6Bʋteyinki ba ntʋpwɛ,
bʋdɛkplʋn fɛ akɩaɩ, bomli wulu amʋ.
7Kɩ, bʋtɛkpakpa asiabi bun.
Amʋ́ ɔnɔ klakla fɛ ɔdayi,
bʋdɛblɩ bɛɛ, “Ɔhaa medenu.”
8Tamɛ Nana Bulu, mɔsɩ fʋdɛ amʋ́,
fʋdɛ ɔmá anfɩ fɛ́ɛ́ ɔblɔla bwɛ.
9Mɩ ɔwʋnlɩn, ndɛ fʋ ɔkpa kɩ,
tsufɛ fʋ Bulu gyi mɩ ɔtanʋkpa kinkin.
10Mɩ Bulu ɔbɔ́pʋ mʋ ɔdwɛá ɩma ɔka befia mɩ.
Ɔbɛ́ha nówun alɩá nagyi mɩ alupʋsʋ.
11Mámɔ amʋ́, mɛnɩ mɩ aha Israelfɔ bʋmɛ́ɛtan mʋ́sʋ.
Pʋ fʋ ɔwʋnlɩn da amʋ́ saɩn, afʋfɩn amʋ́ da.
Oo anɩ Wie, fʋgyi anɩ kʋtʋ.
12Amʋ́ asʋn lalahɛ blɩ, amʋ́ ɔnɔ asʋn sʋ
ha amʋ́ ɩwɩtsu ɩkpa kɩta amʋ́ fɛ agbla.
Amʋ́ ɩlwɩɩ pʋ́ amʋ́ afunuwa sʋ,
13pʋ ɔblɔ mɔ amʋ́.
Mɔ amʋ́ plɩplɩplɩ.
Ɔyɩtɔ aha fɛ́ɛ́ abʋwun ánɩ́ Bulu dɛ iwie gyi Yakob ɔmásʋ. Ɩya.
14Bʋteyinki ba ntʋpwɛ,
bʋdɛkplʋn fɛ akɩaɩ, bomli wulu amʋ.
15Bʋna bʋdeki dunka atogyihɛ,
tamɛ nɩ bʋmɔmwɛ a, bʋtɔkplʋn.
16Tamɛ mɩ mʋ́ nɔ́wa fʋ ɔwʋnlɩn ɩwɩ ɩlʋ.
Nyankɩ-nyankɩ nɔ́pʋ ansigyi kplʋn wa ɩlʋ, fʋ ɔdwɛá ɩma ɔka sʋ.
Tsufɛ fʋgyi mɩ ɔtanʋkpa kinkin pʋ́ mɩ oŋainkpa mɩ ɔkplankɛ.
17Mɩ ɔwʋnlɩn, nɔ́wa ɩlʋ kanfʋ fʋ,
tsufɛ Bulu, fʋgyi mɩ ɔtanʋkpa kinkin.
Fʋtɛlɛ fʋ ɔdwɛá ɩma ɔka suna mɩ.
Currently Selected:
Israelfɔ Ɩlʋ 59: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
