Israelfɔ Ɩlʋ 55
55
Mɩ Ɩwɩ Ɔblɔ Laha Bʋdɛ Mɩ Lu
Dawid ɩlʋ ha ɩlʋ osunapʋ. Bɔ́pʋ ɔsankuo da mʋ́.
1Oo Bulu, yaa asʋ afʋnu mɩ mpaɩ.
Mákina mɩ kokoli.
2Yaa asʋ nu mɩ isu, afʋsɔ mɩ ɔnɔ.
Mɩ asʋn wunhɛ ladʋn mɩ.
Nagyigya,
3mɩ alupʋ asʋn blɩhɛ
pʋ́ aha lalahɛ asɩá bʋdɛ mɩ ba sʋ.
Tsufɛ bapʋ ipian dɩnka mɩsʋ,
mɩ ɩwɩ ɔblɔ laha bʋdɛ mɩ lu.
4Mɩ ɩklʋn mɛdɩ mɩ asɩ.
Opuni dɛ mɩ tsii, ndekle anwu.
5Ifu dɛ mɩ, ndɛkpɩnkɩ kpakpakpakpa.
Ɩwɩ mesi mɩ kpɩnkɩ.
6Ao! Tɛkɩ nɩ mbʋ atɛ fɛ lɔpɔ a,
tɛkɩ nófuli yɛda ɔkpʋnʋ ɔtɩnɛkʋ.
7Ee, tɛkɩ nɔ́yɔ tsutsuutsu,
ɔsʋlʋkpansʋ ɔtɩnɛkʋ. Ɩya.
8Tɛkɩ nɔ́kɔsɩ dunka oŋainkpa ha ɩwɩ,
si afu mʋ́a alankpla anfɩ.
9Mɩ Wie, ha amʋ́ abʋgyigya, amʋ́ ɔdandʋ imlimli,
tsufɛ owuntɔlɩn mʋ́a ɩkɔ́ gyi tɔá ndewun wulu amʋtɔ.
10Bʋtobomli wulu amʋ ɔpa-onye,
lalahɛbwɛ mʋ́a asʋn wunhɛ sɔɔn bʋ mʋ́tɔ.
11Asʋkpangyi bʋ wulu amʋtɔ.
Ahamlɛ pʋ́ ahasisi tamakpa mʋ́ dɩnsʋ.
12Nɩ mɩ olupʋ dɛ mɩ sʋpa a,
tɛkɩ nótomi.
Nɩ mɩ olupʋ dɛ ɩwɩ tsu suna mɩ a,
tɛkɩ nódunka ɩwɩ ɔwakpa.
13Tamɛ fʋ mɩ ba, mɩ nyawie
pʋ́ mɩ ɔbɩsʋfɛá nhɩɛ nyin fʋ, dɛpʋ ɩnɩ gyi mɩ.
14Tɛkɩ mɩa fʋnyɔ tɛbla aba anɩ awuntɔsʋ,
natɩ buo ɔdɔm yɔ Bulu woyitɔ.
15Mɩ alupʋ lowu ifwie amʋ́tɔ.
Bʋyɔ afulitɔ amʋ́ ansɩ bʋya,
tsufɛ lalahɛ labʋla amʋ́ woyi pʋ́ amʋ́ klʋntɔ.
16Mɩ mʋ́ nósu kpoli Bulu.
Nana Bulu ɔbɔ́hɔ mɩ.
17Nyankɩ, ɔpa, ntʋpwɛ fɛ́ɛ́
nósu kʋklʋkʋʋ bla mʋ mɩ asʋn,
obónu mɩ ɔmɛ.
18Aha tsɔtsɔɔtsɔ bʋdɛ mɩ ɩsa kɔ,
tamɛ ɔbɛ́lɛ mɩ lɛ amʋ́ ɩbɩ.
Tɔtɔɔtɔ mɔ́ɔbwɛ mɩ.
19Bulu dɛ iwiegyi tsu bɩmbɩ ɔpá. Ɩya.
Obónu mɩ isu, ba amʋ́ asɩ.
Tsufɛ mɩ alupʋ amʋ bʋtamatsɛ,
bʋtamanya Bulu ifu.
20Mɩ nyawie lakpa mʋ nyawie ɔma.
Alatʋn mɩa mʋnyɔ ntam.
21Mʋ asʋn blɩhɛ bʋ ɔdwɛ dʋn ɔkwɛn,
tamɛ ɩsakɔ asʋn bʋ mʋ ɩklʋntɔ.
Mʋ asʋn lɔpɔn dʋn adɔmpɔ,
tamɛ igyi fɛ ɔdayiá bapio mʋ́ lɛ.
22Pʋ fʋ asʋn fɛ́ɛ́ wa Nana Bulu ɩbɩtɔ, ɔbɛ́kpa fʋ.
Ɔmɛ́ɛha ɔha yile mɛ́ɛdɩda.
23Tamɛ fʋ Bulu, fɔ́tswɩ aha lalahɛ amʋ wa ɔbɔ kluklu amʋtɔ dodoodo,
asa amʋ́ nkɛ ɩbɛ́ta fʋn.
Tsufɛ fɛ́kpa aha amɔpʋ pʋ́ afunupʋ tsitsa,
tamɛ mɩ mʋ́ nɔ́pʋ ansɩ dɩnka fʋsʋ.
Currently Selected:
Israelfɔ Ɩlʋ 55: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
