Israelfɔ Ɩlʋ 118
118
Bulu Ɔdwɛá Ɩma Ɔka Bʋ Ɩnʋ Brɛ Fɛ́ɛ́
1Mlɩda Nana Bulu ɩpan, tsufɛ ɔbʋ alɛ.
Mʋ ɔdwɛá ɩma ɔka bʋ ɩnʋ brɛ fɛ́ɛ́!
2Israelfɔ bʋblɩ bɛɛ,
“Mʋ ɔdwɛá ɩma ɔka bʋ ɩnʋ brɛ fɛ́ɛ́.”
3Aaron woyi bʋblɩ bɛɛ,
“Mʋ ɔdwɛá ɩma ɔka bʋ ɩnʋ brɛ fɛ́ɛ́.”
4Nana Bulu ifu anyapʋ bʋblɩ bɛɛ,
“Mʋ ɔdwɛá ɩma ɔka bʋ ɩnʋ brɛ fɛ́ɛ́.”
5Brɛá nowie ɩkplantɔ a, nokpoli Nana Bulu,
ɔlɔsɔ mɩ ɔnɔ,
pʋ mɩ lɩɩ ɔtɛɩkpa.
6Nana Bulu bʋ mɩ wa, tɔtɔ mɔ́ɔwa mɩ ifu.
Ntɔ nyankpʋsa ɔbɛ́talɩ bwɛ mɩ?
7Nana Bulu bʋ mɩ wa. Obégyi mɩ bʋalɛ.
Négyi ɩsʋ, pʋ mɩ ansibi kɩ mɩ alupʋ.
8Ɩbʋ alɛá nɛ́tanʋ Nana Bulu,
dʋn ánɩ́ nɔ́pʋ ansɩ dɩnka anyankpʋsasʋ.
9Ɩbʋ alɛá nɛ́tanʋ Nana Bulu,
dʋn ánɩ́ nɔ́pʋ ansɩ dɩnka wulu ahandɛsʋ.
10Ɔmá fɛ́ɛ́ bɛkafia mɩ,
tamɛ néyinta amʋ́ Nana Bulu ɩdatɔ plɩplɩplɩ!
11Bɛkafia mɩ,
tamɛ neyinta amʋ́ Nana Bulu ɩdatɔ plɩplɩplɩ!
12Bɛkpa bun mɩsʋ fɛ awʋnsa.
Bodun fɛ akpokplofwɩ ogya,
Neyinta amʋ́ Nana Bulu ɩdatɔ plɩplɩplɩ.
13Bowuta mɩ, sian mɩ lɛ da,
tamɛ Nana Bulu legyi mɩ bʋalɛ.
14Nana Bulu gyi mɩ ɔwʋnlɩn. Nɔ́wa ɩlʋ kanfʋ mʋ.
Alahɔ mɩ nkpa.
15Ansigyi ɩlʋ mʋ́a ope dɛlɩn
yile abwɛpʋ obun ɔwakpa bɛɛ,
“Nana Bulu gyɔpɩ labwɛ hayinhɛsʋ.
16Nana Bulu lawa ɔkpayi.
Mʋ gyɔpɩ lagyi hayinhɛsʋ.”
17Mmóowu, nétsia nkpa,
da Nana Bulu gyumagyihɛ ɔkan suna aha.
18Nana Bulu lahɩɛ bɩtɩ mɩ ɩsʋ,
tamɛ ɔmɔpʋ mɩ ha lowu.
19Mlɩfinki yilebwɛ aklʋn ha mɩ,
ambitiwie yɛda Nana Bulu ɩpan.
20Nana Bulu ɔtswɛkpa ɔnɔ klʋn nɩ.
Yile abwɛpʋ ɔbɔ́tsʋn mʋ́tɔ wie.
21Fabwɛ atɔá fasɔ mɩ ɔnɔ,
fahɔ mɩ nkpa.
22Ibwi amʋʋ obu ayipʋ bekina amʋ
lebemli okonkisʋbwi nɩ.
23Nana Bulu lɔbwɛ mʋ́ alɩ.
Ɩbʋ wanwan.
24Ndɛ gyi ɛkɛá Nana Bulu labwɛ nɩ.
Mlɩha ansɩ igyi anɩ, ɩwɩ ɩsankɩ anɩ.
25Oo Nana Bulu, abwii ɩpa hɔ anɩ!
Oo Nana Bulu, kokoli ha ɩwa alɛ ha anɩ!
26Nana Bulu oyula ɔha anfɩ ɔba mʋ ɩdatɔ anfɩ!
Anɩdɛ mlɩ yula tsu Nana Bulu woyitɔ.
27Nana Bulu gyi Bulu,
mʋlaha anɩlawa alɛ.
Mlɩkɩta mbla, amlɩpʋ ansigyi yi opian yɔ
Bulu afɔdɩɛ-ɔswɩ nsiebi asɩ.
28Fʋgyi mɩ Bulu, nɛ́da fʋ ɩpan.
Fʋgyi mɩ Bulu, nótsu fʋ fʋa.
29Mlɩda Nana Bulu ɩpan, tsufɛ ɔbʋ alɛ.
Mʋ ɔdwɛá ɩma ɔka bʋ ɩnʋ brɛ fɛ́ɛ́.
Currently Selected:
Israelfɔ Ɩlʋ 118: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
