Israelfɔ Ɩlʋ 107
107
Ɔwʋlʋ 5sɩ
(Israelfɔ Ɩlʋ 107--150)
Bulu Totsu Aha Ánɩ́ Bʋma Tɔtɔ Lɛ Amʋ́ Ɩkplantɔ
1Mlɩda Nana Bulu ɩpan,
tsufɛ ɔbʋ alɛ.
Mʋ ɔdwɛ ɩma ɔka.
2Aha ánɩ́ Nana Bulu laka lɛ
amʋ́ alupʋ ɩbɩ bʋblɩ alɩ.
3Alakpa amʋ́ tsu owi ɔdalɩkpa
mʋ́a owi ɔkplɩwiekpa ɔsʋlʋsʋ,
tsu ɔsʋsʋ mʋ́a ɔsasɩ befia.
4Amʋ́tɔ akʋ bɛnatɩ tsʋntsʋn adimbitɔ.
Bʋmenya ɔkpa tsʋn yɔ wulu kʋkʋtɔá bétsia.
5Akʋn mʋ́a ɔmɛwʋlɩ lɛkɩta amʋ́,
ɔkla lɛsrɩ amʋ́.
6Ɩnʋ bosu kpoli Nana Bulu amʋ́ ɩkplantɔ,
ɔlɛlɛ amʋ́ lɛ amʋ́ asʋn wunhɛtɔ.
7Ɔlɛkpa amʋ́ tsʋn ɔkpa tswiihɛsʋ,
yɛfʋn brɛá bowie wuluá bétsia mʋ́tɔsʋ.
8Bʋda Nana Bulu ɩpan,
mʋ ɔdwɛá ɩma ɔka pʋ́ mʋ ofula akpɔnkpɔntɩá alabwɛ
ha anyankpʋsa sʋ,
9tsufɛ ɔtɛha aha ánɩ́ ɔmɛwʋlɩ dɛ amʋ́ ntsu,
pʋ atɔ wanklaan bʋla amʋ́á akʋn dɛ amʋ́.
10Amʋ́tɔ akʋ betsia oklun mʋ́a oklun tuuntɔ,
bʋda ɩwɩɔsɩn mʋ́a ɩkantɔ,
11tsufɛ bɔkʋsʋ lɩɩ Bulu asʋnsʋ.
Bekina Ɔsʋsʋʋsʋ Mʋ Wie afutuo nu.
12Ɩnɩ sʋ ɔlɛha amʋ́ bɔyɔ agyʋma kpekple pʋba amʋ́ asɩ.
Bɛdɩda, bʋmenya ɔbʋapʋ.
13Ɩnʋ bosu kpoli Nana Bulu amʋ́ ɩkplantɔ,
ɔlɛlɛ amʋ́ lɛ amʋ́ asʋn wunhɛtɔ.
14Ɔlɛbɩtɩa amʋ́ lɛ oklun mʋ́a oklun tuun amʋtɔ,
tɩntɩn ɩkan amʋ lɛ amʋ́ ɩwɩ.
15Bʋda Nana Bulu ɩpan,
mʋ ɔdwɛá ɩma ɔka pʋ́ mʋ ofula akpɔnkpɔntɩá alabwɛ
ha anyankpʋsa sʋ,
16tsufɛ olobwiebwie kɔɔbrɩ aklʋn,
biabia adatɔtɔ anyɔ.
17Bemimla kʋsʋ lɩɩ Bulusʋ.
Mʋ́ sʋ bowun ɩwɩɔsɩn amʋ́ bwɛhɛ lalahɛ sʋ.
18Atogyihɛ kʋkʋ mɛdɩnka amʋ́ ɔwɔlɩ,
besian wu.
19Ɩnʋ bosu kpoli Nana Bulu amʋ́ ɩkplantɔ,
ɔlɛlɛ amʋ́ lɛ amʋ́ asʋn wunhɛtɔ.
20Ɔlɔpʋ mʋ asʋn sɩsɩ, ɩlɛtsa amʋ́ ɩlɔ,
lɛ amʋ́ lɛ lowutɔ.
21Bʋda Nana Bulu ɩpan,
mʋ ɔdwɛá ɩma ɔka pʋ́ mʋ ofula akpɔnkpɔntɩá alabwɛ
ha anyankpʋsa sʋ,
22abʋpʋ ɩpan bɔ afɔdɩɛ ha mʋ,
wa ɩlʋ ansigyisʋ pʋda mʋ bwɛhɛ ɔkan.
23Amʋ́tɔ akʋ bʋdɩn ɔpʋsʋ-ɩyɛntɔ,
bʋdɛ ibia gyi,
24bowun Nana Bulu gyumagyihɛ
pʋ́ mʋ ofula ánɩ́ ɔlɔbwɛ ɔpʋ okluklukpa;
25tsufɛ ɔlɛlɛ ɔnɔ,
afu kpɔnkpɔntɩ lɔtsʋn,
ɔpʋ lɛda ɔwʋnlɩnsʋ.
26Ilotsu amʋ́ ntsusʋ-yibi amʋ dʋ,
kpa amʋ́ wa,
ɔkla lɛsrɩ amʋ́.
27Bʋna bʋdɛ ntinta bɔ fɛ nta abʋpʋ.
Amʋ́ agywɩɩn lotu pupu.
28Ɩnʋ bosu kpoli Nana Bulu amʋ́ ɩkplantɔ,
ɔlɛlɛ amʋ́ lɛ amʋ́ asʋn wunhɛtɔ.
29Ɔlɛha afu amʋ ɩlɛka itin,
ɔpʋ amʋ ɩlɔlʋa.
30Ansɩ legyi amʋ́, tsufɛ ɔpʋ amʋ ilesi da.
Ɔlɛlɛ amʋ́ yeyi otsubunɔá bʋdekle.
31Bʋda Nana Bulu ɩpan,
mʋ ɔdwɛá ɩma ɔka pʋ́ mʋ ofula akpɔnkpɔntɩá alabwɛ
ha anyankpʋsa sʋ.
32Bʋtsu Nana Bulu fʋa mʋ aha ɔpasuatɔ,
abʋkanfʋ mʋ ahandɛ ansɩtɔ.
33Mʋtɛha ntsu tsʋnhɛ temli ɔsʋlʋkpan,
ntsu ɔwɩkpa tɔwʋlɩ.
34Ɔtɛha ɔsʋlʋ wanklaan temli nfɔlɩ ɔkwɛkpa,
mʋ́sʋ atsiapʋ bwɛhɛ lalahɛ sʋ.
35Ɔtɛladamli adimbi bwɛ patɩ,
ɔtɛha ntsu tɔwɩ ɔsʋlʋ wʋlɩhɛsʋ.
36Ɔtɔpʋ aha ánɩ́ akʋn dɛ amʋ́ yaɩ ɩnʋ,
bʋtɛda wulu tsia mʋ́tɔ.
37Bʋtɔdɔ, wa atɔ, du waɩn-abi,
kpɔtɩ atɔ tsɔtsɔɔtsɔ.
38Otoyula amʋ́ bʋtɛhɩɛ klɛɩ,
amʋ́ mbwɩ yaɩhɛsʋ tamadɩnkɩ.
39Nɩ ɔhɩɛ, asʋn wunhɛ mʋ́a isu ɩba a,
ɩtɛha ɔmá amʋ́sʋ tɛdɩnkɩ,
40amʋ́ wulu ahandɛ bʋtɔsʋpa,
natɩ ki dimbiá ɔkpa mɛda mʋ́sʋsʋ.
41Tamɛ ototsu aha ánɩ́ bʋma tɔtɔ lɛ amʋ́ ɩkplantɔ,
ha amʋ́ abusuan tɛklɛɩ yɛɛ fɛ akufa.
42Aha ánɩ́ amʋ́ asʋn da ɔkpa bʋtowun mʋ́, nya ansigyi,
tamɛ ɔnɔ tobwie aha lalahɛ fɛ́ɛ́.
43Ɔtɩansɩpʋ okugyiɔkʋ ɔkɩ ɩnɩ yaɩ,
osusu Nana Bulu ɔdwɛá ɩma ɔka ɩwɩ.
Currently Selected:
Israelfɔ Ɩlʋ 107: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
