Mateo 8
8
Ɩlɔ Pɛpɛ Ɔlɔpʋ Ɔkʋ Tsa
(Marko 1:40-45; Luka 5:12-16)
1Brɛá Yesu lɛkplɩ tsu ɩbʋ amʋsʋ a, ɔdɔm kpɔnkpɔɔnkpɔntɩ bobuo mʋ. 2Ɩnʋ a, ɩlɔ pɛpɛ ɔlɔpʋ ɔkʋ lɛba bɛda akpawunu mʋ ayabitɔ, kokoli mʋ ɔbɛɛ, “Owie! Nɩ fótsula a, fɛ́talɩ ha mɩ ɩwɩ bɛ́plɩ.”
3Mʋʋ Yesu lɛtɩnkɩ ɩbɩ da mʋ, bla mʋ ɔbɛɛ, “Natsula, fʋ ɩwɩ ɩplɩ!” Ɩnʋnʋ mʋ ɩwɩ lɛplɩ. 4Mʋʋ Yesu lɛda mʋ ɔla ɔbɛɛ, “Mábla ɔhaa asʋn anfɩ. Natɩ laa afʋpʋ fʋ ɩwɩ yesuna Bulu igyi ɔhapʋ, afʋha mʋ ɩwɩgyʋratɔ amʋʋ Mose mbla losuna tsu ɩlɔ-pɛpɛtsa ɩwɩ amʋ. Igyi adansɩɛ suna aha ánɩ́ fʋ ɩwɩ laplɩ.”
Romafɔ Ɩsa Akɔpʋ Ɔhandɛ Osumpʋ Ɔkʋ Ɩlɔ Tsa
(Luka 7:1-10)
5Yesu lowie Kapernaum wulutɔ. Romafɔ ɩsa akɔpʋ ɔhandɛ ɔkʋ lɛba mʋ wa, bobwii ɩpa ha mʋ ɔbɛɛ, 6“Owie, mɩ osumpʋ dɛlɔ. Alasin tsukʋlɛ. Ɔda woyitɔ ɔdɛ ɩwɩɔsɩn wun dʋbɩ.”
7Mʋʋ Yesu lɛbla mʋ ɔbɛɛ, “Nɛ́ba bɛtsa mʋ ɩlɔ.”
8-9Tamɛ ɔhandɛ amʋ lɛbla mʋ ɔbɛɛ, “Owie, mmɔfʋn ánɩ́ fɛ́ba mɩ woyitɔ. Fʋ mʋ́ blɩ asʋankʋ, ɩwɩ bɔ́wa mɩ osumpʋ amʋ ɔnlɩn. Tsufɛ mɩ ɛ mbʋ ahandɛ akʋ asɩ, ɩsa akɔpʋ akʋ ɛ bʋbʋ mɩ asɩ. Nɛlɛ ɔnɔ mbɛɛ amʋ́tɔ ɔkʋ ɔnatɩ a, ɔtɛnatɩ. Nɩ mbɛɛ ɔba ɛ a, ɔtɛba. Togyitɔá nɛbla mɩ osumpʋ mbɛɛ ɔbwɛ a, ɔtɔbwɛ.”
10Brɛá Yesu lonu asʋn anfɩ a, ɔnɔ lobwie mʋ, ɔlɛdamli bla aha amʋʋ bʋbuo mʋ amʋ, ɔbɛɛ, “Ɔnɔkwalɩ ndɛ mlɩ bla, mmɔkʋwun ɔha ánɩ́ ɔbʋ hogyi kpɔnkpɔntɩ anfɩ odu Israelfɔtɔ kʋraa kɩ!” 11Ndɛ mlɩ bla mbɛɛ, “Aha tsɔtsɔɔtsɔ bótsu owi ɔdalɩkpa pʋ́ owi ɔkplɩwiekpa ba, betsia atɔ ogyikpa Bulu iwiegyi amʋtɔ. Amʋ́a anɩ anain Abraham, Isakɩ pʋ́ Yakob aná bɔ́wa ɩbɩ gyi atɔ. 12Tamɛ bɛlɛ Israelfɔ amʋʋ tɛkɩ bʋgyi Bulu iwiegyi amʋtɔ atsiapʋ amʋ lɛ ɩnʋ, tswɩ amʋ́ wa okluntɔ. Ɩnʋ isu mʋ́a kpisi bʋ nɩ.” 13Mʋʋ ɔlɛlabla ɩsa akɔpʋ ɔhandɛ amʋ ɔbɛɛ, “Natɩ, ɩba mʋ́tɔ ha fʋ fʋ hogyi ɔnɔ.”
Alɩ brɛ amʋtɔ pɛpɛɛpɛ osumpʋ amʋ ɩwɩ lɔwa mʋ ɔnlɩn.
Alɔpʋ Tsɔtsɔɔtsɔ Tsa
(Marko 1:29-34; Luka 4:38-41)
14Yesu lɔyɔ Petro woyitɔ. Ɔlɔyɔ a, owisʋ lakɩta Petro mʋ sia tsɩhɛ, ɔda. 15Mʋʋ ɔlɛyɛkɩta ɔtsɩ amʋ ɩbɩ. Ɩnʋnʋ owisʋ amʋ lɔkʋsʋ mʋsʋ, ɔlɔbwɛ Yesu afɔɔtɔ.
16Mʋ́ ntʋpwɛsʋ a, bɔpʋ aha tsɔtsɔɔtsɔá ɔŋɛ lalahɛ dɛ amʋ́ han ba Yesu. Ɔlɔtɔɩ gya ɔŋɛ lalahɛ amʋ, tsa alɔpʋ amʋ fɛ́ɛ́. 17Ɩnɩ lɛha asʋn amʋʋ Bulu ɔnɔsʋ ɔtɔɩpʋ Yesaia lɛblɩ amʋ lɛba mʋ́tɔ. Ɔbɛɛ, “Mʋlɛtsa anɩ ɩlɔ, tsu ipian kʋsʋ anɩsʋ.”
Aha Ánɩ́ Bɛɛ Bɔ́bwɛ Yesu Abuopʋ
(Luka 9:57-62)
18Yesu lowun ánɩ́ ɔdɔm babomli mʋ, ɔlɛbla mʋ akasɩpʋ amʋ ɔbɛɛ, “Mlɩha afa Galilea ɔpʋ yɔ mʋ́ ɔbɩn.” 19Ɩnʋ Mose mbla osunapʋ ɔkʋ lɛba mʋ wa, bɛbla mʋ ɔbɛɛ, “Osunapʋ, nóbuo fʋ yɔ ɔtɩnɛgyiɔtɩnɛá fɔ́yɔ.”
20Yesu lɛbla mʋ ɔbɛɛ, “Awɩa bʋbʋ mbɔ, mbubwi ɛ bʋbʋ asia. Tamɛ mɩ, Nyankpʋsa-Mʋ-Bi anfɩ mʋ́ mma ɔtɩnɛá nɔ́pʋ mɩ nwun tswɩ.”
21Aha amʋʋ bʋbuo mʋ amʋtɔ ɔkʋ lɛbla mʋ ɔbɛɛ, “Owie, ha mɩ anyopula mɩ sɩ asa ambobuo fʋ.”
22Tamɛ Yesu lɛbla mʋ ɔbɛɛ, “Bobuo mɩ, afʋsi awupʋ abʋpula amʋ́ afuli.”
Atsufu Asɩba
(Marko 4:35-41; Luka 8:22-25)
23Yesu lowie ɔklʋntɔ, mʋ akasɩpʋ amʋ ɛ bowie buo mʋ. 24Brɛá bɔyɔ a, afu kpɔnkpɔɔnkpɔntɩ kʋ lɔwa tsʋn bɩ. Mʋ́ sʋ ntsu dɛda wie ɔklʋn amʋtɔ, idekle ɩmɛ, tamɛ Yesu mʋ́ da ɔdɛdɩdɩ. 25Akasɩpʋ amʋ betsinki mʋ, bla mʋ bɛɛ, “Anɩ Wie lɛ anɩ. Anɩdɛ ntsu wie!”
26Mʋʋ ɔlɛfɩtɛ amʋ́ ɔbɛɛ, “Ntogyi sʋ mlɩdɛ ifu nya alɩ? Mlɩ hogyi mɔtsɔ!” Ɩnʋ ɔlɔkʋsʋ lɛ ɔnɔ wa afu mʋ́a ntsu amʋ, ɩnʋ fɛ́ɛ́ lɔlʋa.
27Ifu lɛhɩɛ kɩta amʋ́, bɛfɩtɛ aba bɛɛ, “Nyankpʋsa ɔmɔmʋ nɩ, afu mʋ́a ntsu kʋraa tonu mʋ ɔmɛ alɩ?”
Ɔŋɛ Lalahɛ Gya Lɛ Agbedepʋ Abanyɔtɔ
(Marko 5:1-20; Luka 8:26-39)
28Brɛá Yesu lowie Galilea ɔpʋ ɔbɩn, Gadarafɔ ɔsʋlʋsʋ a, ayin abanyɔ akʋá ɔŋɛ lalahɛ bʋ amʋ́tɔ bɛdalɩ tsu afuli opulakpa befia mʋ. Amʋ́ ɩyɩn sʋ ɔhaa tamatalɩ tsʋn ɔkpa amʋsʋ. 29Ɩnʋnʋ bɔkplʋn fɩtɛ Yesu bɛɛ, “Bulu mʋ Bi, amansʋ igyi? Fɛba bɛpɩtɩ anɩ atɔ asa Bulu ɩsʋbɩtɩbɩ ɩfʋn?”
30Mprakuo tsɔtsɔɔtsɔ akʋ bʋdegyi ɩnʋ fʋn. 31Mʋ́ sʋ ɔŋɛ lalahɛ amʋ bokokoli Yesu bɛɛ, “Nɩ fégya anɩ lɛ aha anfɩtɔ a, ha ayowie mprakuo anfɩtɔ.”
32Yesu lɛbla amʋ́ ɔbɛɛ, “Mlɩyɔ.” Ɩnʋnʋ bɛdalɩ ayin amʋtɔ yowie mprakuo amʋtɔ. Amʋ́ fɛ́ɛ́ bɛsrɩ kplɩ okuku kʋ wie ɔpʋ amʋtɔ, wuwu.
33Mprakuo amʋ akpapʋ bɛsrɩ yɔ wulutɔ, yɛbla aha togyitɔá ɩlaba aha amʋʋ tɛkɩ ɔŋɛ lalahɛ bʋ amʋ́tɔ amʋsʋ. 34Mʋ́ sʋ wulu amʋtɔ aha fɛ́ɛ́ bɛdalɩ ba Yesu wa. Brɛá bowun mʋ a, bokokoli mʋ bɛɛ, ɔdalɩ amʋ́ ɔsʋlʋsʋ.
Currently Selected:
Mateo 8: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation