Mateo 7
7
Ɩlalɛ
(Luka 6:37-38, 41-42)
1“Mlɩmálɛ aha ɩla, mɛnɩ Bulu ɔmɛ́ɛlɛ mlɩ ɩla. 2Tsufɛ alɩ amʋʋ mlɩdɛ aha ɩla lɛ amʋ a, alɩ Bulu ɛ ɔbɛ́lɛ mlɩ ɩla nɩ. Ɩtɔá fɔpʋsusu ha fʋ ba a, mʋ́ kɛn Bulu ɔbɔ́pʋsusu ha fʋ nɩ. 3Ntogyi sʋ fʋdɛ ipi tukuriibi wun fʋ ba nsibisʋ, tamɛ fʋmɛdɛ ogyakpatin ánɩ́ ɩdɩn fʋ klɛsʋ mʋ́ wun? 4Ntɛ ntogyi sʋ fʋdɛ fʋ ba bla fɛɛ, ‘Ha mɩ andɩnkɩ ipi fʋ nsibisʋ?> brɛá ogyakpatin dɩn fʋ klɛsʋ? 5Apinabwɛbi ɔbwɛpʋ! Gyankpa dɩnkɩ ogyakpatin amʋ fʋ nsibisʋ, mɛnɩ fówun atɔ wanklaan, talɩ dɩnkɩ ipi amʋ fʋ ba klɛsʋ.
6“Mlɩmápʋ Bulu atɔ wankɩhɛ ha aha ánɩ́ bʋgyi fɛ akɩaɩ. Bulu asʋn tamawa amʋ́ ogya. Bénya ɔblɔ damli dun mlɩ. Alɩ kɛn mlɩmápʋ mlɩ abuto wʋlɩhɛ ha aha ánɩ́ bʋgyi fɛ mprakuo nɩ. Tsufɛ bɛtsatsa mʋ́sʋ, tsɩa mʋ́ wa ɔdɩbatɔ.
Atɔkʋlɩ Tsu Bulu Wa
(Luka 11:9-13)
7“Mlɩkʋlɩ Bulu, ɔbɛ́ha mlɩ. Mlɩdunka, mlówun. Mlɩda mʋ klʋnsʋ, obéfinki mʋ́ ha mlɩ. 8Tsufɛ ɔha ánɩ́ ɔtɔkʋlɩ atɔ tenya. Ɔha ánɩ́ otodunka atɔ towun. Ɔha ánɩ́ ɔtɛda klʋnsʋ bʋtefinki ha. 9Ma bʋ mlɩtɔá mʋ bi ɔkʋlɩ mʋ bodobodo a, obótsu ibwi wa mʋ ɩbɩtɔ? 10Ntɛ nɩ ɔkʋlɩ mʋ iye a, ɔbɛ́kɩta ɩwɔ wa mʋ ɩbɩtɔ? 11Mlɩ lakpan abwɛpʋ kʋraa mlɩyin alɩá bʋtɔpʋ atɔ wanklaan ha mlɩ abi. Ntogyi sʋ mlɩ Sɩ amʋʋ ɔbʋ ɔsʋsʋ amʋ mʋ́ mɔ́ɔpʋ atɔ wanklaan ha aha ánɩ́ bʋdɛ mʋ kʋlɩ?
12“Bwɛ ha aha alɩá fʋdekle fɛɛ, bʋbwɛ ha fʋ. Ɩnɩ Mose Mbla pʋ Bulu ɔnɔsʋ atɔɩpʋ amʋ atosunahɛ dɛblɩ nɩ.
Ɔkpa Kplanhɛ Mʋ́a Tɛɩhɛ
(Luka 13:24)
13-14“Mlɔtsʋn ɔkpa kplanhɛ amʋsʋ a, mlɔ́yɔ nkpa ánɩ́ ɩtamatatɔ. Aha kpalobi pɛ tɛbɩ mʋ́. Tamɛ nɩ mlɔtsʋn tɛɩhɛ amʋʋ ɩbʋ atsʋnlɛ amʋsʋ a, mlɔ́yɔ ɔhɩkpa. Aha tsɔtsɔɔtsɔ tɔtsʋn mʋ́sʋ.
Oyi Pʋ́ Mʋ́ Abi Swiehɛ
(Luka 6:43-44)
15“Mlɩkɩ wanklaan aha ánɩ́ bʋtɔwa afunu bɛɛ, Bulu ɔnɔsʋ atɔɩpʋ bʋgyisʋ. Bʋtepina bwɛ ɩwɩ fɛ akufa ba mlɩ wa, tamɛ nkpatakuá bʋbʋ ɩyɩn bʋgyi. 16Amʋ́ bwɛhɛ mlɔ́pʋbɩ amʋ́. Bʋtamakpɔtɩ kankaba okploto oyisʋ, bʋtamakpɔtɩ tsɔkpʋn ɛ tʋnkpa ɩflasʋ. 17Oyi wanklaan toswie abi wanklaan. Oyi lalahɛ ɛ toswie abi lalahɛ. 18Oyi wanklaan mɛ́ɛtalɩ swie abi lalahɛ, alɩ kɛn oyi lalahɛ ɛ mɛ́ɛtalɩ swie abi wanklaan nɩ. 19Oyiá ɩtamaswie abi wanklaan a, kun bʋtokun mʋ́ da, wa mʋ́ ogya. 20Mʋ́ alɩ sʋ a, ɔnɔsʋ atɔɩpʋ afunupʋ anfɩ bwɛhɛ mlɔ́pʋbɩ amʋ́.
Bulu Iwiegyi Amʋtɔ Awiepʋ
(Luka 13:25-27)
21“Megyi ɔhagyiɔha ánɩ́ ɔtɛtɩ mɩ ɔbɛɛ, ‘Mɩ Wie, mɩ Wie> obówie Bulu iwiegyi amʋtɔ. Mboun ɔha ánɩ́ ɔtɔbwɛ mɩ Sɩ amʋʋ ɔbʋ ɔsʋsʋ amʋ apɛ ɔbɔ́yɔ ɩnʋ. 22Bulu asʋn ogyikɛ amʋ a, aha tsɔtsɔɔtsɔ bɛ́fɩtɛ mɩ bɛɛ, ‘Mɩ Wie, megyi fʋ ɩdatɔ anɩlɛblɩ Bulu ɔnɔ asʋn, gya ɔŋɛ lalahɛ lɛ ahatɔ, bwɛ ofula ɛ nɩ?> 23Ɩnʋ nɛ́lɛ bla amʋ́ mbɛɛ, ‘Mmeyin mlɩ ɔkpagyiɔkpasʋ. Mlɩnatɩ tɛɩ mɩsʋ, mlɩ lakpan abwɛpʋ!>
Bʋtasʋ Pʋ́ Osublutɔ Obuyi
(Luka 6:47-49)
24“Mʋ́ sʋ ɔhagyiɔha ánɩ́ olonu mɩ asʋn blɩhɛ anfɩ, olegyi mʋ́sʋ a, ogyi fɛ ɔtɩansɩpʋá oleyi mʋ obu dɩnka bʋtasʋ. 25Nyankpʋ lotswie, ntsu lɔbʋla wa mʋ́, atsufu lɔtsʋn wʋlɩ mʋ́sʋ, tamɛ imobwie. Tsufɛ oleyi mʋ́ dɩnka bʋtasʋ.
26“Tamɛ ɔhagyiɔha ánɩ́ olonu mɩ asʋn blɩhɛ anfɩ, omegyi mʋ́sʋ a, ogyi fɛ ɔha mimlahɛ ánɩ́ oleyi mʋ obu osublutɔ. 27Nyankpʋ lotswie, ntsu lɔbʋla wa mʋ́, atsufu ɛ lɔtsʋn wʋlɩ mʋ́sʋ. Obu amʋ lobwie da asɩ gbloo!”
Túmiá Yesu Bʋ
28Brɛá Yesu lɛblɩ asʋn anfɩ ta a, mʋ atosunahɛ lɛha ɔnɔ lobwie ɔdɔm amʋ. 29Tsufɛ olosuna amʋ́ atɔ tumisʋ. Omosuna mʋ́ fɛ Mose mbla asunapʋ amʋ.
Currently Selected:
Mateo 7: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation