Yohane 13
13
Akasɩpʋ Amʋ Ayabiasɩ Fwɩ
1Asa béfi Israelfɔsʋ Katsʋn Nkɛ amʋ gyi asɩ a, Yesu lɛbɩá mʋ brɛ lafʋn ánɩ́ mɛ́dalɩ ɔyɩ anfɩtɔ yɔ mʋ Sɩ wa. Ɔlɔdwɛ aha amʋʋ bʋgyi mʋ klɛ ɔsʋlʋsʋ nfɩ amʋ alɩɩ yɔfʋn mʋ owukɛ.
2Mʋa mʋ akasɩpʋ amʋ befia ntʋpwɛ atɔ ogyikpa. Alɩ brɛ amʋtɔ a, ɔbʋnsam lawuna wie Simon Iskariot mʋ bi Yuda klʋntɔá ɔyɛlɛ Yesu ha. 3Yesu yin ánɩ́ mʋ Sɩ lɔpʋ togyitɔ wa mʋ ɩbɩtɔ. Oyin ánɩ́ Bulu wa motsu ba, mʋ wa meyinki yɔ nɩ. 4Mʋ́ sʋ ɔlɛlɛ ɩbɩ ɔlɛpɛ amʋtɔ, ɔlɔkʋsʋ wɔɩ mʋ atadɩɛ tswɩ, tsu ɔsan saba. 5Ɔlɛtsɛɩ ntsu wa blanwɛntɔ, olefi asɩ ɔdɛ mʋ akasɩpʋ amʋ ayabiasɩ fwɩ. Ɔfwɩ ɔmayin a, alapʋ mʋ osietɔ ɔsan amʋ tsitsi mʋ ayabiasɩ. 6Brɛá ɩlɔtʋ Simon Petro a, ɔlɛfɩtɛ Yesu ɔbɛɛ, “Mɩ Wie, fʋ ɔbɔ́fwɩ mɩ ayabiasɩ?”
7Yesu lɛlɛ mʋ́ ɔnɔ ɔbɛɛ, “Fʋmóonu tɔ anfɩ ndɛbwɛ anfɩ asɩ sei. Ɔma asa fóbonu mʋ́ asɩ.”
8Mʋʋ Petro lɛbla mʋ ɔbɛɛ, “O-o! Mméesi afʋfwɩ mɩ ayabiasɩ ɛkɛkɛɛkɛ.”
Yesu lɛbla mʋ ɔbɛɛ, “Nɩ mmɔfwɩ fʋ ayabiasɩ a, fʋméenya ogyikpa mɩ wa.”
9Simon Petro lɛbla mʋ ɔbɛɛ, “Mɩ Wie, megyi mɩ ayabi nkʋlɛ. Wuna fwɩ mɩ ɩbɩ pʋ́ mɩ nwuntɔ ɛ.”
10Yesu lɛbla mʋ ɔbɛɛ, “Ɔha ánɩ́ alabie ntsu mɛtra hian ntsubie. Mboun mʋ ayabiasɩ fwɩ pɛ, tsufɛ alalɩn dodo. Mlɩ ɩwɩ lalɩn, tamɛ megyi mlɩ fɛ́ɛ́.” 11(Yesu lɛbla mʋ alɩ, tsufɛ oyin ɔha ánɩ́ ɔbɛ́lɛ mʋ ha. Mʋ́ sʋ ɔlɛblɩ ɔbɛɛ, “Megyi mlɩ fɛ́ɛ́ lalɩn” nɩ.)
12Brɛá ɔlɔfwɩ amʋ́ ayabiasɩ ta a, ɔlɛlatsu mʋ atadɩɛ wa, yinki yetsia ɔpʋnʋ amʋ asɩ. Mʋʋ ɔlɛfɩtɛ amʋ́ ɔbɛɛ, “Mlɩlanu ɩtɔ anfɩ nabwɛ ha mlɩ anfɩ asɩ? 13Mlɩtɛtɩ mɩ ‘Osunapʋ,> mlɩtɛtɩ mɩ ‘Owie.> Mʋ́ ɔkpa nɩ, tsufɛ mʋ́ ngyi nɩ. 14Nɩ mɩá ngyi mlɩ osunapʋ pʋ́ mlɩ Wie, nafwɩ mlɩ ayabiasɩ a, mʋmʋ ilehian ánɩ́ mlɩ ɛ mlɔ́fwɩ mlɩ aba ayabiasɩ. 15Nabwɛ suna mlɩ, mɛnɩ mlɔ́bwɛ mʋ́ alɩ amʋʋ nabwɛ mʋ́ ha mlɩ amʋ. 16Ɔnɔkwalɩ ndɛ mlɩ bla. Osumpʋ ɔkʋkʋ mɔdʋn mʋ wie. Alɩ kɛn sumbi ɔyɔpʋ mɔdʋn ɔha ánɩ́ ɔlɔwa mʋ nɩ. 17Ɩnɩá mlɩlabɩ ɔnɔkwalɩ anfɩ a, Bulu obóyula mlɩ nɩ mlegyi mʋ́sʋ.
18“Megyi mlɩ fɛ́ɛ́ ɩwɩ asʋn ndɛblɩ. Tsufɛ nyin aha ánɩ́ nalɛ. Tamɛ lehian ánɩ́ Bulu asʋn anfɩ ɩbɛ́ba mʋ́tɔ. Asʋn amʋ ɔbɛɛ, ‘Ɔha amʋʋ mɩa mʋnyɔ anɩdɛ ɩbɩ wa ɔlɛpɛtɔ amʋ lakʋsʋ lɩɩ mɩsʋ.> 19Ndɛ mlɩ bla sei asa ɩba, mɛnɩ nɩ ɩba a, mlɔ́hɔ mɩ gyi ánɩ́ mɩgyi ɔha amʋʋ mbɛɛ ngyi amʋ nɩ. 20Ɔnɔkwalɩ ndɛ mlɩ bla. Ɔhagyiɔha ánɩ́ ɔlɔhɔ ɔha ánɩ́ nɔwa sumbi lahɔ mɩ. Alɩ kɛn ɔhagyiɔha ánɩ́ ɔlɔhɔ mɩ lahɔ mɩ Sɩ amʋ ɔlɔwa mɩ sɩsɩ amʋ ɛ nɩ.”
Yesu Lɛ Ha
(Mateo 26:20-25; Marko 14:17-21; Luka 22:21-23)
21Brɛá Yesu lɛblɩ asʋn anfɩ ta a, asʋn ɩhɩɛ dɛ mʋ han mʋ klʋntɔ. Mʋ́ sʋ olowuna kpa mʋ́ tati ɔbɛɛ, “Ɔnɔkwalɩ ndɛ mlɩ bla, mlɩtɔ ɔkʋlɛ ɔbɛ́lɛ mɩ ha.”
22Akasɩpʋ amʋ bɛkpɛlɛ kɩ aba ansɩtɔ, tsufɛ bʋmeyin amʋ́tɔ ɔmʋá ɔdɛ. 23Akasɩpʋ amʋtɔ ɔkʋlɛá otsie manta Yesu, gyi ɔmʋá Yesu tɛhɩɛ dwɛ nɩ. 24Mʋ́ sʋ Simon Petro lobun mʋ ansibi ɔbɛɛ, ɔfɩtɛ mʋ ɔha ánɩ́ ɔbɛ́lɛ mʋ ha.
25Mʋʋ ɔkasɩpʋ amʋ leyinki kpɩsa Yesusʋ, fɩtɛ mʋ ɔbɛɛ, “Mɩ Wie, ma ɔbɛ́lɛ fʋ ha?”
26Yesu lɛbla mʋ ɔbɛɛ, “Ɔha amʋʋ nébia bodobodo, pʋda oputsutɔ ha amʋ gyi mʋ nɩ.” Ɩnʋ olebia bodobodo pʋda oputsutɔ ha Yuda, ogyi Simon Iskariot mʋ bi. 27Olenya hɔ mʋ́ alɩ, Ɔbʋnsam lowie mʋtɔ. Mʋ́ sʋ Yesu lɛbla mʋ ɔbɛɛ, “Bwɛ tɔá fʋdekleá fɔ́bwɛ sasa!” 28Aha amʋʋ bʋtsie ɔpʋnʋ amʋ asɩ amʋtɔ ɔkʋkʋ mɛbɩ tɔá sʋá Yesu lɛbla mʋ asʋn anfɩ. 29Amʋ́tɔ akʋ bʋkɩ bɛɛ, Yuda gyi amʋ́ sikasʋ ɔkɩpʋ. Fialɩ Yesu dɛ mʋ bla ɔbɛɛ, ɔyɛhɔ atɔá bɔ́pʋgyi nkɛ amʋ, ntɛ ɔpʋ tɔkʋ ya ahianfɔ.
30Yuda lenya hɔ bodobodo amʋ alɩ, ɔlɛdalɩ. Owi lata alɩ brɛ amʋ.
Mbla Pɔpwɛ
31Yuda lenya dalɩ obuto ɩnʋ alɩ Yesu lɛblɩ ɔbɛɛ, “Brɛá Mɩ, Nyankpʋsa-Mʋ-Bi anfɩ numnyam ɩbɛ́lɩn ɔwan nɩ. Bulu ɔbɔ́tsʋn mɩsʋ lɛ mʋ numnyam ɔwan. 32Nɩ ɔtsʋn mɩsʋ lɛ mʋ numnyam ɔwan a, alɩ kɛn ɔbɔ́tsʋn mʋ ɩwɩsʋ lɛ mɩ numnyam ɔwan nɩ. Ɔbɔ́wa mɩ numnyam ɩnʋnʋ. 33Mɩ abi, mmɛ́ɛtra tsia mlɩ wa wa ɔpá. Mlódunka mɩ. Alɩ amʋʋ nɛbla Yudafɔ ahandɛ amʋ mbɛɛ, ‘Mlɩmɛ́ɛtalɩ ba ɔtɩnɛá nɔyɔ amʋ> a, alɩ kɛn ndɛ mlɩ bla mlɩ ɛ nɩ. 34Mbla pɔpwɛ ndɛwa ha mlɩ mbɛɛ, mlɩdwɛ aba. Alɩ amʋʋ nɔdwɛ mlɩ amʋ a, alɩ kɛn mlɩpʋ ɔdwɛ amʋ dwɛ mlɩ aba nɩ. 35Nɩ mlɩdɛ aba dwɛ a, ibósuna aha fɛ́ɛ́á mɩ akasɩpʋ mlɩgyi.”
Petro Ɔbɔ́swɩɩ Ɔbɛɛ, Mʋmeyin Yesu
(Mateo 26:31-35; Marko 14:27-31; Luka 22:31-34)
36Simon Petro lɛfɩtɛ Yesu ɔbɛɛ, “Mɩ Wie, nkʋnʋ fɔyɔ?”
Yesu lɛlɛ mʋ́ ɔnɔ ɔbɛɛ, “Ɔtɩnɛ amʋʋ nɔyɔ amʋ a, fʋmɛ́ɛtalɩ buo mɩ yɔ ɩnʋ sei. Tamɛ ɔma a, fóbobuo mɩ.”
37Petro lɛfɩtɛ mʋ ɔbɛɛ, “Mɩ Wie, ntogyi sʋ mmɛ́ɛtalɩ buo fʋ sei. Nówu fʋ sʋ!”
38Yesu lɛfɩtɛ mʋ ɔbɛɛ, “Fówu mɩ sʋ? Ɔnɔkwalɩ ndɛ fʋ bla. Fɔ́swɩɩ pʋ ɩbɩ wa ogya tse sa fɛɛ, fʋmeyin mɩ asa batɛ ɔbɛ́lɛ ɔnɔ.”
Currently Selected:
Yohane 13: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation