Yohane 12
12
Ofobi Fanfaanfan Pʋwʋlɩ Yesu
(Mateo 26:6-13; Marko 14:3-9)
1Ilesi nkensie abʋgyi Israelfɔsʋ Katsʋn Nkɛ a, Yesu lɔyɔ Lasaro amʋʋ ɔlɔkʋsʋa tsu afulitɔ amʋ wulutɔ Betania. 2Mʋ́ ntʋpwɛsʋ bɔtswɩ ɔpʋnʋ ha mʋ. Marta leye atogyihɛ ɔpʋnʋ amʋ asɩ. Lasaro mʋa aha amʋʋ bɛtɩ amʋ bɔwa ɩbɩ gyi atɔ Yesu wa. 3Ɩnʋ Maria lɔpʋ ofobi fanfaanfan ánɩ́ ɩbʋ ibia prɛntʋa yile ɔbɔ bɛtsɛɩ wʋlɩ Yesu ayabisʋ, ɔlɔpʋ mʋ nwunsʋ-imi tsitsi mʋ́. Ofobi amʋ ɔfan lɔhɔ woyi amʋtɔ fɛ́ɛ́.#12:3 Oyi kʋá bʋtɛtɩ Naadɩ nlin bʋtɔpʋbwɛ ofobi amʋ. 4Tamɛ Yuda Iskariot, ogyi Yesu akasɩpʋ amʋtɔ ɔkʋlɛ, ɔbɛ́lɛ Yesu ha amʋ mʋ́ lɛblɩ ɔbɛɛ, 5“Ofobi anfɩ bʋ bia. Ntogyi sʋ bʋmɛfɛ mʋ́, pʋ kɔba amʋ ha ahianfɔ? Mʋ́ bia bɔ́bwɛ ɔbakʋlɛ ofi ɔkʋlɛ ɩkɔka.” 6Megyi ahianfɔ nwewun sʋ Yuda dɛ asʋn anfɩ blɩ. Owikplu ogyi sʋ. Mʋ wa sika okentebi bʋ, otetsia wi ɩkʋ lɛ mʋ́tɔ.
7Yesu lɛblɩ ɔbɛɛ, “Mlɩsi mʋ ɔpʋ ofobi anfɩ wʋlɩ mɩ ha mɩ opulakɛ. 8Ahianfɔ mʋ́ bétsia mlɩ wa ekekegyiɛkɛ, tamɛ mɩ mʋ́ mméetsia mlɩ wa yɔ.”
Lasaro Nwunsʋ Kɩklɩ
9Yudafɔ tsɔtsɔɔtsɔ bonuá Yesu laba Betania. Mʋ́ sʋ begya ɔkpa yɔ mʋ ɔkɩkpa. Megyi mʋ nkʋlɛ sʋ bɔyɔ ɩnʋ. Bɛyɛkɩ Lasaro amʋʋ Yesu lɔkʋsʋa tsu afulitɔ amʋ ɛ. 10Mʋ́ sʋ Bulu igyi ahapʋ dɛhɛn amʋ bɔbwɛ agywɩɩn bɛɛ, bɔ́mɔ Lasaro ɛ. 11Tsufɛ mʋ kʋsʋa tsu afulitɔ sʋ Yudafɔ tsɔtsɔɔtsɔ bʋdɛ ɔma yinki bɔhɔ Yesu gyi.
Bɔhɔ Yesu Fɛ Owie Yerusalem
(Mateo 21:1-11; Marko 11:1-11; Luka 19:28-40)
12Ɔyɩkɛhɛ a, ɔdɔm amʋʋ baba nkɛ ogyikpa amʋ bonuá Yesu ɔba Yerusalem. 13Mʋ́ sʋ bɛka mbla, bɔpʋ ɔkpa beyefia mʋ. Bʋdɛ okitikiti bɛɛ, “Hosiana! Bulu oyula ɔha anfɩ ɔna anɩ Wie Bulu ɩdatɔ ɔba anfɩ! Bulu oyula Israel Owie amʋ!”
14Yesu lenya afrimu ɔkʋ, ɔlɔdʋ bian mʋsʋ, fɛ alɩá bɔwanlɩn wa Bulu asʋntɔ bɛɛ,
15“Sionfɔ, mlɩmánya ifu!
Mlɩ Wie dɩn afrimu ibisʋ ɔba a!”
16Yesu akasɩpʋ amʋ bʋmɔkɔsɩ nu asʋn anfɩ asɩ. Tamɛ brɛá Bulu lɔkʋsʋa Yesu tsu afulitɔ, wa mʋ numnyam ɔma a, bɛkaɩn ánɩ́ bɔwanlɩn asʋn anfɩ tsu mʋ ɩwɩ. Mʋ́ bɔbwɛ ha mʋ a.
17Aha ánɩ́ bobuo Yesu brɛá ɔlɛtɩ Lasaro fuli-ɔbɔtɔ, kʋsʋa mʋ tsu afulitɔ bɔyɔ mʋ́sʋ da asʋn anfɩ ɔkan. 18Ɩnɩ sʋ ɔdɔm amʋ beyefia mʋ nɩ. Bonuá alabwɛ osuna anfɩ. 19Farisifɔ amʋ bɛbla aba bɛɛ, “Mlɩlawun ánɩ́ anɩlabwɛ kasian. Mlɩkɩ, aha fɛ́ɛ́ bayɔ bʋbuo mʋ o!”
Grikifɔ Akʋ Bodunka Yesu
20Grikifɔ akʋ bʋbʋ aha amʋʋ bɛba Bulu osumkpa Yerusalem Israelfɔsʋ Katsʋn Nkɛ amʋtɔ. 21Bɔyɔ Filipoá otsu Betsaida ánɩ́ ɩbʋ Galilea ɔmátɔ wa yɛbla mʋ bɛɛ, “Owie, anɩdekleá abówun Yesu.”
22Filipo lɛbla Andrea, mʋa mʋnyɔ bɛyɛbla Yesu. 23Yesu lɛbla amʋ́ ɔbɛɛ, “Brɛ lafʋn ánɩ́ bɔ́wa Nyankpʋsa-Mʋ-Bi amʋ numnyam. 24Ɔnɔkwalɩ ndɛ mlɩ bla. Nɩ kpolibi mɔkʋwie ɔbɔtɔ, ɩkwɛ, plɔ a, kpoli ibi kʋlɛ amʋ kɛn igyi. Tamɛ nɩ ɩkwɛ, plɔ a, ɩtɔbwɛ abi tsɔtsɔɔtsɔ. 25Nɩ ɔkʋ tɔdwɛ mʋ nkpa ɔyɩ anfɩtɔ a, ɔbɔ́hʋlɩ mʋ́. Nɩ ɔkʋ ɛ tamadwɛ mʋ nkpa a, obénya nkpa ánɩ́ ɩtamata. 26Nɩ mlɩtɔ ɔkʋ ɔbɛɛ mósum mɩ a, ilehian ánɩ́ obóbuo mɩ, mɛnɩ obétsia ɔtɩnɛá mbʋ. Nɩ ɔkʋ dɛ mɩ sum a, mɩ Sɩ ɔbɔ́wa mʋ numnyam.”
Yesu Lowu Ɩwɩ Asʋn Blɩ
27Yesu lɔyɔ mʋ́sʋ ɔbɛɛ, “Sei a, asʋn dɛ mɩ klʋn han! Amansʋ nɛ́blɩ? Blɩ ntɛblɩ mbɛɛ, Mɩ Sɩ, lɛ mɩ tsu asʋn wunhɛ anfɩtɔ loo? O-o, mʋ́ sʋ nɛba nɩ. 28Mɩ Sɩ, wa fʋ ɩwɩ numnyam!”
Ɩnʋ a, ɔmɛ ɔkʋ lotsu ɔsʋsʋ ba ɔbɛɛ, “Nawa mɩ ɩwɩ numnyam dodo. Nɛ́tra wa mʋ́.”
29Brɛá ɔdɔm amʋʋ bʋlɩɩ ɩnʋ amʋ bonu ɔmɛ amʋ a, bɛblɩ bɛɛ “Ɔprada lapʋtɩ.” Akʋ ɛ bɛɛ, “Bulu-ɔbɔpʋ labla mʋ asʋn!”
30Ɩnʋ Yesu lɛbla amʋ́ ɔbɛɛ, “Mlɩ sʋ ɔmɛ anfɩ lalɩn, megyi mɩ. 31Brɛá Bulu obégyi ɔyɩtɔfɔ asʋn nɩ. Brɛá Bulu ɔbɛ́kplɩ Ɔbʋnsam, ɔyɩsʋ ogyipʋ amʋ obiasʋ nɩ. 32Tamɛ mɩ mʋ́ a, nɩ bɛda mɩ manta oyikpalihɛsʋ, tsu mʋ́ lɩɩ a, nɛ́kpa aha fɛ́ɛ́ ba mɩ ɩwɩ wa.” 33(Yesu lɛblɩ asʋn anfɩ pʋsuna lowu oduá mówu.)
34Ɩnʋ ɔdɔm amʋ bɛfɩtɛ mʋ bɛɛ, “Anɩ mʋ́ anɩlonu tsu anɩ Mbla ɔwʋlʋ amʋtɔá Kristo, (ɔha amʋʋ Bulu lada mʋ ofuli amʋ) obétsia brɛ fɛ́ɛ́. Mʋ́ ntogyi sʋ fʋdɛblɩ fɛɛ, ilehian ánɩ́ bɛ́da Nyankpʋsa-Mʋ-Bi amʋ manta oyisʋ, tsu mʋ́ lɩɩ? Ma gyi Nyankpʋsa-Mʋ-Bi amʋ?”
35Yesu lɛbla amʋ́ ɔbɛɛ, “Brɛ kpalobi kʋ pɛ ɩlasiá Wankɩ amʋ ɔbɛ́tra tsia mlɩ wa. Ɩnɩá Wankɩ amʋ tra ɔbʋ mlɩ wa a, mlɩnatɩ wankɩ amʋtɔ, mɛnɩ owi mɛ́ɛta wa mlɩ. Tsufɛ ɔha ánɩ́ ɔna okluntɔ tamabɩ ɔtɩnɛá ɔyɔ. 36Brɛ anfɩ wankɩ#12:36 Yesu gyi Wankɩ amʋ. amʋ tra ɔbʋ mlɩ wa a, mlɩhɔ mʋ gyi, mɛnɩ mlɔ́bwɛ wankɩ amʋ abi.”
Yudafɔ Yesu Máhogyi
Brɛá Yesu lɛbla amʋ́ asʋn anfɩ ta a, ɔlɛnatɩ yeŋain. 37Ɩnɩá ɔlɔbwɛ osuna tsɔtsɔɔtsɔ amʋ́ ansɩtɔ o a, bʋmɔhɔ mʋ gyi. 38Ɩnɩ lɛha Bulu ɔnɔsʋ ɔtɔɩpʋ Yesaia asʋn amʋʋ ɔlɛblɩ tswɩ dodo amʋ lɛba mʋ́tɔ. Ɔbɛɛ,
“Anɩ Wie, ma lahɔ asʋn amʋʋ anɩlɛblɩ amʋsʋ gyi?
Ma anɩ Wie lalɛ mʋ tumi suna?”
39Mʋ́ sʋ bʋmɛtalɩ hɔ Yesu gyi, tsufɛ Yesaia lɛtra blɩ ɔbɛɛ,
40“Anɩ Wie Bulu laha bʋmedewun,
bʋmɛdɛ asʋn nu,
Mʋ́ sʋ bʋmóowun atɔ,
bʋmóonu asʋn, mɛnɩ bɛ́damli ba mɩ wa,
nɛ́tsa amʋ́ ɩlɔ.”
41Yesaia lowun Yesu numnyam. Mʋ́ sʋ ɔlɛblɩ asʋn anfɩ tsu mʋ ɩwɩ nɩ.
42Mʋ́ o a, Yudafɔ ahandɛ amʋ tsɔtsɔɔtsɔ bɔhɔ mʋ gyi, tamɛ bʋmɛlɛ amʋ́ hogyi ɔwan. Tsufɛ benya ifuá Farisifɔ amʋ bɛ́bɩ amʋ́, gya amʋ́ lɛ amʋ́ ofiakpa. 43Tsufɛ bʋtekle bɛɛ, aha bʋkanfʋ amʋ́ dʋn ánɩ́ Bulu ɔbɛ́kanfʋ amʋ́.
Yesu Asʋn Bulu Ɔbɔ́pʋgyi Aha Asʋn
44Yesu lɔkplʋn blɩ ɔbɛɛ, “Megyi mɩ nkʋlɛ ɔhagyiɔha ánɩ́ ɔlɔhɔ mɩ gyi dehogyi. Ɔha amʋʋ ɔlɔwa mɩ sɩsɩ amʋ ɛ. 45Ɔhagyiɔha ánɩ́ ɔdɛ mɩ wun dɛ ɔha amʋʋ ɔlɔwa mɩ sɩsɩ amʋ ɛ wun. 46Naba ɔyɩ anfɩtɔ fɛ wankɩ. Fɛ́kɩ ɔsʋlʋ anfɩsʋ ɩwankɩ, mɛnɩ ɔhagyiɔha ánɩ́ ɔlɔhɔ mɩ gyi méesin okluntɔ. 47Nɩ ɔkʋ onu mɩ asʋn, tamɛ omegyi mʋ́sʋ a, megyi mɩ ɔbɛ́ha mʋ ɩpɔn. Tsufɛ mmɛba asʋn ogyikpa. Aha nkpa ɔhɔkpa nɛba. 48Ɔha ánɩ́ okina mɩ, ɔmɔhɔ mɩ asʋn ɛ bʋ asʋn ánɩ́ bɔ́pʋha mʋ ɩpɔn. Mɩ asʋn blɩhɛ amʋ ɩbɛ́ha mʋ ɩpɔn ɛkɛ trahɛ amʋ. 49Tsufɛ megyi mɩ onuto tumi nɔpʋtɔɩ. Mɩ Sɩ lɔwa mɩ sɩsɩ. Mʋlɛha mɩ asʋn ánɩ́ mblɩ, pʋ́ alɩá mblɩ mʋ́. 50Nyin ánɩ́ mʋ asʋn amʋ ɩtɛha nkpa ánɩ́ ɩtamata. Mʋ́ sʋ asʋn ánɩ́ ɔtɔwa mɩ blɩ koun ntɛblɩ.”
Currently Selected:
Yohane 12: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation