Gyumagyihɛ 16
16
Timoteo Paulo Mʋa Silastɔ Tsɩa
1Paulo mʋa Silas bɛnatɩ yɔ Derbe pʋ́ Listra. Ohogyipʋ ɔkʋá bʋtɛtɩ mʋ Timoteo bʋ Listra wulutɔ ɩnʋ. Mʋ yin gyi Yudayin ánɩ́ ɔlɔhɔ Yesu gyi, tamɛ mʋ sɩ gyi Grikiyin. 2Apioá bʋbʋ Listra pʋ́ Ikonion bɛtɩ Timoteo ɩdayile. 3Paulo lekleá ɔbɛ́kpa Timoteo natɩ. Mʋ́ sʋ ɔlɛha bɛtɩn Timoteo kete, tsufɛ Yudafɔ amʋʋ bʋbʋ ɩnʋ amʋ fɛ́ɛ́ bʋyin ánɩ́ Grikiyin Timoteo mʋ sɩ gyi. 4Brɛá bɔyɔ a, bowie wulugyiwulusʋ bʋtosuna ɩnʋ ahogyipʋ mbla oduá Yesu sumbi ayɔpʋ amʋ pʋ́ ɔpasua ahandɛ amʋʋ bʋbʋ Yerusalem amʋ bawa bɛɛ, bʋgyi mʋ́sʋ. 5Ɩnɩ sʋ ɔpasua amʋ benya ɔwʋnlɩn hogyitɔ, klɛɩ ekekegyiɛkɛ.
Paulo Makedonia Ɔmátɔ Yɔ
6Paulo mʋa mʋ aba amʋ bɔtsʋn Frigia pʋ́ Galatia ɔmásʋ. Tsufɛ Ɔŋɛ Wankɩhɛ mɛha amʋ́ ɔkpa ɔbɛɛ, bʋda Bulu asʋn amʋ ɔkan Asia ɔmátɔ. 7Brɛá bowie Misia ɔsʋlʋ ɔka a, bɔbwɛ agywɩɩn bɛɛ béyinki tsʋn yɔ Bitinia ɔmátɔ, tamɛ Yesu Ɔŋɛ mɛha amʋ́ ɔkpa. 8Mʋ́ sʋ bɔtsʋn Misia ɔsʋlʋsʋ kplɩ yɔ Troa wulutɔ. 9Mʋ́ onye a, Paulo lowun atɔ. Olowun ánɩ́ Makedoniayin ɔkʋ lɩɩ mʋ ansɩtɔ, ɔdɛ mʋ kokoli ɔbɛɛ, “Fa ɔpʋ amʋ ba Makedonia, afʋbegyi anɩ bʋalɛ.” 10Paulo lenya wun atɔ amʋ alɩ, ɩlɔwankɩ mʋ ánɩ́ Bulu dɛ anɩ wa ɔbɛɛ, ayɛda asʋn wanklaan amʋ ɔkan ɩnʋ. Mʋ́ sʋ anɩlɔpʋ ɔkpa yɔ Makedonia.
Lidia Klʋntɔdamli Filipi Wulutɔ
11Anɩlowie ntsusʋ-yibitɔ tsu Troa, fa ɔpʋ yɔ Samotrake ɔsʋlʋsʋ. Mʋ́ ɔyɩkɛhɛ a, anɩlɛlatsia yɔ Neapoli wulutɔ. 12Anɩlɔpʋ ayabitɔ tsu Neapoli yɔ Filipi wulutɔ. Filipi gyi Makedonia wulu yile nɩ. Romafɔ bʋ wulu anfɩtɔ. Anɩletsia ɩnʋ nkɛ kpalobi. 13Ɔkpʋnʋ ɔdakɛ a, anɩlɛdalɩ wulutɔ yɔ ɔpʋ ɔnɔ ɔtɩnɛkʋá anɩkɩ anɩaa, abówun ɔtɩnɛá Yudafɔ bʋtefia bɔ mpaɩ. Anɩletsia ɩnʋ bla atsɩ akʋá bebefia ɩnʋ Bulu asʋn. 14Atsɩá bonu asʋn amʋtɔ ɔkʋlɛ gyi Lidia. Tiatirayin ogyi, ɔtɛfɛ tatiá mʋ́ ntsu lɛpɛ, ɩbʋ bia. Bulu osumpʋ ogyi. Anɩ Wie lɛha mʋ olonu Paulo asʋn blɩhɛ amʋtɔ. 15Mʋ́ sʋ brɛá anɩlɔbɔ mʋa mʋ woyitɔ aha asu a, olobwii ɩpa ha anɩ, blɩ ɔbɛɛ, “Nɩ mlɩlahogyiá nahɔ Yesu gyi a, mlɩbetsia mɩ woyitɔ.” Ɔtsɩ anfɩ bʋ anɩsʋ alɩɩ anɩlobuo mʋ yɔ mʋ woyitɔ.
Paulo Mʋa Silas Obudɩ Filipi
16Ɛkɛ ɔkʋ ayɔ Yudafɔ mpaɩ ɔbɔkpa ɩnʋ a, anɩlɔtʋ otsibi ɔkʋá ogyi ɔkpábi ɩnʋ. Atɔla ɔŋɛ bʋ mʋsʋ. Ɔtɛla atɔ, blɩ asʋn ánɩ́ ɩbɛ́ba. Ɔtɔbwɛ kɔba tsɔtsɔɔtsɔ ha mʋ awie tsu mʋ́tɔ. 17Otsibi anfɩ lɛkpla buo anɩa Paulonyɔ. Ɔna ɔdɛkplʋn blɩ ɔbɛɛ, “Aha anfɩ gyi Ɔsʋsʋʋsʋ mʋ Wie amʋ asumpʋ nɩ. Amʋ́dɛ mlɩ nkpahɔ ɔkpa suna nɩ.” 18Ɔlɔbwɛ mʋ́ nkɛ tsɔtsɔɔtsɔ. Ɩnɩ lɛhan Paulo. Mʋ́ sʋ ɔlɛdamli bla otsibi amʋ ɔbɛɛ, “Atɔla-ɔŋɛ, ndɛ mbla wa ha fʋ Yesu Kristo ɩdatɔ, dalɩ mʋtɔ!” Ɩnʋnʋ ɔŋɛ amʋ lɛdalɩ mʋtɔ.
19Ɔkpábi amʋ awie bowun ánɩ́ amʋ́ kɔba ɔkpa latin. Mʋ́ sʋ bɛkɩta Paulo mʋa Silas, bɩtɩa amʋ́ ya wulu ahandɛ ansɩtɔ. 20Bɔpʋ amʋ́ ya Romafɔ asʋn agyipʋ bɛɛ, “Yudafɔ aha anfɩ bʋgyi, bʋdɛ asʋn kle wa anɩ wulu anfɩtɔ. 21Bʋdɛ amandɩɛ lalahɛá anɩ mbla mɛha mʋ́ ɩwɩ ɔkpa suna. Romafɔ anɩ mʋ́ anɩgyi. Anɩmɛ́ɛtalɩ hɔ amʋ́ amandɩɛ amʋ gyi mʋ́sʋ.” 22Ɩnʋ ɔdɔm amʋ botu bun Paulo mʋa Silasʋ.
Asʋn agyipʋ amʋ bɛha bɛɛ, bʋwɔɩ amʋ́ atadɩɛ, abʋnwɛn amʋ́ mplɩ. 23Bɛpɩtɩ Paulo mʋa Silas atɔ wanklaan ta a, bɛha bɔpʋ amʋ́ tswɩ obu. Bɛbla obu adɩpʋsʋ ɔkɩpʋ bɛɛ, ogyo amʋ́ wanklaan. 24Asʋn amʋʋ bɛbla obu adɩpʋsʋ ɔkɩpʋ amʋ sʋ ɔlɔpʋ amʋ́ yɔtswɩ obutotɔ, wa amʋ́ ayabi kplakitsi.
Obu Adɩpʋsʋ Ɔkɩpʋ Yesu Hogyi
25Mʋ́ ɔyɩ-nsɩnɛ a, Paulo mʋa Silas bʋdɛ mpaɩ bɔ, bʋdɛ ɩlʋ wa kanfʋ Bulu. Obu adɩpʋ atrahɛ amʋ ɛ bʋda bʋdenu. 26Ɔtsawʋlɛ pɛ a, ɔsʋlʋ lɛkpɩnkɩ ɔwʋnlɩnsʋ, ɩlɛkpɩnkɩ obu amʋ ntswɩasɩ. Mʋ́ aklʋn fɛ́ɛ́ lefinki. Obu adɩpʋ amʋ ɩkan pʋ́ amʋ́ kplakitsi amʋ fɛ́ɛ́ lɔwɔɩ. 27Obu adɩpʋsʋ ɔkɩpʋ amʋ letsinki, wun ánɩ́ aklʋn amʋ fɛ́ɛ́ lafinki. Ɩnʋ ɔlɛlɛ ɔdayi ɩya anyɔ ɔbɛɛ amʋwɔ ɩwɩ, tsufɛ ɔkɩ ɔbɛɛ obu adɩpʋ amʋ fɛ́ɛ́ badalɩ srɩ. 28Tamɛ Paulo lɔkplʋn kʋklʋkʋʋ bla mʋ ɔbɛɛ, “Mábwɛ ɩwɩ tɔtɔ. Anɩ fɛ́ɛ́ anɩbʋ ɩnʋ.”
29Obu adɩpʋsʋ ɔkɩpʋ amʋ lɛha botsu ɔkandɩɛ ba mʋ, ɔlɔwa ɔsa wie obu amʋtɔ. Ifu dɛ mʋ, sʋ ɔdɛkpɩnkɩ kpakpakpakpa. Ɔlɛyɛda akpawunu Paulo mʋa Silas ayabitɔ. 30Ɩnʋ ɔlɛkpa amʋ́ dalɩ yɛfɩtɛ amʋ́ ɔbɛɛ, “Mɩ awie, ntɔ mbwɛ asa Bulu ɔhɔ mɩ nkpa?”
31Mʋʋ Paulo mʋa Silas bɛbla mʋ bɛɛ, “Hɔ Yesu gyi, mɛnɩ Bulu ɔbɔ́hɔ fʋa fʋ woyitɔ aha fɛ́ɛ́ nkpa.” 32Mʋʋ bɛbla mʋa mʋ woyitɔ aha fɛ́ɛ́ anɩ Wie Yesu asʋn wanklaan amʋ. 33Onye-onye amʋ a, oyin amʋ leyia amʋ́ ɩwɩ nlɔ amʋʋ benya brɛ amʋʋ bɛpɩtɩ amʋ́ atɔ amʋ. Ɔlɛha amʋ́ bɔbɔ mʋa mʋ woyitɔ aha amʋ asu ɩnʋnʋ. 34Obu adɩpʋsʋ ɔkɩpʋ anfɩ lɔpʋ amʋ́ ya mʋ woyitɔ, ɔlɛyɛha bɛnɩna atɔ ha amʋ́ begyi. Ɩnɩá mʋa mʋ woyitɔ aha fɛ́ɛ́ bahɔ Bulu gyi sʋ a, ansɩ lɛhɩɛ gyi amʋ́.
35Mʋ́ ɔyɩkɛhɛ a, asʋn agyipʋ amʋ bɔwa aha akɩtapʋ akʋ bɛɛ bʋyɛbla obu adɩpʋsʋ ɔkɩpʋ amʋ bɛɛ, osi aha amʋ abʋnatɩ.
36Mʋ́ sʋ oyin amʋ lɛbla Paulo ɔbɛɛ, “Asʋn agyipʋ amʋ bapʋ ɔmɛ sɩsɩ mɩ bɛɛ, nsi fʋa Silas amlɩnatɩ. Mʋ́ sʋ mlɩnatɩ iwilwiitɔ.”
37Tamɛ Paulo lɛbla aha akɩtapʋ amʋ akʋ ɔbɛɛ, “Bʋmegyi anɩ asʋn, tamɛ banwɛn anɩ atɔ ɔbʋntɔ. Romafɔ anɩgyi, tamɛ bawa anɩ obu. Ntogyi sʋ bʋdekleá bési anɩ ŋaintɔ? Ɛkɛkɛɛkɛ! Asʋn agyipʋ amʋ onuto bʋba bɛlɛ anɩ.”
38Aha akɩtapʋ amʋ beyinki yɔ yɛbla asʋn agyipʋ amʋ. Brɛá bonuá Romafɔ Paulo mʋa Silas bʋgyi a, ifu lɛhɩɛ kɩta amʋ́. 39Mʋ́ sʋ boyobwii ɩpa ha Paulo aná, bɛkpa amʋ́ dalɩ yokokoli amʋ́ bɛɛ bʋdalɩ wulu amʋtɔ. 40Ɩnʋ Paulo mʋa Silas bɛnatɩ yɔ Lidia woyitɔ. Befia apio ahogyipʋ amʋ ɩnʋ, tɔɩ kpla amʋ́, wa amʋ́ ɔwʋnlɩn asa bɛnatɩ.
Currently Selected:
Gyumagyihɛ 16: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
