Gyumagyihɛ 12
12
Petro Obudɩ
1Alɩ brɛ amʋtɔ a, Owie Herode lɛdɩnka ɔpasua amʋtɔ akʋsʋ, wa amʋ́ amʋmʋyɔ. 2Ɔlɛha bɛtɩn Yohane mʋ pio Yakobo ɔdayitɔ. 3Herode lowun ánɩ́ ɩbʋ Yudafɔ amʋ ɔdwɛ. Mʋ́ sʋ omesi, ɔlɛyɛkɩta Petro ɛ. Alɩ brɛ amʋtɔ bʋdɛ Israelfɔ Bodobodo Mátuhɛ Nkɛ gyi. 4Mʋ́ sʋ brɛá ɔlɛkɩta Petro a, ɔlɔpʋ mʋ tswɩ obu, ɔlɛlɛ ɩsa akɔpʋ duasie ɔbɛɛ, bʋtsia gyo mʋ ɩwɩ abana-abana. Ɔlɔbwɛ agywɩɩn ɔbɛɛ, begyi Nkɛ amʋ ta a, megyi Petro asʋn dɩnsʋ. 5Bɔwa Petro obu, tamɛ ɔpasua amʋ bɔbɔ mpaɩ kinkiinkin ha mʋ.
Petro Obulɛ
6Onye asa ɔyɩ ɔbɛ́kɛ Owie Herode ɔbɛ́lɛ Petro ba dɩnsʋ begyi mʋ asʋn a, bɔwa Petro ɩkan anyɔ kɛkɛ, ɔda ɔdɛdɩdɩ ɩsa akɔpʋ abanyɔ nsɩnɛ. Ɩsa akɔpʋ akʋ ɛ bʋlɩɩ bʋdɛ obu amʋ ɔnɔ gyo. 7Ɔtsawʋlɛ pɛ a, Bulu-ɔbɔpʋ ɔkʋ lɛbɛlɩɩ amʋ́ wa obuto ɩnʋ, ɩnʋ fɛ́ɛ́ lɔwankɩ. Bulu-ɔbɔpʋ amʋ lɔpʋ ɩbɩ da Petro abɩntɔ, oletsinki. Ɔlɛbla Petro ɔbɛɛ, “Wa ɔsa kʋsʋ.” Ɩnʋ ɩkan amʋ lɔwɔɩ lɛ mʋ ɩbɩ. 8Mʋʋ Bulu-ɔbɔpʋ amʋ lɛbla mʋ ɔbɛɛ, “Kʋsʋ pʋ ɔfɛ klɩ osietɔ, afʋtsu fʋ ntʋkʋta wa.” Petro lɔbwɛ. Mʋʋ ɔlɛtra bla Petro ɔbɛɛ, “Tsu fʋ liga wa, afʋba ayɔ.” 9Petro lobuo Bulu-ɔbɔpʋ amʋ dalɩ obu amʋtɔ. Ɩmɔwankɩ Petro nɩ akɩankpatɔ ntɛ atowunhɛtɔ Bulu-ɔbɔpʋ amʋ dɛ mʋ asʋn bla. 10Mʋa Bulu-ɔbɔpʋ amʋ bɔtsʋn obu-ɔnɔ gyankpapʋ pʋ́ nyɔsɩ agyopʋsʋ. Bɛba bɔtʋ ɩdatɔ ɩklʋn ánɩ́ fɔ́pʋdalɩ wie wulutɔ. Ɩklʋn amʋ onuto lefinki ha amʋ́ bɔtsʋn. Bɔpʋtsʋn brɔnʋ kʋsʋ bɔyɔ a, Bulu-ɔbɔpʋ amʋ lɔfwɩ si Petro.
11Brɛá Petro ansɩtɔ lɛtɩtɩ mʋ a, ɔlɛblɩ ɔbɛɛ, “Sei mʋ́ nawun ánɩ́ lɛlɛ Bulu lawa mʋ ɔbɔpʋ labɛlɛ mɩ Owie Herode ɩbɩ pʋ́ tɔá Yudafɔ bʋdɛ ɔkpa kɩtɔ.”
12Ɩnɩá Petro lowun mʋ́ alɩ sʋ a, ɔlɛnatɩ yɔ Yohaneá bʋtɛtra tɩ mʋ Marko mʋ yin Maria woyi. Alɩ brɛ amʋtɔ a, aha tsɔtsɔɔtsɔ bafia ɩnʋ bʋdɛ mpaɩ bɔ. 13Petro lɛda amʋ́ ɩklʋnsʋ, osumbi tsɩhɛ ɔkʋá bʋtɛtɩ mʋ Rode lɛbɛkɩ ɔha ánɩ́ ogyi. 14Brɛá ɔlɛbɩá Petro ɔmɛ nɩ a, ansɩ lɛhɩɛ gyi mʋ. Mʋ́ sʋ ɔlɛtan obu amʋ finki. Mboun oleyinki srɩ yɛbla amʋ́ ɔbɛɛ, “Petro laba ɔlɩɩ obu-ɔnɔ.” 15Aha amʋ bɛbla mʋ bɛɛ, “Fʋ nwun layinta.” Tamɛ ɔlɔyɔ mʋ́sʋ, ɔdɛblɩ ɔbɛɛ, “Lɛlɛ a.” Mʋ́ sʋ bɛbla mʋ bɛɛ, “Mʋmʋ fialɩ Bulu-ɔbɔpʋá ɔtɛkɩ Petrosʋ nɩ.”
16Alɩ brɛ amʋtɔ fɛ́ɛ́ a, Petro tra ɔdɛ ɩklʋn amʋsʋ da. Brɛá bɔyɔ yefinki mʋ́, bowun Petro a, ɔnɔ lobwie amʋ́. 17Petro lɔbwɛ ɩbɩ suna amʋ́ ɔbɛɛ bʋkasʋ. Ɔlɛbla amʋ́ alɩá anɩ Wie lalɛ mʋ obu. Ɔlɛbla amʋ́ ɔbɛɛ, “Mlɩbla Yakobo mʋa apio ahogyipʋ atrahɛ amʋ asʋn anfɩ.” Mʋʋ ɔlɛnatɩ amʋ́ wa yɔ ɔtɩnɛ bamba a.
18Brɛá ɔyɩ lɛkɛ a, ɩsa akɔpʋ amʋ fɛ́ɛ́ begyigya, fɩtɛ aba bɛɛ, “Nkɩ Petro mɛ?” 19Owie Herode lɛha bodunka Petro ɔtɩnɛgyiɔtɩnɛ, tamɛ bʋmowun mʋ. Mʋ́ sʋ ɔlɛtɩ obu adɩpʋsʋ akɩpʋ amʋ, fɩtɛ amʋ́ asʋn, ɔlɛha bɔmɔ amʋ́.
Mʋ́ ɔma a, ɔlɛnatɩ Yudea ɔmátɔ yetsia Kaesarea wulutɔ nkɛnsa kʋ.
Owie Herode Lowu
20Brɛ kʋtɔ a, ɔblɔ lɛhɩɛ kɩta Owie Herode Tiro mʋa Sidonfɔ sʋ. Mʋ́ sʋ awulu anyɔ anfɩ bɛlɛ abi bɛɛ bʋyokokoli mʋ, iwilwii itsia amʋ́ nsɩnɛ. Tsufɛ Owie Herode ɔmátɔ bʋtenya atogyihɛ tsu. Aha amʋ begyankpa yɛlɛ asʋntɔ suna Owie Herode woyisʋ ɔkɩpʋ ɔkʋá bʋtɛtɩ mʋ Blasto, olotsula gya amʋ́ nkpa bɔyɔ Owie Herode wa yokokoli mʋ.
21Owie Herode lɛhɩɛ amʋ́ ɛkɛ. Ɛkɛ amʋ lɔfʋn a, ɔlɛhɩhɩɛ ɩwɩ dalɩ betsia mʋ obiasʋ, bla amʋ́ asʋn. 22Aha amʋ bɔkplʋn blɩ bɛɛ, “Megyi nyankpʋsa dɛtɔɩ, mboun ɔkpɩ dɛtɔɩ o!” 23Ɩnʋnʋ Bulu-ɔbɔpʋ lɛda Herode, anyambi bɔwɩ mʋ, olowu. Tsufɛ ɔmɔpʋ numnyam ha Bulu.
24Bulu asʋn lɔyɔ mʋ́sʋ, klɛɩ yɔ tsutsuutsu.
25Barnaba mʋa Saul bɔyɔ amʋ́ agyʋma ta Yerusalem, bɛkpa Yohaneá bʋtɛtra tɩ mʋ Marko buo ɩwɩ yinki yɔ Antiokia.
Currently Selected:
Gyumagyihɛ 12: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
