Zakaria 8
8
Mwene Zambi yalakenya kutungulula Yerusaleme
1Mwene Zambi Mukwa Ndundo Jeswe yalweza maliji wano kuli Zakaria ngwenyi: 2“Hasuku nachijile kukwasa Yerusaleme mumu nakuzanga atu jami kuhiana. Mumu ha zango lize, nevwilile akwa kole jo ufwatulo. 3Mungukahiluka ku Yerusaleme, limbo liami lia chijila, ni kutwama mo. Maakalivuluka ngwo, limbo lia akwa kushishika. Mulundu wa Mwene Zambi Mukwa Ndundo Jeswe maakauvuluka ngwo, mulundu wa chijila. 4Tushinakaji a malunga ni a mapwo waze maakendangana ni pango ha ushinakaji wo, maakatwama mu manjila ja limbo. 5Mu majila ja limbo mumukazala ana a malunga ni a mapwo nikuheha.
6“Chino muchikabwa chikomokeso kuli masalila ja che chifuchi alioze kuli yami hi chikomokeso ko. 7-8Mungukapulula atu jami ku yifuchi ku chivumbuko, ni ku chitokelo kuze aatwalile ni kwaahilwisa ku Yerusaleme. Kumaakabwa atu jami, ni yami mungukabwa Zambi yo, mungukaayula ni umwenmwene ni ululi.
9“Hamukenu! Hinwevwa maliji waze akwa munanyi ahanjikile muze asele fundamentu ya zuwo liami. 10Muze te kanda achibutula kutunga lie zuwo, niumwe kahashile kufweta atu hanji yimuna mumu ha milimo yo, niumwe wabwile ni uhwimino mumu ha kwoka cha akwa kole jo. Yingushinjika atu alimike ene ni ene. 11Alioze mungulinga kanawa kuli masalila a vungu lino. 12Kumaakakuwa mbuto jo mu uhwimino. Mivinyu yo muyikema mihuko, mavu maakasokesa mbuto, mukukabwa vula munji. Atu ja vungu liami waze maasala ho mungukaawahisa ni yuma yino yeswe. 13Ayuda ni Aisraele, ha mwaka wali yilambala te kaakulishinga ngwo: ‘Lamba lize amwene Ayuda ni Aisraele linuhete kama!’ Alioze yami mungukanulamwina, mba yilambala wano maakalihanjekesa ngwo: ‘Ni yenu, Zambi anuwahise ngwe chize hawahisa Ayuda ni Aisraele!’ Kashika hamukenu, kanda nwivwa woma.”
14Mwene Zambi Mukwa Ndundo Jeswe kanambe ngwenyi: “Muze tushakulu twenu angwivwishile ufwatulo, nabatwile ni kwamwesa lamba, chalumwine ko mbunge yami, nachilingile. 15Alioze hinabatula kuwahisa akwa Yerusaleme ni Ayuda ha matangwa wano. Kashika kanda nwivwa woma. 16Yuma yize chanutamba kulinga yili yino: hanjikenu umwenemwene umwe ni mukwo. Mu yisopelo batulenu ni ululi, mba nubwe mu uhwimino. 17Kanda nutakila akwenu yuma yibi. Kanda nulishinga ni kulenya mutu mukwo. Mumu nakuvutwokela mahuza ni uhenge.”
18Mwene Zambi Mukwa Ndundo Jeswe yalweza Zakaria maliji wano ngwenyi: 19“Kulitwamina kulia ha tukweji wa muchiwana, ni wa muchitano, ni wa muchishimbiali, ni wa muchikumi, muyikalumuka yiwanyino ya chiseke ni ya uwahililo ya Ayuda. Kashika zangenu umwenemwene ni uhwimino.”
20Mwene Zambi Mukwa Ndundo Jeswe kanambe ngwenyi: “Matangwa maakeza muze atu a ku membo anji maakeza ku Yerusaleme. 21Akwa limbo limwe maakambila akwa limbo likwo ngwo: ‘Tunayi ni kuwayila Mwene Zambi Mukwa Ndundo Jeswe ni kumwita ukonekeno. Tatuyenu!’ 22Atu anji ni mavungu a tachi maakeza ku Yerusaleme ni kuwayila Mwene Zambi Mukwa Ndundo Jeswe ni kumwita ukonekeno. 23Ha matangwa waze malunga kumi yilambala maakeza kuli umwe Kayuda nikwamba ngwo: ‘Tunazange kulinunga nenu, mumu hitwevwa ngwo, Zambi kali hamwe ni yenu.’ ”
Currently Selected:
Zakaria 8: CHK1970
Highlight
Copy
Compare
Share
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
