Yoano 15
15
Yesu che chibuta chamwenemwene cha vinyu
1“Yami che chibuta chamwenemwene cha vinyu, Tata mwe njimi wa vinyu. 2Kakubatula mutango weswe muli yami uze kuushi kwima mihuko. Kakuselela mutango weswe uze wakwima mihuko. Kakuubemesa hanga ukeme mihuko yahiana. 3Longeso lize nanulongesele, hilinanubemesa kulu. 4Nyongononenu kulinunga ni yami, ngwe chize nakunyongonona kulinunga ni yenu. Mutango kuwahashile kwima mihuko ukawawo, shina muulinunga ni chibuta cha vinyu. Chimuwika nawa, yenu kunwahashile kwima mihuko nyi kunushi kunyongonona kulinunga ni yami.
5“Che chibuta cha vinyu yami, yenu nuli mitango. Yoze manyongonona kulinunga ni yami, ni yami ni iye, mwenawo mema mihuko yinji, mumu kunwahashile kulinga nichimwe shina ni yami. 6Yoze keshi kunyongonona kulinunga ni yami maakamumbila haze ngwe mutango, mba muuma. Mitango yize hiyinomu, kakuyitongona ni kuyimbila mu kahia, mba muyiwema. 7Nyi mununyongonona kulinunga ni yami, ni maliji jami mabwa muli yenu, munwita cheswe Chuma nunazange, munukachitambula. 8Uhenya wa Tata muusoloka nyi munwima mihuko yinji. Chenacho munukabwa tumbaji twami. 9Nakunuzanga ngwe chize Tata akunguzanga yami. Nyongononenu mu zango liami. 10Nyi munufunga Shimbi jami, mununyongonona mu zango liami, ngwe chize nakufunga Shimbi ja Tata ni nakunyongonona mu zango lienyi.
11“Yuma yino hinamba, hanga nubwe ni uwahililo wami, ni hanga nuwahilile kuhiana. 12Yino ye Shimbi yami, ngwami, lizangenu ni akwenu ngwe chize yami nakunuzanga. 13Zango liahiana lili lino: mutu akunjike mwono wenyi hali masepa jenyi. 14Nuli masepa jami, nyi munulinga Shimbi yize ngunanwehe. 15Chichi kanuvuluka nawa ngwami, tuvumbi, mumu kavumbi keshi kunyingika chize mwata wenyi akulinga. Ngunanuvuluka ngwami, masepa, mumu hingunanunyingikisa yeswe yize nevwile kuli Tata. 16Yenu kunwangutongwele, alioze yami nanutongwele. Nanusele hanga nukeme mihuko yize muyikalinduluka. Chenacho Tata makanwaha cheswacho munuketa mu jina liami. 17Chino ngunanwambe ngwami, lizangenu ni akwenu.”
Akwa hashi kaakuvutwokela Yesu ni atu jenyi
18“Nyi akwa hashi maanuvutwokela, nyingikenu ngwenu, hatangu haananguvutwokela yami. 19Nyi nwabwa akwa hashi, kachi akwa hashi maakanuzanga mumu nuli nioo. Alioze hingunanutongola, hingunanuchiza hakachi ko, hi nuli akwa hashi ko. Kashika akunuvutwokela. 20Iwulukenu maliji waze nanwambile ngwami: ‘Ndungo niumwe mahiana mwata wenyi.’ Nyi haananguhungumiona, ni yenu nawa maakanuhungumiona. Nyi haanonokena longeso liami, maakononokena nawa longeso lienu. 21Alioze maakanulinga yeswe ayize mumu ha jina liami, mumu kaanyingikine yoze wangutumine. 22Nyi chejile ni kwalongesa, kachi keeshi mulonga. Alioze haliabwila keeshi kaliongelo ha milonga yo. 23Yoze Wakunguvutwokela, kakuvutwokela nawa Tata. 24Nyi chilingile yitanga ku meso jo yize mutu niumwe kayilingile, kachi keeshi mulonga. Alioze haliabwila haanamono yitanga yami, hindu kaakutuvutwokela yami ni Tata. 25Alioze yuma yino yeswe chatamba yibwe hanga Chisoneko cha Shimbi jo chikamanunuke ngwo: ‘Anguvutwokelele, alioze chikuma kaabwile ko nacho.’
26“Chikwashi makeza, Mwiku wamenemwene, yoze unakatuka kuli Tata. Mungukanutumina yo wa kuli Tata. Makashindakenya hali yami. 27Ni yenu nawa, munukashindakenya hali yami, mumu nwabwile hamwe ni yami chize ku kabutu.”
Currently Selected:
Yoano 15: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.