Ubutukilo 6
6
1Muze atu hooka haalitanda hashi heswe, ana a mapwo no yaasemuka. 2Muze atu ja Zambi haamona ngwo, ana mapwo kaanabeme kuhiana, yaabutuka kulimbata ni waze azangile. 3Mba Mwene Zambi yamba ngwenyi: “Mwiku wami kuuchi kalitachika ni atu matangwa eswe mumu kaali lume atu. Alioze miaka yo muyikabwa lume 120.” 4Ha matangwa waze, hanji chibwe kulutwe lia matangwa waze, hashi habwile atu ataluka. E atu waze yaasemuka kuli akwa mwilu#6:4 akwa mwilu hanji ana a malunga a Zambi. ni ana mapwo ja atu. Te tushakulu a tachi kanda akwa lufuma.
5Muze Mwene Zambi hamona ngwenyi, hashi heswe atu kaakulinga yibi kuhiana, kaakunyonga shina kulinga yibi matangwa eswe, 6yevwa chinyengo ha chize atangile mutu ni kumusa hashi. 7Mba yamba ngwenyi: “Mungwonona atu eswe waze natangile, chibwe kweswako ali. Mungwonona atu ni tushitu ni tututu ni tujila eswe, mumu ngunevu chinyengo ha chize natangile yuma yeswe.” 8Alioze Mwene Zambi yawahilila hali Noa.
Noa
9-11Jino je sango ja Noa. Noa yasema ana atatu a malunga: Sheme, ni Hame, ni Jafete. Noa te keshi kapalia, yalivwa ni Zambi. Shina iye wabwile mukwa ululi ha miaka yenyi, atu akwo eswe abwile abi ku meso ja Zambi. Vunda ni kwonona yiimwangana mwamwaa hashi heswe. 12Zambi yatala hashi, yamona ngwenyi, hihabihia, mumu atu te kaakulinga yibi kuhiana.
13Zambi yambila Noa ngwenyi: “Hinabatula ngwami, mungwonona atu eswe. Mungwonona eswe upu mumu hashi yibi yaho hiyoka kuhiana. 14Ulitungile ulungu ni mabaya abema a tachi. Usamo yibatulo yikepe yikepe, uushila ni usolososhi (goudron) haze ni muchima. 15Kusuhwa chawo chibwa metro 133, kutohwa metro 22, chizundamo metro 13. 16Tunga fulumba liawo. Mba chize ku fulumba ndoo ku mbango hichika sentimetro 44 mumu ha tupenda. Usa yibatulo yitatu mu ulungu, chimwe kushi, chikwo hakachi, ni chikwo helu. Mba usa chikolo cha ulungu hakachi. 17Yami mungutuma sanga lia meya hashi mu kunongesa eswe waze atwama ho ni mwono. Yuma yeswe hashi kumuyikafwa, 18alioze mungukolesa Usendo wami ni yena. Yena ni mukwenu pwo, ni ana je a malunga ni mapwo jo, munukanjila mu ulungu. 19-20Tushitu a milali yeswe, anene anene ni akepe akepe, ni tujila a milali yeswe, unjisa aali aali, kuji ni chihwo, mu ulungu. Nyi ka maakafwa. 21Wanda yakulia yeka ni yeka ya yena ni ya tushitu.” 22Mba Noa yalinga yize yeswe amwambile Zambi.
Currently Selected:
Ubutukilo 6: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.