Romapụ 15

Ọ́ Jịn Apụ Ḅụḅẹlẹye Mịẹ, Ọ́mịna Ḅụkẹ

1Mine ḅereni ḅụ kụrọ wara apụma ḅarachụa kụrọka apụma pịrị se inia ikuaye ma nwọ pụra gbẹịnmẹ. Wa mịna ḅụḅẹlẹye nwọ mịẹ gbẹịnkẹ. 2Anịnakaraka ye mịna ḅụ ḅọḅọ mịnaḅọ mị iḅi gose, ye mịẹ, ḅereni ḅụ iniḅọ namachịẹmaḅịa ḅara. 3Anịatịḅị Kraịst Ḅe ori ọ̀ ḅụḅẹlẹye nwọ mịẹkẹ, anịnakaraka fịafịa ḍiri mị ḍuko ḅara ḅụ na, “Ị́ wọlọ apụma kọn wọlọ ọkwẹịnma àrị ị̀ya ọgọnọ gbanasam.” 4Fịafịa ḍirima ḅie gịẹịn yegoyegoye ye se wa ḍieḅịa ẹrẹchị ini gịẹịnmẹ, mịẹse wa tọrụseḍikiye nwọ nyanaḅịa ḅara, Fịafịa ḍirima se wa pịrịḅịa inema na kuḅiekụrọma na ḅụ. 5Se ye Tamụnọ Ḅe anị ye inema na kuḅiekụrọma na ḅụḅụ ḅo ḅọ ḅe, ọ́ mịẹkụrọma se ómine ọ́mịna ogboku Kraịst Jizọs Ḅe nyana gbọrị koroma ḅara mị nwọ nyanaḅịa ḅara. 6Mịẹse ómine mgba gboloma gbọrị pụkọ nwọse Tamụnọ Ḅe anị pịkị wa Nyanaḅọ Jizọs Kraịst Ḅe Ḍaḅọ Ḅe nwọ tokoniḅịa ḅara.

Ini Iḅiọkwẹịn Mị Seni Jịnsẹapụ Ma Fịrịma Mẹ

7Anịọkụma ọ́ jịnḅọ jịnḅọ daọkị, Tamụnọ Ḅe boma mị gose, anị Kraịst Ḅe ómine daọkịsa ḅara mị. 8Anịatịḅị à ḍuko ọ́ pịrịmẹ na Kraịst Ḅe fịrịnwẹngịḅọ sọ Juapụma nwọ pịrịmẹ se ḍiepakụma na Tamụnọ Ḅe kuḅie se ḅụgbana gbẹịnḅọ-ẹ, mịẹse Tamụnọ Ḅe ḅereni ḅieju-aḍapụma pịrị ayema ḅo kọkọmaye nwọ sọḅịa ḅara, 9pịkị Jịnsẹapụma mịẹkụrọma se ini Tamụnọ Ḅe tokoniḅịa ḅara oria ḍikiḅụgerere mị gose. Fịafịa ḍiri mị ḍuko ḅara ḅụ,

“Anị ḅụ à pịkị mịẹḅaka se ị́ ḅẹḅịa Jịnsẹapụma ogboku;

à nime chu ị́ya ẹrẹ mị bomaḅịa.”

10Anịḅe jịnye anị pịkị nwọ ḅẹmẹ,

“Ó ḅieḅẹlẹ ómine Jịnsẹapụ, Tamụnọ Ḅe sẹlẹọkị apụma na ómine na!”

11Anị pịkị nwọ ḅẹmẹ,

“Ọ́ Nyanaḅọ Ḅe tokoni, ómine Jịnsẹapụ mamgba;

tomoni mamgba, ò tokoni!”

12Anịḅe jịnye Aịzaya ḅe nwọ ḅẹmẹ,

“Jẹsi furo ḅie pakaḅo ḅọ ḅoḅịa;

ò ḅo ḅẹrẹtọn Jịnsẹapụma pịrịḅịa,

se ọ̀ ḅụ ini tọrụseḍikiye nyanaḅịa.”

13Ye Tamụnọ Ḅe ọ́ tọrụseḍikiye mị ḅụ ḅo ḅọ ḅe, ḅieḅẹlẹ na deinma na goyegoye se ọ́ pịrị ḅeinma ómine ọ̀ ḅụ nyana ḅereni ḅụ wẹrị mịẹse Fịafịa Tẹmẹ Ḅe kụrọ mị ḅụ ọ́ tọrụseḍikiye mị pa sẹnịmamunḅịa ḅara.

Mị Pọl Ḅe Gose Ḅalafaka Ḅara Se Ḍiri Gịẹịn Ye-ẹ

14Ị̀ya mịnapụ ị̀rị̀ na mịnaḅụ na anị ị̀ ḅụokoromẹ na iḅi mịẹmịẹye ọ́mịna ḅie ḅeinmẹ na yemamgba ọ́ ḍawọ nemisam, ọ́ pịkị ineda ye se jịnḅọ jịnḅọ ḍieḅịa. 15Ọkụma mị à gịẹịn ḍiri mị ḅie à tọrụkụnka ḅara se da ọkwẹịn gịẹịnmẹ à se ọ́mịna ḅiekoromasaye ma ḅụ, anị Tamụnọ Ḅe se ị̀ pịrị kiri mị gose. 16Ḅo Kraịst Jizọs Ḅe fịrịnwẹngịḅọ nwọ sọ mị ḅụ fịrịnwẹngị Jịnsẹapụma nwọ pịrị mị ḅụ, agbamịẹḅọ ḅara à nwọse fịrịnwẹngịmẹ Tamụnọ ḅara ḅo Iḅi Ḅẹrẹ mị ḍuko ḅụ, mịẹse Jịnsẹapụma Tamụnọ Ḅe ọkị gbẹịn agba nwọ sọḅịa ḅara. Fịafịa Tẹmẹ Ḅe ini mịẹ fịafịama ọ̀ pịrị mị ḅụ. 17Kraịst Jizọs Ḅe na gbọrịye mịẹ mị ḅụ, anịọkụma, àrị ineda à nwẹngị Tamụnọ Ḅe pịrị fịrị mị se ḅụbomaḅịa. 18À kụrọkuḅie nyana se Kraịst Ḅe ị̀ ḅụ ḅọrọ mịẹsaye mị nwọ ḍukoḅịa, Jịnsẹapụma mịẹse ini Tamụnọ Ḅe ḍukoye nwọ mịẹarị ḅara mị, ọkwẹịn ḅụ na mịẹmịẹye ḅụ na. 19Elekima na, ḅụgbiripumaye na kụrọ ḅụ na, pịkị Tamụnọ Tẹmẹ Ḅe kụrọ mị ḅụ na. Anị ḅụ, Jerusalẹm ḅie sakị ọkịmun Ilirikọm nwọ chịn ama mị la, Kraịst Ḅe gboloma Iḅi Ḅẹrẹ mị à ḍuko karamasam. 20À kuḅie se gbanamẹ na sịkịmamgba ma ini Kraịst Ḅe ḅụ ḅẹrẹ nwọ naaka anga ḅụ àrị Iḅi Ḅẹrẹ mị nwọ ḍukoḅịa, mịẹse à mun jịnḅọ sakị ḅọrọsa chuku sẹkẹ ḍụparị ọgọnọ nama ẹka ḅara. 21Fịafịa ḍiri mị ḍuko ḅara ḅụ,

“Ma ini ọ̀ ḅụ ḅẹrẹ ḍuko pịrịka apụma ini ọrịḅịa,

ma naaka apụma pịkị kaịnḅoḅịa.”

Pọl Ḅe Tọnmẹ Na Ò Mun Rom Laḅịa

22Mịn mị tọn-a sịkị se kikichụa ị̀ pịrịmẹ ọ́ damaḅo mị ḅụ. 23Ọkụma à nwọ mịọkụ ị̀ya fịrị nwọ nwẹngị so sa sịkị ma nyọma ḅụ, à nwọ tọn-a kụra ḅụ ọ́ damaḅo se ómine ọrị mị nwọ ḍọkị warasịkị, 24à nwọ kala sịkị se ómine la so se anịa tọrụḅẹlẹ mị ḅọrọsa ḅẹḅẹ, à ḅiḅịa àrị ómine ọrị se ọ́ pịkị ḅarachụa ị̀ya nwẹngị mị pịrị, à nwọ so Spen sẹ mị munḅịa sịkị. 25Anị simeọkụ simeọkụ sọnị, mịkirikiri, à Jerusalẹm mun aḅẹ ḅarachụa anịnyọ sime Tamụnọ-a tomonima pịrịḅịaye gose fịrị mị ḅụ. 26Anịatịḅị Masidonia na Akaya na ḅie sime-a chọchị ma ḍuko pẹlẹsam na inia ḅụḅẹlẹmẹ ḅarachụa Jerusalẹm ḅie sime Tamụnọ-a tomonima ḅie igwein apụma pịrị. 27Ini ngẹrị ḅara na ọkọ se anị tọnpẹlẹmẹ, ọkụma, kọkọmaye ḅụ ḅarachụa ini pịrị mị anị mịẹ gbẹịnye-ẹ. Juapụma nwọ inia tẹmẹ anga ḅụ ḅẹlẹmamẹ se Jịnsẹapụma na ḍia ọkụ mị, anị Jịnsẹapụma sọnị pịkị inia ojumịnị ḅụ ḅẹlẹmama se ḅarachụa Juapụma pịrị gbẹịn ọkụ-ẹ. 28À mịn fịrị mị nwẹngị so sịkị se ḅeinma igbiki mị saḅama ini pịrị so sịkị ini ocho ini pịrịye mị, à so Spen nwọ munḅịa, àrị ómine agbaḅịa à ḅọrọ anịnyọ munḅịa sịkị. 29Àrị ọ́ damaḅoḅịa sịkị à nemimẹ na à Kraịst Ḅe ḅẹlẹma mị nwọse ḅakama ḅo ómine na ḍiaḅịa. 30Àrị ọ̀ tẹkẹmẹ ị̀ya mịnapụ wa Nyanaḅọ Jizọs Kraịst Ḅe ḅụ, pịkị Tẹmẹ Ḅe pịrị ḅẹlẹma mị ḅụ, na ómine ị̀ ḅụ sọ se ọfịrị ḅara se kụrọma ị̀ tịḅị gose Tamụnọ Ḅe tẹkẹ. 31Ọ́ tẹkẹ mịẹse Judia ḅie sime ḅereni nyanaka apụma ḅara ḅie ye ị̀ la ẹka ọkụ, se Jerusalẹm ḅie à nwẹngị fịrị mị Tamụnọ-a tomonima ọkị gbẹịnye nwọ sọ anịnyọ ḅụ. 32Mịẹse àrị opu ḅieḅẹlẹ na ọ́ damaḅoḅịa ḅara, anị Tamụnọ Ḅe ḅi ọkụ-ẹ ḅẹḅẹ, se ḅo ómine agba mị ịwọ ịnyọ se ị̀ pịrịḅịa ḅara àrị ómine na simeḅịa sịkị mị ḅụ. 33Ye Tamụnọ Ḅe deinma mị pịrịpịrị ḅọ ḅe, ómine mgba na sime. Amẹn.

Currently Selected:

Romapụ 15: OBTP

Highlight

Copy