Matio 27
27
Ini Jizọs Ḅe Se Paịlet Ḅe Damamunmẹ
(Mak 15.1; Luk 23.1-2; Jọn 18.28-32)
1Dede funfun ḅụ tịḅịnị agbamịẹapụma na Ju sẹnịapụma na ḅẹrẹḅia se Jizọs Ḅe pịrịmẹ, ọ̀ ḅaaḅịa gose. 2Ini ikoli se Ori ịkasị se Ọ̀ ḅọrọma Paịlet Romapụ gọvịna ḅe pịrịmẹ.
Judas Ḅe Fị Mị
(Oku 1.18-19)
3Judas, ịbafịḅọ ḅe naasam na ini ḅẹrẹpẹlẹ Jizọs Ḅe ḅara simasam nwọ ḅẹ sịkị, ọ̀ mịẹ si ḅụ ò vinpịkịmẹ, se seleḅa pẹkẹrẹ-a soima nwọse pịkị mun tịḅịnị agbamịẹapụma na sẹnịapụma na pịrịmẹ. 4Ọ̀ nwọ ḅẹmẹ, “À siye mịẹsam, siye mịẹkaḅọ nwọse ịbafị na ini Ọ̀ ḅaa-ẹ nwọḅẹ ye mị!”
Ini ọ̀ pẹkẹrẹmẹ, “Nde anị mị wa gbakịma ọkụ?” “Anị mị ị́ya fịrị-ẹ!”
5Judas ḅe igbikima se Oputẹkẹwarị mị ḅie gbin koroma se somun ọ̀ ḅụ kpọ ḅaamẹ.
6Tịḅịnị agbamịẹapụma igbikima kolokolo se nwọ ḅẹmẹ, “Mịn mị pulo tịḅị igbiki-ẹ, anị mịna oloko na kurakẹ anị se Oputẹkẹwarị igbiki koko igbe ḅie chụa.” 7Ini anịa ḅịpịogbosọ nwọ nyana so sịkị, ini anị igbiki mị se ḅẹlẹ tẹmẹḅọ Ele mị nwọ fẹmẹ, se anị se igoniapụ ḍụẹịn ḍipi nyọ nwọ mịẹmẹ. 8Anị mị mịẹse ini “Pulo Ele” nwọse nyọ mị chịnmẹ ḅo mịmgba ene lamẹ.
9Anịsịkị ịkịankoro Jerimaya ḅe ḍukoye mị ḅo kọkọmaye nwọ sọmẹ. “Ini seleḅa soima, Izrẹlapụma ḅụ tọn-apụ se ọ̀ tịḅị ḅụ gbẹịnyema nwọ ọkịmẹ, 10se anị se ḅẹlẹ tẹmẹḅọ ḅe ele mị nwọ fẹmẹ, Nyanaḅọ Ḅe tọn ị̀ pịrịsa ḅaraḅụ.”
Paịlet Ḅe Ḅẹrẹ Se Jizọs Ḅe Gbelamẹ
(Mak 15.2-5; Luk 23.3-5; Jọn 18.33-38)
11Jizọs Ḅe Romapụ Gọvịna ḅe tọrọkọ chịẹmẹ, se Gọvịna ḅe Ò gbelamẹ, “Juapụ amanyanaḅọ ḅe ị́rị́?”
“Ị́rị́ anị ọkọ ḅẹye-ẹ,” Jizọs Ḅe nwọ pẹkẹrẹmẹ. 12Ọkụma tịḅịnị agbamịẹapụma na sẹnịapụma na se Ọ̀ pụnụmaye mamgba ḅụ Ò ye pẹkẹrẹkẹ.
13Anị Paịlet ḅe nwọse Ọ̀ ḅẹye-ẹ, “Mà ini se Ị́ pụnụmaye mamgba Ị́ naaka?”
14Ọkụma Jizọs Ḅe gbọrịye sọnị se ọ̀ pẹkẹrẹ ḍụkụkẹ, anị iḅiọkụma gọvịna ḅe ḅụgbiripumamẹ.
Ini Ḅa Ḅẹrẹpẹlẹ Jizọs Ḅe Pịrịmẹ
(Mak 15.6-15; Luk 23.13-25; Jọn 18.39—19.16)
15Saḅaḅọrọ Alalị mị lasịkị lasịkị, Romapụ gọvịna ḅe tomonikpo mị ọ̀ ḅara ḅiḅimẹ gbọrị ikoliḅọ ḅụ ọ̀ ḅarasin ini pịrị, mịẹmịẹye ḅaraḅụ. 16Anịsịkị mị ḅụ ini iḅiọkụ nemi ikoliḅọ simemẹ, Barabas nwọ chịnḅọ. 17Se tomonikpo mị koḅirima so sịkị, Paịlet ḅe ini gbelamẹ, “Nde ó ḅi na à ḅarasin ọ́ pịrị nwọ ḅẹḅọ? Barabas ḅe mụnọ se Jizọs ini Mẹsaya se chịnḅọ Ḅe?” 18Anịatịḅị ori iḅiọkụnemi mẹ na ḍikitọrụfụka ḅụ ini Jizọs Ḅe nwọ ḅọrọma ọ̀ pịrịmẹ.
19Anịmịsikima, Paịlet ḅe ḅẹrẹkọn nyọ mị ḅụ simearịogbo, tarọ ma oku se ọ̀ fịrịmamẹ: “Simịẹkaḅọ ḅe na gbọrịye sọ mịẹma, anịatịḅị nwọ ḅọrọsa ḍin mị ḅie, àrị ò gose ḍawọju opuma tọrụsiọrịmẹ.”
20Tịḅịnị agbamịẹapụma na sẹnịapụma na tomonikpo mị kpẹịnmamẹ na ini Paịlet ḅe ḅara ḅi, ọ̀ Barabas ḅe ḅụ ḅarasin, se Jizọs Ḅe nwọ ḅaa. 21Ọkụma Paịlet ḅe kpoto tomonikpo mị gbelamẹ, “Ini mama apụma ḅụ àrị nde ḅọ ḅụ ḅarasin ọ́ pịrị ọ́ nwọ ḅi?”
Ini pẹkẹrẹmẹ, “Barabas ḅe-ẹ!”
22“Nde, anịsịkị Jizọs ini Mẹsaya se chịnḅọ Ḅe à nwọ mịẹḅịa ọkụ?” Paịlet ḅe nwọ gbelamẹ.
“Ò se mgbẹsẹchịn ọgọnọ ḅakụḅaa!” Inimgba nwọ pẹkẹrẹmẹ.
23Ọkụma Paịlet ḅe gbelamẹ, “Che oloko Ọ̀ nwọ koro?”
Anị sọnị ini pa gele pụkọ se olokuaḅẹ: “Mgbẹsẹchịn ọgọnọ Ọ̀ ḅakụḅaa.”
24Paịlet ḅe ḅo ọrịmẹ na anị ḍukoma mun mị yeḅụsọkẹ, anịnakaraka anị amafiemaḅịa nwọ ḅẹ sịkị, ò mengi ọkị ọ̀ ḅarama sịkịrịmẹ tomonikpo mị tọrụkuḅu se nwọ ḅẹmẹ, “Ị̀ ḅara ḅe tomoniḅọ ḅe fị mị ḅụ ofori-ẹ! Ọ́mịna ḅụḅẹlẹ ọkụ ọ́ nwọ mịẹ!”
25Bebe tomonikpo mị mgba pẹkẹrẹmẹ, “Ye Ọ̀ tịḅị pulo mịna ọgọnọ gbana, pịkị mịna awọma na!”
26Anị Paịlet ḅe Barabas ḅe ḅụ ḅarasin tomonikpo mị pịrịye-ẹ, se ò Jizọs Ḅe fomu so sịkị, ori Ọ̀ ḅọrọma ini pịrịmẹ na ini Ò se mun mgbẹsẹchịn ọgọnọ ḅakụḅaa.
Owuni Ma Jizọs Ḅe Se Ḍẹrịye Mịẹmẹ
(Mak 15.16-20; Jọn 19.2-3)
27Anịsịkị Paịlet owunima Jizọs Ḅe se so gọvịna ḅe warị mun mẹ, se owuni-ogbo mị mgba koḅirima Ò kelemamẹ. 28Ini Oria ḅụchụayema sin se awụwụ ḅụchụaye se Ọ̀ chụamẹ. 29Anịsịkị ini ịga se amanyanaḅọchu ḍori se Ò chiramẹ, se chịn se Oria amaḅara mị ḅie chụamẹ, anịsịkị ini Ọ̀ tọrọkọ kpẹrẹkị se Ò kombo se nwọ ḅẹmẹ, “Gele Juapụ Amanyanaḅọ nangwọ ḍumo nyana!” 30Ini fụla se Ọ̀ sara, se chịn mị ọkị se Ọ̀ tịḅị fomumẹ. 31Ini Ò kombo so sịkị, ini Ọ̀ ḅụ inia ḅụchụaye mị sin se Oria yema nwọse Ọ̀ chụamẹ. Anị ini Ọ̀ ḅọrọma pakụmaye-ẹ, Ò se mun mgbẹsẹchịn ọgọnọ ḅakụḅaaḅịa ẹrẹchị.
Jizọs Ḅe Ini Ọ̀ Ḅakụḅaamẹ
(Mak 15.21-32; Luk 23.26-43; Jọn 19.17-27)
32Ini pakasoarịogbo ini gbọrị Saịrini owuḅọ na ịrịamẹ Saịmọn nwọ chịnḅọ, se owunima kụrọ ḅara se ori ọlọ se ò Jizọs Ḅe mgbẹsẹchịn mị pụramẹ. 33Ini ḅo Gọlgọta nwọ chịn nyọ mị lamẹ, anị mị fiearịye, “Kukure-tịḅị Nyọ.” 34Anịnyọ ini akụ iru se Jizọs Ḅe pịrịmẹ; Ọ̀ ḅịpị se anị lama so sịkị, Ò ḅu ḍụkụkẹ.
35Ini Ò se mgbẹsẹchịn ọgọnọ ḅakụḅaamẹ, se Oria ḅụchụayema nwọ ḍiama ọkịmẹ, ịkịan wakị ḅụ. 36Anị mị mịẹso sịkị, ini kpọnjị sime se Ò korumẹ. 37Ọ̀ tịḅị ọgọnọju ḅụ, ini ḍuko se Ọ̀ pụnụmaye mị gịẹịn waraḅẹ: “Ḅe Jizọs Ḅe-ẹ, Juapụ Amanyanaḅọ Ḅe.” 38Anịsịkị ini jịn mama kụrọḅara se furufuruapụ se chụa mgbẹsẹchịnma ḅụ Jizọs Ḅe na ḅakụḅaamẹ, gbọrịḅọ Oria amaḅara anga ísíḅọ ḅe pịkị Oria ereḅara anga ḅụ.
39Nwẹngị ḅọrọ sime-a tomoni inia tịḅịma jike se wọlọ ọkwẹịn tan Jizọs Ḅe ọgọnọ saramẹ: 40“Ị́rị́ Oputẹkẹwarị mị nwọ kan sara se tẹrẹ-a ḍin ḅụ anị nama chịẹmaḅịa ḅọ ḅe! Ị́ ḅụ ḍụaḅọrọma, ị́rị́ nemikase Tamụnọ Tọkụ-ẹ ḅẹḅẹ! Mgbẹsẹchịn ọgọnọ koro ḅo!”
41Anị gbọrị ḅara mị ḅụ tịḅịnị agbamịẹapụma na Oloko ḍieapụma na, sẹnịapụma na ọkọ se Ò kombomẹ: 42“Ò jịn apụ ḍụaḅọrọmamẹ, ọkụma ori ineda Ọ̀ ḅụ ḍụaḅọrọmakẹ! Izrẹl Amanyanaḅọ ḅe orika? Ye Ori mgbẹsẹchịn ọgọnọ koroḅo anịsịkị, wa Ò ḅereniḅịa! 43Ò kuḅie se Tamụnọ Ḅe ḅụgbanamẹ, se nwọ ḅẹmẹ, Ori Tamụnọ Tọkụ-ẹ. Iḅimẹ, ye anịọkụma wa ḍiki Tamụnọ Ḅe mịọkụ Ọ̀ ḍụaḅọrọmaḅịa-ẹtuḅo!”
44Ini se Ori na chụa ḅakụḅaa kụrọḅara se furufuruapụma sọnị anị gbọrị ḅara mị nwọse Ọ̀ wọlọmẹ.
Jizọs Ḅe Fị Mị
(Mak 15.33-41; Luk 23.44-49; Jọn 19.28-30)
45Karakarama eneogboin ḅiri, kanakana bebe ama mị gbẹịn mun ḅọlọ sịkị nwọ lamẹ. 46Tẹrẹ-a so pembe ḅiri ḅụ Jizọs Ḅe kụrọ pụkọ nwọse olokumẹ, “Ẹlaị, Ẹlaị, lama sabaktani?” Anị fiearịye, “Ị̀ Tamụnọ, Ị̀ Tamụnọ, nde ị́ gose ị̀ sịkịye?”
47Anị nyọ chịẹ sime apụma ḅie tọn-apụ Ọ̀ pụkọ naa se nwọ ḅẹmẹ, “Ori Ịlaịja ḅe chịn aḅẹ!” 48Inia ḅie gbọrịḅọ kirikiri mangị mun sapo ọkị, anị se tụmgbakị iru ḅie su, anị se chịn ḅịpị sụka se Ọ̀ pịrịmẹ na Ò ḅu-ẹ.
49Ọkụma ísíapụma nwọ ḅẹmẹ, “Koru, ye wa ḍiki nwọfa Ịlaịja ḅe ò ḅo Ọ̀ ḍụaḅọrọmaḅịa-ẹtuḅo!”
50Jizọs Ḅe pịkị gele pụkọ ḅụ olokumẹ, se Oria kuluma ịnyọ nwọ saramẹ.
51Anịsịkị Oputẹkẹwarị mị ḅie kikichụa ḅịtẹ mị gbụama maịn pumẹ, ọgọnọ ọkịmun chuku la. Kiri mị jikemẹ, se ḍụparịma pumẹ, 52iḍupuma pu finjimẹ, se fị ḅọrọsa Tamụnọ tomonima ḅie tọn-apụ fịḅụsịsẹmẹ. 53Ini iḍupuma koroma somẹ, se Jizọs Ḅe fịḅụsịsẹ seso sịkị, ini Fịafịa Opuama mị ḅie sọmẹ, se tọn-apụ ini ọrịmẹ.
54Owuni tịḅịnịḅọ ḅe na, ori na sime Jizọs Ḅe koruarị owunima na kiri mị jike ọkụ na pakaye mamgba na nwọ ọrị sịkị, inia ḅalafa, se nwọ ḅẹmẹ, “Kọkọmaye ḅụ Ḅe Tamụnọ Tọkụ-ẹ!”
55Tọn-a eremeni sasaju ḅụ wẹrị yeḍiki simemẹ, anị Galili ḅie wẹrị Jizọs Ḅe ḍuko se ḅarachụa Ọ̀ pịrị sime apụma-ẹ. 56Inia ḅie sime apụ anị Meri Magdalin ma na, Jems na Josẹf na nyengi Meri ma na, pịkị Zẹbidi ta ma na.
Jizọs Ḅe Ḍipi Mị
(Mak 15.42-47; Luk 23.50-56; Jọn 19.38-42)
57Anị ḅo saso ḅiri lasịkị, Arịmatia ḅie gbọrị alaḅọ ḅomẹ oria ẹrẹ anị Josẹf, ori sọnị Jizọs ọḅụḍukoḅọ-ẹ. 58Ọ̀ Paịlet ḅe tọrọkọ mun se Jizọs Ḅe oju nwọ ḅimẹ. Paịlet ḅe kụrọpịrịmẹ na ini Jizọs Ḅe oju mị nwọse Josẹf ḅe pịrị. 59Anị Josẹf ḅe anị ọkịye-ẹ, ịwọ Sịnịnị ḅịtẹ se anị fịna, 60se anị seni ọ̀ ḅarakuḅu iḍupu ḅie ḍipimẹ, ori ịwọma ḍụparị ḅụ pupakụma ọ̀ ḅụ pịrịye mị. Se opu ḍụparị nwọ imbibile anịa ḅịpị gbẹịn, se nwẹngị somẹ. 61Meri Magdalin ma na ísí Meri ma na anị nyọ ḅụ kpọnjị sime se tọrụ se iḍupu mị damẹ.
Iḍupu Mị Koruapụma
62Ịnyọsara Ene ḍukoma ene mị ḅụ, tịḅịnị agbamịẹapụma na Farisiapụma na Paịlet ḅe na ịrịa 63se nwọ ḅẹmẹ, “Tịḅịnịḅọ, wa se ḅiekoromaḅịa na Ori iruoḅọ ḅe ḍumo sime sịkị Ọ̀ nwọ ḅẹmẹ, ‘Tẹrẹ-a ḍin ḅọrọ sịkị à fịḅụ sịsẹḅịa.’ 64Anịẹrẹchị kụrọpịrị, se ini tọrụkweinma iḍupu mị koru mun tẹrẹ-a ḍin karama ene mị la, mịẹse Oria ọḅụḍukoapụma ḅo Ò furu ẹka ḅara, anịsịkị ḍuko tomonima pịrị na, Ọ̀ fịḅụ sịsẹmẹ. Mịn kuluma iruo mị sitẹịn tatarịye mị nẹngịḅịa.”
65Paịlet ḅe nwọse ini ḅẹmẹ, “Ọ́ nyọ koruapụ ọkị, se ómine na iḅitẹịnḅịa ḅara nwọse iḍupu mị koru.”
66Anị ini soye-ẹ, se iḍupu mị se ye anị la-ẹka ḅara ḅụ wẹrịmẹ, se pịkị nyọ koruapụ nwọse koromamẹ.
Currently Selected:
Matio 27: OBTP
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
