Matio 25
25
Oyi Iremeni Awọ Ma Kaḅo Mị
1“Soḅie Amanyanakiri mị pulo tọnjie semun ereyaḅọ na ịrịama-ẹ mun oyi iremeni awọ simeọkụ simemẹ. 2Sọnọ apụ inia ḅie yenemikẹ, ọkụma ísí sọnọ apụma ini yenemimẹ. 3Yenemika apụma inia tọnjiema nwọ dekimẹ, ọkụma ini pulo se chụa ọbị munkẹ, 4anịsịkị yenemi apụma ini pulo se ye ḅie chụa ḅeinma mun mẹ. 5Ereyaḅọ ḅe ori iḅisịkị se ḅokẹ, anị iremeni awọma sakị sịngị se koro mọnọye-ẹ.
6“Anị ḍin ogbo nwọ lasam anị oloku tịḅị ḅie fie pakaḅoye-ẹ na, ‘Ereyaḅọ ḅe ḅe ori-ẹ! Ọ́ pakaḅo ori na ịrịa!’ 7Oyi-a iremeni awọma boma sịsẹ se inia tọnjiema karakaramamẹ. 8Anị yenemika apụma nwọse yenemi apụma ḅẹye-ẹ, ‘Ye wa kele ọ́mịna puloma ḅụ ye ọkị, anịatịḅị mịna tọnjiema àrị bin-aḅẹ.’ 9‘Ẹn-ẹn, ọkọkẹ,’ yenemi apụma nwọ pẹkẹrẹmẹ, ‘Ómine na mine na karaḅịaye ofori-ẹ. Ó yedẹrị warịma mun, se ọ́mịnaye fẹ.’ 10Anị yenemika iremeni awọma nwẹngị paka mun pulo mị fẹ-ẹmunye-ẹ se ini mun nyọ ḅụ simearịogbo, ereyaḅọ ḅe ḅo lamẹ. Ḅụkarakarama sime sọnọ-a iremeni awọma ori na ereya alalị mị ḅie sọmẹ, se ḅọkọ mị palịmẹ.
11“Ọḅụkọ anị ísí iremeni awọma sọnị ḅoye-ẹ. Ini oloku se nwọ ḅẹmẹ, ‘Nyanaḅọ, Nyanaḅọ! Ḅọkọ finji wa pịrị!’ 12‘Karakaraye à nwọ ḍuko ọ́ pịrịaḅẹ! Àrị ó nemikẹ,’ ereyaḅọ ḅe nwọse ini pẹkẹrẹmẹ.
13“Anịẹrẹchị, ó koru ḅụ sime, anịatịḅị ene mị na sịkị mị na ó nemikẹ.”
Tẹrẹ-a Fịrịnwẹngịapụma Kaḅo Mị
(Luk 19.11-27)
14“Mị soḅie Amanyanakiri mị anị simeḅịa ọkụ-ẹ. Gbọrị sịkị mịna warị koromaso jịn nyọ mun ḍọkịarịḅọ omi-ẹ. Ori oria fịrịnwẹngịapụma chịn, se ọ̀ nyanayema nwọse inia ḅarachụamẹ. 15Ḅọḅọ ịnyọ laḅara ọ̀ nwọ kịẹnma ye se ini pịrịmẹ: Kọbọ oyimẹndẹ fịnjị, na kọbọ oyiasi ọ̀ nwọse gbọrịḅọ pịrịmẹ, ọ̀ pịkị kọbọ sọnọ ẹndẹ nwọse jịnḅọ pịrịmẹ, ọ̀ pịkị kọbọ mẹndẹ oyiasi fịnjị nwọse ísíḅọ ḅe pịrịmẹ. Se ọ̀ pakaso ò mun àrị nyọ nwọ mun mẹ. 16Kọbọ oyimẹndẹ fịnjị na oyiasima ọkị fịrịnwẹngịḅọ ḅe kirikiri mun àrị se tuḅo kọnmẹ se jịn kọbọ oyimẹndẹ fịnjị na oyiasi na nwọ mịẹ ḅomẹ. 17Anị gbọrị ḅara ḅụ kọbọ sọnọ ẹndẹ ọkịḅọ ḅe pịkị kọbọ sọnọ ẹndẹ sọye nwọ nyanamẹ. 18Ọkụma kọbọ-a mẹndẹ oyiasi fịnjịma ọkịḅọ ḅe, pakaso mun kiri soku se ọ̀ nyanaḅọ ḅe igbiki mị se ḅọị koromamẹ.
19“Ḅọlọ sịkị ḅo ḅọrọmẹ anị fịrịnwẹngịapụma nyanaḅọ ḅe vinpịkị ḅo se ini opoli tọn ọ̀ pịrịye-ẹ. 20Kọbọ oyimẹndẹ fịnjị na oyiasima ọkịḅọ ḅe sọ ḅo se ísí kọbọ oyimẹndẹ fịnjị na oyiasima ḅọrọma ọ̀ ḅara chụa, se nwọ ḅẹmẹ. ‘Ị̀ nyanaḅọ ḍiki, mà pịkị jịn kọbọ oyimẹndẹ fịnjị na oyiasi na-ẹ, à sọye ḅụ mịẹḅo aye-ẹ.’ 21Ọ̀ nyanaḅọ ḅe nwọse ọ̀ ḅẹmẹ, ‘Ị́ mịẹ ḍinmẹ iḅi pịkị kuḅie se ḅụgbana gbẹịn fịrịnwẹngịḅọ. Ị́ kala igbiki se kuḅie se ḅụgbana gbẹịnḅọ ḅara nwọse fịrịnwẹngịsam, anịẹrẹchị àrị ị́ se ḅakaye ḅụ tịḅịdaḅịa, sọ ḅo se ị̀ ḍuko ḅieḅẹlẹ!’ 22Ini kọbọ-a sọnọ ẹndẹ se pịrị fịrịnwẹngịḅọ ḅe sọ ḅo se nwọ ḅẹmẹ, ‘Kọbọ sọnọ ẹndẹ ị́ nwọse ị̀ pịrịmẹ, ị̀ nyanaḅọ. Ḍiki! Mà à pịkị mịẹḅo jịn kọbọ sọnọ ẹndẹ sọye-ẹ.’ 23‘Ị́ mịẹ ḍinmẹ, iḅi pịkị kuḅie se ḅụgbana gbẹịn fịrịnwẹngịḅọ!’ ọ̀ nyanaḅọ ḅe nwọ ḅẹmẹ. ‘Ị́ kala igbiki se kuḅie se ḅụgbana gbẹịn ḅara nwọse fịrịnwẹngịsam, anịẹrẹchị àrị ị́ se ḅakaye ḅụ tịḅịdaḅọ nwọ mịẹḅịa. Sọ ḅo se ị̀ ḍuko ḅieḅẹlẹ!’
24“Kọbọ-a mẹndẹ oyiasi fịnjịma ọkị fịrịnwẹngịḅọ ḅe sọnị sọ ḅo se nwọ ḅẹmẹ, ‘Ị̀ nyanaḅọ, à nemimẹ na ị́rị́ kụrọ pịkị ḅụfụkama tomoniḅọ-ẹ, ị́ ye ḍipika anga ị́ ye soku sokumẹ, ị́ pịkị ye koḅirima koḅirimamẹ ị́ ḍipiyemgbọlụ se saraka anga ḅụ. 25Ị̀ ḅalafamẹ, anịẹrẹchị à so mun ị́ya igbiki mị se kiri ḅie ḅọị koromamẹ. Ḍiki! Mịn ị́ya igbiki mị-ẹ.’ 26‘Ị́rị́ sitịḅịnyana pịkị ikula fịrịnwẹngịḅọ-ẹ!’ ọ̀ nyanaḅọ ḅe nwọse ọ̀ ḅẹmẹ. ‘Ị́ nemimẹ, na à ye ḍipika anga à fịye soku sokumẹ, pịkị ye koḅirima koḅirimamẹ, à ḍipiyemgbọlụ se saraka anga? 27Iḅimẹ, mgbọkụ ị̀ya igbiki mị ị́ se mun igbiki koko warị mị ḅie chụasam, se anị sọye mịẹ ị̀ pịrịsam, à vinpịkị ḅoḅịa sịkị. 28Mịọkụ, ómine ọ̀ ḅara igbiki mị ọkị, se anị se kọbọ oyimẹndẹ fịnjị na oyiasima nyanaḅọ ḅe pịrị. 29Anịatịḅị ini pịkị ye se chụatẹịn nyanaḅọ ḅe pịrịḅịa, se ọ̀ nyanatẹịnḅịa ḅara; ọkụma ye nyanakaḅọ ḅe ori ịkịanma nyana kalaye mị sọnị ọ̀ ḅara ini ọkịḅịa. 30Ḅe yeḅụsọka fịrịnwẹngịḅọ ḅe ọkụma, ómine ò se kanakana ḅie nụngọ ogbo gbin wokuma, anịanga ḅụ ori owuḅịa pịkị oria akama farịḅịa.’
Kuluma Ḅẹrẹkọn Mị
31“Tomoniḅọ Tọkụ Ḅe Amanyanaḅọ ḅara se ḅoḅịa sịkị, oria enjẹlapụma na Ori na ḅoḅịa, se Ori Oria amanyanaḅọ ngada mị ọgọnọ simeḅịa, 32se tomonikiri mị ḅie tomoni mamgba Ọ̀ tọrọkọ koḅirimaḅịa. Anịsịkị Ori ini se mama kiri ḅụ koromaḅịa, anana koruḅọ ḅe ananama ḅie oḅorima sẹlẹ sikima ḅara mị. 33Ori ananama se oria amaḅara anga ḅụ koromaḅịa, oḅorima pịkị oria ereḅara anga ḅụ simeḅịa. 34Anịsịkị Amanyanaḅọ ḅe nwọse oria amaḅara anga ḅụ sime apụma ḅẹḅịa, ‘Ó ḅo ómine ị̀ Ḍaḅe ḅẹlẹmasa apụma! Ó ḅo Amanyanakiri mị ḅie sọ anị tomonikiri mị tẹmẹ sịkị ngịsị ini karakarama ọ́ pịrịsa ye mị. 35Ḅuru ị̀ tarịmẹ, ó fịye se ị̀ pịrịmẹ, ị̀ pụkọ samịnamẹ, ó mengi se ị̀ pịrịmẹ, àrị igoni ḅomẹ, ómine ị̀ da ọkị ọ́mịna warịma ḅie chumẹ, 36à papaḅụsinmẹ, ọ́ pịkị ḅụchụaye se ị̀ chụamẹ, àrị obimẹ, ómine ị̀ ḍikiḍikimẹ, àrị ikoliwarị ḅie simemẹ, ó ḅo ị̀ lamẹ.’ 37Karakaraye mịẹapụma anịsịkị ọ̀ pẹkẹrẹḅịa, ‘Nyanaḅọ, nde sịkị ḅuru Ị́ tarị se wa fịye se Ị́ pịrị, anịkanịka Ị́ pụkọ samịna se wa mengi se Ị́ pịrị Ị́ ḅu. 38Nde sịkị Ị́ igoni ḅo, se wa Ị́ ọrị, se wa Ị́ da warị chu, anịkanịka Ị́ papaḅụsin, se wa ḅụchụaye se Ị́ pịrị Ị́ chụa? 39Nde sịkị wa Ị́ ọrị Ị́ obi, anịkanịka ikoliwarị ḅie sime, se wa ḅo Ị́ la?’ 40Se Amanyanaḅọ ḅe oria amaḅara anga sime apụma pẹkẹrẹḅịa, ‘Kọkọmaye à nwọ ḍuko ọ́ pịrịaḅẹ, ọ́ nwọ mịn mị mịẹ ị̀ya mịnapụma ḅụ bokatẹịnḅọ ḅe nwọ pịrị warasịkị, ị̀rị̀ mị ómine anị mịẹ pịrịye-ẹ!’
41“Anịsịkị ọ̀ nwọse oria ereḅara anga sime apụma ḅẹḅịa, ‘Ị̀ wẹrị ḅụ sikima, ómine Tamụnọ Ḅe sifụla se pịrịsa apụma! Ó sikima mun simegbaso fịnị mị ḅie sọ, ini karakarama se Oru ḅe na oria enjẹlapụma na pịrịye mị! 42Anịatịḅị ḅuru ị̀ tarịmẹ, ó fịye se ị̀ pịrị ḍụkụkẹ, ị̀ pụkọ samịnamẹ ó mengi se ị̀ pịrị ḍụkụkẹ; 43àrị igoni ḅomẹ, ómine ị̀ da warị chukẹ, à papaḅụsinmẹ, ọ́ ḅụchụaye se ị̀ pịrị ḍụkụkẹ; àrị obi se pịkị ikoliwarị ḅie simemẹ, ọkụma ó ḅo ị̀ ḍiki ḍụkụkẹ.’ 44Anịsịkị ini sọnị ọ̀ pẹkẹrẹḅịa, ‘Nyanaḅọ, nde sịkị wa Ị́ ọrị se ḅuru Ị́ tarị anịkanịka Ị́ pụkọ samịna anịkanịka Ị́ igoni ḅo anịkanịka Ị́ papaḅụsin anịkanịka Ị́ obi anịkanịka Ị́ ikoliwarị ḅie sime, se wa ḅarachụa Ị́ pịrịka?’ 45Amanyanaḅọ ḅe pịkị ini pẹkẹrẹḅịa, ‘Kọkọmaye à nwọ ḍuko ọ́ pịrịaḅẹ, ọ́ nwọ ḅarachụa ị̀ya mịnapụma ḅụ bokatẹịnḅọ ḅe nwọ pịrịka sịkị layelaye, ọ́ ḅarachụa ị̀ pịrịkẹ.’ 46Mịna apụma anịsịkị, ini nwọse mun simegbamaso tọrụsiọrị ḅie chuḅịa, ọkụma karakaraye mịẹapụma mun simegbamaso ḍumo ḅie sọḅịa.”
Currently Selected:
Matio 25: OBTP
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
