Agbamịẹ Apụ 7
7
Yepẹkẹrẹ Agbamịẹaye
1Ma anị yepẹkẹrẹ ḅo agba oloko ma-ẹ, àrị opuma osiḅụ omi-ẹ. 2Se mịn agba mị mịẹḅịa nama ḅe agbamịẹ ẹbẹ mị ḅụ ọgọnọju daọrụ mị ḅụ ini ọ̀ ḅaaḅịa, ini se dọkịma agbamịẹḅịa namama ini nwọ ḅaaḅaa nyọ mị, se oria oju pulo mị seni agbamịẹ ẹbẹ mị ḅụ inein-a ịkọlị ma ḅụ saraḅịa. 3Oria ḅẹlẹkị ma mgba ini sin se agbamịẹ ẹbẹ mị ọgọnọ ḅụ agba mị mịẹḅịa; opu tumo mị na, ḅụlọ ḅie ayema gbẹịn ḅẹlẹkị mị na, 4nịna akpa ma na, arịaḅụ sime ḅẹlẹkị mị na, pịkị iḅi paranga mị na. 5Agbamịẹḅọ ḅe ḅẹlẹkị mị mgba se agbamịẹ ẹbẹ mị ọgọnọ ḅụ dọkịma, se fịye agbamịẹ Nyanaḅọ Ḅe pịrịḅịa. Mịn anị yepẹkẹrẹ ḅo agba-ẹ. 6Agbamịẹapụ furoḅie owuḅọ goyegoye ineda mịn agbamịẹ nama mị pẹịḅịa, ọkụma osiḅụ sime nyọ ḅụ ini sime anị pẹịḅịa, anịatịḅị anị opuma osiḅụ omi-ẹ.
7Si gose mịẹ agba mị na yepẹkẹrẹ ḅo gose mịẹ agba mị na gbọrị oloko arịaḅụ omi-ẹ; anị nama mị sime ori agba mị mịẹ agbamịẹḅọ ḅe pịrịmẹ. 8Ini se dọkịma agbamịẹ nama ḅe oju apụra mị sime agba mị mịẹ agbamịẹḅọ ḅe pịrịmẹ. 9Fịaye mgbọlụ agba goyegoye anị ini se fịnị ḅie fọị ye-o, anịkanịka panị ḅie mịẹ ye-o, anịkanịka panị ḅẹlẹ ḅie mịẹ ye-o, sime ori anị agba mị mịẹ Tamụnọ Ḅe pịrị agbamịẹḅọ ḅe pịrịmẹ. 10Ọkụma chụọka fịaye mgbọlụ agbamịẹ aye mamgba sime Erọn owuapụ awọ mamgba pịrịmẹ; anị ḅọrọ pulo se pikiriye-o, anịkanịka samịnaye sọnị, ini arịmgba ḍie gbasịma iniaḅụ pịrịḅịa.
Gboloma Agba Ma
11Ma anị se gboloma agba mịẹ Nyanaḅọ Ḅe pịrịḅịa oloko ma-ẹ. 12Nemikase tomoniḅọ mịẹḅaka se Tamụnọ Ḅe ḅẹ gose agbamịẹḅịa ḅẹḅẹ, ma anị ò se agba mị mịẹḅịa nama ḅe ḅụ chụaḅịaye ma-ẹ; fịturu sumaye sọka fịturu: anị ḅọrọ oliv pulo se gwa fịturu okpokpo, anịkanịka oliv pulo se tan ịkịka, anịkanịka fịlawa na oliv pulo na se mịẹ ịkịka. 13Jịnye, ọ̀ pịkị fịturu sumaye sọ jịn-a okpokpo se chụa agba mị mịẹḅịa. 14Arịa ḅụ gbọrị pẹkẹrẹ gbọrị pẹkẹrẹ, ọ̀ nwọ ọkị se sosikima agba mịẹ Nyanaḅọ Ḅe pịrịḅịa; nama ḅe oju pulo mị ọkị se agbamịẹ ẹbẹ mị ḅụ sara agbamịẹḅọ ḅe anị sime nwọ pịrịmẹ. 15Nama ḅe oju mịnị mị ini pẹịḅịa ini nwọ anị se agba mị mịẹ gbọrị ene mị ḅụ; anịa ḅụ gbọrịye sọnị ngịsị sime mun jịn eneḅa ḅe dede ḅie la-ẹkẹ.
16Nemikase tomoniḅọ se gboloma agbamịẹḅịaye se ḅomẹ ḅẹḅẹ, anị ḅereniye mị mịẹḅeinma ḅụ, anịkanịka mịẹpụkọtarị agba ḅaraḅụ; anịmgba ini nwọ pẹị soẹkẹ; ini anị se agba mị mịẹ gbọrị ene mị ḅụ, ọkụma kọn mun jịn eneḅa laye omi-ẹ ḅẹḅẹ, ini ineda anị pẹịḅịa. 17Tẹrẹ-a ḍin karama ene ḅụ kọn nama goyegoye ini dọkịmaḅịa. 18Tẹrẹ-a ḍin karama ene mị ḅụ anịa ḅụ kọn ye ini nwọ pẹịmẹ ḅẹḅẹ, tomoniḅọ ḅe oria agba mị Tamụnọ Ḅe ọ̀ ḅarị ọkị-ẹkẹ. Ò se agbamịẹye mị anị ḅarị iḅi sọ ọ̀ pịrịkẹ, ọkụma fịafịakaye anị ḅo nwọ sọḅịa; se anị pẹịḅọ goyegoye anịa fomuḅara nwọ daḅịa. 19Nama mị mun fịafịakaye na gbolomamẹ ḅẹḅẹ ini pẹị ẹkẹ, ọkụma ini anị dọkịmaḅịa.
Ḅụ wẹrị fịafịama ḅọ goyegoye ineda nama mị pẹịḅịa, 20ọkụma nemikase ḅụ wẹrị fịafịamaka ḅọ anị pẹịmẹ ḅẹḅẹ, Tamụnọ-a tomonima ḅie gbọrịḅọ ḅara ini ḅarị nwọse ọ̀ kịẹnma ẹkẹ. 21Anị gbọrị ḅara ḅụ, ḅara se fịafịakaye lamaso se ḅo mị agbamịẹ nama mị pẹịḅọ goyegoye, anị ḅọrọ tomoniḅọ ḅụ, anịkanịka nama ḅụ-o, Tamụnọ-a tomonima ḅie gbọrịḅọ ḅara ini ḅarị nwọse ọ̀ kịẹnma ẹkẹ.
22Nyanaḅọ Ḅe ma olokoma se Moziz ḅe pịrịmẹ 23seni Izrẹlapụma pịrị. Nama ḅẹlẹkị, anana, anịkanịka oḅori sọnị, gbọrịḅọ sọ pẹị ẹkẹ. 24Ngẹrị papa fị nama, anịkanịka piri ḅie owoi nama ḅaa nama ḅẹlẹkị ngịsị gbọrịḅọ sọ pẹị ma, ọkụma ini ineda anị se jịn fịrị ḅụ chuḅịa. 25Se fịye agbamịẹ Nyanaḅọ Ḅe pịrịḅịa nama ḅe ḅụ ḅẹlẹkị pẹị ḅọ goyegoye, Tamụnọ-a tomonima ḅie gbọrịḅọ ḅara ini ḅarị nwọse ọ̀ kịẹnma ẹkẹ. 26Izrẹlapụma anga nyọ anga nyọ ḅụ, ngịsị feni oju pulo anịkanịka nama oju pulo ini se fịye mịẹ fịẹkẹ. 27Mịn oloko mị kan ḅọ goyegoye, Tamụnọ-a tomonima ḅie gbọrịḅọ ḅara ini ḅarị nwọse ọ̀ kịẹnma ẹkẹ.
28Nyanaḅọ Ḅe ma olokoma se Moziz ḅe pịrịmẹ 29seni Izrẹlapụma pịrị. Gboloma agba mịẹḅịa ḅọ goyegoye anịaḅụ ye ọkịḅo ḍie Nyanaḅọ Ḅe pịrị, 30nụḅọ ḅarana anị ọkịḅo se fịye agba mịẹ ḅaraḅụ. Nama ḅe ḅụ ḅẹlẹkị mị na ekpe mị na ọ̀ nwọse ḅo sosikima ḍiepịrịye agbamịẹ Nyanaḅọ Ḅe pịrịḅịa. 31Agbamịẹḅọ ḅe ọ̀ ḅẹlẹkị mị dọkịmaḅịa agbamịẹ ẹbẹ mị ọgọnọ, ọkụma ekpe mị sime agbamịẹ Erọn ḅe na oria owuapụ awọma na pịrịmẹ. 32Nama ḅe ḅụ ọḅụju amaḅaranga ḅụọ mị, ini sosikima anị se 33agbamịẹḅọ ḅe pịrịḅịa, anị pulo mị na ḅẹlẹkị mị na se gboloma agba mị mịẹḅọ ḅe. 34Nama ḅe ekpe mị anị sosikima ḍiepịrịye-ẹ, anịsịkị ọḅụju amaḅaranga ḅụọ mị anị sosikima Nyanaḅọ Ḅe oria tomoni Izrẹlapụma ḅara ọkị se agbamịẹ apụma pịrịmẹ. Mịn anị Izrẹlapụma se agbamịẹ apụma pịrịpịrịḅịaye-ẹ, ọkịmun ḅụọḅụọ laḅịa. 35Mịn anị ini se agba mịẹ Nyanaḅọ Ḅe pịrị fịayema ḅụ pẹkẹrẹ-ẹ, anị sime Erọn ḅe na oria owuapụ awọma na pịrịye-ẹ, ini ini se agbamịẹapụ mịẹ ene mị ḅụ ọkịmun. 36Anị ene mị ḅụ Nyanaḅọ Ḅe ọ̀ tọn Izrẹlapụma pịrịmẹ na agbamịẹye mị ḅụ mịn pẹkẹrẹ mị ini nwọse ini pịrịpịrị-ẹ. Mịn oloko mị Izrẹlapụma mịẹka mịẹka ḅaraḅụ anị kokoḅịa ọkịmun ḅụọḅụọ la.
37Ma olokoma sime dọkịma agbama na, fịaye mgbọlụ agbama na, simịẹ agba na, ye pẹkẹrẹ ḅo agba na, agbamịẹ apụ fịrị kiri ḅụ simeḅịa apụ agbama na, pịkị gboloma agbama na pịrịmẹ. 38Anị nyọ onwun ele mị ḅie sime Saịnaị Tụndụ mị ọgọnọ Nyanaḅọ Ḅe ma olokoma se Moziz ḅe pịrịmẹ na ò ḍuko Izrẹlapụma pịrịmẹ ini inia agbama mịẹ nwọḅẹ ene mị ḅụ.
Currently Selected:
Agbamịẹ Apụ 7: OBTP
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
