Agbamịẹ Apụ 24
24
Tọrụ Se Tọnjie Ma Ḅụ Wẹrị Mị
(Pak 27.20-21)
1Nyanaḅọ Ḅe nwọse Moziz ḅe ḅẹmẹ 2tọn Izrẹlapụma pịrị na: Iḅitẹịn oliv pulo mị ini nwọse ḅo Ikowarị mị ḅie tọnjie ma ḅie chụa, mịẹse tọnjie anịa ḅie sịkịmamgba kọrịḅịa ọkụ. 3Saso goyegoye Erọn ḅe ori àrị chụaḅịa, àrị pịkị kọrị mun dede laḅịa, Nyanaḅọ Ḅe tọrụkuḅu ḅụ, nyọ kikima ḅịtẹ mị ḅie sọka ḅaraḅụ, Ọḅọkụ Igbe mị tọrọkọ, anị Osi Nyanatẹịn Nyọ mị. Mịn oloko mị ini anị koko mun ḅụọḅụọ laḅịa. 4Erọn ḅe ọ̀ tọrụ se jokoma goli goli tọnjie gbanaye mị ọgọnọ sime tọnjie ma ḅụ wẹrịḅịa, ori ọrịḅịa na sịkịmamgba àrị kọrịaḅẹ Nyanaḅọ Ḅe tọrụkuḅu.
Ini Se Tamụnọ Ḅe Pịrị Fịturu Mị
5Fịlawa ḅụ oyimaịn kọpụ fịnjị nwọ ọkị seni fịturu oyimaịn okpokpo fịnjị nwọ mịẹ. 6Fịturu ma àrị se mama ọrụ ḅụ koroma anga sonio sonio, ini jokoma goli se oḅolo gbẹịn dẹbụl mị ọgọnọ ḅụ, anị Nyanaḅọ Ḅe tọrụkuḅu ḅụ simeye mị. 7Jokoma insẹnsị se gbọrị ọrụ gbọrị ọrụ ḅụ chụa, se ḍiepakụma na fịye agba anị nwọsọ Nyanaḅọ Ḅe pịrịsam, se fịturu mị kiri ḍinma ḅaraḅụ. 8Ịnyọsara ene goyegoye, ọkịmun ḅụọḅụọ la, fịturu mị Nyanaḅọ Ḅe tọrụkuḅu ḅụ ini se koroma gbasoḅịa. Mịn anị sime Izrẹl mị pịrị fịrị-ẹ ọkịmun ḅene-ḅene la. 9Fịturu mị sime Erọn ḅe na ò furo ḅie apụma na pịrịmẹ, osiḅụ sime gbọrị nyọ ḅụ mị ini sime anị fịfịḅịaye-ẹ, anịatịḅị mịn mị opuma osiḅụ sime pẹkẹrẹ-ẹ ini se agbamịẹ Nyanaḅọ Ḅe pịrị se sime agbamịẹapụma pịrị fịye mị ḅụ.
Karakara Pịkị Ḅụgbẹịn Fomuḅara Elekima
10-11Gbọrị owuḅọ ḍawu ḅe Ijiptḅọ-ẹ, anị sịkị nyọngọrọma Izrẹlḅọ-ẹ, árị ẹrẹ anị Shẹlomit, Dibraị ḅe ḅarọ-ẹ, anị Danị sẹ ḅie ḅọ ḅe. Ini pike ịnyọsara sime anga mị ḅụ ori Izrẹlḅọ na kamụ sọmẹ. Ini kamụ mị sọarịogbo ọ̀ Tamụnọ Ḅe worimẹ, anị ini ò se ḅo Moziz ḅe pịrịye-ẹ, 12ini ọ̀ se kun ḅaraḅie koroma se koru mun ini se ori na mịẹḅịa ọkụ Nyanaḅọ Ḅe nwọ ḍuko ini pịrị sịkị lamẹ.
13Nyanaḅọ Ḅe nwọse Moziz ḅe ḅẹmẹ, 14“Oriḅọ ḅe ó pike ịnyọsara sime anga mị ḅụ ori ọkị paka. Ò nime mị wori sịkị naaḅọ naaḅọ ḅara se tomoniḅọ ḅe tịḅị gbana se ḍuko pakụma na ḅẹrẹ ọ̀ ḅarasimẹ, anị sịkị bebe Izrẹl sẹ mị mgba imgbele se ò gbin ḅaaḅịa. 15Anịsịkị ḍuko Izrẹlapụma pịrị na Tamụnọ Ḅe woriḅọ woriḅọ nụḅọ anịḅe fomuḅara daḅịa, 16ini pịkị nụḅọ ḅaaḅịa. Anị ḅọrọ Izrẹlḅọ anịkanịka Izrẹl mị ḅie anga igoniḅọ sọnị, Nyanaḅọ Ḅe woriḅọ, bebe Izrẹl sẹ mị mgba imgbele se nụḅọ gbin ḅaaḅịa.
17“Nweni ḅaaḅọ goyegoye ini nụḅọ ḅaaḅịa, 18pịkị jụmḅọ nama ḅaaḅọ-ḅaaḅọ nụḅọ jịn nama se nyanaḅọ ḅe gbẹịnḅịa. Anịa oloko anị ḍumo na ḍumo na ḅọrọmaḅịa.
19“Nemikase gbọrịḅọ yese jụmḅọ lamamẹ ọ̀ mịẹye mị ini nwọse ọ̀ mịẹ ọkịḅịa anị karamakaramasam. 20Se ori imgbe anyịmamẹ ḅẹḅẹ, oria imgbe ḅụ ini gbọrịye anyịmaḅịa; ò nemikase gbọrị tọrụmgbọlụ pụnmamẹ ḅẹḅẹ, ori sọnị oria gbọrị tọrụmgbọlụ ini nwọ pụnmaḅịa; ori aka mgbọlụ ḅakụ pọkọmẹ ḅẹḅẹ, oria aka ma ḅụ ini gbọrịye ḅakụ pọkọḅịa. Ò se jụmḅọ lamaye goyegoye ini pịkị anị se ọ̀ lama ọkịḅịa. 21Nama ḅaaḅọ nụḅọ gbẹịnḅịa, ọkụma tomoniḅọ ḅaaḅọ ini nụḅọ ḅaaḅịa. 22Mịn oloko mị sime ómine mgba pịrịmẹ, sime ómine Izrẹlapụma pịrịmẹ anị pịkị sime ómine na anga igoniapụma sọnị pịrịmẹ, anịatịḅị Ị̀rị̀ anị Nyanaḅọ ọ́mịna Tamụnọ Ḅe-ẹ.”
23Moziz ḅe mịn mị ḍuko Izrẹlapụma pịrị se so sịkị, ini tomoniḅọ ḅe ọkị ini pike sime anga mị ḅụ paka sikima se imgbele seni ò gbin ḅaamẹ. Mị ḅara mị ḅụ Izrẹlapụma Nyanaḅọ Ḅe tọn seni Moziz ḅe pịrịye mị nwọ mịẹmẹ.
Currently Selected:
Agbamịẹ Apụ 24: OBTP
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
