Agbamịẹ Apụ 20

Ḅịpịpokika Mị Ḅe Fomuḅara

1Nyanaḅọ Ḅe nwọse Moziz ḅe ḅẹmẹ 2ḍuko Izrẹlapụma pịrị, “Ọ́mịna ḅie anịkanịka ómine na anga jịn sẹ apụma ḅie pa nụḅọ tọkụ se Mọlẹk oru mị pịrị se anị tẹkẹḅọ goyegoye bebe sẹ mị mgba nụḅọ gbinḅa. 3Nụḅọ tọkụ se Mọlẹk mị pịrịḅọ goyegoye nụḅọ ị̀ya osiḅụ sime Ikowarị mị se fịafịakaye mịẹmẹ, nụḅọ pịkị ị̀ya fịafịa ẹrẹ mị ḅụgereremamẹ, à nụḅọ dapakaḅịa à pịkị ḅarị nụḅọ se ị̀ya tomonima ḅie gbọrịḅọ mịẹ ẹkẹ. 4Ọkụma nemikase sẹ mị ọ̀ mịẹye mị ḍikitọrụsin se ọ̀ ḅaakẹ ḅẹḅẹ, 5ị̀rị̀ ḅarana ọ̀ dapakaḅịa pịkị bebe oria furo mị mgba na pịkị ọ̀ ḅụ sọ se ị̀ ḅụ ḅereni nyanaka se mun Mọlẹk mị tẹkẹ apụ mamgba na. À ḅarị ini seni ị̀ya tomoni mịẹ ẹkẹ.

6“Nemikase fịapụ tẹmẹ ma chịn yeḅiarịapụma damamun ye ḅi ḅọ omi-ẹ ḅẹḅẹ, àrị ọ̀ dapakaḅịa, à pịkị ḅarị ò seni ị̀ya tomonima ḅie gbọrịḅọ mịẹ ẹkẹ. 7Ómine ọ́mịna ḅụ se fịafịaḅụ wẹrị, anịatịḅị Ị̀rị̀ anị Nyanaḅọ ọ́mịna Tamụnọ Ḅe-ẹ. 8Ómine ị̀ya olokoma koko, anịatịḅị Ị̀rị̀ anị Nyanaḅọ Ḅe-ẹ, à pịkị ọ́ mịẹ fịafịamamẹ.”

9Nyanaḅọ Ḅe ma olokoma chụamẹ. Ḍaḅọ anịkanịka nyengiḅọ woriḅọ goyegoye ini nụḅọ ḅaaḅịa; nụḅọ ḅaraḅo fị mị nụḅọ kọnye-ẹ.

10Nemikase nụḅọ juo Izrẹlḅọ ta na sẹfịḅọ omi-ẹ ḅẹḅẹ, ori na eremeniḅọ ma na ini ini ḅaaḅịa. 11Ḍawu ḅe oria erema ḅie gbọrịḅọ na gbolomaḅọ goyegoye ọ̀ ḅụgerere se ḍawu ḅe tọrụ chụamẹ, ori na eremeniḅọ ma na ini ini ḅaaḅịa. Inia ḅaraḅo fị mị ini kọnye-ẹ. 12Nụḅọ owutọkụ ta na gbolomaḅọ goyegoye, ini mama apụma ini ini ḅaa. Nụḅọ na pulo mịna sọ ḅọ na si nwẹngị kọnmẹ, inia ḅaraḅo fị mị ini kọnye-ẹ. 13Nemikase ò juo owuḅọ na gbolomaḅọ omi-ẹ ḅẹḅẹ, ini ḅụsimaye mịẹsam, ini mama apụma ini ini ḅaa. Inia ḅaraḅo fị mị ini kọnye-ẹ. 14Nyengiḅọ na arịa eremeni tọkụ na sime ḅọ omi-ẹ ḅẹḅẹ, ini tẹrẹ-a apụ mamgba ini fịnị seni ini dọkịma ini mịẹ ḅụgereremaye mị gose; ọkọ simeye ngịsị ó ḅerenima ọ́mịna ogboku anị mịẹ. 15Tomoniḅọ nemikase nama na gbolomamẹ ḅẹḅẹ, tomoniḅọ ḅe na nama ḅe na ini ini ḅaa. 16Eremeniḅọ nemikase nama na gbolomamẹ ḅẹḅẹ, árị na nama ḅe na ini ini ḅaa. Inia ḅaraḅo fị mị ini kọnye-ẹ.

17Nụmbụrarọ anịkanịka ori na pẹkẹrẹ mịna sọḅọ ọkị sime ḅọ omi-ẹ ḅẹḅẹ, ini amaogbo inia ḅụgererema se sẹ mị ḅie ini depakụmaḅịa. Ori oria mịnaḅọ na ḅụgbolomasam ọ̀ pịkị anịa fomuḅara nwọ daḅịa. 18Kiriọrịarị eremeniḅọ na gbolomaḅọ goyegoye ini mama apụ mamgba sẹ mị ḅie ini ini depakụmaḅịa, anịatịḅị ḅụfịafịamaka olokoma ini àrị korosam.

19Ḍawu nụmbụrarọ anịkanịka nyọngọrọ nụmbụrarọ na gbolomaḅọ goyegoye, pulo mịna si nwẹngị ḅe fomuḅara ini nwọ daḅịa. 20Ḍawu anịkanịka nyọngọrọ numbireowu ta na gbolomaḅọ goyegoye, ò numbireowu ḅe ḅụgereremamẹ, ori na árị na ini anịa fomuḅara daḅịa; inia ḅụ gbọrịḅọ sọnị tọkụ yi ẹkẹ. 21Numbireowu ta ọkị sime ḅọ goyegoye yika ḅụ ini sime fịḅịa, fịafịakaye ọ̀ nwọ mịẹsam ọ̀ pịkị numbireowu ḅe ḅụgereremasam.

22Nyanaḅọ Ḅe nwọ ḅẹmẹ, “Ị̀ya olokoma na pịkị à tọn ọ́ pịrị aye mamgba na ọ́ nwọ koko, mịẹse àrị ómine se mun-arị Kenan ama mị, anị ọ́ sịkị ẹka ḅara. 23Anịnyọ anga apụma inia amanganga ḅara mị ọ́ nwọ ḍawọma-o; ini oru tẹkẹtẹkẹ apụma à nwọ desin-aḅẹ ama mị ḅie, mịẹse ómine ama mị ḅie sọḅịa ọkụ. Inia si mịẹmịẹye mamgba gose ini ị̀ ḅụngụngụmasam. 24Ọkụma mị ngọ na lọkọlọkọ fịaye pakụma ama mị àrị anị ḅereni ọ́ pịrịmẹ na ọ́mịnaye-ẹ, à pịkị anị seni ọ́ pịrịḅịa, anị ndo mengi na ḅẹịn na ḅein nyọ mị. Ị̀rị̀ anị Nyanaḅọ ọ́mịna Tamụnọ Ḅe-ẹ, àrị ọ́ sẹlẹ sikimamẹ jịn sẹma ogboku ḅụ. 25Anịẹrẹchị namama na fenima na ogboku fịafịa aye na pịkị fịafịaka aye na ḅụ kịrị elekima ọ́ nwọ chụa. Ngịsị fịafịaka namama anịkanịka fịafịaka fenima ọ́ pẹịma. Àrị fịafịakẹ à nwọ ḅẹsam, anịẹrẹchị ómine àrị pẹịmẹ ḅẹḅẹ, àrị ọ́ mịẹse ọ́ fịafịaka apụ sọḅịa. 26Ọ́ fịafịaḅịa, se pịkị sime ị̀rị̀ ngẹrị pịrịḅịa anịatịḅị Ị̀rị̀ Nyanaḅọ Ḅe à fịafịamẹ. Jịn-a sẹma ogboku ḅụ, àrị ọ́ sẹlẹ sikimamẹ, mịẹse ó sime ị̀rị̀ kẹngẹ nwọ pịrịḅịa ẹrẹchị.

27“Anị ḅọrọ owuḅọ anịkanịka eremeniḅọ fịapụ tẹmẹ ma chịn se ye ḅiḅọ goyegoye ómine nụḅọ gbin ḅaaḅịa; mịn mị mịẹḅọ goyegoye nụḅọ ḅaraḅoye, mị nụḅọ ḅaaye-ẹ.”

Currently Selected:

Agbamịẹ Apụ 20: OBTP

Highlight

Copy

Compare