Agbamịẹ Apụ 16
16
Ḅẹrẹfama Agbamịẹ Ene Mị
1Erọn mama owuapụ awọ, ini osi nyanaka fịnị nwọse agbamịẹ Nyanaḅọ Ḅe pịrịye gose ini fịmẹ, ini fị ḅọrọso se Nyanaḅọ Ḅe ọkwẹịn Moziz ḅe pịrịmẹ. 2Ọ̀ nwọ ḅẹmẹ, “Ḍuko ị́ mbire Erọn ḅe pịrị na nyọ kikima ḅịtẹ mị ọḅụju Fịafịatẹịn Nyọ mị ḅie, ọ̀ sọ gbẹịn sịkị ḅụ kẹngẹ mị ori anịa ḅie sọmunḅịaye-ẹ, anịatịḅị anịanga Ọḅọkụ Igbe mị ḅịpịgbẹịnye mị ọgọnọ ḅụ, àrị ị̀ ḅụ ḍiepakụma-pakụmamẹ soḅuno mị ḅie. Ò nemikase ḅịpịpokikẹ ḅẹḅẹ, ọ̀ fịḅịa. 3Fịafịatẹịn Nyọ mị ọ̀ nwọ sọḅịa sịkị, anị ori ayamburama owoi nambulo se ḅo si agbamịẹḅịa, pịkị ajirima se ḅo dọkịma agbamịẹḅịa sịkị ḅụ kẹngẹ-ẹ.”
4Anịsịkị Nyanaḅọ Ḅe ma olokoma chụa ini pịrịmẹ. Tẹrẹmẹ Erọn ḅe ọ̀ Fịafịatẹịn Nyọ mị ḅie sọmun, ọ̀ tatarị mengi ḅiriḅịa, pịkị agbamịẹḅọ ḅụchụayema nwọ chụaḅịa: lọkọ pịkị koro ḅịtẹ ḅụchụaye mị na, kpụlụ tumochụaye mị na, ḅirikunye mị na, pịkị agbamịẹḅọ chu mị na.
5Izrẹl sẹ mị mama ẹkpẹịn nwọse ḅo Erọn ḅe pịrịḅịa si agba mị gose, pịkị gbọrị ajirima na se dọkịma agbamịẹḅịaye-ẹ. 6Gbọrị owoi nambulo ọ̀ nwọse ori na ò furo ḅie apụma na si agba nwọ mịẹḅịa. 7Anịsịkị mama ẹkpẹịn ma ọ̀ nwọ ọkị Nyanaḅọ Ḅe pakaḅoḅo Ikowarị mị ḅọkọ nwọ munḅịa. 8Mama ḍụparị ọ̀ nwọse yegbelaḅịa, anịsịkị gbọrị wu ḅụ ọ̀ chụaḅịa elekima anị “Sime Nyanaḅọ Ḅe pịrịmẹ,” ísí wu ḅe “ò sipụra oḅori nwọ sọḅịa.” 9Erọn ḅe, gbela ḅo ye mị ọlọ Nyanaḅọ Ḅe pịrị ẹkpẹịn ḅe ọkị se si agbamịẹ Nyanaḅọ Ḅe pịrịḅịa. 10Anịsịkị ini ḅụḅarasin ḅịa ẹkpẹịn ḅe fịka ḅụ ori ò seni Nyanaḅọ Ḅe pịrịḅịa, ori ò seni onwun ele mị ḅie fịrịmaḅịa, tomonima mịẹasi ma dekisinḅịa ẹrẹchị.
11Erọn ḅe owoi nambulo ḅe nwọse ori na ò furo ḅie apụma na ḅe si agba mị mịẹḅịa sịkị, 12ọ̀ ḅụrọchụa panị nwọ ọkịḅịa se binka anyị mgbọlụma se anịa ḅie chụa ḅeinma, anị agbamịẹ ẹbẹ mị ḅụ ọ̀ tan ayema, pịkị iḅi insẹnsị ḅụ mama ḅarakuḅu ḅeinḅịaye na ọ̀ nwọ ọkị se, àrị seni Fịafịatẹịn Nyọ mị ḅie sọmunḅịa. 13Anịanga Nyanaḅọ Ḅe tọrụkuḅu ḅụ ori insẹnsị mị seni fịnị mị ḅie chụaḅịa, se anịa onwoin mị anị Ọḅọkụ Igbe mị ḅịpịgbẹịnye mị kikimaḅịa, mịẹse ori anị ọrị se fịẹka ọkụ. 14Ori owoi nambulo ḅe oju pulo mị ḅụ ye ọkị, se ọ̀ ḅaratụmgbalị seni anịa ḅịpịgbẹịnye mị ọgọnọ sana, ọ̀ pịkị anị seni sọnọma sịkị se Ọḅọkụ Igbe mị tọrọkọ sanaḅịa.
15Anị ḅọrọ sịkị, ò se tomonima si agba mịẹḅịa ẹkpẹịn ḅe ọ̀ nwọ ḅaa se oria oju pulo mị se Fịafịatẹịn Nyọ mị ḅie sọmunḅịa, se anị seni ḅịpịgbẹịnye mị ọgọnọ ḅụ sanaḅịa, pịkị Ọḅọkụ Igbe mị tọrọkọ ḅụ na, anị owoi nambulo ḅe oju pulo mị ọ̀ nwọse ye ọkụ mị. 16Mịn ḅara anị ò se Fịafịatẹịn Nyọ mị mịẹfịafịamaḅịa ọkụ-ẹ, Izrẹlapụma inia fịafịaka mị na, pịkị inia si mamgba ḅụ na. Anị ọ̀ pịkị Ikowarị mị mịẹḅịa ọkụ-ẹ, anịatịḅị ini pike ịnyọsara sime nyọ mị ogboku ḅụ anị omi-ẹ, anị fịafịaka nyọ mị. 17Erọn ḅe ọ̀ Fịafịatẹịn Nyọ mị ḅie sọmun ye mịẹfịafịama mịẹmịẹye mị mịẹarị sịkị ḅụ ọkịmun ọ̀ pakaḅo sịkị la, gbọrịḅọ sọnị Ikowarị mị ḅie sime ẹkẹ. Ori na ò furo ḅie apụma na, pịkị bebe Izrẹl sẹ mị na mịẹfịafịama mịẹmịẹye mị ọ̀ nwọ mịẹ sosa ḅẹḅẹ, 18anịsịkị ọ̀ paka somun dọkịma agbamịẹ ẹbẹ mị mịẹfịafịamaḅịa. Owoi nambulo ḅe oju pulo mị na ẹkpẹịn ḅe oju pulo mị na, ọ̀ nwọ ọkị se anịmgba seni agbamịẹ ẹbẹ mị ịvalị ma ḅụ saraḅịa ịkọlị-ịkọlị ḅụ. 19Ori ọ̀ ḅaratụmgbalị seni nama oju pulo mị se sọnọma sịkị seni agbamịẹ ẹbẹ mị sanaḅịa. Mịn ḅara mị ò seni Izrẹlapụma mịẹasi ma ḅụ ini mịẹfịafịamaḅịa ọkụ-ẹ.
Si Pụra Seso Oḅori Ḅe
20Erọn ḅe ọ̀ Fịafịatẹịn Nyọ mị na, kirikọn Nyanaḅọ Ḅe pakaḅoḅo Ikowarị mị mgba na, pịkị agbamịẹ ẹbẹ mị na nwọ mịẹfịafịama so sịkị, ò ḍumo ẹkpẹịn, anị si pụra seso ẹkpẹịn ḅe ọkịḅo Nyanaḅọ Ḅe pịrịḅịa. 21Oria mama ḅarama ọ̀ nwọse ẹkpẹịn ḅe tịḅị ọgọnọ gbana se Izrẹlapụma mịẹsa sima na, pịkị nyana ḅerenika na, ininachịn ḍumo ma na nwọ ḍukopakụma se ẹkpẹịn ḅe tịḅị ọgọnọ gbanaḅịa. Anịsịkị ini tọn gbọrị owuḅọ ẹkpẹịn ḅe de onwun ele mị ḅie famaḅịa. 22Ẹkpẹịn ḅe inia si mamgba dekiso tomoni angaka nyọ nwọ munḅịa.
23Anịsịkị Erọn ḅe ò so Ikowarị mị ḅie sọmun se ọ̀ chụa Fịafịatẹịn Nyọ mị ḅie sọmun agbamịẹḅọ ḅụchụayema sin se anịanga koromaḅịa. 24Gbọrị fịafịa nyọ ḅụ ò sime mengi ḅiriḅịa, se ọ̀ ḅarakuḅu ḅụchụayema nwọ ọkị chụaḅịa. Anị ḅọrọ sịkị, ọ̀ pakamun dọkịma agba mịẹḅịa se oria sima na pịkị tomonima ayema na dekisinḅịa. 25Si agba mị mịẹ nama ḅe ḅẹlẹkị mị ò se agbamịẹ ẹbẹ mị ọgọnọ ḅụ dọkịmaḅịa. 26Si pụra seso ẹkpẹịn ḅe de mun onwun ele mị ḅie fama owuḅọ ḅe, ori oria ḅụchụayema sịkịrị, pịkị mengi ḅiri sosịkị anị ò vinpịkịḅo ini pike ịnyọsara sime nyọ mị ḅie sọḅịaye-ẹ. 27Owoi nambulo ḅe na ẹkpẹịn ḅe na anị ini se si agba mị mịẹaye ma, ini àrị deki ini pike ịnyọsara sime nyọ mị ḅie pakasomun dọkịmaḅịa, anị arịa oju pulo mị ini nwọse Fịafịatẹịn Nyọ mị mun si dekisin ayema. Nama oju apụra mị na, mịnị mị na, pịkị ḅụlọ ḅie ayema na ini dọkịmaḅịa. 28Nwọ àrị dọkịmaḅọ ḅe ori oria ḅụchụayema sịkịrị pịkị mengi ḅiri sosịkị anị ò vinpịkị so ini pike ịnyọsara sime nyọ mị ḅie sọmunḅịaye-ẹ.
Ḅẹrẹfama Ene Mị Koko
29Ma olokoma ini àrị kokomun ḅụọ ḅụọ laḅịa. Sọnọma akalụ mị ḅie oyi-a ḍin ene mị ḅụ, Izrẹlapụma na, ini na anga igoni apụma na ini ḅuruseḅụḅaama se tẹkẹḅịa, gbọrị fịrị sọnị ngịsị ini nwẹngị-ẹkẹ. 30Anị ene mị ḅụ se inia sima ḅụ ini mịẹfịafịamaḅịa mịẹmịẹye mị ini nwọ mịẹḅịa, mịẹse ini fịafịaḅịa ọkụ Nyanaḅọ Ḅe tọrụkuḅu. 31Anị ene mị opuma osiḅụ sime ene anị nwọ sọḅịa, anị ini ḅuruseḅụḅaama se tẹkẹ, pịkị ngịsị gbọrị fịrị sọnị nwọ nwẹngị ẹka ene-ẹ. Ma olokoma ini àrị kokomun ḅụọ ḅụọ laḅịa. 32Ini karakara ḅaraḅụ se Gele Agbamịẹḅọ fịrịkiri ḅụ koroma pịkị pulo se tịḅị sarasaḅọ ḅe anị ḍawu ḅe kiri ḍinmaḅịaḅọ ḅe anị ḅụmịẹfịafịama mịẹmịẹye mị mịẹmịẹḅịaye-ẹ. Ori agbamịẹapụ ḅụchụaye mị chụaḅịa 33se Fịafịatẹịn Nyọ mị na, kirikọn Nyanaḅọ Ḅe pakaḅoḅo Ikowarị mị na pịkị agbamịẹ ẹbẹ mị na, agbamịẹapụma na, pịkị sẹ mị ḅie sime tomoni mamgba na. 34Ma olokoma ini àrị kokomun ḅụọ ḅụọ laḅịa. Mịn mịẹmịẹye mị kụra tịḅị gbọrị sịkị kẹngẹ mị ini anị mịẹḅịaye-ẹ, se Izrẹlapụma mịẹfịafịama inia sima ḅụ.
Anịẹrẹchị Moziz ḅe Nyanaḅọ Ḅe tọn ọkụ mị anị ọ̀ pịkị mịẹ ọkụ-ẹ.
Currently Selected:
Agbamịẹ Apụ 16: OBTP
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
