Agbamịẹ Apụ 14
14
Oju Kiri Obi Kọnso Se Ḅụmịẹfịafịama Mị
1Nyanaḅọ Ḅe ma olokoma se Moziz ḅe 2pịrịmẹ anị ḅụkan obi kọnso se ḅo ḅụ iḅisa ḅọ ḅụmịẹfịafịama gbolomaye. Ọ̀ fịafịasam ini nwọ ḍukopakụmaḅịa ene mị ḅụ ini ò se ḅo agbamịẹḅọ ḅe pịrịḅịa, 3se agbamịẹḅọ ḅe ori ọkị ini pike ịnyọsara sime nyọ mị ḅụ pakaso mun iḅiọkụma ò ḍikikpaịnmaḅịa. Nemikase obi mị gwọsam nwọ ḅẹḅẹ, 4agbamịẹḅọ ḅe ọ̀ kụrọ pịrịḅịa na ini mama fịafịa feni nwọ ọkịḅo, pịkị awụ chịn gbọrị ikiḅa na, gbọrị pulo-pulo ḍiki na, pịkị gbọrị chịn ịsaka na. 5Anịsịkị agbamịẹḅọ ḅe ọ̀ kụrọ pịrị se ini mama fenima ḅụ gbọrị wu ḅaa, se ịwọ ideri mengi ḅie sime okoma ḅẹlẹ ḅie daḅịa. 6Ori ísí feni ḅe na, awụ chịn ikiḅa mị na, pulo-pulo ḍiki mị na, pịkị chịn ịsaka mị na ọkị se ini ḅaa feni ḅe oju pulo mị ḅie suḅịa. 7Pulo mị ọ̀ nwọse sọnọma sịkị seni ḅụkan obi mị kọnse ḅụmịẹfịafịamaḅịaḅọ ḅe sanaḅịa, anịsịkị ò ḍukopakụmaḅịa na ọ̀ fịafịasam. Ḍumo feni ḅe ọ̀ nwọ wẹrịso se ò fin ele mị saḅa soḅịa. 8Tomoniḅọ ḅe ori oria ḅụchụayema sịkịrị, ọ̀ ḅụ inime mamgba sẹịnsin, se mengi ḅiriḅịa, anịsịkị re mị ọ̀ fịafịasaye-ẹ. Ori ineda so ini pike ịnyọsara sime nyọ mị munḅịa, ọkụma oria ikowarị mị ḅie ọ̀ sọka mun sọnọma ḍin nwọ laḅịa. 9Sọnọma ḍin karama ene mị ḅụ ọ̀ pịkịna ọ̀ tịḅị na, ọgụrẹ ma na, ọ̀ tọrụ anjị na, pịkị ọ̀ ḅụ sime inime mamgba nwọ sẹịnsinḅịa; oria ḅụchụayema ọ̀ nwọ sịkịrị pịkị mengi ḅiriḅịa, anịsịkị re mị ọ̀ fịafịasaye-ẹ.
10Nine-a ḍin karama ene mị ḅụ mama ajirima na gbọrị kụra lasa anana na ọ̀ nwọse ḅoḅịa, ḅẹḅẹaye ḅụ oforika aye, oliv pulo se gwa fịlawa tẹrẹ-a loko na, pịkị oliv pulo gbọrị kongo ololo se tẹrẹ-a kiri pu ḅe gbọrị kiri na. 11Agbamịẹḅọ ḅe ọ̀ ma agbamịẹaye ma na tomoniḅọ ḅe na ọkị se Nyanaḅọ Ḅe pakaḅoḅo Ikowarị mị ḅọkọ munḅịa. 12Anịsịkị agbamịẹḅọ ḅe ori ajirima ma ḅụ gbọrị wu ọkị se pulo gbọrị kongo ololo se tẹrẹ-a kiri pu se gbọrị kiri mị ḅụ chụa se kpoto pẹkẹrẹḅo agbamịẹ Nyanaḅọ Ḅe pịrịḅịa. Ori àrị se sosikima ḍiepịrịye agbamịẹ Nyanaḅọ Ḅe pịrịḅịa; anị sime agbamịẹḅọ ḅe pịrịye ḅaraḅụ. 13Ini se si agba na, dọkịma agba na mịẹḅịa namama ḅaaḅaa osiḅụ sime nyọ mị ḅụ mị ori ajirima ḅe ḅaaḅịaye-ẹ. Ori ọkọ mịẹḅịa anịatịḅị kpoto pẹkẹrẹḅo agba mị na si agba mị na sime agbamịẹḅọ ḅe pịrịmẹ, anịatịḅị àrị opuma osiḅụ omi-ẹ. 14Agbamịẹḅọ ḅe ori anana tọkụ ḅe oju pulo mị ḅụ ye ọkị se ini mịẹfịafịamaḅịaḅọ ḅe amaḅaranga ḅeri mị ọgọnọ ḅụ na, amaḅaranga opu ḅaratụmgbalị mị ḅụ na, amaḅaranga opu ḅụọtụmgbalị mị ḅụ na nwọ tanḅịa. 15Agbamịẹḅọ ḅe ori oliv pulo mị ḅụ ye ọkị se, oria ereḅaranga ḅarakuḅu mị ḅie sarase, 16oria amaḅaranga ḅaratụmgbalị se anịa ḅie gbọ se sọnọma sịkị se anị nyọ ḅụ Nyanaḅọ Ḅe tọrụkuḅu ḅụ sanaḅịa. 17Ọ̀ ḅarakuḅu ḅie sime pulo mị na anana tọkụ ḅe oju pulo mị na ọ̀ nwọ ọkị se ini mịẹfịafịamaḅịaḅọ ḅe amaḅaranga ḅeri mị ọgọnọ ḅụ na, oria amaḅaranga opu ḅaratụmgbalị mị ḅụ na, pịkị oria amaḅaranga opu ḅụọtụmgbalị mị ḅụ na tanḅịa. 18Ọ̀ ḅarakuḅu ḅie kọn pulo mị ọ̀ nwọse tomoniḅọ ḅe tịḅị saraḅịa. Mị ò seni ḅụmịẹfịafịama mịẹmịẹye mị mịẹḅịa ọkụ mị-ẹ.
19Anịsịkị agbamịẹḅọ ḅe ò si agba mị mịẹḅịa pịkị, ḅụmịẹfịafịama mịẹmịẹye mị mịẹḅịa. Anịeso, anị dọkịma agbamịẹḅịa nama ḅe ọ̀ nwọ ḅaaḅịa 20se anị seni fịaye mgbọlụ agba mị na chụa dọkịmaḅịa agbamịẹ ẹbẹ mị ọgọnọ ḅụ. Mị ḅara mị anị agbamịẹḅọ se ḅụmịẹfịafịama mịẹmịẹye mị mịẹḅịa ọkụ mị-ẹ, se tomoniḅọ ḅe ọ̀ fịafịaḅịa.
21Nemikase tomoniḅọ ḅe igweinḅọ-ẹ se ori ineda mịẹkụkụḅịaye ofori-ẹ ḅẹḅẹ, gbọrị ajirima kẹngẹ ọ̀ nwọse ḅo oria ḅụmịẹfịafịama mịẹmịẹye mị mịẹḅịa, anị oria kpoto pẹkẹrẹḅo agbamịẹ Nyanaḅọ Ḅe pịrị ḅaraḅụ, Nyanaḅọ Ḅe oria sosikima ḍiepịrịye agba mị sime agbamịẹḅọ ḅe pịrịmẹ. Oliv pulo se gwa fịlawa gbọrị loko kẹngẹ ọ̀ nwọse ḅoḅịa fịaye mgbọlụ agba mị gose pịkị oliv pulo ḅụ gbọrị kongo ololo se tẹrẹ-a kiri pu ḅe gbọrị kiri na. 22Ọ̀ pịkị mama okuku anịkanịka mama elesika na nwọse ḅoḅịa, gbọrị wu anị si agbamịẹye-ẹ, ísí wu ḅe anị dọkịma agbamịẹye-ẹ. 23Oria ḅụmịẹfịafịama mịẹmịẹye mị ḅe nine-a ḍin karama ene mị ḅụ ori àrị ọkịḅo agbamịẹḅọ ḅe pịrịḅịa, Nyanaḅọ Ḅe pakaḅoḅo Ikowarị mị ḅọkọ ḅụ. 24Agbamịẹḅọ ḅe ori anana tọkụ ḅe na oliv pulo mị na nwọ ọkị se sosikima ḍiepịrịye agbamịẹ Nyanaḅọ Ḅe pịrịḅịa, anị sime agbamịẹḅọ ḅe pịrịye ḅaraḅụ. 25Ori anana tọkụ ḅe ḅaa se oria oju pulo mị ḅụ ye ọkị se tomoniḅọ ḅe amaḅaranga ḅeri mị ọgọnọ ḅụ na, oria amaḅaranga opu ḅaratụmgbalị mị ḅụ na pịkị oria amaḅaranga opu ḅụọtụmgbalị mị ḅụ na nwọ tanḅịa. 26Agbamịẹḅọ ḅe ò pulo mị ḅụ ye ọkị se oria ereḅaranga ḅarakuḅu mị ḅie sara 27se oria amaḅaranga gbọrị ḅaratụmgbalị se anị seni anị nyọ ḅụ Nyanaḅọ Ḅe tọrụkuḅu sanaḅịa sọnọma sịkị ḅụ. 28Ọ̀ nama oju pulo mị se tan anga ma ọ̀ pịkị oliv pulo mị se nwọ tanḅịa, tomoniḅọ ḅe amaḅaranga ḅeri mị ḅụ na, oria amaḅaranga opu ḅaratụmgbalị mị ḅụ na, pịkị oria amaḅaranga opu ḅụọtụmgbalị mị ḅụ na. 29Ọ̀ ḅarakuḅu ḅie kọn pulo mị ọ̀ nwọse tomoniḅọ ḅe tịḅị kiri saraḅịa, mị ḅara mị ò seni ḅụmịẹfịafịama mịẹmịẹye mị mịẹḅịa ọkụ-ẹ. 30Anịsịkị okuku ma anịkanịka elesika ma ḅụ gbọrị wu ọ̀ nwọse se 31si agbamịẹḅịa, pịkị ísí wu ḅe se dọkịma agba nwọ mịẹḅịa; pịkị fịaye mgbọlụ agba mị na. Mị ḅara mị anị agbamịẹḅọ ḅe se ḅụmịẹfịafịama mịẹmịẹye mị mịẹḅịa ọkụ-ẹ. 32Mị ḅụkan obi kọnḅọ ḅe se ọ̀ ḅụmịẹfịafịamaḅịa oloko mị-ẹ, ori ineda seni agba mị mịẹ gbẹịn ayema nyanaḅokẹ nwọ ḅẹḅẹ.
Warị Oḅopuroḅa Chụa Mị
33Nyanaḅọ Ḅe ma olokoma se Moziz ḅe na Erọn ḅe na 34-35pịrịmẹ anị oḅopuroḅa warị ḅụ wasama na gbolomaye ḅụ. (Ma olokoma kiri ọkịḅịa sịkị anị Izrẹlapụma Kenan mị ḅie sọmun ḅọrọso sịkị-ẹ, anị Nyanaḅọ Ḅe ḅereni ini pịrị na sime ini pịrịḅịa nwọḅẹ ama mị.) Tomoniḅọ nemikase ḍọkịḅo ọrịmẹ na Nyanaḅọ Ḅe oḅopuroḅa se nụḅọ warị fịrịmasam nwọ ḅẹḅẹ, ò somun anị gbolomaye ḍuko agbamịẹḅọ ḅe pịrị. 36Agbamịẹḅọ ḅe ma ò ḅo oḅopuroḅa ma ḍikika simeogbo ọ̀ kụrọ pịrịḅịa na anịa ḅie sime aye mamgba ini tan pakụma; mịẹsosịkị ọ̀ ḅẹ ẹka ḅara na warị mị ḅie sime aye mamgba fịafịakẹ. Anịsịkị ò mun warị mị ḅụ 37oḅopuroḅa mị ḍikikpaịnmaḅịa. Nemikase elelenda tọrụ anịkanịka pulo-pulo tọrụ chụaye omi-ẹ ḅẹḅẹ, pịkị warị agbagba mị pẹị ḅie sọ aḅẹ ḅẹḅẹ, 38ọ̀ warị mị ịkasị koroma se soḅịa sọnọma ḍin ḅụ. 39Sọnọma ḍin karama ene mị ḅụ ò vinpịkị ḅo se anị ḍikikpaịnmaḅịa. Nemikase oḅopuroḅa mị wasamamẹ ḅẹḅẹ, 40ọ̀ kụrọ pịrịḅịa na warị mị ḅụ oḅopuroḅa chụa ḍụparịma ini nwọ sọkị sin se àrị se pakaso mun opu ama mị ḅie ḅụ gbọrị fịafịaka nyọ ḅụ gbin wokuma. 41Anị ḅọrọ sịkị warị mị ḅie ḅụ warị agbagba ma ọ̀ nwọ kpakpa, se kiri sara ayema ọ̀ tan pakaso mun opu ama mị ḅie ḅụ gbọrị fịafịaka nyọ ḅụ saraḅịa. 42Anịsịkị ini jịn-a ḍụparị se ini sin-a ḍụparịma kiri ḍinma pịkị ịwọma warị agbagba ma sikiriḅịa.
43Nemikase ini warị mị ḅụ ḍụparịma sin pịkị anị kpakpa so, pịkị sikiri fama sose oḅopuroḅa ma kpoto warị mị ḅie chụamẹ ḅẹḅẹ, 44agbamịẹḅọ ḅe ò mun ḍikiḅịa. Anị nemikase wasamamẹ ḅẹḅẹ, warị mị fịafịakẹ. 45Ini anị kan koromaḅịa, se anịa ḍụparịma na, anịa chịnma na, pịkị ini se anị sikiri aye mamgba na, opu ama mị ḅie ini àrị tan pakaso mun fịafịaka gbọrị nyọ ḅụ saraḅịa. 46Warị mị ịkasị sime sịkị mị ḅụ anịa ḅie sọḅọ goyegoye nụḅọ fịafịaka ḅụ sime mun saso ḅiri laḅịa. 47Warị mị ḅie ḅọlọlọ anịkanịka yefịḅọ goyegoye nụḅọ mịna ḅụchụayema sịkịrịḅịa.
48Nemikase, agbamịẹḅọ ḅe ḅo warị ḍiki se so, ini pịkị kpoto warị mị sikirisam, se oḅopuroḅa mị ḅarị pakakẹ ḅẹḅẹ, ò ḍukopakụmaḅịa na warị mị fịafịamẹ, anịatịḅị oḅopuroḅa mị anị gbọtụma sosam. 49Se warị mị mịẹfịafịama ḅụ, mama feni ọ̀ nwọ ọkịḅịa, awụ chịn na, pulo-pulo ḍiki na, pịkị chịn Ịsaka na. 50Feni ma ḅụ ọ̀ gbọrị wu ḅaa se ịwọ ideri mengi ḅie sime okoma ḅẹlẹ ḅie daḅịa. 51Anịsịkị ori awụ chịn mị na, chịn Ịsaka mị na, pulo-pulo ḍiki mị na, pịkị ḍumo feni ḅe na nwọse ọ̀ ḅaa feni ḅe oju pulo mị na ịwọ ideri mengi mị na ḅie su seni bebe warị mị mgba sanaḅịa sọnọma sịkị ḅụ. 52Mị ḅara anị ò seni feni ḅe oju pulo mị na, ideri mengi mị na, ḍumo feni ḅe na, awụ chịn mị na, chịn Ịsaka mị na, pịkị pulo-pulo ḍiki mị na se warị mị mịẹfịafịamaḅịa ọkụ mị-ẹ. 53Anịsịkị ò ḍumo feni ḅe wẹrịso se ori ele mị ḅie fin opu ama mị ḅie pakasoḅịa. Mị ḅara anị ò seni warị mị mịẹfịafịama mịẹmịẹye mị mịẹḅịa ọkụ mị-ẹ, se anị fịafịaḅịa.
54Ma anị ḅụkan obi ma oloko ma-ẹ; 55-56ịnọ ma na, ọpọpọlị ma na, anịkanịka dọkịaye ma sọnị; pịkị ḅịtẹ ḅụ anịkanịka warị ḅụ paka oḅopuroḅa oloko ma-ẹ. 57Ma olokoma anị, ye fịafịa ḅụ sime sịkị na pịkị ye fịafịaka sịkị na nwọ ḍiepakụmaḅịaye-ẹ.
Currently Selected:
Agbamịẹ Apụ 14: OBTP
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
