Agbamịẹ Apụ 12

Eremeniḅọ Tọkụ Yi So Se Ḅụmịẹfịafịama Mị

1Nyanaḅọ Ḅe ma olokoma se Moziz ḅe pịrịmẹ 2Izrẹlapụma gose. Eremeniḅọ owutọkụ yimẹ ḅẹḅẹ, sọnọma ḍin á nwọse fịafịaka ḅụ simeḅịa, árịa sịkị ọrị sịkị ḅụ á sime sime ọkụ mị. 3Nine-a ḍin karama ene mị ḅụ ini tọkụ ḅe ḅụpẹlẹḅịa. 4Ḍin soi tẹrẹ-a ḍin fịnjị á ḅo nwọse anịaḅụ chụa, anịsịkị anị á tẹmẹḅụ fịafịa se pulo á ḅụ kụnụnụḅịaye-ẹ; fịafịaye goyegoye á ḅara se lama ẹkẹ, osiḅụ sime Ikowarị mị ḅie sọnị á sọmun ẹkẹ, ọkịmun árịa ḅụmịẹfịafịama ḍin ma kara sịkị nwọ laḅịa.

5Eremeniḅọ eremeni tọkụ yimẹ ḅẹḅẹ, oyi inein-a ḍin fịnjị á nwọse fịafịaka ḅụ simeḅịa, árịa sịkị ọrị sịkị ḅụ á sime sime ọkụ mị. Ineinfa ḍin-a tesi oyi fịnjị anịaḅụ sọ sịkị mị á tẹmẹḅụ fịafịa se pulo á ḅụ kụnụnụḅịaye-ẹ.

6Arịa ḅụmịẹfịafịama ḍin ma karasa ḅẹḅẹ, á ḅọrọ owutọkụ anịkanịka eremenitọkụ yi sọnị, gbọrị kụra lasa anana tọkụ á nwọse ḅo agbamịẹḅọ ḅe pịrịḅịa Nyanaḅọ Ḅe pakaḅoḅo Ikowarị mị ḅọkọ ḅụ; se dọkịma agbamịẹḅịa, gbọrị elesika anịkanịka okuku á pịkị nwọse ḅoḅịa si agba mị gose. 7Agbamịẹḅọ ḅe ori árịa agbamịẹye mị se agbamịẹ Nyanaḅọ Ḅe pịrịḅịa, seni árịa fịafịaka mị dekisinḅịa, se á ḅo tẹmẹḅụ fịafịasa ḅọ nwọ sọḅịa. Mị anị eremeniḅọ tọkụ yi so se mịẹḅịaye mị-ẹ.

8Eremeniḅọ ma nemikase ineda anana tọkụ nyana ḅoẹkẹ ḅẹḅẹ, árị mama elesika anịkanịka mama okuku nwọse ḅoḅịa gbọrịye dọkịma agbamịẹye-ẹ, ísí wu ḅe si agbamịẹye-ẹ, anịsịkị agbamịẹḅọ ḅe agba mị mịẹ se árịa fịafịaka mị dekisinḅịa, se á ḅo tẹmẹḅụ fịafịasaḅọ nwọ sọḅịa.

Currently Selected:

Agbamịẹ Apụ 12: OBTP

Highlight

Copy

Compare