Chukusakị 49
49
Jekọb Ḅe Oria Kuluma Ọkwẹịn Ma
1Jekọb ḅe oria awọma chịn se ini ḅẹmẹ, “Ó koḅiria se à tọrọkọju ọ́mịna ḅụ pakaḅịaye ḍuko ọ́ pịrịḅịa:
2“Ị̀ya awọ ó koḅiria se ị̀ poki, ị̀rị̀ anị ọ́mịna ḍa Jekọb ḅe-ẹ.
Ómine ị̀ poki ị̀rị̀ ọ́mịna ḍa Izrẹl ḅe-ẹ.
3“Rubẹnị, ị̀ya tatarị tọkụ, ị́rị́ anị ị̀ya kụrọ-ẹ
Pịkị ị̀ya tatarị tọkụ, àrị ogu lasịkị,
Ị̀ya awọma ḅụmgba, opuaye mịẹtẹịn pịkị kụrọtẹịnḅọ-ẹ.
4Ị́ opuma ịganịarị owoi seri mengi kịkẹmẹ,
Ọkụma ị́ ye latẹịnḅọ sọ ẹkẹ,
Anịatịḅị ị́ ị̀ ta ị̀ya ịgwa eremeniḅọ ma na gbolomamẹ,
Se ị́ ḍaḅe oria mọnọye mị osikẹ.
5“Simiọnị ḅe na Livaị ḅe na mịnapụ-ẹ.
Ini inia owuniayema se ḅẹrẹpakụmamẹ.
6Inia ḅọị ọkwẹịn ma ḅie à sọ paka ẹkẹ,
Inia koḅiria ma ḅie sọ à gboloma ẹkẹ,
Anịatịḅị ini akụ kuḅie se tomoni ḅaamẹ,
Pịkị nambulo mịẹ ikelima se àrị ḅarị nwẹngịkẹ.
7Worinime sime inia akụ kuḅie mị pịrị, anịatịḅị anị opuma ḅalafamamẹ,
Pịkị sime inia owoi mị na pịrị, anịatịḅị simịẹmịẹye-ẹ.
Àrị ini galagalamaḅịa Izrẹl sẹ mị ḅie.
Anịa tomonima ḅie àrị ini galagalamaḅịa.
8“Juda, ị́ya mịnapụma ini ị́ tokoniḅịa.
Ị́rị́ na tarakapụma kọngọ ḅụ ị́ ini ọlọḅịa.
Ị́ya mịnapụma ini tịḅịtu ị́ pịrịḅịa.
9Juda ḅe ọ̀ chịrịḅa kịkẹmẹ,
Ori ọ̀ ḅaaḅịaḅọ ḅaase, ọ̀ pịkịmamun oria pokolo ḅie sọ,
Se ọ̀ ḅụ ịsụn pịkị ḅọlọlọ aḅẹ.
Ọ̀ tọrụdaḅịa gbọrịḅọ sọ ofori-ẹ.
10Juda ḅe amanyana amgbara mị ọlọḅịa,
Ò furo mị anị amanyana gbasoḅịaye-ẹ.
Sẹsẹ gbẹịnye se ḅo ọ̀ pịrịḅịa
Se ọ̀ tọrọkọ ḅịpị poki ḅụ tịḅịtu ọ̀ pịrịḅịa.
11Oria kala yepụra asụn ḅe ọ̀ nwọse tụmgbakị elelenda chịn ḅụ kpọmẹ,
Tụmgbakị elelenda chịnma ḅụ iḅitẹịnye mị ḅụ.
Pulo-pulo iru ḅie ori oria ḅụchụayema sịkịrịmẹ.
12Ọ̀ tọrụmgbọlụma ere iruḅu ḅụ pulo-pulo-pulomẹ,
Oria aka ma ndo mengi ḅu ḅụ ḅịaḅịa mẹ.
13“Zẹbụlọnị ḅe ọ̀ tọrụ aka angaḅịa.
Oria pọkụ ma onwoin arụ agba-agba nyọ sọḅịa,
Oria sẹ mị anị ọkịmun Saịdọn mị laḅịa.
14“Ịsaka ḅe, ori iḅi ikuaye pụnụma
Kpatụ yepụra asụn nẹngịkẹ.
15Ọkụma ori ọrịmẹ na ịnyọ sara nyọ mị iḅimẹ
Pịkịna amakiri mị ḅụḅẹlẹmamẹ.
Anịgose ori okoku tu se ye mị dekimẹ
Se ini ọ̀ mịẹse ori omoniḅọ ḅara se fịrịnwẹngịmẹ.
16“Danị ḅe, ọ̀ ḅẹrẹtọnḅọ sọ oria tomonima pịrịḅịa.
Ini ísí Izrẹl sẹma kịkẹḅịa.
17Danị ḅe ori ateli anga sime oruwu sọḅịa,
Nweni ḅaaḅaa oruwu ateli anga sime ọkụ,
Anị asụn ḅe ḅụọ-tongu gbọ,
Mịẹso sịkị ò se nwẹngịarịḅọ ḅe oria ọgọnọ ḅịkịkoroḅịa ọkụ.
18“Àrị ị́ya ḍụaḅọrọma mị korumẹ, Nyanaḅọ.
19“Gadị ḅe furuapụ ogbo ọ̀ gbẹịnma chịẹḅịa,
Ọkụma ò vinpịkị se ini ḍukoḅịa.
20“Asha ḅe, oria kirima iḅiọkụma fịaye pakụmaḅịa.
Ori amanyanaḅọ fị-gbẹịn fịye nyanaḅo ḅịa.
21“Naftalaị ḅe ori anị ḅụfụkamaye oforiḅụ mangị soarị tụḅụra-ẹ,
Anị iḅi tụḅụra awọ yi àrị wu.
22“Josẹf ḅe kịkẹye, anị kiri ḅie pakaḅoarị mengi aka ḅụ sime piri ḅie owoi yepụra asụn,
Chịngị anga sịkị sime piri ḅie owoi kala asụn.
23Ori na tarakapụma ḅalafama ḅara se ọ̀ gbẹịnma chịẹ se
Inia lubu ma na ḍẹịn ma na nwọse ò ḍukomẹ.
24Ọkụma oria lubu mị jikekẹ,
Se ọ̀ ḅarama mịẹ kụrọmamẹ
Se Jekọb Opu Tamụnọ Ḅe kụrọ ḅụ,
Anana Ḍikiḍikiḅọ Ḅe, Izrẹl Kokoḅọ Ḅe.
25Ị́ ḍaḅe Tamụnọ Ḅe anị ḅarachụa ị́ pịrịye-ẹ,
Kụrọmamgba Nyana Tamụnọ Ḅe
Anị ọgọnọju ḅo ene na
Kiri chuku ḅie ḅo gbun mengi na se ị́ ḅẹlẹmaḅọ ḅe,
Pịkị tọn-a nambulo na awọ na nwọse ị́ ḅẹlẹmamẹ,
26Ịpịamgba na fịturu mịẹ fịlawa na ḅẹlẹma,
Olomusịkị tụndụ ḅe ḅẹlẹma na,
Sime gbaso chịngị ḅụ ḅo tọrụḅẹlẹmaye na.
Ye ma ḅẹlẹma ma Josẹf ḅe tịḅị ọgọnọ gbana,
Oria mịnapụma ḅụ ini sẹlẹ sikimaḅọ ḅe tọrụ anjị ọgọnọ gbana.
27“Bẹnjamin ḅe owoi piri ḅie obiri ọ̀ nwọ kịkẹmẹ.
Dede na saso na ḅaa na pẹị na ḅụ ò simeḅịa.”
28Ma anị Izrẹl oyimaịn furo fịnjị ma-ẹ, mị anị pịkị inia ḍaḅe kọn gbẹịn kuluma ọkwẹịn-ẹ ḅaḅa se gbọrịḅọ gbọrịḅọ ḅẹye-ẹ.
Jekọb Ḅe Oria Fị Na Ḍipi Na
29Anị Jekọb ḅe ọ̀ tọn oria owuapụ awọma pịrịye-ẹ, “Mịọkụ à nwọ mun ị̀ya tomonima ḅụ sọ-ẹmun-arị sịkị fị ḅụ, ómine ị̀ se ini ị̀ya ḍapụma ḍipi nyọ, Ifrọn Hitaịḅọ ḅe oria ele ḅie sime pokolo mị ḅie ḍipi, 30Makpẹla Mamre ḅụ ịrụapakapaka nyọ, Kenan ama mị ḅie. Ebraham ḅe mị pokolo mị na ele mị na fẹ mẹ Ifrọn ḅe ḅara ò se ḍụẹịn ḍipiḍipiḅịa ẹrẹchị. 31Anịnyọ anị ini Ebraham ḅe na tarọ Sera ma na nwọ ḍipiye-ẹ; anịnyọ ini pịkị Aịzịk ḅe na tarọ Ribeka ma na ḍipimẹ; pịkịna anịju anị ị̀rị̀ à Lia ma ḍipi nyọ-ẹ. 32Ele mị na anịa ḅie sime pokolo mị na Hitaị apụma ḅara wa fẹ mẹ. Anịnyọ ómine ị̀ ḍipi.” 33Jekọb ḅe mayema tọn oria awọma pịrịso sịkị, ọ̀ pịkị ḅọlọlọ se fịye-ẹ.
Currently Selected:
Chukusakị 49: OBTP
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
