Chukusakị 33
33
Jekọb Ḅe Isọ Ḅe Na Ịrịamẹ
1Isọ ḅe oria kịnị ẹndẹ ma na ḅoarị sịkị, Jekọb ḅe ori ini ọrịmẹ, anịgose ori awọmẹnịma ḍiama Lia ma na Rechẹl ma na pịkị mama ịgwa apụma na pịrịmẹ. 2Ịgwa apụma na inia awọma na se tọrọkọ damẹ, anịsịkị Lia ma na árịa awọma na ini ḍukomamẹ, anịḅe kuluma Rechẹl ma na Josẹf ḅe na ọḅụju simemẹ. 3Jekọb ḅe ori inia tọrọkọ pẹlẹma nwẹngị mun numbireowu ḅe na kpeki sịkị sọnọma sịkị ọ̀ nwọ seni ọ̀ tịḅị tutu ọ̀ fụḅara se kiri lamamẹ. 4Ọkụma Isọ ḅe ọ̀ mangị ò damamun se ori oḅolo pịkị ọ̀ ḅịpị nọnjụmẹ. Ini mama apụ mamgba owugbolomamẹ. 5Isọ ḅe nyọ ḍiki kelema se ò ḅo eremeni ma na awọmẹnịma na ọrị sịkị ò gbelamẹ, “Nwọ ị́rị́ na sime apụma tapụ?”
“Sẹnịḅọ, mị Tamụnọ Ḅe iḅimịẹ ḅaraḅụ se ị̀ pịrị awọ ma-ẹ,” Jekọb ḅe nwọ pẹkẹrẹmẹ. 6Anịsịkị re mị ịgwa eremeni ma na inia awọma na ḅo tịḅịtu ọ̀ pịrịye-ẹ; 7anịsịkị Lia ma na árịa awọma na ḅomẹ, anịḅe kuluma Josẹf ḅe na Rechẹl ma na ḅo inia tịḅịtumẹ.
8Isọ ḅe gbelamẹ, “Nde ị̀rị̀ na ịrịa ísí kpo mị kwanị? Anị anị che fie?”
Jekọb ḅe nwọ pẹkẹrẹmẹ, “Se ị́ tọrụ iḅi fẹḅịaye gose-ẹ.”
9Ọkụma Isọ ḅe nwọ ḅẹmẹ, “À ḅakama ye nyanamẹ, ị̀ mbire; ị́ nyanaye ma ọlọ.”
10Jekọb ḅe nwọ ḅẹmẹ, “Ẹn-ẹn, pasisi, ị́ nemikase ị̀ ọkị mẹ ḅẹḅẹ, ị̀ya ḍiepịrịayema ọkị. Ị́ tọrụ ọrị mị ị̀ ḅụ à Tamụnọ Ḅe tọrụ ọrị ọkụ simemẹ, ị́ nwọ mịọkụ ikiaḅọ ḅara se ị̀ ọkị sasịkị. 11Sisi à se ị́ pịrị ḍiepịrịayema ọkị; Tamụnọ Ḅe ori iḅi se ị̀ mịẹsam, ọ̀ pịkị ị̀ ḅụpalịmaye layelaye nwọse ị̀ pịrịsam.” Jekọb ḅe ori opuma ọ̀ ḅụfụkamaye gose, ori àrị ọkịmẹ.
12Isọ ḅe nwọ ḅẹmẹ, “Ye wa ḅụkarakarama se so. Ị̀rị̀ tatarị munḅịa.”
13Jekọb ḅe nwọ pẹkẹrẹmẹ, “Ị́ nemimẹ na awọmẹnịma inia ḅụ ịnyọ ofori-ẹ, à pịkị ananama na ísí-a nama na, arịa awọma na se ḅiekoromaḅịa. Ini nemikase kụrọma gbọrị ene kẹngẹ sọnị àrị na nwẹngị ọkụma arịmgba fịḅịa. 14Sisi, ị́rị́ tọrọkọ tarị mun anịsịkị à deindeinma, namama na awọmẹnịma na, inedaḅịa ḅara nwọse sarama ị́ ḍuko se à ḅo Idọm ḅie ị́ laḅịa.”
15Isọ ḅe nwọ ḅẹmẹ, “Anịọkụma ye àrị ị̀ya tomonima ḅụ ḍapụ se koroma ị́ pịrị.”
Ọkụma Jekọb ḅe nwọse ọ̀ pẹkẹrẹmẹ, “Ọkọmịẹma, anịatịḅị ị́ya ḅẹlẹma kẹngẹ mị à ḅiarịye-ẹ.” 16Anị ḅụ Isọ ḅe anị ene mị ḅụ vinpịkị nwẹngịso Idọm mun mẹ. 17Ọkụma Jekọb ḅe ò so Sọkọt mun mẹ, ori anịanga warị nama ọ̀ ḅụ pịrịmẹ, ọ̀ pịkị tịḅịkikima nyọ nama oria namama sọ pịrịmẹ. Anị ini gose Sọkọt nwọse nyọ mị chịnye-ẹ.
18Jekọb ḅe Mẹsopotemịa ḅie, ò deinma ḅụ vinpịkị mun Kenan ama ḅie sime opuama Shẹkẹm mị lamẹ, anịanga opuama mị na kpeki gbọrị ele ogbo ori oria ikowarị nwọ namamẹ. 19Anị ele mị Hemọ Shẹkẹm ḍaḅe furo ḅie apụ ḅara mị ọ̀ seleḅa pẹkẹrẹ-a sọnọasi se fẹye-ẹ. 20Anịanga ori agbamịẹ ẹbẹ pike se nwọse anị chịnmẹ El, Izrẹl Tamụnọ Ḅe.
Currently Selected:
Chukusakị 33: OBTP
Highlight
Share
Compare
Copy
Want to have your highlights saved across all your devices? Sign up or sign in
The Bible Society of Nigeria
