Pakaso 8
8
Ngụ Ma
1Anị Nyanaḅọ Ḅe nwọse Moziz ḅe ḅẹye-ẹ, “So amanyanaḅọ ḅe damamun se nwọse ọ̀ ḅẹ na Nyanaḅọ Ḅe nwọ ḅẹmẹ, ‘Ị̀ya tomonima wẹrịso se ini pakaso mun ị̀ tẹkẹ. 2Ị́ nemikase ḍụkụkẹ ḅẹḅẹ, àrị ngụ se ị́ya sẹ mị mgba ḅie ḅeinmaḅịa fomuḅara seni anị pịrị ḅụ. 3Naịl Tọrụ mị ḅie ngụ ma àrị ḅein so ọkụma, àrị Naịl Tọrụ mị wẹrịso se so ị́ya amanyanaḅọ warị mị ḅie sọmunḅịa, ị́ya jukuru ḅie na, ị́ya mọnọye mị ọgọnọ ḅụ na, ị́ya fịrịtịḅịdapụ ma warịma ḅie na, pịkị ị́ya tomonima warịma ḅie mgba na, pịkị ị́ya fịturu fọị fịnị tọnọ ayema ḅie na, fịturu okpo-panị ma ḅie na. 4Àrị ḍosiḅo ị́rị́ na, ị́ya tomonima na, ị́ya fịrịtịḅịnị mamgba na kpọlịḅịa.’”
5Nyanaḅọ Ḅe nwọse Moziz ḅe ḅẹmẹ, “Erọn ḅe ḅẹ oria amgbara mị ọ̀ nwọ dekichịẹma se tọrụ ma na, ini pu okolo ma na, pịkị ḍapa ma na da, mịẹse ngụ ma iwoḅo Ijipt ama mị ḅie ḅeinḅịa ọkụ.” 6Anị Erọn ḅe amgbara mị dekichịẹma mengi mamgba daye-ẹ, se ngụ ma àrị iwoḅo ama mị ḅie ḅeinmẹ. 7Ọkụma ḍiri kọrị apụma sọnị inia ḍiri-a mịẹmịẹyema mịẹmẹ se ngụ ma ama iwomẹ.
8Amanyanaḅọ ḅe ò Moziz ḅe na Erọn ḅe na chịn se nwọse ini ḅẹmẹ, “Ọ́ Nyanaḅọ Ḅe tẹkẹ se ọ̀ mà ngụ ma sin se àrị ọ́mịna tomonima wẹrịso se ini so mun agbamịẹ Nyanaḅọ Ḅe pịrịḅịa.”
9Moziz ḅe nwọse ọ̀ pẹkẹrẹmẹ, “Tẹkẹ ị́ pịrị mị ị̀ ḅie ḅẹlẹmaḅịa. Ị́rị́ pa à tẹkẹ ị́rị́ na, ị́ya fịrịtịḅịdapụ ma na, pịkị ị́ya tomonima na pịrịḅịa sịkị re nwọ tọn wẹrị. Anịsịkị ngụ ma ḅụḅalaḅala mị ḅie ọ́ pakaḅoḅịa, se gbọrị wu sọnị ḅarị kọn ẹkẹ Naịl Tọrụ mị ḅie sikima.”
10Amanyanaḅọ ḅe nwọse ọ̀ pẹkẹrẹmẹ, “Tẹkẹ ị̀ pịrị ḅa.”
Moziz ḅe nwọse ọ̀ ḅẹmẹ, “Ị́ ḅi ọkụ mị à nwọ mịẹḅịa, se anịsịkị ị́ nemiḅịa na Nyanaḅọ, mịna Tamụnọ Ḅe kịkẹ jịn oru ngịsị ofori-ẹ. 11Ị́rị́ na, ị́ya fịrịtịḅịnị ma na pịkị ị́ya tomonima na ngụ ma ḅụḅalaḅala mị ḅie ọ́ pakaḅoḅịa, se gbọrị wu sọnị ḅarị kọnkẹ, Naịl Tọrụ ḅie sikima.” 12Anịsịkị Moziz ḅe na Erọn ḅe na, amanyanaḅọ ḅe wẹrịso se somẹ, se Moziz ḅe Nyanaḅọ Ḅe tẹkẹmẹ na ori ọkịḅo amanyanaḅọ ḅe ọgọnọ gbanasa ngụ ma ọ̀ nwọ ọfịnsin. 13Nyanaḅọ Ḅe Moziz ḅe ḅi ḅara mị nwọ mịẹmẹ, se warịma ḅie na, nụngọ kuḅu ma na, pịkị ozuma ḅie sime ngụ mamgba fịmẹ. 14Ijipt apụma ini àrị tan chiri-chiri ḅụ koroma, se àrị fụrụ bebe ama mị mgba kelemamẹ. 15Amanyanaḅọ ḅe ò ḅo ọrịmẹ na ngụ mamgba àrị fịsam nwọḅẹ sịkị, ọ̀ pịkị ininachịnmẹ, anị Nyanaḅọ Ḅe ḍukosa ḅaraḅụ na, amanyanaḅọ ḅe ngịsị Moziz ḅe na Erọn ḅe na ori ini poki ḍụkụ-ẹkẹ nwọḅẹ ọkụ mị.
Ẹmẹmbụ Ma
16Nyanaḅọ Ḅe nwọse Moziz ḅe ḅẹmẹ, “Erọn ḅe ḅẹ oria amgbara mị ọ̀ nwọse kiri fomu, anị sịkị bebe Ijipt ama mị ḅie sime fọn mamgba ḍin ẹmẹmbụ sọḅịa.” 17Anị Erọn ḅe oria amgbara mị se kiri mị fomuye-ẹ, se Ijipt mị ḅie fọn mamgba ḍin ẹmẹmbụ sọmẹ, àrị tomonima na namama na gbẹịn-gbitipumamẹ. 18Ḍiri kọrị apụma ini kọrị ḍiri ma ḅụ ḅọrọ ẹmẹmbụ mịẹ pakụmaḅoḅịa ọkụ nwọ ḍọkịmẹ, ọkụma ini inedakẹ. Nyọ mamgba ḅụ ẹmẹmbụ ḅeinmẹ, 19se ḍiri kọrị apụma nwọse amanyanaḅọ ḅe ḅẹmẹ, “Tamụnọ Ḅe mị ọ̀ ḅara fịrị-ẹ!” Ọkụma amanyanaḅọ ḅe ngịsị Moziz ḅe na Erọn ḅe na ori ini poki ḍụkụ-ẹkẹ nwọḅẹ ọkụ mị-ẹ.
Ọmụmụ Ma
20Nyanaḅọ Ḅe nwọse Moziz ḅe ḅẹmẹ, “Ḅa dede funfun ḅụ somun amanyanaḅọ ḅe na ịrịa ọ̀ pọkụ koroḅịa sịkị, se nwọse ọ̀ ḅẹ na Nyanaḅọ Ḅe nwọ ḅẹmẹ, ‘Ị̀ya tomonima wẹrịso ini so, mịẹse ini ineda mun ị̀ tẹkẹḅịa ọkụ. 21Àrị ị́ ḅerijine-aḅẹ na ị́ ḅerenikẹ ḅẹḅẹ à fomuḅara se ọ́ pịrịḅịa anị ọmụmụ kpo se ị́rị́ na, ị́ya fịrịtịḅịnị ma na, pịkị ị́ya tomonima na fịrịmaḅịa. Ijipt apụ warịma ḅie mgba ọmụmụ sọ ḅeinḅịa, pịkị nyọ mamgba gbẹịn-gbitipumaḅịa. 22Ọkụma Goshẹn pẹkẹrẹ mị à la-ẹkẹ, anị ị̀ya tomonima anga nyọ mị, mịẹse ọmụmụ anịanga sime ẹka ọkụ. À mịn mị mịẹḅịa, mịẹse ị́ nemiḅịa ọkụ na Ị̀rị̀ Nyanaḅọ Ḅe, mịn ama mị ḅie à fịrịnwẹngịaḅẹ. 23Ị̀ya tomonima na ị́ya tomonima na ogboku à kịrịye ḍiepakụmaḅịa. Ḅa ḅụ mị ḅụgbiripumaye mị anị kiri ọkịḅịa.’” 24Nyanaḅọ Ḅe opu ọmụmụ kpo ọ̀ nwọse amanyanaḅọ ḅe oria warị ḅie na, pịkị oria fịrịtịḅịdapụ ma warịma ḅie na fịrịmamẹ. Bebe Ijipt ama mị mgba ọmụmụ ma anị ḅụrụma famamẹ.
25Anị amanyanaḅọ ḅe Moziz ḅe na Erọn ḅe na chịn se nwọse ini ḅẹye-ẹ, “Ó mun mị sẹ mị ḅie sime agbamịẹ ọ́mịna Tamụnọ Ḅe pịrị.”
26Moziz ḅe nwọse ọ̀ pẹkẹrẹmẹ, “Anị karakarakẹ ọkọ mịẹ mị”, “anịatịḅị Ijipt apụma, wa se agbamịẹ Nyanaḅọ mịna Tamụnọ Ḅe pịrịḅịa namama anị inia ḅụosọḅịa. Wa nemikase ma namama se agbamịẹ Nyanaḅọ, mịna Tamụnọ Ḅe pịrịse ini ọrị ọkụma, anị inia ḅụosọḅịa, ini pịkị ḍụparị se wa gbin ḅaaḅịa. 27Wa tẹrẹ-a ḍin se so onwun ele ḅie mun agbamịẹ se Nyanaḅọ, mịna Tamụnọ Ḅe pịrịḅịa, anị ọ̀ tọn wa pịrịsa ḅaraḅụ.”
28Amanyanaḅọ ḅe nwọ ḅẹmẹ, “Àrị ọ́ wẹrịso se ó somun agbamịẹ Nyanaḅọ, ọ́mịna Tamụnọ Ḅe pịrịḅịa onwun ele ḅie ó nemikase opuma ḅọlọ anga mun-ẹkẹ ḅẹḅẹ. Tẹkẹ ị̀ pịrị.”
29Moziz ḅe nwọse ọ̀ pẹkẹrẹmẹ, “À mịanga so kirikiri, à Nyanaḅọ Ḅe tẹkẹḅịa se ḅa ọmụmụ ma àrị ị́rị́ na, ị́ya fịrịtịḅịdapụ ma na, pịkị ị́ya tomonima na wẹrịsoḅịa. Ọkụma ḅarị epele se wa tima, pịkị tomonima kikima ini somun agbamịẹ Nyanaḅọ Ḅe pịrịḅụ.”
30Moziz ḅe ori amanyanaḅọ ḅe wẹrịso se Nyanaḅọ Ḅe tẹkẹ mẹ, 31Nyanaḅọ Ḅe ọ̀ pịkị Moziz ḅe ḅi ḅara mị mịẹmẹ. Ọmụmụ ma àrị amanyanaḅọ ḅe na, oria fịrịtịḅịdapụ ma na, pịkị oria tomonima na wẹrịsomẹ; gbọrị ọmụmụ sọnị kọnkẹ. 32Ọkụma ḅo nwọ la sọnị, amanyanaḅọ ḅe ọ̀ pa ininachịn ḅụ omi-ẹ, ọ̀ pịkị ḍụkụkẹ tomonima ini so.
Currently Selected:
Pakaso 8: OBTP
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
