Pakaso 38
38
Dọkịma Agba Mịẹ Ẹbẹ Mị Mịẹ Mị
(Pak 27.1-8)
1Dọkịma agba mịẹḅịa gose, ọjị chịn ọ̀ nwọse ẹbẹ mịẹmẹ. Anịa inein-a ịkọlị ma gbasịmẹ, ịsụn mị sọnọma ḅụọ na pẹkẹrẹ, finji mị pịkị sọnọma ḅụọ na pẹkẹrẹ-ẹ, anịa gele mị inein-a ḅụọ na pẹkẹrẹ-ẹ. 2Inein-a ịkọlị ma tịḅị ọgọnọ ori ịkpangị chụa pakụmamẹ, anịẹrẹchị àrị ẹbẹ mị na gbọrịḅụ simemẹ. Anịmgba alapẹlẹka ọ̀ nwọse oḅolomẹ. 3Ọ̀ pịkị ẹbẹ mị anịa fịrịnwẹngịḅịa aye mamgba mịẹmẹ; anị panị na, kirisoku ọgụ na, ye fị-a bọlị na, ye sụka aye na, pịkị fịnị chụa panị na. Fịrịnwẹngị aye mamgba alapẹlẹka ọ̀ nwọse àrị mịẹmẹ. 4Alapẹlẹka ọ̀ nwọse aganagana mịẹ se anị se ẹbẹ mị chuku koromamẹ, anịa chịẹ, ẹbẹ mị ḅụ mamaju gbasị lamẹ. 5Yedekiḅịa inein-a kelekele aye ọ̀ nwọ mịẹ se àrị seni inein-a ịkọlị ma ḅie chumẹ. 6Ọjị chịn ọ̀ nwọse yedeki-dekiḅịa chịn mịẹmẹ, se alapẹlẹka se àrị oḅolomẹ, 7ori àrị se kelekele ayema ḅie chu tolumamẹ ịkọlị ịkọlị ḅụ. Ẹbẹ mị ḍụpọ ọ̀ nwọse anị mịẹmẹ, anịa ḅie fomẹ.
Alapẹlẹka Mengi Chụaye Mị Mịẹ Mị
(Pak 30.18)
8Ḅọrọ mun Nyanaḅọ Ḅe pakaḅoḅo Ikowarị mị la nyọ mị ḅụ sime fịrịnwẹngị-nwẹngị eremeni ma ḅara ori ọkị tẹmẹḍikiaye ma ò se alapẹlẹka mengi chụaye mịẹmẹ.
Nyanaḅọ Ḅe Pakaḅoḅo Ikowarị Mị Anịa Odo Mị
(Pak 27.9-19)
9Nyanaḅọ Ḅe pakaḅoḅo Ikowarị mị anịa odo mị gbẹịnḅịa ḅịtẹ mị, iḅi lọkọ-opu-ḅịtẹ ọ̀ nwọse anị mịẹmẹ. Chuku daọrụ ḅụ, nyọ kikima ḅịtẹ mị, anịa ịsụn si sọnọ-a kuḅu fịnjị-ẹ, 10alapẹlẹka ikulele si, arịa chuku sẹkẹ ayema pịkị si ọ̀ nwọ mịẹ se àrị ọlọchịẹmamẹ; seleḅa-ye-sụkaye-na seleḅa gbasa na anịa ḅụ omi-ẹ. 11Ọgọnọ ọrụ da nyọ gbẹịnye mị sọ, anịa ịsụn sisọnọ-a kuḅu fịnjị, alapẹlẹka ikulele si, arịa chuku sẹkẹ ayema ọlọchịẹmamẹ. 12Ịrụasọsọ nyọ da nyọ gbẹịnye mị anịa ịsụn oyimaịn kuḅu fịnjị na pẹkẹrẹ-ẹ, anị ọlọchịẹma oyi-a ogbochịnma na, arịa chuku sẹkẹ ayema na, yesụkaye ma na, gbasa ma na, seleḅa ọ̀ nwọse àrị mịẹmẹ. 13Ịrụapakapaka nyọ daọrụ mị ḅụ ḅọrọ sọ nyọ mị kikima ḅịtẹ mị anịa finji, oyimaịn kuḅu fịnjị na pẹkẹrẹ-ẹ. 14-15Ḅọrọ odo mị ḅie sọ nyọ mị kikima ḅịtẹ mị anịa finji tẹrẹ-a kuḅu gbọrị agbagba ḅụ simemẹ, pịkị tẹrẹ-a ogbochịn na tẹrẹ-a chuku sẹkẹ aye na, pịkị nyọ kikima ḅịtẹ tẹrẹ-a kuḅu ísí agbagba ḅụ ḅọrọsọ nyọ mị ḅụ simemẹ, pịkị tẹrẹ-a ogbochịn na arịa chuku sẹkẹ ayema na. 16Nyọ mị mgba kelema kikima ḅịtẹ mị iḅi lọkọ ḅịtẹ ọ̀ nwọse anị mịẹmẹ. 17Ogbochịn ma chuku sẹkẹ ayema alapẹlẹka-ẹ, anịsịkị yesụkaye ma na, gbasa ma na, pịkị chịnma tịḅị ọgọnọ ayema na seleḅa-ẹ. Nyọ kikima ḅịtẹ mị kelema gbasa mamgba seleḅa-ẹ. 18Ḅọrọ odo mị ḅie sọ nyọ mị kikima ḅịtẹ mị, bulu bulu na, awụwụ na, pịkị pulo-pulo wulu na nwọse ḍori ḅirima iḅi lọkọ ḅịtẹ mị ò se anị mịẹye-ẹ. Anịa ịsụn mị ḅịtẹ sọnọ-a kuḅu, anịa chịẹ mị gbọrị kuḅu na pẹkẹrẹ, odo mị gbẹịnye mị sime ọkụ. 19Inein-a ogbochịnma na arịa chuku sẹkẹ alapẹlẹka ayema na ọ̀ nwọse àrị ọlọchịẹmamẹ. Arịa yesụkaye ma na, arịa tịḅị ọgọnọ ayema na, gbasa ma na seleḅa ọ̀ nwọse àrị mịẹmẹ. 20Ikowarị mị ini se anị kakị ikiḅa chịnma na, pịkị odo gbẹịnye mị kelemaye mamgba na alapẹlẹka ọ̀ nwọse àrị mịẹmẹ.
Nyanaḅọ Ḅe Pakaḅoḅo Ikowarị Mị Ḅụ Sọ Ikulele
21Mịn anị Nyanaḅọ Ḅe pakaḅoḅo Ikowarị mị ḅụ ini se fịrịnwẹngị ikulele ma la-ọkụ-ẹ; anị Oyi Olokoma ini nwọ gịẹịn mama ḍụparị pẹkẹrẹ ma ini nwọse koroma nyọ mị. Moziz ḅe ọ̀ kụrọ pịrịmẹ na yema la-ọkụ ini nwọ nemi, anị Erọn agbamịẹḅọ ḅe ya Itama ḅe Livaị apụma datekerema se ini fịrị mị nwẹngịye-ẹ.
22Juda sẹ ḅie Họ ḅe yi tọkụ Bẹzalẹl ḅe yemamgba mịẹmẹ, Nyanaḅọ Ḅe tọn Moziz ḅe pịrị ḅaraḅụ. 23Ḅarachụa ọ̀ pịrịḅọ anị Ọholiab, Ahisamak ya Danị sẹḅọ ḅe-ẹ, ò ye kara ḍinmẹ, chịn na ḍụparị na ḅụ ori ineda ye karaḅịa, pịkị ye ḅirima ḍinḅọ-ẹ, ori anị bulu bulu na awụwụ na pulo-pulo wulu na se iḅi lọkọ ḅịtẹ ḍori-ḍoriḅọ-ẹ.
24Ikowarị mị nama gose ini se osiḅụ wẹrị Nyanaḅọ Ḅe pịrị goli ma laye goli-a mama ẹndẹ oyiasi fịnjị-ẹ; mị anị anịsịkị igbiki mị la ọkụ-ẹ. 25Anịsịkị igbiki mị la-ọkụ ḅụ ini tomonima kịẹnso pakaḅo aye, seleḅa okpokpo nine ẹndẹ oyiasi fịnjị na okpokpo soi. 26Mịn mị anị ini tomonima kịẹn sịkị ḅụ simeḅọ goyegoye gbẹịnye-ẹ, ọrụḅọḅọ ini pẹlẹ nụḅọ pịrị igbiki mị gbẹịnmẹ, anị ene igbiki mị la ḅaraḅụ. Owuapụ, poku-a tesi oyi fịnjị na sọnọ-a poku, na nine ẹndẹ jieasi fịnjị na kịnị-a mesi oyi fịnjị; anị si kụra lasapụ ḅụ sakị iwo mun. 27Seleḅa ḅụ ini se osiḅụ sime Ikowarị mị, anịa sọnọasi chuku sẹkẹ ayema na, nyọ kikima ḅịtẹ mị na, ọlọchịẹma ogbochịnma chuku sẹkẹ ayema mịẹye ma na la ḅịpị anị seleḅa okpokpo nine ẹndẹ oyiasi fịnjị; okpokpo-a soi inein okpokpo fịnjị anị gbọrị chuku sẹkẹye, gbọrị chuku sẹkẹye laye-ẹ. 28Kirikọn seleḅa okpokpo soi ma anị Bẹzalẹl ḅe ò se gbasa ma na, ogbochịnma ḅụ sụka ayema na, pịkị chịnma tịḅị ọgọnọ gbẹịn ayema na mịẹye-ẹ. 29Ini se ọrụtọn koroma Nyanaḅọ Ḅe pịrị alapẹlẹka ma laye, seleḅa sonio ẹndẹ na sisọnọ okpokpo fịnjị. 30Anị mị ò seni ḅọrọ mun Nyanaḅọ Ḅe pakaḅoḅo Ikowarị mị la odo mị chuku sẹkẹ ayema na, alapẹlẹka ẹbẹ mị na pịkị ẹbẹ mị anịa fịrịnwẹngị aye mamgba na mịẹye-ẹ, 31pịkị nyọ ogbokiaye ma ḅe chuku sẹkẹ ayema na, ḅọrọ ogbokiaye mị ḅie sọmun nyọma na; pịkị ini se Ikowarị mị kakị ikiḅa chịn mamgba na, pịkị nyọ mị mgba gbọrị kelemaye mamgba na mịẹye-ẹ.
Currently Selected:
Pakaso 38: OBTP
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
