Pakaso 31
31
Nyanaḅọ Ḅe Pakaḅoḅo Ikowarị Mị Fịrịnwẹngịḅịa Apụ
(Pak 35.30—36.1)
1Nyanaḅọ Ḅe nwọse Moziz ḅe ḅẹmẹ, 2“Họ ya, Uraị ḅe yitọkụ, Bẹzalẹl Juda sẹ mị ḅieḅọ à nwọ sẹlẹsam, 3à pịkị ị̀ya kụrọ se ò ḅie chu ḅeinmasam. À yekaịnḅo nemi se ọ̀ pịrịsam, fịrịnwẹngị-ḍin pịkị ò se aka kọn fịrị goyegoye nwẹngịḅịa ịnyọ na à nwọse ọ̀ pịrịsam— 4goli na seleḅa na alapẹlẹka na nwọse gẹnịgẹnị fịrịnwẹngị, 5yela ḍụparị pẹlẹ fịrịnwẹngị na, chịn kara fịrị na, pịkị jịn-a ḅarafịrị kịrịkịrị fịrịnwẹngị ḍin kụrọ à nwọse ọ̀ pịrịsam. 6Danị sẹ ḅie à pịkị Ahisamak ya Ọholiab ḅe sẹlẹsam, ori na fịrịnwẹngị gose, à pịkị ḅakama ịnyọ seni ísí fịrịnwẹngị ḍin apụ mamgba pịrịsam, mịẹso sịkị à tọn ini pịrịye goyegoye ini nwọ mịẹḅịa ọkụ. 7Ị̀ tọrụkuḅu sime Ikowarị mị na, Ọḅọkụ Igbe mị na anịa ḅịpị gbẹịnye mị na, pịkị Ikowarị mị ḅirimaḅịaye mamgba na, 8dẹbụl mị na anịaye ma na, iḅi goli-goli tọnjie gbanaye mị na, anịaye ma na, insẹnsị dọkịma-dọkịmaḅịa ẹbẹ mị na, 9ḍiepịrịaye dọkịma-dọkịmaḅịa agbamịẹ ẹbẹ mị na anịaye ma na, ḅụ-sịkịrị mengi chụaye mị na anịa sẹkẹye mị na, 10Erọn ḅe na oria owuapụ awọma na, ini agbamịẹ fịrịnwẹngịḅịa sịkị ini chụachụaḅịa iḅi-a ḅụchụayema na, 11ini se agbamịẹapụ tịḅị sarasaraḅịa pulo mị na, pịkị Fịafịa Nyọ mị ḅie simeḅịa insẹnsị mị na, à tọn ị́ pịrị ḅara ini jokoma nwọ mịẹ.”
Sọnọma Ḍin Karama Ene Mị Ịnyọsara Ene-ẹ
12Nyanaḅọ Ḅe ọ̀ tọn Moziz ḅe pịrịmẹ na 13ò ḍuko Izrẹlapụma pịrị. “Sọnọma Ḍin karama ene mị, ị̀ya ịnyọsara ene mị ini anị koko, anịatịḅị, anị elekima sọ ómine-na-ị̀rị̀-na pịrịmẹ ọkịmun ḅụọ ḅụọ la, se ḍiepakụma na Ị̀rị̀, Nyanaḅọ Ḅe, àrị ómine se ị̀ya tomoni mịẹsam. 14Ịnyọsara ene mị ómine anị kokoḅịa, anịatịḅị anị osi nyanamẹ. Anị kokoka se anị ene ḅie fịrịnwẹngịḅọ goyegoye ini iniḅọ ḅaaḅịa. 15Ó se fịrịnwẹngịḅịa sonio-a ḍin ọ́ nwọ nyanamẹ, ọkụma sọnọma ḍin karama ene mị osi nyana ịnyọsara ene-ẹ, anị osiḅụ sime ị̀ pịrịmẹ. Anị ene ḅie fịrịnwẹngịḅọ goyegoye ini nụḅọ ḅaaḅịa. 16Izrẹlapụma mị ene mị ini kokoḅịa, ọḅọkụ mị ḅe elekima ḅaraḅụ. 17Izrẹlapụma na ị̀rị̀ na ogboku, anị mị sime gbamaso elekima-ẹ, anịatịḅị Ị̀rị̀, Nyanaḅọ Ḅe, sonio-a ḍin à nwọse so mị na sẹkiri mị na tẹmẹmẹ, se sọnọma ḍin karama ene mị, à fịrịnwẹngị ḅụ dachịẹ se ịnyọsaramẹ.”
18Tamụnọ Ḅe Saịnaị Tụndụ mị ọgọnọ, ori ọkwẹịn Moziz ḅe pịrịso sịkị, ọ̀ ḅarana olokoma gịẹịn mama ḍụparịma ọ̀ nwọse Moziz ḅe pịrịmẹ.
Currently Selected:
Pakaso 31: OBTP
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
