Pakaso 29

Erọn Ḅe Na Oria Owuapụ Awọ Ma Na Se Agbamịẹapụ Mịẹ Mị Tọnkoroma Ḅara

(Agba 8.1-36)

1“Mị ị́ mịẹse Erọn ḅe na oria owuapụ awọma na ị́ nwọse osiḅụ wẹrị se ini agbamịẹapụ sọ fịrịnwẹngị ị̀ pịrịḅịa ọkụ mị-ẹ. Gbọrị owoi nambulo tọkụ na pịkị mama ajirima na nwọ ọkị anị gbọrị ḅẹḅẹye sọnị ḅụ oforikaye. 2Iḅitẹịn ịpịamgba seni fịlawa nwọ mịẹ, fịturu sumaye ḅie sọma, se oliv pulo seni fịturu ma ḅụ da aye mịẹ, da aye ḅụ anị sọ ma, pịkị da aye seni ịkịka mịẹ, pulo mị seni àrị tan. 3Àrị seni kana ḅie chụa ị̀ pịrị, ị́ owoi nambulo ḅe na ajirima ma na se agbamịẹ ị̀ pịrịḅịa sịkị mị ḅụ.

4“Erọn ḅe na oria owuapụ awọma na ọkịḅo à pakaḅoḅo Ikowarị mị ḅọkọ ḅụ koroma, se ini ḅẹ ini ḅụ mịẹfịafịama mengi nwọ ḅiri. 5Anịsịkị agbamịẹḅọ ḅụchụayema seni Erọn ḅe chụa, ifọd mị ḅieju sime koro ḅụchụaye mị na, ifọd mị na ekpe gbẹịnye mị na, pịkị ḅirikunye mị na. 6Ḅịtẹ chu mị se ò chira, anịsịkị ‘Osiḅụ-sime-Nyanaḅọ-Ḅe-Pịrịmẹ’ ini nwọ gịẹịnye mị seni anịaḅụ kpọ. 7Anịsịkị osiḅụ-sime-pulo mị ọkị seni ọ̀ tịḅị sara, se ò seni osiḅụ wẹrị.

8“Oria owuapụ awọma ọkịḅo se ḅụchụayema seni ini chụa; 9ḅirikun ayema seni inia ḅirikun, pịkị chu ma seni inia tịḅị kpọ. Anị ị́ ḅara-wẹrịma Erọn ḅe na oria owuapụ awọma na seni Tamụnọ agbamịẹapụ kiri koromaḅịa ọkụ mị-ẹ. Ini na inia furo ḅie apụma na anị agbamịẹapụ fịrị mị nwẹngị ị̀ pịrịpịrị gbasoḅịaye-ẹ.

10“Owoi nambulo ḅe ọkịḅo à pakaḅoḅo Ikowarị mị tọrọkọ koroma se Erọn ḅe na oria owuapụ awọma na ḅẹ ini ḅara seni ọ̀ tịḅị ọgọnọ gbana. 11Owoi nambulo ḅe ḅaa, anịnyọ à sime fịafịa nyọ mị ḅụ ḅọrọ mun Ikowarị mị sọḅịa ḅọkọ mị ḅụ. 12Nambulo ḅe pulo mị ḅụ kele ye ọkị se ị́ ḅaratụmgbalị seni anị se agbamịẹ ẹbẹ mị tọrọkọ sana. Anịsịkị kiri kọn pulo mị seni agbamịẹ ẹbẹ mị chuku sara. 13Jịnye, ḅụlọ ḅie ayema gbẹịn ḅẹlẹkị mamgba nwọ ọkị, paranga mị ḅụ iḅitẹịn pẹkẹrẹ mị na, pịkị mama nịna akpa ma na arịa ḅụ oḅolo ḅẹlẹkị mị na, àrị seni dọkịma agba mịẹ ị̀ pịrị agbamịẹ ẹbẹ mị ọgọnọ. 14Ọkụma owoi nambulo ḅe oria mịnị mị na, oria apụra mị na, pịkị ịla ma na nwọse ini pike sime nyọ mị ḅụ sikima mun dọkịma. Mịn mị anị seni agbamịẹapụma sima dekisinḅịaye mị-ẹ.

15“Ajirima ma ḅụ gbọrịwu ọkị se Erọn ḅe na oria owuapụ awọma na ḅe ini ḅara seni ọ̀ tịḅị ọgọnọ gbana. 16Ọ̀ ḅaa, se oria pulo mị seni agbamịẹ ẹbẹ mị ḅụ inein-a ịkọlị ma ḅụ sara. 17Ajirima ḅe kẹnị; ọ̀ ḅụlọ ḅie ayema na pịkị ọḅụju-a ḅụọma na nwọ sịkịrị, se àrị seni tịḅị mị na pịkị ísí ini kẹnị koroma ayema ọgọnọ gbana. 18Bebe ajirima ḅe seni fịye agbamịẹ ḅara ḅụ dọkịma ị̀ pịrị. Mịn ḍiepịrịye agba mị anịa kụnụ ḅara mị ị̀ ḅụḅẹlẹḅẹlẹmẹ.

19“Ísí ajirima ḅe ọkị, anị ini seni ye mịẹfịafịa ma mịẹmịẹye mị mịẹ wuḅe se Erọn ḅe na oria owuapụ awọma na ḅẹ, ini ḅara seni ọ̀ tịḅị ọgọnọ gbana. 20Ọ̀ ḅaa, se oria pulo mị ḅụ ye ọkị seni Erọn ḅe na oria owuapụ awọma na amaḅara anga ḅeri chuku ma na, inia amaḅara anga opu ḅaratụmgbalị ma na pịkị inia amaḅara anga ḅụọ ḅụ opu tụmgbalị ma na nwọ tan. Kirikọn pulo mịmgba seni agbamịẹ ẹbẹ mị inein-a ịkọlị ma ḅụ sara. 21Agbamịẹ ẹbẹ mị ọgọnọ sime nama pulo mị ọkị, pịkị agbamịẹapụ tịḅị ọgọnọ sarasara pulo mị ḅụ sọnị ye ọkị, se anị seni Erọn ḅe na oria ḅụchụayema na nwọ sana, pịkị oria owuapụ awọma na inia ḅụchụayema na. Anịsịkị ori na, oria owuapụ awọma na pịkị inia ḅụchụayema na ḅo osiḅụ sime ị̀ pịrịḅịa.

22“Ajirima ḅe oria ḅẹlẹkị mị na, ḅẹlẹkị chụa tumo mị na, ḅụlọ ḅie ayema gbẹịn ḅẹlẹkị mị na, paranga mị ḅụ iḅitẹịn pẹkẹrẹ mị na, mama nịna akpa ma na arịa ḅụ sime ḅẹlẹkị ma na pịkị amaḅara anga ḅụọ eleke mị na pẹlẹsin. 23Ini seni ḍiepịrịye agba mịẹ ị̀ pịrị fịturu kana mị ḅie, arịa ḅụ gbọrị-okpokpo-gbọrị-okpokpo nwọ deki, oliv pulo sọye gbọrị-okpokpo, anị sọkaye gbọrị-okpokpo, pịkị gbọrị ịkịka pẹkẹrẹ na. 24Mịna fịaye mamgba seni Erọn ḅe na oria owuapụ awọma na ḅarachụa se ini ḅẹ ini anị seni osiḅụ wẹrị se kịrị-ḍiepịrịye-agba-mịẹ ị̀ pịrị. 25Anịsịkị inia ḅara anị ọkị seni agbamịẹ ẹbẹ mị ọgọnọ dọkịma, dọkịma agba mị ọgọnọ ḅụ, anị seni fịye-ḍiepịrịye-agba-mịẹ ị̀ pịrị ḅụ. Mịn ḍiepịrịye agba mị anịa kụnụ ị̀ ḅụḅẹlẹḅẹlẹmẹ.

26“Ḅe ajirima ḅe oria ekpe mị anị seni osiḅụ wẹrị se kịrị ḍiepịrịye agba mịẹ ị̀ pịrị. Nama mị ḅụ, mị pẹkẹrẹ mị ị́yaye-ẹ.

27“Ini agbamịẹḅọ seni fịrịkiri ḅụ koromasa ḅẹḅẹ, ajirima ḅe ekpe mị na eleke mị na anị ini seni fịrịkiri ḅụ koromaḅịa ḅọ ḅụ se fịrịnwẹngịḅịa yema, seni osiḅụ wẹrị ị̀ pịrịḅịa kịrị-ḍiepịrịye-agba-ḅaraḅụ, ini pịkị àrị sikima koroma agbamịẹapụma pịrịḅịa. 28Ị̀ya tomonima ini deinma ḍiepịrịye agba mịẹmẹ ḅẹḅẹ ini seni agba mị mịẹ nama ḅe ḅụ ekpe mị na eleke mị na, sime agbamịẹapụma pịrị. Mị à nwọ tọnkoromaye mị ngịsị ḍinmaẹkẹ. Mị anị tomonima seni ḍie Ị̀rị̀, Nyanaḅọ Ḅe pịrịye mị-ẹ.

29“Erọn ḅe oria agbamịẹ fịrịnwẹngị ḅụchụayema ini àrị saḅama seni oria owuapụ awọma pịrịḅịa ọ̀ fịsa ḅẹḅẹ, ini àrị chụaḅịa; ini ini seni agbamịẹ fịrịkiri mị ḅụ koromasa ḅẹḅẹ. 30Erọn owutọkụ, anị agbamịẹḅọ ḅaraḅụ oria kiri ọkịḅịa ḅọ ḅe, anị à pakaḅoḅo Ikowarị ḅie sọmun Fịafịa ḅụ sime Nyọ mị ḅie fịrịnwẹngịḅịa ḅọḅe, sọnọma ḍin mị ò seni ma opu ḅụchụayema chụaḅịaye-ẹ.

31“Ini seni Erọn ḅe na oria owuapụ awọma na ḅụ fịrịnwẹngịḅịa ajirima nama mịnị mị ọkị, se anị seni gbọrị fịafịa ḅụ sime nyọ ḅụ chụọ. 32Ị̀ tọrụkuḅu sime ikowarị mị ḅọkọkọ ḅụ mị ini sime anị seni kana mị ḅie kọn fịturu mị na ḅalịḅịaye-ẹ. 33Ini nwọ ini seni osi nyana fịrịkiri ḅụ koromarị sịkị ḅụ ini seni si wẹrịso pịrị fịrịnwẹngị ayema ini àrị fịḅịa. Mịn fịye mị agbamịẹapụma kẹngẹ anị anị fịḅịaye-ẹ, anịatịḅị osiḅụ simeye-ẹ. 34Nemikase nama mị ḅụ, anịkanịka fịturu mị ḅụ, ini fịkọnma se eneḅa dede laye omi-ẹ ḅẹḅẹ, ini dọkịmaḅịa ini ḅarị anị fịẹkẹ, anịatịḅị osiḅụ simeye-ẹ.

35“Erọn ḅe na oria owuapụ awọma na, seni fịafịa fịrịnwẹngị kiri ḅụ koroma mịẹmịẹye mị, sọnọma ḍin mị ị́ se anị nwẹngịḅịaye-ẹ, à tọn ị́ pịrịsa ḅaraḅụ. 36Gbọrị nambulo gbọrị ene, gbọrị ene mị ị́ se agbamịẹḅịaye-ẹ, mịẹsosịkị siḅụ-ḅarasin ini nwọ nyanaḅịa ọkụ. Mịn mị mịẹse agbamịẹ ẹbẹ mị anị fịafịa ḅụ simeḅịa. Anịsịkị oliv pulo nwọse anị tan anị fịafịa ḅụ simeḅịa ọkụ. 37Mịn ḅara mịẹ mun sọnọma ḍin la. Anịsịkị agbamịẹ ẹbẹ mị anị ḅo okorona okorona fịafịa ḅụ simeye nwọ sọḅịa, se ḅụ seni anị lamaḅọ anịkanịka jịnye sọnị, ḅụ se anị lamaye goyegoye anị ye se nụḅọ lamaḅịa anịa fịafịa ḅara mị gose.

Enene Ḅe Agba Ma

(Kịẹn 28.1-8)

38“Ene ḅene-ḅene ọkịmun ḅụọ-ḅụọ la, gbọrị kụra lasa mama kala anana ọ́ nwọse agbamịẹḅịa. 39Anana ma ḅụ gbọrịwu ọ́ nwọse dede ḅie agbamịẹ, se ísí wuḅe seni saso ḅiri agba nwọ mịẹ. 40Tatarịwu ḅe gbọrị loko laḅịa iḅi ịpịamgba fịlawa na pịkị oliv pulo gbọrị kongo ololo na nwọse ọḅụ chụa agba mị mị-ẹ. Ḍiepịrịye agba ḅaraḅụ ere iru gbọrị kongo ololo nwọ sara. 41Saso ḅiriḅụ maịn karamawu ḅe se agba mịẹ, dede ḅie agba mị mịẹ fịlawa mị na, oliv pulo mị na, pịkị iru mị na gbasịye ọ́ nwọse anị mịẹ. Mịn mị anị fịye ḍiepịrịye agba-ẹ, sime Ị̀rị̀, Nyanaḅọ Ḅe pịrịmẹ, anịa kụnụ mị ị̀ ḅụḅẹlẹḅẹlẹmẹ. 42Mịn dọkịma agba mị ómine anị mịẹ ị̀ pịrịpịrịḅịa à pakaḅoḅo Ikowarị mị ḅọkọ mị ḅụ, ọkịmun ḅụọ-ḅụọ nwọ laḅịa. Anịanga ḅụ anị àrị ị̀ya tomonima na ịrịa se ọkwẹịn kọn ọ́ pịrịpịrịḅịaye-ẹ. 43Anịanga ḅụ àrị Izrẹlapụma na ịrịaḅịa, se ị̀ya boma mị mịẹse nyọ mị ḅo fịafịa ḅụ simeḅịa. 44À mịẹḅịa Ikowarị mị na agbamịẹ ẹbẹ mị na ḅo fịafịa ḅụ simeḅịa, à pịkị Erọn ḅe na oria owuapụ awọma na sẹlẹ sikima seni ini agbamịẹ fịrịnwẹngịapụ sọ ị̀ pịrịpịrịḅịa. 45Àrị Izrẹlapụma ogboku sime, se inia Tamụnọ sọḅịa. 46Ini nemiḅịa na Ị̀rị̀ anị Nyanaḅọ, inia Tamụnọ Ḅe-ẹ anị Ijipt mị ḅie ini ọkịpakụmaḅo ḅọ ḅe-ẹ, mịẹso sịkị àrị ineda inia ogboku angaḅịa ọkụ. Ị̀rị̀ anị Nyanaḅọ inia Tamụnọ Ḅe-ẹ.

Currently Selected:

Pakaso 29: OBTP

Highlight

Copy

Compare