Pakaso 2
2
Moziz Ḅe Yi Mị
1Izrẹlapụma mị ḅụfụka mị ḅie simearị sịkị ḅụ, Livaị furo ḅie gbọrị owuḅọ ò furo ḅie gbọrị eremeniḅọ na simemẹ, 2se á gbọrị owutọkụ yi ọ̀ pịrịmẹ. Tọkụ ḅe iḅi la-ọkụ á nwọ ọrị sịkị, tẹrẹ-a akalụ á nwọse ò se ḅọị wẹrịmẹ. 3Ọkụma á ḅarị ineda ò se ḅọịka sịkị, nangwọ nangwọ osuein se ḍori kana á nwọ ọkị, se chịn ḅụ pakaḅo ye oḅoloye seni anị sikiri pụnmamẹ, mịẹse mengi ḅie sọẹka ḅara. Á tọkụ ḅe seni anịa ḅie chụa se anị seni mun tọrụ aka sime nangwọ nangwọ osueinma ḅie koromamẹ. 4Tọkụ ḅe nụmbụrarọ ma sasama á chịẹ sime se ọ̀ ḅụ mịẹḅịaye nwọ ḍikiaḅẹ.
5Amanyanaḅọ ada ma á Naịl tọrụ aka koro mengi ḅiri eḅomẹ, anịsịkị arịa fịrịnwẹngị apụma ḅụmọ mị ọgọnọ nwẹngịma ḅọrọ aḅẹ. Bẹkẹma ḅaraḅụ á kana mị ọrịmẹ nangwọ nangwọ osueinma ḅie, se árị arịa gbọrị omoni eremeni tọkụ nwọ fịrịmamẹ mun anị ọkịḅomẹ. 6Amanyanaḅọ ada ma árị anị finji se gbọrị owutọkụ á nwọ ọrịmẹ. Ori owuaḅẹ, se árị ò ḍikitịḅịfoinmẹ. Á nwọ ḅẹmẹ, “Ḅe Hibruapụ awọma ḅụ gbọrị tọkụ-ẹ.”
7Anịsịkị nụmbụrarọ ma nwọse á ḅẹmẹ, “À mun Hibru eremeniḅọ chịnḅo se á tọkụ ḅe ḍẹkị ị́ pịrị?”
8Á nwọse tọkụ ma pẹkẹrẹmẹ, “Pasisi ọkọ mịẹ.” Anị tọkụ ma somun tọkụ ḅe nyengima chịnḅoye-ẹ. 9Amanyanaḅọ ada ma nwọse eremeniḅọ ma ḅẹmẹ, “Ḅe tọkụ ḅe ọkị se ọ̀ ḍẹkị ị̀ pịrị, à yese ị́ gbẹịnḅịa.” Anị á tọkụ ḅe ọkị somun ọ̀ ḍẹkịye-ẹ. 10Ọḅụkọ, tọkụ ḅe ò ḅo ogula sịkị, árị ò se mun amanyanaḅọ ada ma pịrịmẹ, á ḅo ori ọkị se ò se arịa tọkụ nwọ mịẹmẹ. Á nwọse á ḅụ ḅẹmẹ, “Mengi ḅie àrị ò binḅomẹ, anịẹrẹchị á nwọse ọ̀ chịnmẹ, Moziz.”
Moziz Ḅe Ọ̀ Mangịso Midian Mun mẹ
11Moziz ḅe ọ̀ sẹnị ḅo ogula sịkị, ò mun toluma oria mịnapụ Hibruapụ ma ḍikimẹ, se ini kụrọ ḅara se ini mịẹ se ini kụrọ fịrịnwẹngị àrị ọkụ mị ọ̀ nwọ ọrịmẹ. Ọ̀ pịkị Ijiptḅọ, gbọrị Hibruḅọ fomu àrị ọkụ sọnị nwọ ọrịmẹ, anị Moziz ḅe oria amapụ ma ḅie gbọrịḅọ. 12Moziz ḅe ọ̀ nyọ mị ḍiki kelema, se ori ọrịmẹ na gbọrịḅọ sọnị ofori-ẹ nwọḅẹ sịkị, ori Ijiptḅọ ḅe ḅaa se ò se onwun ma ḅie ḍipimẹ. 13Anịḅe eneḅa, ò vinpịkị mun se mama Hibruapụ ọrịmẹ, ini owusọaḅẹ. Ọ̀ nwọse ḅẹrẹ ḅarasiḅọ ḅe ḅẹmẹ, “Nde ị́ gose ị́ juo Hibruḅọ ḅe fomuarịye?”
14Tomoniḅọ ḅe nwọse ọ̀ pẹkẹrẹmẹ, “Tụḅọ ị́ se mịna ḅẹrẹtọnḅọ na ḅẹrẹkọnḅọ na mịẹ? Ị́ ḅo ị̀ ḅaa ḍọkị-ao, ori Ijiptḅọ ḅe ị́ nwọ ḅaa ọkụ mị?” Anị Moziz ḅe ḅalafa ḅụ ḅịpị se ọ̀ ḅụ fiemaye-ẹ, “À mịẹye mị sembe tomoni nemisam.” 15-16Amanyanaḅọ ḅe ọ̀ pakaye mị naa sịkị ò Moziz ḅe ḅaaḅịa ẹrẹchị ḍọkịmẹ, ọkụma Moziz ḅe ọ̀ mangịso mun Midia mị ḅie angamẹ.
Gbọrị ene, Moziz ḅe gbọrị tiḅe aka ọ̀ kpọnjị simearịogbo, Jẹtro, Midia ḅie agbamịẹḅọ ḅe oria sọnọma eremeni awọ ḅo mengi ḍu-eḅomẹ. Ini mengi se inia ḍa namama se mengi ḅuḅuaye ma ḅie chụa ḅeinma-eḅomẹ. 17Ọkụma da anana koruapụ Jẹtro eremeni awọma desinmẹ. Se Moziz ḅe ò mun ini ḍụa se mengi seni inia namama pịrị ḅumẹ. 18Ini pịkịmaḅo inia ḍa ḅe lasịkị, ọ̀ nwọse ini gbelamẹ, “Nde mịẹse ó be ḅo ọkụ, mịmgba?”
19Ini nwọse ọ̀ pẹkẹrẹmẹ, “Gbọrị Ijiptḅọ anana kokoapụ ḅara ḅie wa ḍụamẹ. Ò mengi ḍu wa pịrị, pịkị mengi seni mịna namama pịrịmẹ.”
20Ọ̀ nwọse oria eremeni awọma gbelamẹ, “Nde anga ori omi?” “Nde ó gose anịanga ọ̀ wẹrịsoye-ẹ? Ò mun ọ̀ chịn, ò ḅo mine na yefị.”
21Mị ḅaraḅụ, Moziz ḅe ori ini na anga mị ḅerenimẹ, se Jẹtro ḅe pịkị ḅarọ Zipọra ma seni ọ̀ pịrị se ori árị na simemẹ, 22gbọrị owutọkụ á nwọ yi ọ̀ pịrịmẹ. Moziz ḅe ḅịpị se ọ̀ ḅụ fiema se nwọḅẹmẹ, “Ị̀rị̀ igoniḅọ-ẹ mị ama, anịẹrẹchị à nwọse ọ̀ chịnḅịa Gashọm.”
23Tọn-a kụra ḅọrọ sịkị, Ijipt amanyanaḅọ ḅe ọ̀ fịmẹ, ọkụma Izrẹlapụma ini pa omoniapụ sọ kiri ḅụ sime ḅiede pịkị ḅarachụa gose owuwumẹ. Inia owu pụkọ mị iwomun Tamụnọ Ḅe lamẹ, 24ori inia ḅiede mị naa seni ori Ebraham ḅe na, Aịzịk ḅe na pịkị Jekọb ḅe na fị ọḅọkụ mị se ḅiekoromamẹ. 25Izrẹlapụma ini sọ omoni ḅara mị ọ̀ nwọ ọrịmẹ, se anị ò gboloma ḅara mị ọ̀ nwọ ḍiepakụmamẹ.
Currently Selected:
Pakaso 2: OBTP
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
