Pakaso 18
18
Jẹtro Ḅe Mun Moziz Ḅe Lamẹ
1Moziz ḅe tarọ ma ḍawu Jẹtro, Midia agbamịẹḅọ ḅe, Tamụnọ Ḅe mịẹse Moziz ḅe na Izrẹlapụma na pịrịaye mamgba nwọ naamẹ, anị ori Ijipt mị ḅie ini ọkịpakụmaḅo sịkị mị ḅụ. 2Anịẹrẹchị ò Moziz ḅe tarọ Zipọra ma ọkị ọ̀ ḅụ chụa se árị na ọ̀ damamunmẹ, anị Moziz ḅe se koromasoḅọ ma, 3pịkị árịa mama owuapụ awọ Gashọm ḅe na Ẹleaza ḅe na. (Moziz ḅe nwọ ḅẹmẹ, “À bịan ḅomẹ mị igoni ama mị ḅie,” anịẹrẹchị ọ̀ nwọse gbọrị tọkụ chịnmẹ Gashọm. 4Ọ̀ pịkị nwọ ḅẹmẹ, “Ị̀ ḍa Tamụnọ Ḅe ọ̀ ḅarachụa ị̀ pịrị pịkị Ijipt amanyanaḅọ ḅe ị̀ ḅaa ḍọkị ḅụ ị̀ ḍụaḅọrọmamẹ, anịẹrẹchị ọ̀ nwọse ị́sị́ tọkụ ḅe chịnmẹ Ẹleaza.) 5Jẹtro ḅe ò Moziz ta ma na árịa mama owuapụ awọma na ọkị ọ̀ ḅụ chụa se ini na Moziz ḅe damamunmẹ Tamụnọ Ḅe oria fịafịa tụndụ mị anga ḅụ, anị onwun ele mị ḅie ò pike sime anga ḅụ. 6Ọ̀ ḅịpị seni Moziz ḅe fịrịmamẹ na ini ḅoaḅẹ, 7anịẹrẹchị Moziz ḅe ò mun ori na ịrịa se tịḅịtu ọ̀ pịrị, pịkị ọ̀ ḅịpị nọnjụmẹ. Ini jụmḅọ jụmḅọ oju sime ọkụ seni inia ḅụ ma gbela se so Moziz ikowarị mị ḅie sọmunmẹ. 8Nyanaḅọ Ḅe ori Izrẹlapụma ḍụaḅịa ẹrẹchị ò seni amanyanaḅọ ḅe na Ijipt apụma na mịẹaye layelaye Moziz ḅe ò ḍuko Jẹtro ḅe pịrịmẹ, ọ̀ pịkị ateli mị ḅie tomonima nyana ḅụfụka ma sọnị nwọ ḍuko ọ̀ pịrịmẹ, pịkị Nyanaḅọ Ḅe ḅara wẹrịma ini ḍụa ọkụ mị na. 9Jẹtro ḅe ọ̀ mamgba nwọ naa sịkị ò ḅieḅẹlẹmẹ 10se ọ̀ nwọ ḅẹmẹ, Nyanaḅọ Ḅe tokoni, anị amanyanaḅọ ḅe na pịkị Ijipt apụma na ḅara ḅie ómine ḍụaḅọrọmaḅọ ḅe! Nyanaḅọ Ḅe tokoni, omoni ḅara ḅie oria tomonima ḍụaḅọrọmaḅọ ḅe! 11Mịọkụ à nemisam na Nyanaḅọ Ḅe ọ̀ oru mamgba nẹngịmẹ, anịatịḅị Ijipt apụma ini ḅụdekichịẹma Izrẹlapụma pịrị sịkị ḅụ anị ọ̀ mịn mị mịẹye-ẹ.” 12Anị Jẹtro ḅe ini seni bebema dọkịma agbamịẹ Tamụnọ Ḅe pịrịḅịaye na pịkị seni agbamịẹḅịa jịn aye na nwọ ọkị pakụmaḅoye-ẹ; se Erọn ḅe na pịkị Izrẹl ḅie tịḅịnị mamgba na ọ̀ ḅụ sọ se mun osi nyana fịye mị fịmẹ; anị osi seni Nyanaḅọ Ḅe pịrị ḅaraḅụ.
Ḅẹrẹkọn Apụ Tọn Mị
(Maịn 1.9-18)
13Anịḅe ene ḅa, Moziz ḅe ori ịgbanịaye tẹlịma tomonima pịrịarị sịkị, dede ḅie ọ̀ sakị ḅẹrẹkọn ọkịmun enesan lamẹ. 14Jẹtro ḅe sime Moziz ḅe pịrị fịrị mamgba ọ̀ nwọ ọrị sịkị, ọ̀ nwọse ò gbelamẹ, “Mị ndende ọkụ sime fịrị ị́ nwọ nwẹngị tomonima pịrị-ao? Cheye ẹrẹchị ị́rị́ ngẹrịḅọ ḅe nwọ sime fịrịnwẹngị-ao se tomonima mị ḅara se chịẹ ị́ gbori kelemarịye, seni ị́ dede ḅie ngịsị ḅẹrẹ tetema ọkịmun enesan la-ao?”
15Moziz ḅe nwọse ọ̀ pẹkẹrẹmẹ, “Àrị ọkọ mịẹḅịa, anịatịḅị tomonima ini ị̀ damaḅomẹ Tamụnọ Ḅe ḅi ayema ḍawọḅịa ẹrẹchị. 16Mama apụ nemikase ịgbanịaye nyana ọkụma ini ị̀ ḍọkịmaḅoḅịa à pịkị ḅẹrẹkọn ini pịrị se iniaḅụ karakaraye mịẹḅọ nwọ ḍuko ḍukomẹ, à pịkị Tamụnọ Ḅe tọn koroma ayema na oria olokoma na nwọ ḍuko ini pịrịpịrịmẹ.”
17Anị Jẹtro ḅe nwọse ọ̀ ḅẹye-ẹ, “Anị ị́ mịẹ gbẹịn ḅara mị anịkẹ. 18Ị́rị́ na mịna apụma na ọ́mịna oju siḅịa. Mị fịrị mị opuma ikumẹ ị́rị́ ngẹrị anị nwẹngị mị. 19Mịọkụ ye àrị iḅi tetema seni ị́ pịrị, Tamụnọ Ḅe ọ̀ pịkị ị́rị́ na simeḅịa. Tamụnọ Ḅe tọrụkuḅu ị́ tomonima tọrụḍinma se ini ịgbanịarịayema seni ò ḍie mị anị ị́ mịẹ gbẹịnye-ẹ. 20Tamụnọ Ḅe tọn ayema na oria olokoma na ị́ nwọse ini ḍieḅịa, pịkị ini seni angaḅịa ọkụ, pịkị ini mịẹḅịaye na nwọ ḍuko finji ini pịrị. 21Ọkụma anịa ḅụ jịnye, ị́ ineda yenemi apụ nwọ sẹlẹọkị ḅịa owuapụma ḅieḅụ, se ini tọn ini tịḅịnị sọ tomonima pịrị: mẹndẹ oyiasi fịnjị-fịnjị na, sọnọasi-sọnọasi na, mesi oyi fịnjị-fịnjị na, pịkị oyi-oyi tịḅịnị na: Tamụnọ Ḅe ḍikiḅalafa se ineda kuḅie se ḅụgbana-gbẹịn apụ, pịkị ọḅụfịekapụ anị ị́ sẹlẹọkịḅịaye-ẹ. 22Ye ini ḅẹrẹkọn fịrị mị ḅụ sime tomonima pịrị. Ḅụfụkama ḅẹrẹ ma ngẹrị anị ini ineda ọkịḅo ị́ pịrịḅịaye-ẹ, ọkụma ịgbanịaye ḅụ sarasaraye ma ini ineda àrị kọn pẹlẹḅịa. Anị mị mịẹse ye sarasara ị́ pịrịḅịa, ini nwọ ị́ pụnụmarịye mị ḍiasa sịkị. 23Ị́ nemikase mị ḅara mị mịẹmẹ Tamụnọ Ḅe tọn ị́ pịrị ḅara, ị́ ḅarị oju si nwọ nyana ẹkẹ, mịna apụ mamgba ini ịgbanịarịayema, tẹlịmasa ḅaraḅụ ini so inia warịma munḅịa dein ḅụ.”
24Moziz ḅe Jẹtro ḅe seni ọ̀ pịrị tetema mị ori ọkịmẹ 25se ineda yemịẹḅịa owuapụ Izrẹlapụma ḅie ọ̀ nwọ sẹlẹọkịmẹ. Ori ini tọn se mẹndẹ oyiasi fịnjị-fịnjị na, sọnọasi sọnọasi na, mesi oyi fịnjị-fịnjị na, pịkị oyi-oyi ḅụ tịḅịnị na nwọ mịẹmẹ. 26Gbọtụma sime ḅẹrẹkọn fịrị mị pịrị apụ ini nwọsọ tomonima pịrịmẹ, se ḅụfụkama ḅẹrẹ ma kẹngẹ nwọse ḅo Moziz ḅe pịrịpịrịmẹ, ọkụma sarasara ịgbanịaye ma ini nwọ kọnkọn pẹlẹmẹ.
27Anịsịkị Moziz ḅe dein na mun nwọse Jẹtro ḅe ḅẹmẹ, se Jẹtro ḅe ọ̀ pịkịma so oria ama mun mẹ.
Currently Selected:
Pakaso 18: OBTP
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
