Okunwẹngịapụ 20

Ini Masidonia Na Gris Na Mun Mẹ

1Ama mị fie ḅọrọ sịkị Pọl ḅe ḅereniapụma chịn koḅirimamẹ, kuḅie kụrọma ọkwẹịn kọn ini pịrị se ḅaḅa se ini ḅẹmẹ. Anịsịkị re ori ini koroma so Masidonia nwọ mun mẹ. 2Ori àrị irima tolu ḅọrọ se tomonima kuḅie kụrọmamẹ tọn-a ọkwẹịn ḅụ, anịsịkị ò so Gris nwọ mun mẹ, 3anịanga tẹrẹ akalụ ọ̀ nwọ simemẹ. Ọ̀ ḅụkarakarama Siria mun-ẹtọn ogbo anị ọ̀ ḍọkịḅo ọrịye-ẹ na Juapụma ini si ḅẹrẹ ḅia ọ̀ pịrịaḅẹ; anị ò kuḅie ḅụ ọ̀ tọn pẹlẹye-ẹ na ọ̀ Masidonia ḅụ ḅọrọ vinpịkị soḅịa. 4Biria ḅie ḅo Paịrọs ya, Sopata ḅe, ori na mun mẹ; anị gbọrị ḅara ḅụ anị Tẹsalonaịkapụ ma Arịstakọs ḅe na Sẹkọndọs ḅe na inia ḅụ sọmun ọkụ-ẹ, Dabi ḅie ḅo Gaịọs ḅe na pịkị Esia sẹ ḅie ḅo Tikikọs ḅe na Trọfimọs ḅe na, pịkị Timoti ḅe na. 5Ini ma tọrọkọ mun Troas ḅie sime wa korumẹ. 6Wa Filipaị ḅie wẹrị dọkụ pakamẹ. Suka Fịturu Alalị mị ḅo ḅọrọ sịkị, anị ḅe sọnọ-a ḍin karama ene, wa mun Troas ḅie ini lamẹ se ini na gbọrị wiki nwọ simemẹ.

Pọl Ḅe Troas La Kuluma Mẹ

7Chọchị sonio-a ḍin ene saso ḅiri ḅụ; wa koḅirimamẹ gboloma fịye mị fịḅịa ẹrẹchị, Pọl ḅe ọkwẹịn tomonima pịrịmẹ, se ọkwẹịn mun karakarama ḍin-ogbo nwọ lamẹ, ori anịḅe eneḅa ini koroma soḅịa gose. 8Wa koḅirima sime ọgọnọ warị mị ḅie tọn-a tọnjie kọrịaḅẹ. 9Pọl ḅe ọkwẹịnma mun-arị sịkị, Yutikọs nwọ chịn gbọrị asẹmẹnị tọkụ pẹlẹḅọkọ ọgọnọ sime mọnọaḅẹ. Mọnọ mị ḅo opuma gbun sịkị ò sime tẹrẹ karama deki mị ọgọnọ ò sokoro koromẹ. Ini mun ò deki sịkị ọ̀ fịsam. 10Ọkụma Pọl ḅe koro mun oria ọgọnọ ḅọlọlọ se ori apuramẹ. Ọ̀ nwọ se ini ḅẹmẹ, “Ómine ọ́ ḅụ ḅalaḅalamama, ọ̀ pa ḍumo waraḅẹ.” 11Anịsịkị ò vinpịkị iwo ọgọnọju mun se fịturu pu se fịmẹ. Pọl ḅe ini na ḅọlọ sịkị se ọkwẹịn mun epepe paka sịkị la se somẹ. 12Ini ḍumo ḅụ asẹmẹnịḅọ ḅe ọkị warị mun mẹ, se anị opuma inia kuḅie kụrọmamẹ.

Ini Troas Ḅie Ḅọrọ Mun Militọs Lamẹ

13Wa tọrọkọ mun owoin arụ mị lamẹ se anịju arụ sin Asọs mun mẹ, anị wa mun Pọl ḅe se arụ ḅie sẹịnḅịa nyọ mị. Ò ḍuko wa pịrịsam na wa mị ḅara mị nwọ mịẹ, anịatịḅị ò kiri ọgọnọ ḅọrọ anịnyọ mị nwọ mun aḅẹ. 14Asọs ḅie ò mine na ịrịa sịkị, wa ọ̀ sẹịn se ori na Mitilini mun mẹ. 15Wa anịnyọ arụ sin se dọkụ mun Kaịọs mị ḅọrọmẹ anị ḅe eneḅa ḅụ. Gbọrị ene ḅo ḅọrọ sịkị wa ḅo Samọs mị lamẹ, se anị ḅe eneḅa wa mun Militọs lamẹ. 16Pọl ḅe ò kuḅie ḅụ ḍukopẹlẹmẹ na ori Ẹfịsọsị mị agbaka ḅara ḅụ ḅọrọ munḅịa, mịẹse Esia pẹkẹrẹ ḅụ ọ̀ sịkị fama ẹka ḅara. Ọ̀ Pẹntikọst ene mị ḅụ ḅo Jerusalẹm laḅịa ḅara gose ò beaḅẹ, anị nemikase sarasaraḅịa ọkụma.

Pọl Ḅe Iḅiọkụ Sime Nwọse Ẹfịsọsị Sẹnịapụ Ma Ḅẹ Mẹ

17Pọl ḅe Militọs ḅie sime oku se Ẹfịsọsị fịrịmamẹ, ḅiaḅẹ na chọchị mị ḅie sẹnịapụma ḅo ori na ịrịa. 18Ini ḅo lasịkị ọ̀ nwọse ini ḅẹmẹ, “Ómine sọnị nemimẹ na à tatarị Esia pẹkẹrẹ mị la ene, bebe ene mị mgba à nwọse ómine na simemẹ. 19Ḅụiderima na owutọrụsara na ḅụ mị àrị ị̀ya fịrịma nwẹngịye-ẹ, Nyanaḅọ Ḅe fịrịnwẹngịḅọ ḅara ḅụ, mịn sịkị mị ḅụ à ḅakama ḍaḍiki nyanamẹ, Juapụma ḅia ị̀ pịrịarị ḅẹrẹ ma gose. 20Ó nemimẹ na ḅarachụa ọ́ pịrịḅịaye ḅụ à se ọ́ ḅọịma gbọrị kalaye sọnị ofori-ẹ, à nwọ amaogbo na pịkị ọ́mịna warịma ḅie Tamụnọ ḅẹrẹ mị ḍukoarị sịkị ḅụ. 21Anị gbọrị ḅara mị anị à se tetema se Juapụma na Jịnsẹapụma na pịrị ọkụ-ẹ, na ini inia sima ḅụ vinpịkị Tamụnọ Ḅe da, se wa Nyanaḅọ Jizọs Kraịst Ḅe ḅereni. 22Se mịọkụ, Fịafịa Tẹmẹ Ḅe ḅịpị poki ḅụ, à so Jerusalẹm mun aḅẹ, anịnyọ ị̀ ḅụ pakaḅịaye nwọ nemika ḅụ. 23À nemiye kẹngẹ anị, ama goyegoye ḅie Fịafịa Tẹmẹ Ḅe ori ị̀ ḅeri jinesam na, ikoli na ḅụfụka na sime ị̀ koruaḅẹ. 24Ọkụma àrị ị̀ ḍumo mị nwọse yelakaye kịẹnmamẹ; mịẹse à kọn-arị nwẹngị mị kọn karama pịkị ị̀ya fịrị nwọ nwẹngị karamaḅịa ḅara; Nyanaḅọ Jizọs Ḅe se ị̀ pịrị mịẹ nwọ ḅẹye mị, anị Tamụnọ Ḅe oria ḍikiḅụgerere Iḅi Ḅẹrẹ mị nwọ ḍukopakụma mị-ẹ.

25“Àrị ómine mgba ogboku nwẹngị kelema, Tamụnọ Amanyanakiri ḅẹrẹ mị ḍukosam. Se mịọkụ à nemimẹ na ọ́mịna ḅie gbọrịḅọ sọnị ḅarị jịn sịkị se ị̀ ọrị ẹkẹ. 26Anịgose mịmgba, à ḅelema ḍuko ọ́ pịrịaḅẹ na nemikase ọ́mịna ḅie faḅịa ḅọ omi-ẹ ḅẹḅẹ, anị ị̀rị̀ mịẹkẹ. 27Anịatịḅị Tamụnọ Ḅe tọn koroma se à ḍuko ọ́ pịrịka se ọlọchịẹmaye ofori-ẹ. 28Anịgose ọ́ tọrụ se ọ́mịna ḅụ wẹrị, pịkị Fịafịa Tẹmẹ Ḅe se ọ́mịna ḅarachụa anana ogbo mị na. Anana ḍikiḍikiapụ ọ́ nwọ sọ oria chọchị mị pịrị anị, oria Tọkụ Ḅe fịḅụ mịẹ agba mị. 29À nemimẹ na à sosa ḅẹḅẹ owoi-owoi piri obirima àrị ḅo ọ́mịna ḅie sọḅịa, àrị pịkị anana ogbo mị wẹrịso ẹkẹ. 30Sịkị ḅoḅịa ọ́mịna ḅie pakaḅoḅịa dapụ iruoaye ḍukoḅịa se ḅereniapụma fọnọ inia ḅụ ma pịrịḅịa ẹrẹchị. 31Anịgose ómine ọbị, ọ́ pịkị se ḅiekoroma na tẹrẹ-a kụra ḅụ ḍin na enekaka na ḅụ ye se ó ḍie ḅụ à ḅarasinkẹ, owumengi pịkị ị̀ tọrụ saramẹ ọ́ tịḅị gose.

32“Se mịọkụ àrị ó se Tamụnọ Ḅe ḅarachụamẹ, pịkị oria ḍikiḅụgerere oku mị ḅara ḅụ na, anị ineda ọ́ namachịẹma pịkị ò se oria tomoni mamgba wẹrịma ḅẹlẹma mị seni ọ́ pịrịḅịaye mị. 33Ma à gbọrịḅọ sọ seleḅa, anịkanịka goli, anịkanịka ḅụchụaye nwọ ḍikipụkọsolikẹ. 34Ómine sọnị ḅara na nemimẹ na ị̀ ḅarama anị à se ị̀rị̀ na nwẹngịapụma na ị̀rị̀ na ḅụpalịmaye ma nwọ nyanaḅoye-ẹ. 35Ye mamgba à se ó ḍiesam na mị ḅara mị nwọse kụrọma fịrịnwẹngị ḅụ wa ineda ḅarachụa ịnyọ ḅụ oforika apụma pịrịḅịa, Nyanaḅọ Jizọs Ḅe na mịnaḅụ na nwọ ḅẹmẹ, ‘Ye ḍie nweni pịrị mị ḅẹlẹma nyanatẹịn ye daọkị mị nẹngịmẹ.’”

36Pọl ḅe ori ọkwẹịn so sịkị, ori ini na kpẹrẹkị se tẹkẹmẹ. 37Inimgba ini owuaḅẹ, ini ori oḅolo pịkị ọ̀ ḅịpị nọnjụ se ḅaḅa seni ọ̀ ḅẹarị sịkị. 38Anịeso, anị ini kururumamẹ na ini ḅarị jịn sịkị se ori ọrị ẹkẹ. Anị ini ọ̀ ḅọrọma mun owoin arụ mị ḅie sẹịnye-ẹ.

Currently Selected:

Okunwẹngịapụ 20: OBTP

Highlight

Copy