Tayịtọsị 3
3
Kịrayịsị Ḍukamẹnjịapụ Ye-mịẹ-ḅara
1Kẹ ị́ atomi ma ḅiokoroma tẹ ịn sịḅị-tuu ḅẹrẹtọn-apụ na, kụrọ-ḅara ḅụ simearị apụ na pịrị, tẹ ịna ḅịḅị poki, pịkị tẹlẹma tẹ iḅiye goyegoye mịẹ, ḅọkọ, ḅọkọ ḅụ. 2Ḍuko ịn pịrị ịn gbọrụḅọ ḅụ sọ siye ḍuko ma, kụma dein na ikia na ḅara simee, tẹ sakị mamgba gbene ḍumo kẹ ḅẹḅọ-ḅẹḅọ na anga. 3Kẹ gotẹ ọkọ ḍukoarị, sakị ḅẹ gbọrụ sakị ḅụ wamịnị ḅioju sọ oḅori-sọ tẹ, ḅịḅịpoki-a ḅara kẹ irima-irima simem. Wa omoni-sọ ye goyegoye pịrị gotẹ lẹlẹ akuroma na tomikiri ḅẹ tọrụ-ḅẹlẹ kịrị-kịrị na nyana simem. Wa wamịna aḍumo kẹ mịẹye jen-a, si kuroma na, jụmọ sime-ḅara ḍiki tọrụ fụka na famam; ja apụ nwẹnị wa ḍiki-ḅioḅu, tẹ wamịnị pịkị ịn ḍiki-ḅioḅum. 4Kụma wamịna Tamụnọ wamịna Ḅọrọmaḅọ ḅe ori iḅi-yemịẹ-ḅara na, ḅẹlẹma na mịẹfinji tẹso, 5ọ̀ nwẹnị wa ḅọrọma. Wamịnị ḅarana mịẹ gbọrụ iḅi mịẹye sọ ẹrẹsị-a, kụma ori ọkụrụkụrụ ẹrẹsị ọ̀ wa ḅọrọmam, ọ̀ Fịafịa Tẹmẹ ḅe ḅụ, anie sin iyi na ịwọ ḍumo na kẹ wa pịrịarị ḅọ ḅe, wa sịkịrị ḅụ. 6Tamụnọ, wamịna Ḅọrọmaḅọ Jizọsị Kịrayịsị ḅe ḅụ ḅọrọ tẹ ḅaka ḅara kẹ ọ̀ Fịafịa Tẹmẹ ḅe ọsụma wamịna ọgọnọ saram, 7mịẹtẹ ò ḍiki-ḅụụjịrị ḅụ wa ḅo Tamụnọ na kura tẹ wa kẹ ḅiokpọmarị sime gbamaso ḍumo mẹ nyana ḅẹm. 8Miemẹ karakara ẹkwẹn.
À ḅiiarị ị́ mịna aḅẹrẹ ma ḍuko, ḍuko kụrọma, mịẹtẹ Tamụnọ ḅụ minini nyana apụ ma ịna sakị kẹ iḅi amịẹaị pịrị mẹ kẹ ye-sịn, anie iḅi kẹ ḅẹḅọ-ḅẹḅọ mịẹ ḅẹ aị. 9Kụma kịnị na nimi ofori aḅẹrẹ nụnụama ḅọrọ kọkọrọọ, paka-furo kịẹn nangwọma, kamụ-sọ, na oloko mẹ gbolomaye gotẹ owu sọ na. Arị kẹ mịẹ-mịẹ ye ofori, pịkị gberie-sọ la-a. 10Ị́ maa sakị pembe ye kẹ puua dogi-ḅoarị ḅọ ḅeri nụnụ tẹ ọ̀ ḍụkụ-a ḅẹḅẹ, ḅarị ori na gbọrụ mịẹye sọ nyana gboloma ma. 11Í nimi wararị mịnẹ ọkọ sime tomḅọ mẹ iḅi tomḅọ-a, mḅọ mịẹarị asi ma mḅọ sime si ḅara kẹ kịnị ḍiearị.
Kunoma Ḅụ Mịẹ Ḅẹ Ḍuko Aị
12 #
Fịr 20.4; Ẹfi 6.21,22; Kọl 4.7,8; 2 Tim 4.12 À ḅiiarị arị Atimasị na Tịkịkọsị na kẹ ị́ fịrịma sakị, í inetẹ ḅara, inetẹ ḅara mịẹ tẹ ḅo ị̀ la Nikopolisi ḅụ, arị anịanga okiringa sakị mẹ sime ḅẹ ẹrẹsị. 13#Fịr 18.24; 1 Kọr 16.12Sisi, í inetẹ ḅara, inetẹ ḅara mịẹ tẹ ḅarasụa Zenasi, oloko nimi ḅọ ḅe na Apọlọsị na pịrị tẹ ịn ḅọrọ-so in muarị anga mu, tẹ ẹrị mịnẹ ịna ḅụụ-fụkama ḅẹ ye goyegoye ịn nyanam. 14Wamịna jụ ḅẹ atomi ma mịẹ, ịn ḍawọ tẹ ịn nyana sakị goyegoye kẹ iḅi mịẹ-mịẹ tẹ ịn pịrị ḅarịye mẹ ḅo karakara ḅụụ-fụka mịẹ ḅarị ḅara, ḍụkụ tẹ ini iḅi kẹ gbọrụḅọ-sọ mịẹ-a aḍumo kọnma.
15Ị̀ na mị anga emi apụ mamgba í ḅiim. Ḅii-ḅịḅị kẹ mininiye mẹ ḅụ wamịna ikiapụ ma pịrịị.
Tamụnọ ḍiki-ḅụụjịrị ọmịnị-mgba na simee.
Currently Selected:
Tayịtọsị 3: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria