Rufu 2
2
Rufu Mu Bohazi Ḍụọ Ḅio Kọrịnama Kọrịm
1Mịọkụ Nahomi gbọrụ mịnaḅọ nyanam, á di Ẹlịmẹlẹkị furo mẹ ḅẹ ḅọ, ngọ-kọn wararị tomḅọ, oriḅe ẹrẹ anie Bohazi. 2#Lẹv 19.9,10; Dit 24.19Gbọrụ ene ḅụ, Rufu, Mohabụ ḅẹ ẹrẹḅọ ma nwẹnị Nahomi ḅẹẹ, “Sisi ḍụkụ ị̀ pịrị tẹ à ḍụọ mu, tẹ oriḅe tẹ à tọrụ ḅụ ḍiki-ḅụụjịrị ḍọkị-ẹrị ḅarị ḅọ ḍukamẹnjị tẹ sịn mgbọlị ma ogboku ḅara-kọnma-aị ma kolokolo.”
Nahomi nwẹnị á ḅẹẹ, “Ị̀ ẹrẹḅọtụḅọ, inetẹ mu ḅa.”
3Anieḅụ á nwẹnị saakị paka ḍụọ mu, tẹ fịye-sokuapụ ma ḍukamẹnjị-mẹnjịtẹ ḅara-kọnma-aị ma kolokolo ḍụọ mẹ ḅio; tẹ So tọn ḅara ḅụ, á nwẹnị ḅo sime Bohazi, Ẹlịmẹlẹkị furo-ḅẹ-ḅọ ḅe ḍụọ mẹ la.
4Anị gbọrụ-kirikiri, Bohazi nwẹnị Bẹtịlịhẹmụ ḅụ sime tẹ ḅo la; tẹ sịn-ḅịḅị kẹ fịye-sokuapụ ma pịrị tẹ ḅẹẹ, “KỊNỊNYANAḄỌ ḅe ọmịnị na simee!”
Ini nwẹnị pakịrị, “KỊNỊNYANAḄỌ ḅe í bomaa.”
5Anịtẹso Bohazi nwẹnị ọ́ fịrịmẹnjịḅọ ḅe tẹ fịye-sokuapụ ma ḍikiḍikiarịḅọ ḅe gbela, “Mie tụḅọ ẹrẹḅọtụḅọ?” 6Fịrịmẹnjịḅọ ḅe tẹ fịye-sokuapụ ma ḍikiḍikiarị ḅọ ḅe nwẹnị pakịrị, “Árị anie Mohabụ ḅẹ ẹrẹḅọtụḅọ ma tẹ Nahomi ḅụụ sọ tẹ Mohabụ ḅẹ sịẹ mẹ ḅụ ọḅụ pịkị tẹ ḅo ḅọ ma. 7Á ḅọ tẹ ì tẹkẹm à paa á wẹrịso tẹ á fịye-sokuapụ ma ḍukamẹnjị-mẹnjịtẹ puku-puku ma ogboku ḅara-kọnma-aị ma kolokolo tẹ arị kobiri. Anieḅụ dede-funfun kụra-ḅio á namakọrịarị; mịọkụ anie á kẹlẹ kẹ ịnyọsararị.”
8Anịtẹso Bohazi nwẹnị Rufu ḅẹẹ, “Ị̀ ẹrẹḅọtụḅọ, mịọkụ pokii, mu jen ḍụọ ḅio ḅara-kọnma-aị kolokolo ma, anịanịa mị ḍụọ mẹ wẹrịso, kụma namakọrị ị̀ pịrịarị eremịna-awọmẹ ma na simee. 9Yee ị́ atọrụngbọ ḍụọ mẹ tẹ ịn ḅara-kọnma-aị kolokoloarị ḍụọ mẹ ḅụ sime, tẹ ịn ḍukamẹnjịị. À tọn ị̀ asambịrịma owiapụ ma pịrị tẹ ini ị́ ḅụụ fụkama ma. Anịsakị minji ḅuu ị́ tarị tarị, mu minji-sụaye mẹ ḅio asambịrịma owiapụ ma ḍuu sara minji mẹ ḅuu.”
10Anịtẹso Rufu nwẹnị sịḅị-tuu, tẹ á tọrụkuḅu kẹ ḅịkị kiri-ḅio koro, tẹ ọ̀ ḅẹẹ, “À tiegotẹ ị́ tọrụ ḅụ ḍiki-ḅụụjịrị ḍọkị-ẹrị, tẹ ị́ ị̀ kẹ elekima sụa na-iḅi, yẹrị igoniḅọ ḅẹẹ sakị?”
11Kụma Bohazi nwẹnị á pakịrị, “Í di fịị kụra-ḅio ị́ mịẹ í iyingi pịrị aị mamgba na, ị́ wẹrịtẹ ị́ ḍa na, í iyingi na, ị́ paka wararị ama na, wẹrịso tẹ tarị ḅụ tomi tẹ amụ í nimi-a apụ ḍọkụma-ḅo ḅara mẹ ịn ḅintẹ ḅara kẹ arị ḍuko ị̀ pịrị tẹ. 12KỊNỊNYANAḄỌ ḅe ị́ mịẹ ḅara mẹ mịẹ ị́ pịrịị, anịsakị KỊNỊNYANAḄỌ ḅe, Izirẹlịapụ tẹkẹarị Tamụnọ ḅe ḅintẹ gbẹẹ-ye kẹ ị́ pịrịị, oriḅe tẹ í ḅo warị-ḅọkọ kẹ suha ḅọ ḅe.” 13Anịtẹso á nwẹnị ḅẹẹ, “Ị̀ nyanaḅọ, ị́yẹrị ḍiki-ḅụụjịrị nyana ị̀ pịrị tẹịnm, kẹ gotẹ ọkọ ḅẹẹarị, ị́ ì ḅiokpọma tẹ, pịkị iḅi ẹkwẹn kọn ị̀ pịrị tẹ, yẹrị ị́ afịrịmẹnjị-ereme ma ḅụ ḅẹ gbọrụḅọ-sọ na gbasị-a nwẹn ḅẹsọ.”
14Fịye fị sakị ḅụ Bohazi nwẹnị á ḅẹẹ, “Mịanga ḅoo, tẹ fịye fịị. Ị́ inetẹ anị paịn-paịntẹ kẹ ọḍụ fụlọ mẹ gbọn-gbọn-fị ḅa.” Anieḅụ á nwẹnị fịye-sokuapụ ma akaka lẹgị tẹ ọ̀ nwẹnị fịturu ḅọrọma mu á pịrị, tẹ á fịye fị nwenii á furo ḅinm, tẹ á pịkị fịye fị kọnmam. 15Á saakị tẹ ḅara-kọnma-aị ma kolokolo ḅẹ tẹso, Bohazi nwẹnị fịrịmẹnjị-owiapụ ma mịẹ ḅẹ ye ḍuko ịn pịrị, tẹ ḅẹẹm, “Ọmịnị á wẹrịso tẹ puku-puku ma ogboku ḅụ sọ á ḅara-kọnma-aị kolokolo, anịsakị ọmịnị á ḅụụ-jịrịma ma. 16Ọ́ fịna wararị apuku ma ḅụ sọ ye pịọnị-pịọnị pakama-ḅo koroma á pịrịị, tẹ arị wẹrịso tẹ á ḅo kolokolo, anịsakị ọmịnị á ḍiki ịganị ma.”
17Anị ḅara ḅụ á ḍụọ mẹ ḅio ḅara-kọnma-aị kolokolo nwenii ene-ḅoḅirim; anịtẹrẹmẹ á mu á kolokolotẹ aị ma ḅụ mgbọlị ma fomu-fomu pakama-ḅom; anịsakị anị ịn kẹ Bali sịn fịye mẹ ḅẹ oyia kilogịramụ (10 kg) pembe ye lam. 18Árị anị dogi ama mẹ ḅio sọ-mum; á nwẹnị á kolokolo ye kẹ á di iyingi ḍie, tẹ pịkị á fị furo ḅinmatẹ kọn wararị fịye mẹ sọ ọkị-ḅo á pịrị. 19Tẹ á di iyingi nwẹnị á gbela, “Ị́ tọ-anga ḅụ ḅara-kọnma-aị kolokolo mịmgba? Anịsakị tọ-anga ḅụ í mu kọrịnama kọrị? Boma sime anịḅọ ḅe tẹ ị́ kẹ tọrụ gbarịma-a tẹ ị́ ḍiki-ḅụụjịrị ḅọ ḅe pịrịị.”
Anieḅụ Rufu nwẹnị oriḅe tẹ á kọrịnama kọrị pịrị ḅọ ḅe ẹrẹ ḍuko á di iyingi pịrị tẹ ḅẹẹ, “Oriḅe tẹ mịmgba à kọrịnama kọrị pịrị owiḅọ ḅe ẹrẹ Bohazi nwẹn sịn ḅọ.”
20 #
Lẹv 25.25
Nahomi nwẹnị á tụḅọ ta ma ḅẹẹ, “Oriḅe tẹ iḅi-yemịẹ-ḅara nyana ḍumo wararị apụ na fịtẹ-apụ ma na pịrị ḅo ḅe, KỊNỊNYANAḄỌ ḅe ḅụụ ḅo boma sime ọ̀ pịrịị!” Nahomi nwẹnị pịkị á ḅẹẹ, “Owiḅọ ḅe anie wamịna gbọrụ mịnaḅọ, wamịnị na kpekitẹịn-mịnapụ ma ḅẹ gbọrụḅọ.”
21Rufu, Mohabụ ḅẹ ẹrẹḅọ ma nwẹnị ḅẹẹ, “Anie sikima, ori ị̀ ḅẹẹm, ‘Ị́ ị̀ afịrịmẹnjịapụ kpeki kpekitẹ ini akaka sime ḅa, nwenii ì fịye soku mẹ kụnụnụ ḅa.’ ”
22Nahomi nwẹnị Rufu, á tụḅọ ta ma ḅẹẹ, “Í ori afịrịmẹnjị-ereme ma ḅụụ sọ tẹ ini na mu ḅara iḅim, Ị̀ ẹrẹḅọtụḅọ, anieofori jen ḍụọ ḅio ịn ḅofa ị́ ḅụụ-fụkama tọrọkọ jụụ.” 23Anieḅụ á Bohazi afịrịmẹnjị-ereme ma na kpeki-kpeki sime tẹ ḅara-kọnma-aị ma kolokolo nwenii ịn kẹ bali na witi na sịn afịaị ma soku mẹ kunomam, tẹ árị á di iyingi ma ḅụụ sọ tẹ árị na simem.
Currently Selected:
Rufu 2: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria