Romu 15
15
Ó Yee Wa Ja Apụ Iḅi Ḍọkị, Wamịna Iḅi-a
1Wamịnị minini kụrọ wararị apụ ma, ḅarasụa minini kụrọ-a apụ ma pịrị na-iḅim, mịẹtẹ ịn ḅịkị ḅịa ḅara, wa wamịna ḅụụ na-iḅi ḅẹ ye ḍọkị ma. 2Anie nakara, yee wamịnị-mgba ḅarasụa wamịna amịnapụ ma pịrị, ịna iḅi ḍọkị ḅụ, tẹ mịẹtẹ ịna minini kụrọ. 3#Dev 69.9Kịrayịsị sọ, ori ọ̀ ḅụụ na-iḅi ḅẹ ye ḍọkị-a. Anie nakara, Fịafịa Ḍiri mẹ ḅẹẹm, “Àrị ọmịna sịḅị ḅẹ wori-nume dam.” 4Fịafịa Ḍiri mẹ ḅio kẹẹ ye goyegoye, ịn kẹ ye kẹ wa toluma ḅẹ ẹrẹsị ini anị kẹẹm, mịẹtẹ ịn kẹẹ aị ma kẹ wa pịrị ḅarị ye-inema na ḅiokpọma na ḅụ, wa ḅọrọ tẹ ḅiokpọ nyana ḅarị ḅara. 5Tẹ ye-inema na ḅiokpọ na ḅụụ ḅụ paka-ḅoarị Tamụnọ ḅe, ịnyọ kẹ ọ́ pịrị tẹ ọmịnị inetẹ gbọrụ ḅara kẹ ye ọkị, ọmịna ogboku ḅụ, Kịrayịsị Jizọsị ḅe ḅụọ ḍiki-mẹnjị ḅụ, 6mịẹtẹ ọmịnị-mgba gbọrụ ḅụ ḅụ, gbọrụ pọkọ kẹ Tamụnọ anie Wanyanaḅọ Jizọsị Kịrayịsị Ḍaḅọ ḅẹ, tokini ḅarị ḅara.
Sime Ja asịẹ Ḅẹ Apụ Ma Pịrị Iḅi Oku
7Ọkọẹrẹsị, Tamụnọ ebube mẹ gotẹ, ọ́ Kịrayịsị kẹ ọmịnị ọkị ḅara kẹ jụmọ-jụmọ ọkịị. 8À gbala mịẹ tẹ ó nimiarị mịnẹ Kịrayịsị ḅo kọn, kọrịnama kọrị ja apụ pịrị ḍumo mẹ, Juu-ḅẹ-apụ sịḅị mie ó gotẹ anị kọn ye, kẹ mịẹtẹ tomi ẹrị, mịnẹ Tamụnọ anie ḅioḅẹngbọ-kẹ-sịrẹrẹ-niḅi ḅọ; ọ̀ mịẹ tẹ ò minini ịna atẹngịapụ ma pịrị aị ma mịẹ tẹ aị sọ ḅẹ ḅara; 9#2 Sam 22.50; Dev 18.49miemẹ ḅụ Ja asịẹ ḅẹ apụ sọ inetẹ Tamụnọ ọkụrụkụrụ mẹ gotẹ ò tokini ḅẹ ḅara. Anie Fịafịa Ḍiri mẹ ḅẹẹ ḅara mẹ,
“Ọkọẹrẹsị, Ja asịẹ ḅẹ apụ ma ogboku ḅụ arị í tokini ḅa;
à nume su-su í tokini ḅa.”
10 #
Dit 32.43
Tẹ anị pịkị ḅẹẹm,
“Ja asịẹ ḅẹ apụ, ọ́ Tamụnọ sẹlẹ-ọkị tẹ atomi ma ḅụụ sọ tẹ ḍerekuu!”
11 #
Dev 117.1
Ja anga sọ ḅẹẹm,
“Ọmịnị Ja asịẹ ḅẹ apụ mamgba, ọ́ KỊNỊNYANAḄỌ ḅe tokinii;
ọmịnị ò tokinii, ọmịnị tomi mamgba.”
12 #
Ayị 11.10
Ayịzaya sọ ḅẹẹm,
“Jese furo ḅụ gbọrụḅọ paka-ḅo ḅa,
ori ama-da Ja asịẹ ḅẹ apụ ma pịrị ḅa,
tẹ ini ọ̀ ḅụụ ḅiokpọ nyana ḅa.”
13Yee ḅiokpọ ḅara ḅụ sime tẹ ḅoarị Tamụnọ ḅe, ọmịnị ọ̀ ḅụụ nyana minini gotẹ ḅioḅẹlẹ na dein na kẹ ọ́ pịrị ḅinma, mịẹtẹ Fịafịa Tẹmẹ ḅe kụrọ ḅụ ọmịna ḅiokpọ mẹ kụrọ tọrọkọ-tọrọkọ mu ḅarị ḅara.
Pọlụ Gotẹ Ḅalafa-a Tẹ Ye Kọnma-a Ḅara Kẹ Ḍiri Mẹ Kẹẹ Ye
14Ị̀ amịnapụ Kịrayịsị ḅụụ: à ḅarana nimi lama wararị, mịnẹ iḅi na ye-nimi na ọmịna ḅụụ ḅio ḅin wararị, ọ́ pịkị inetẹ ye kẹ jụmọ-jụmọ toluma ḅa. 15Anịsọ, mị ḍiri mẹ ḅio, ye ḅụ ḅẹ jaị ḅụ, Tamụnọ minini ị̀ pịrị ḅara ḅụ, à ye kọnma-a ḅara kẹ ḍuko giregirema tẹ, pịkị kẹ ọmịna ḅiokoroma tẹ aị emi, 16anie Jizọsị Kịrayịsị fịrịmẹnjịḅọ, tẹ kọrịnama kọrị Ja asịẹ ḅẹ apụ ma pịrịarị ḅọ ḅara ḅụ, à gbala ḅọrọ Tamụnọ agbamịẹḅọ sọ ọ́ pịrị tẹ, Tamụnọ Iḅi Oku mẹ ḍuko ḅụ, mịẹtẹ Fịafịa Tẹmẹ ḅe anị ḅụ ḅọrọ tẹ Ja asịẹ ḅẹ apụ ma tẹlẹma tẹ kẹ Tamụnọ ḅụụ-ḅẹlẹ ḅẹ ḅara wẹrị tẹ, in ḅo ọkị na-iḅi agba sọ Tamụnọ pịrị ḅarị ḅara. 17Anị ḅara ḅụ, à Kịrayịsị Jizọsị ḅụ sọ tẹ kọrị Tamụnọ pịrị kọrịnama mẹ àrị inetẹ anị kẹ ḅụụ-tọn ḅa. 18À ḅiokpọ ḅara kẹ Kịrayịsị ị̀ ḅụụ ḅọrọ tẹ kọrị kọrịnama, tẹ kẹ Ja asịẹ ḅẹ apụ ma ọkị-ḅo Tamụnọ ḅịḅị poki apụ sọma ye mẹ, ḍuko ḅa. Ó miemẹ mịẹm, ẹkwẹn-ḅịḅị na mịẹ-aị na ḅụ, 19ḅụụ-buama-aị na, ḅụụ-gbiripuma aị na, kụrọ ḅụ na, pịkị Tamụnọ Iḅi Tẹmẹ ḅe kụrọ na ḅụ. Mie ḅụ, Jeruselemu ḅụ ọkị mu Ilirikọmụ la à ḅin tẹ ḅara kẹ Kịrayịsị gboloma Iḅi Oku mẹ ḍuko pakama tẹ. 20Sakị mamgba ì ḅio-sẹsẹ pịrịarị ye anie, kịnị amụ Kịrayịsị ẹrẹ naa-a anga ma ḅụ Iḅi Oku mẹ ḍuko, mịẹtẹ à jụmọ suku-saakị tẹ anga ḅụ kọrịnama kọrị ḅịa ḅara. 21#Ayị 52.15Anie Fịafịa Ḍiri mẹ ḅẹẹ ḅara,
“Amụ ini ọ̀ ḅẹrẹ ḍuko pịrị-a apụ, ẹrị ḅa,
amụ ò gbolomaye naa-a apụ, nimi ḅa.”
Pọlụ Tọnm Ò Romu Mu Ḅa
22 #
Rom 1.13
Tẹ mie ḅụ tọnwa sakị à tọn-tọn tẹ ye ì kiki-kiki tẹ à ḅarị ḅo ọ́ la-a. 23Kụma mịọkụ mịna iri ma ḅụ à kọrị ḅẹ ye fa tẹ sakị, tẹ à pịkị tọnwa, tọnwa ḅẹ akụra kẹ ḅo ọ́ la ḅẹ ḅii lama tẹ ḅara ḅụ, 24à ḅiokpọ wararị mịnẹ à ḅo ọ́ la ḅa mị sakị mẹ ḅụ. À ḅiiarị à ḅọrọ Sipeni mu ḅarị sakị, àrị agba tẹ ọmịnị na kẹlẹ sime tẹ tọrụ-ḅẹlẹ nyana tẹ ọ́ ḅarasụa ị̀ pịrị tẹ à mu anịanga la. 25#1 Kọr 16.1-4Mị gbọrụ sakị mẹ kịngẹ kụma à so Jeruselemu muarị, ye kẹ anịanga simearị Tamụnọ atomi ma pịrị ḅarị ḅara ẹrẹsị. 26Gbala Masidoniya na Akaya na ḅẹ asọsị ma tọn-pẹlẹ tẹ mịnẹ ịn ḅara foofoma ḅara kẹ ye pịrị tẹ kẹ ḅarasụa Jeruselemu ḅụ simarị Tamụnọ atomi ma ḅụ igoin-apụ ma pịrị ḅa. 27#1 Kọr 9.11Ini mie ḅarana ọkọ tọn ịna ḅụụ pịrị ye; kụma karakara-ḅara-ḅụ anie ịn pịkị mịẹ na-iḅi ḅara, ḅarasụa ịn pịrị mẹ. Anị sime-ḅara ḅụ, Ja asịẹ ḅe apụ ma Juu-ḅẹ-apụ ma na sọ tẹ ini Juu-ḅẹ-apụ ma tẹmẹ anga ḅẹ aboma ma nyanarị sakị goyegoye, Juu-ḅẹ-apụ ma sọ Ja asịẹ ḅe apụ ma nyana wararị tomikiri ḅẹ aị ma ḅụ ḅe aị ma ḅụ ḅẹ ḅarasụa nyana na-iḅim. 28À mu ịn kẹ ị̀ ḅara sẹma igbigi mẹ kịẹn ịn pịrị fama tẹ ḅẹḅẹ, à ḅo ọmịnị agba tẹ ḅọrọ so Sipeni mu ḅa. 29À ḅo ọ́ la sakị, à nimi wararị à ḅin tẹ ḅara kẹ Kịrayịsị boma mẹ kẹ ọ́ pịrị ḅa.
30Sisi, mịnapụ, wa Nyanaḅọ Jizọsị Kịrayịsị ḅe ḅụ na, Tẹmẹ ḅe pịrịarị ḅẹlẹma mẹ na ḅụ, ọ́ paa ị̀ na sọ tẹ tẹmẹ-la ḅara kẹ Tamụnọ tẹkẹ ị̀ pịrịị. 31Ọ́ tẹkẹẹ mịnẹ Judiya ḅụ simearị Kịrayịsị minini-a apụ ma ye kẹ ị̀ lama ma, tẹ Jeruselemu ḅẹ Tamụnọ atomi ma pịkị iḅi ḅioḅẹngbọ kẹ à mẹnjịarị fịrị mẹ daa-ọkị ḅarị ḅara. 32Anịtẹso, anị Tamụnọ ḅụụ-ḅẹlẹm ḅẹḅẹ, à nwẹnị ḅin tẹ ḍereku ḅụ ḅo ọ́ la, tẹ anị ḅụ ịwọ ịnyọ sụa. 33Yee dein kẹ kịnị pịrị, pịrị Tamụnọ ḅe ọmịnị-mgba na simee. Amẹnị.
Currently Selected:
Romu 15: KBTP
Highlight
Share
Compare
Copy
Want to have your highlights saved across all your devices? Sign up or sign in
(C) The Bible Society of Nigeria
