Egberima-Ẹkwẹn 27
27
1 #
Jem 4.13-16
Ḅaa gotẹ ḅụụ-boma ma. Mịọkụ na anị sakị na ogbo ḅụ paka ḅẹ ye í nimi-a.
2Yee jen-apụ í tokini, anị ḅọrọ kịnị tọrụ nimi-a apụ sọ — gbala-gbala ḅarana mịẹ ma.
3Ḍụḅarị na onwin na iku sọ apantu ḍumo inetẹ dogi-ḅo ḅarị ḅụụ-fụka na gbasị-a.
4Ịganị anị tọrụ guda-gudarị, pịkị ḅaa gulugulumarị; kụma anie papaa ye, kẹ afana na tọnma kụma.
5Kịnị nimi ḅara kẹ da karakarama ẹkwẹn kọn tomḅọ pịrị, iḅi gbala-gbala ḅịḅị-fie-a tẹ mḅọ ọkị mịnẹ ị̀ mḅọ bala-a nẹngịm.
6Ikiaḅọ iḅi mie mḅọ kẹ ị́ tọn-arị, mḅọ ḍuko ye ị́ ịnọarị sọ. Kụma si kẹ ị́ tọn-arị ḅọ ḅara kẹ ị́ apana gbana ikelema wararị ḅẹḅẹ ẹbị lamaa!
7Í furo ḅin wararị sakị ḅẹm sọ ị́ sịkịarị, kụma ḅuru ị́ tarị sakị akụarị fịye sọ ḅẹlẹarị.
8Warị koroma-so wararị tomḅọ ḅe kịkarị ye amịna warị ḅụ ḅele-fa wararị feni.
9Sẹntị na kụnụ-olo na ị́ mịẹ tẹ í ḅioḅẹlẹ tarị ḅara nẹngịarị, kụma ḅụụ-fụka ḅo tẹ í kuroma ḅẹ dein mẹ kan-siin-arị.
10Í ikiapụ anịanịa ị́ ḍa ikiapụ kẹ ḅioḅọrọma ma. Ḅụụ-fụka ị́ la ḅẹḅẹ, í iyimbere ḅara ḅarasụa ḅii ma; jen tomḅọ inetẹ ḅarasụa ḅele-fa wararị mịnaḅọ nẹngị lama ḅa.
11Ị̀ tụḅọ, ye-nimii, anịsakị à ḅioḅẹlẹ ḅa; àrị ị́ mịẹkọn nyana tẹẹ kẹ ị́ ḅẹẹarị ḅọ goḅọ-goḅọ pakịrị ḅẹ ye nyana ḅa.
12Sịḅịḅio nyana apụ ḅoarị ḅụụ-fụka mẹ ẹrị tẹ anị kọkọrọ ḅa, kụma kuroma nyanaḅọ mẹ da-da mẹnjị mu anị ḅio sọ tẹ ọḅụkọ tiye-ì-gbo ḅẹẹ ḅa.
13Ḅẹḅọ-ḅẹḅọ tẹ apantu sọ nwenii tẹ minini tẹ onyo-sẹịn kịnị tọrụ-nimi-a ḅọ fị saa pịrịarị ḅọ mẹ, anị iḅim mḅọ nyana aị dẹrị tẹ kẹ saa mẹ gbẹ ḅẹ sakị ẹbịma.
14Í dede-funfun ḅụ oloku pọkọ kẹ ikiaḅọ sịn saakịarị sakị goyegoye ị́ pịkị ò wori ḅarịya.
15Ẹkwẹn pẹlẹ-pẹlẹ-a taḅọ kịkarị ye anie eene koroarị ene ḅụ tọịn-tọịnma koroarị minji. 16Ndẹẹ ị́ mịẹ tẹ á yaụ-sime ḅẹ ḅara? Jen sakị ị́ fẹrụ dasịẹma ḍiki tẹẹ, anịanịa pulo kẹ ḅara ḅio ọlọ wẹrị?
17Tomi jụmọ-jụmọ ḅara ye ḍawọarị, anie jen ikulele jen ikulele farịarị ḅara mẹ.
18Figi-sịn ḍikiḍiki kpaịnma, anịsakị í figi-sịnmgbọlụ nyana tẹ fị ḅa. Amịna sịḅịdaḅọ balarị fịrịmẹnjịḅọ ḅe ini ọ̀ kẹ kụn nyana kiri ḅụ koroma ḅa.
19Í minji ḅio ḍiki tẹ ẹrịarị tọrụ mẹ í nyee, anịsakị í ḅioju mie ị́ pịkị í ḅioḅẹngbọ ḅụ ẹrịarị.
20Tomina aḅioḅẹngbọ ịgbanịarị aị ma arị ḍuḅu na kịkam — sakị mamgba kiri paa foo wararị anị jen ḅii ḅụ.
21Fịnị anie tomi kẹ golu na seleḅa na tọn-ḍikiarị tomḅọ ereso sọ ini inetẹ tọn-ḍiki ḅa.
22Í oḅori-ḅọ fomu nwenii ọ̀ fịị-fịị ḅara sime sọ í inetẹ ori oḅori-sọ mẹ fomu siin ḅịa ọ̀ ḅụụ ḅio.
23Í ine-ḅara ine-ḅara kẹ iḅiọkụ ị́ anana na nambulo na ḍikiḍikii, 24kẹ gotẹ ọkọ ḍukoarị pẹrẹ sime-gbamaso-so-a. Sịẹ-sịẹ ma sọ sime gbamaso-a. 25Ị́ nama fị ḅẹ osuka mẹ pẹlẹ tẹso, í ḅo tụndụ ma akaka ḅẹ osuka mẹ pẹlẹarị, ị́ ọkọ mịẹarị sakị jen pẹlẹ ḅẹ aị ma pịkị so-pakarị. 26Í inetẹ ị́ anana ma ḅụ ị́ nyana ḅo isuke ma kẹ ḅịtẹ ḍori tẹ í oḅori ma ḅụ dẹrị ḅo igbigi kẹ kiri fẹ ḅa. 27Oḅori ma ḅụ kirikọn-aị ma nwẹnị ndo-minji pakama-ḅo na, ị́ warị ḅẹ apụ na, ị́ fịrịmẹnjị-eremịna-awọmẹ ma na pịrị ḅa.
Currently Selected:
Egberima-Ẹkwẹn 27: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria