Egberima-Ẹkwẹn 18
18
1Ja atomi na kura-kura-a apụ anie amịna aḅụụ kịngẹ kẹ ye-sịn-arị apụ; ịn ḅẹḅọ-ḅẹḅọ kẹ kuraye sịn-arị ye na tụḅụrụ ḅa.
2Oḅori-ḅọ ḅe ọ̀ bala-a ò yefieye ye naarị-o, ọ̀ naa-o; ori ḅiiarị ye mẹmgba anie kẹ tomi ḍie mịnẹ ò ye nimi ḅụram.
3Si na ḅụụ-jịrị na mẹnjị gbolomarị. Ị́ kụn famaa, tẹ anị kiri ḅụ ḍiki-sima nyana-a.
4Tomḅọ ẹkwẹn-aḅịḅị ma inetẹ nimi sime tẹ paka-ḅoarị yọ sọ ḅa, pokolotẹ abajị ọkụ, seriarị iwo ḅara.
5Anị kura-a, tomḅọ iḅi ḅara kẹ ḅẹrẹ-ḅarasii-ḅọ na mịẹ, tẹ mịẹye-ofori ḅọ karakara fama.
6Gbọrụ oḅori-ḅọ ye-nụnụa saakịarị sakị, fomuye mie ò ḅiiarị.
7Gbọrụ oḅori-ḅọ ẹkwẹn-arị sakị, ọ̀ ḅụụ mie ò gulugulumarị; ori kọn-arị ẹkwẹn ma ḍiein sọ tẹ ò kuun-sịẹmarị.
8Ọḅụ-ẹkwẹn fịye ḅẹlẹ ḅara ḅẹlẹarị — wa kpọma anị ḅẹlẹma tẹ gbịrịm-ma anị mẹnị ḅọrọmarị ḅara ḍikii!
9Kọrịnama ḅụụ-lọkọ nyana ḅọ mẹ, ye guluguluma ḅọ si ḅara mḅọ nwẹn siinm.
10KỊNỊNYANAḄỌ ḅe ọ̀ kụrọtẹ gele-warị na kịkam, anie karakaraye-mịẹapụ ma inetẹ mu tẹ ye ịn la ḅịa anga.
11Anị sime-ḅara sime-ḅara sọ, ngọ-kọnapụ ọkịarị mịnẹ ịna ngọ ịn gbaịn ḅọrọma ḅa, geletẹ, kụrọtẹ, opu ama gbori-ikelema wararị onu ọkụ.
12Tomi mangịmarị gbọrụḅọ-sọ ofori ḅụụ-iderimarị ḅọ sikima; opu ẹkwẹn kọn-arị apụ ma ịn mẹnjị mu gulugulu-faa ḅẹ muarị.
13Poki tẹrẹmẹ pakịrịị. Ị́ ọkọ mịẹ-a kụma, ị́ ị́ ḅụụ kẹ apantu sọma tẹẹ, tẹ jen-apụ ḍiki-simarị.
14Í ḍumo ịgbanịarị mẹ inetẹ ị́ ọlọ-sịẹma ḅa, í obi sakị; kụma ị́ anị fama-fama, í kunoma ḅiokpọ so tẹẹ.
15Sịḅịḅio nyana apụ ma sakị mamgba in ḅio-sẹsẹ tẹ tẹlẹma ye ḍawọ pịrịarị.
16Í opu tomḅọ dama-mu ḅẹ-ḅiiarị? Ḍiepịrịye kẹ mu ọ̀ pịrịị, anịsakị anị ị́ na sarasara ḅa.
17Ḅẹrẹ-siri ḅụ tarị ẹkwẹn ḅarị ḅọ mẹ sakị mamgba karakara ye ḍukoḅọ kịkarị, nwenii ori ori na ḅẹrẹ nyanaḅọ saakị ye kẹ ò gbela.
18Maa opu atomi ye-nụnụarị tẹ ḅẹrẹkọn-apụ sọ ḅarị inetẹ kọn pẹlẹ-a ḅẹḅẹ, apịan sụa, anị ḅẹrẹ mẹ pẹlẹ ḅa.
19Ḅarasụa í iyimbere pịrịị, ori onu gbori-ikelema wararị opu ama ḅara kẹ ị́ gbaịn ḅọrọma ḅa, kụma í ori na kamụ-kamụ-sọarị kụma ori ori aḅọkọ gbaịn ị́ pịrị ḅa.
20Í ḍuko ye dogi-ḅo ye ḅo ye, ị́nịna sime ḅa; ị́ ẹkwẹn-arị ye inetẹ ḅioḅẹlẹma-ye sọ kẹ ị́ pịrị ḅa.
21Í ḍuko ye inetẹ ḍumo wẹrị kpaịnma ḅa anịanịa anị guluguluma ḅa; mie ḅụ, ị́ mịẹ ḅẹ jen ye ofori, ị́ ẹkwẹn ma dogi-ḅo ị́ pịrị ye daa-ọkịị.
22Ị́ taḅọ ḍọkị ẹrị-ẹrị, ị́ iḅiye ḍọkị ẹrị tẹẹ; anị ḍie-pakamarị mịnẹ KỊNỊNYANAḄỌ ḅe iḅi kẹ ị́ tọn-arị.
23Igoinḅọ ẹkwẹn ḅẹ-yearị sakị, ori anị yọ sime apụ kẹ ye sịn ḅara kẹ tẹkẹarị, kụma ngọ-kọnḅọ ḅe pakịrịarị sakị kịnị bala-a ḅara mie ọ̀ kẹ ẹkwẹn-arị.
24Ja ikia ma ene la-laa, kụma ja ikiapụ ḅioḅẹngbọ-kẹ-sịrẹrẹ-niḅi ḅara sime mịnapụ nẹngịm.
Currently Selected:
Egberima-Ẹkwẹn 18: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria