Kịẹn-aḅịḅị 20
20
Kadẹsị Ḅụ Paka Aị
(Pks 17.1-7)
1Izirẹlịapụ ma, bebe tomina-ogbo mẹ nwẹnị tarị akalụ mẹ ḅụ ḅo ịn kẹ Zini nwẹn-sịn ịkpa mẹ ḅio la, tẹ tomi ma Kadẹsị ḅụ simem. Anịjụ mie Mirihamụ fịị ye, anịanga ịn pịkị á ḍiḅim.
2 #
Pks 17.1-7
Mịọkụ tomina-ogbo mẹ minji nyana-a, tẹ ịn nwẹnị ịna aḅụụ kobiri tẹ mu Mozizi na Erọnị na da-paka. 3Tomi ma nwẹnị Mozizi na ịgbanịya nyana, tẹ ḅẹẹ, “Mimgbe wamịna amịnapụ ma KỊNỊNYANAḄỌ ḅe tọrọkọ fịị sakị mẹ wamịnị sọ kọkọ ini na sọ fị tẹ! 4Í tiegotẹ KỊNỊNYANAḄỌ ḅe kobiri-ogbo mẹ kẹ mị ịkpa mẹ ḅio ḅo, mịẹtẹ wamịnị na, wamịna anama na mịanga ḅụ fịị gboloma ḅẹ ḅara? 5Anị-a kụma tiye ẹrẹsị Ijiputi ḅụ ị́ mịẹtẹ wa paka-ḅo, wa kẹ mị si anga mẹ ḅo ḅẹ ḅara? Anị sịnmgbọlị — mgbọlụ-fịye, anịanịa figi, anịanịa girepu, anịanịa omburo pakama ḅẹ anga-a; ḅuu-ḅuu minji sọ ofori.” 6Anịtẹso Mozizi na, Erọnị na nwẹnị kobiri-ogbo mẹ simearị anga ḅụ mẹnjị sikima Kobiri Akpụrụ-warị mẹ ḅọkọ mu, tẹ ịna atọrụ-kuḅu kẹ ḅịkị-koro. KỊNỊNYANAḄỌ ḅe ebube mẹ nwẹnị ḅịya paka ịn sarama.
7KỊNỊNYANAḄỌ ḅe nwẹnị Mozizi ḅẹẹ, 8“Mkpara mẹ ọkịị, tẹ ị́yẹrị na, í iyimbere Erọnị na tomina-ogbo mẹ kobirii, tẹ ịna atọrọkọ ogbo ḅụ ḍuko ịkụ mẹ pịrịị anị ḅẹ minji pakama-ḅo; mie ḅụ ị́ ịkụ mẹ ḅụ minji pakama-ḅo ịn pịrị ḅa; anie ḅụ í minji kẹ tomina-ogbo mẹ na, ịna anama na pịrị ḅuu ḅa.” 9Tẹ Mozizi KỊNỊNYANAḄỌ ḅe tọrọkọ ḅụ mkpara mẹ saakị ọkịm, KỊNỊNYANAḄỌ ḅe wẹrịtẹ tọn ọ̀ pịrị ḅara ḅụ.
10Mozizi na, Erọnị na nwẹnị ịkụ mẹ tọrọkọ ḅụ kobiri-ogbo mẹ kobiri gboloma, tẹ ọ̀ nwẹnị ịn ḅẹẹ: Mịọkụ ọ́ naa, ọmịnị sịḅị-kụrọtẹ atomi! Mị ịkụ mẹ ḅụ wa minji pakama-ḅo ọ́ pịrị ḅẹ? 11Tẹ Mozizi nwẹnị ori mkpara mẹ saakị-gelema tẹ maa asakị kẹ anị kẹ ịkụ mẹ fomu; tẹ minji tọnwa ḅara kẹ paka-ḅom, tẹ tomina-ogbo mẹ na, ịna anama na minji mẹ ḅuum.
12KỊNỊNYANAḄỌ ḅe nwẹnị Mozizi na, Erọnị na ḅẹẹ, “Ọmịnị Izirẹlịapụ ma tọrụ-ogbo ḅụ ị̀ mịẹ fịafịama ḅẹ ḅara kẹ ị̀ ḅụụ minini nyana-a ẹrẹsị, anịẹrẹsị ọmịnị mị kobiri-ogbo mẹ ọkị-ḅo ama mẹ tẹ à kẹ ịn pịrị tẹ ama mẹ ḅio suu ḅịa.”
13Mịna minji ma anie Mẹrịba ḅẹ aminji ma, Izirẹlị ḅẹ apụ ma KỊNỊNYANAḄỌ ḅe na ịgbanịya nyana anga mẹ, tẹ ori ini ogbo-ḅio ḅụ ọ̀ fịafịa ḅara kẹ ọ̀ ḅụụ ḍie-pakamam.
Idọmụ Ḅẹ Amadaḅọ Ḍụkụtẹ Izirẹlị Mẹnjị-ḅọrọ-a
14Mozizi nwẹnị Kadẹsị ḅụ oku-mẹnjịapụ kẹ Idọmụ ḅẹ amadaḅọ fịrịma, Mie í iyimbere Izirẹlị ḅẹẹ ḅara. Ḅụụ-fụka tẹ wa la aị mamgba í nimi famam; 15wamịna atẹngịapụ ma wẹrịtẹ Ijiputi mu ḅara, tẹ wa nangwọ sakị kẹ Ijiputi ḅụ angam; Ijiputi ḅẹ apụ ma guda-guda ḅara kẹ wamịna atẹngịapụ ma na wamịnị na angam. 16Tẹ wa owu KỊNỊNYANAḄỌ ḅe pịrị tẹso, ọ̀ wamịna pọkọ naam, tẹ gbọrụ enjẹlị ḅẹ ḅọ kẹ wa fịrịma tẹ Ijiputi ḅụ wa pakama-ḅom, wa mịanga Kadẹsị ḅụ emi, ị́ ama iri agara ḅẹ opu ama. 17Minini wa pịrị tẹ wa ị́ ama ḅio mẹnjị-toluḅọrọ. Wa ḍụọ, anịanịa girepu-ḍụọ ḅio mẹnjị-toluḅọrọ ḅịa; gbọrụ suḅe ḅio ḅẹ minji sọ wa ḅuu ḅịa. Amadaḅọ ḅe opu etela mẹ ḅụ mie wa mẹnjị-ḅọrọ ḅarịye, wa tọrụ pịkị ama-ḅara, anịanịa ere-ḅara sọ ḍiki ḅịa nwenii wa ị́ iri mẹ mẹnjị-toluḅọrọ so ḅa.
18Kụma Idọmụ nwẹnị ọ̀ pakịrị, “À ḍụkụ tẹ ị́ mẹnjị-toluḅọrọ ḅịa, à ḅofa okologie kẹ paka-ḅo ị́ da-paka.”
19Izirẹlịapụ ma nwẹnị ọ̀ ḅẹẹ, “Opu etela mẹ mie wa ḍiki mẹnjị ḅarịye; tẹ yẹrị na, ị̀ anama na minji ḅuu, ḅuu, anịrẹ arị anị gbẹẹ ḅa; yee à paa ḅụọ ngẹrị kẹ mẹnjị-toluḅọrọ so, jen gbọrụ ye sọ ofori.”
20Kụma ori mẹẹ, “Ọ́ mẹnjị-toluḅọrọ ḅịa.” Tẹ Idọmụ nwẹnị kụrọ, kụrọtẹ tọnwa ọmụgbin-apụ kẹ paka ḅo ịn da-paka. 21Mị-ḅara ḅụ Idọmụ ḍụkụ tẹ Izirẹlị ọ̀ ye-yọ ḅụ mẹnjị-toluḅọrọ-a; mie ḅụ Izirẹlị ọ̀ ḅụụ ḅụ vuunma ọ̀ tọrụ pịkị siinm.
Erọnị Fịị Mẹ
22Izirẹlịapụ ma bebe tomina-ogbo mẹ nwẹnị Kadẹsị ḅụ saakị mẹnjị ḅọ Họ nwẹn sin Tụndụ la. 23KỊNỊNYANAḄỌ ḅe nwẹnị Họ Tụndụ mẹ ḅụ, Idọmụ ḅẹ ama mẹ ḅẹ agara ḅụ Mozizi na Erọnị na ḅẹẹ, 24Erọnị fịị ḅa, kẹ gotẹ ọkọ ḅẹẹarị, ori ama mẹ tẹ à kẹ Izirẹlị ḅẹ apụ ma pịrị tẹ ama mẹ ḅio sọ-mu ḅịa, gbala Mẹrịba ḅẹ aminji ma ḅụ ọ́ sịḅị kụrọma à tọn ye pịrịm ẹrẹsị. 25Erọnị na, ori owiḅọtụḅọ Ẹlịyeza na ọkị tẹ ịn kẹ Họ Tụndụ mẹ kpọlị iwo ḅoo. 26Erọnị oju ḅụ ori akapa ma sin tẹ arị kẹ ori owiḅọtụḅọ Ẹlịyeza sụa; anịsakị ini Erọnị kobiri mu ori atomi pịrị ḅa, tẹ ori anịjụ fịị ḅa. 27Mozizi KỊNỊNYANAḄỌ ḅe tọn ḅara mịẹm; tẹ tomina-ogbo mẹmgba tọrụ-ogbo ḅụ ịn Họ Tụndụ mẹ kpọlị iwom. 28#Pks 29.29; Kịẹ 33.38; Dit 10.6Mozizi, Erọnị oju ḅụ ori akapa siinm, tẹ arị kẹ ori owiḅọtụḅọ Ẹlịyeza sụam; tẹ Erọnị anịjụ, tụndụ mẹ sịḅị ọgọnọ-jụ ḅụ fịịm. Anịtẹso Mozizi na, Ẹlịyeza na tụndụ mẹ ọgọnọ ideri-ḅom. 29Tomina-ogbo mẹmgba ẹrị tẹ mịnẹ Erọnị fịị tẹ ḅẹ sakị, bebe Izirẹlị warị mẹmgba ḍin suei kẹ tẹmẹ-la owu kọn Erọnị pịrịm.
Currently Selected:
Kịẹn-aḅịḅị 20: KBTP
Highlight
Share
Compare
Copy
Want to have your highlights saved across all your devices? Sign up or sign in
(C) The Bible Society of Nigeria
