Nahọmụ 3
3
1Sule-ḅịḅị sime ọmbie opu ama mẹ pịrịị,
ama mẹmgba iruo na fọịn-ọkị aị na ḅin wararị
kụrọ-ḅara kẹ ye fọịn mẹ kunoma-a!
2Bẹkẹma mẹnjịarị arụ ḅẹ fie mẹ naa,
kirimẹnjị-arụ ḅụọ fie mẹ naa,
ḍosi-ḍosi mangịarị asụ naa,
kiri sẹlẹ dọkụ-a kirimẹnjị-ọmụarụ gbii-gbiima dọkụarị naa!
3Asụ-dọkụapụ tẹịn-arị
okologie nwanam-nwanam-ma ḅịyarị,
ḅẹkẹrẹ sanịarị
fịị sara wararị inweni-ogbo-ogbo,
ḍụẹịn oju sara pakama tụndụ-tụndụ mịẹm
kịẹn-ḅịḅị nimi-a ḍụẹịn oju,
ḍụẹịn ma ọgọnọ ịn pụmbụ-pụmbụ ḅịkị-ḅịkị korom.
4Arịmgba sẹfị-ẹrẹḅọ ma kịẹn-kịẹn fa-a amịẹaị gotẹ,
pọkọsọlịmarị tẹ ḅụụ ḅụ kịnị ḅaa pile ye emi ḅọ,
arị ma tẹ amịna sẹfị amịẹaị kẹ opu asịẹ dẹrịarị,
tẹ á kọn-arị kẹ tomi-kụlọkụlọ pilearị ḅọ ma.
5Ḍikii arị ị́ da-paka wararị,
Ye mamgba nyana KỊNỊNYANAḄỌ ḅe ọkọ ḅẹẹm;
anịsakị à konju ḅụ ị́ sụa akapa saakị ị́ tọrụ gbaịn ḅa;
tẹ arị ị́ wẹrịso tẹ opu asịẹ ị́ paụ ḍiki ḅa,
tẹ ama kịrị-kịrị ma ị́ ḅụụ-jịrị ẹrị ḅa.
6À fun kẹ ị́ ọgọnọ sara ḅa,
ị́ kẹ ye-sịn-a ḅara à nwẹn kẹ ị́ mịẹ ḅa,
tẹ ị́ kẹ tomi tọrụ pịkị-pịkị ḍiki ḅẹ ye sọma ḅa.
7Anịsakị í ḍiki apụ mamgba ị́ ḅụụ mangị-so tẹ ḅẹẹ ḅa,
Ninive fa tẹ, tụḅọ á ḍuu ḅẹ?
Tọ anga à mu á dedema ḅẹ apụ ḍọkị á pịrị ḅẹ?
8Ị́ iḅi Tibesi tẹ Nayịlị nwẹn-sịn tọrụ akaka emi ḅọ ma,
minji ikelema wararị
opu tọrụ kẹ á ḅụụ-ḍụaye mịẹ,
tẹ minji amịna onu mịẹ ḅọ ma nẹngị?
9Ẹtịyopịya anie arị ịnyọ,
pịkị Ijiputi sọ, kunoma ofori ḅara,
Putu na Libiya ḅẹ apụ na anie ḅarasụa á pịrịarị apụ.
10Anịsọ ini á dogi-som,
á mu kun-ḅara ḅio sọm,
á ḍọkọḍọkọ-awọmẹ ini ịn kanị pakịrị-pakịrị mịẹm
etela goyegoye sịḅị ḅụ;
ini apịan sụa-sụa tẹ kẹ kụn nyana apụ ma ḍiemam,
tẹ ikoli kẹ arị opu atomi mamgba sụam.
11Ị́yẹrị sọ iru ḅuu ị́ tọrụ-ḅaama ḅa,
tẹ ye-nimia ḅara kẹ ye mịẹ ḅa,
tẹ kịnị-na-fịya-a ḅọ ḅe ḅụụ ḅụ
ḅụụ-ḅọị-yọ ḍọkị ḅa.
12Ị́ nama ị́ ḅụụ pịrị ọmụ kiki aị mamgba,
tarị sụa tẹ ḅịyatẹ opu ịla asịnmgbọlụ
sime-ḅara simem,
anị jike-jike,
arị sara yefịarị ḅọ ḅe ḅịḅị-ḅio sọm.
13Ị́ ọmụgbin apụ ogbo-ogbo ma ḍikii,
ereme-ereme mie ọmịna ogbo ḅio emi ye!
Ọmịna ama ḅẹ ogigo-aḅọkọ ma,
finji sara ọmịna ọmụapụ ma pịrị wararị;
fịnị ọmịna ogigo-aḅọkọ ḅẹ ẹngbẹsẹ ma dọkịma tẹẹ.
14Ini ama mẹ ikelema-koro tẹ owu paka ḅẹ ye mẹ
gotẹ ó minji ḍuu,
ị́ nama ọmụ kiki aị ma mịẹ kụrọmaa;
Ó mu biriki tẹmẹ lịka mẹ nangaa,
ó biriki tẹmẹ-aị ma ọlọ-sịẹmaa!
15Anị yọ mie fịnị ọ́ dọkịma guluguluma ḅarịye,
okologie mẹ ọ́ pẹlẹ-siin ḅa.
Igurube ye guluguluma ḅara anị nwẹn
kẹ ó guluguluma ḅa.
Ọmịnị Igurube ḅin ḅara kẹ ọmịna aḅụụ ḍụḅamaa,
ọmịnị ịkpakpa ḅin ḅara kẹ ọmịna aḅụụ ḍụḅamaa!
16Ọ́ mịẹtẹ ọmịna opu tuḅo-akọnị,
kịẹn-ḅịḅị ḅụ ḍụḅa So-tọrụ ḅẹ alolia ma nẹngị tẹ
kụma igurube ḅe amịna apamba finji tẹ fiin-som.
17Ọmịna sịḅịdapụ ma ịkpakpa
sime-ḅara simem,
ọmịna ḍiri-kẹẹapụ oḅoku ene ḅụ
ḅụọ kiri sịẹ-a igurube ogbo-ogbo sime-ḅara simem
otuka mẹ puu-paka tẹso, in fiin som,
gbọrụḅọ-sọ in sime anga nimi-a.
18Yei Asiriya ḅẹ amadaḅọ,
ị́ anana-ḍikiḍikiapụ in monoarị;
ị́ opu atomi ma sịngẹarị.
Ị́ atomi tụndụ ma ọgọnọ ḅụ gala-gala wararị,
ịn kobiri ḅẹ gbọrụḅọ-sọ ofori ḅara.
19Kẹ ị́ la ye mẹ gwọ-gwọ ye ofori,
ị́ la ye mẹ gwọ sọ iḅi ḅịa.
Ị́ ḅụụ paka ye mẹ gbolomaye naa apụ mamgba
ịna aḅara farị-farị ị́ pịrịarị,
anị kẹ gotẹ ọkọ mịẹarị,
ị́ sịkọpẹlẹ-a ḅara kẹ mịẹarị siye mẹ,
tụḅọ ọgọnọ kụma anị amụ la-a?
Currently Selected:
Nahọmụ 3: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria