Matiyo 26
26
Ịn Ḅaa-Ḅẹrẹ Ḅiya Jizọsị Pịrịm
(Mak 14.1-2; Luk 22.1-2; Jọn 11.45-53)
1Jizọsị ò toluma sime aị mamgba toluma fama tẹso, ọ̀ nwẹnị ò ḍukamẹnjịapụ ma ḅẹẹ, 2#Pks 12.1-27“Maa ḍin kọnm, ọmịnị sọ nimi ḅara ḅụ, Saḅa-ḅọrọ Alalị mẹ fị sakị mẹ la ḅa, tẹ Juu-ḅẹ-apụ ma Tomḅọ Tụḅọ ḅe saḅama igoniapụ ma pịrị tẹ ini ọ̀ kẹ ẹngbẹsẹ-sịn ḅụ ḅakụ ḅa.”
3Anịtẹso agbamịẹapụ ma na omongi apụ ma na nwẹnị Kayafasị, Sịḅịda-Agbamịẹḅọ ḅẹ, opu warị mẹ ḅio kobiri, 4tẹ ịn ḅọịma tẹ Jizọsị kun tẹ ọ̀ ḅaa ḅẹ ḅẹrẹ-ḅiya ḅa. 5Ini mẹẹ, “Ini alalị mẹ fịarị ogbo wa miemẹ mịẹ ḅịa, tomi ma ḅofa ama fiema.”
Bẹtani Ḅụ Ịn Olo Kẹ Jizọsị Sịḅị Saram
(Mak 14.3-9; Jọn 12.1-8)
6Jizọsị Bẹtani ḅụ Sayịmọnị nwẹn-sịn jen sakị sofịnị-obi kọn tẹ so tẹ ḅọ warị mum. 7#Luk 7.37,38Jizọsị anịanga yefịarị ogbo, gbọrụ ẹrẹḅọ ọ̀ dama-ḅom, tẹ á ḅara yela lamatẹ sẹntị, tẹ ịn kẹ alabasịta nwẹn-sịn ḍụḅarị ololo kẹ sụa ye simem, tẹ á nwẹnị sẹntị mẹ kẹ ọ̀ sịḅị ḅama sara. 8Ò ḍukamẹnjịapụ ma miemẹ ẹrị tẹ ịganịm. Ịn nwẹnị gbela, “Tiye ẹrẹsị á papaa mie mẹmgba guluguluma? 9Mị sẹntị mẹ ini inetẹ anị kẹ dẹrị ḅarị igbigi ḅaka wararị, tẹ igbigi mẹ kẹ igoin-apụ pịrị ḅarị ya!”
10Jizọsị ịn ḍuko ye mẹ nimi tẹ ịn ḅẹẹm, “Ó tiegotẹ ma ẹrẹḅọ ma ḅụụ fụkamarị? Iḅi lamatẹ, kpaịntẹ ye mie á mịẹ ị̀ pịrị ye! 11#Dit 15.11Sakị mamgba ọmịnị igoin-apụ nyana ḅa, kụma sakị mamgba ọmịnị ị̀ nyana ḅịa. 12Á mịẹ ye mẹ anie, á mị sẹntị mẹ kẹ ì oju akpakpa mẹ tẹlẹma tẹ kẹ anị ḍiḅi ḅẹ sakị wẹrịmam. 13Mịọkụ à mịẹtẹ ó nimiarị mịnẹ, piki-pikiye-ofori ḅara ḅụ, ịn mị Iḅi-oku mẹ ḍuko ḅẹ anga goyegoye, bebe tomikiri mẹ ḅụ, á mịẹ ye mẹ ịn kẹ á kẹ gotẹ ḍuko ḅa.”
Judasị Mininim Ò Jizọsị Kẹ Dẹrịma Ḅa
(Mak 14.10-11; Luk 22.3-6)
14Anịtẹso ò Ḍukamẹnjị Oyi Maa apụ Finji ma ḅẹ gbọrụḅọ, ịn kẹ Judasị Isikarịyọtị sịn ḅọ ḅe, agbamịẹapụ ma dama-mu 15#Zẹk 11.12tẹ gbelam, “Ó tiye kẹ ị̀ pịrị ḅa, à Jizọsị ḅẹ kẹ ọmịna ḅara-ḅio dẹrịma kụma?” In seleḅa igbigi ḅẹ suei kịẹn pakama-ḅo tẹ kẹ ọ̀ pịrịm. 16Anị sakị ḅụ Judasị saakị, ò Jizọsị ḅọrọma ịna ḅara ḅio suu ḅẹ ḅọkọ ḍọkịm.
Jizọsị Ò Ḍukamẹnjịapụ Ma Na Saḅa-ḅọrọ Fịye Mẹ Fịm
(Mak 14.12-21; Luk 22.7-13,21-23; Jọn 13.21-30)
17Sun-a Fịturu Alalị mẹ ḅẹ tarị ene mẹ ḅụ, Jizọsị ḍukamẹnjịapụ ma ọ̀ dama-ḅo tẹ ò gbelam, “Í ḅiiarị wa Saḅa-ḅọrọ Fịye mẹ tẹlẹma ị́ pịrị ḅẹ anga tọ-anga?”
18Ọ̀ nwẹnị ịn ḅẹẹ, “Ọmịnị opu ama mẹ ḅio nwẹn pembema tomḅọ dama-mu tẹ ọ̀ ḅẹẹ, Ye-tolumaḅọ ḅe mẹẹ, ‘Ị̀ sakị la tẹ, ì ḍukamẹnjịapụ ma na ị̀ na ị́ warị Saḅa-ḅọrọ Fịye mẹ fị ḅa.’ ”
19Ò ḍukamẹnjịapụ ma Jizọsị in ḅẹẹ ḅara mịẹ tẹ Saḅa-ḅọrọ Fịye mẹ tẹlẹmam.
20Ene ḅoḅiri tẹso, Jizọsị na ò Ḍukamẹnjị Oyi Maa apụ Finji ma na fịye fị ḅẹ tẹ lẹgị-simem. 21In ye mẹ fịarị ogbo, Jizọsị nwẹnị ḅẹẹ, “À ḍuko ọ́ pịrịarị, ọmịna ḅụụ ḅẹ gbọrụḅọ ị̀ kẹ dẹrịma ḅa.”
22Ò ḍukamẹnjịapụ ma nwẹnị ḅụụ-ḅalaḅala lama tẹ, gbọrụḅọ, gbọrụḅọ: saakị ò gbelam, “KỊNỊNYANAḄỌ, karakara-ḅara-ḅụ ị́ ị̀ ḅẹẹ-a?”
23 #
Dev 41.9
Jizọsị nwẹnị pakịrị, “Amịna fịturu kẹ ị̀ na gbọrụ ẹfẹrẹ ḅio gbọn-fịarị ḅọ ḅe anie ị̀ kẹ dẹrịma ḅarị ye. 24Tomḅọ Tụḅọ ḅe fịị ḅa Fịafịa Ḍiri mẹ wẹrịtẹ ḅẹẹ ḅara, kụma tẹkẹlẹ kpọma sime Tomḅọ Tụḅọ ḅe kẹ dẹrịmarị ḅọ ḅe pịrị ḅa! Ọkọ sime pịrị ḅarị tomḅọ mẹ mḅọ gbala-gbala iyi-a iḅi mḅọ iyim mẹ nẹngịm!”
25Judasị, Jizọsị kẹ dẹrịma ḅọ ḅe, nwẹnị ẹkwẹn pakama tẹ gbela: “Ye-tolumaḅọ, karakara-ḅara-ḅụ ị́ ị̀ ḅẹẹ-a?”
Jizọsị nwẹnị pakịrị, “Anie ḍuko ḅara.”
KỊNỊNYANAḄỌ ḅe Ḅoḅiri Fịye Mẹ
(Mak 14.22-26; Luk 22.14-20; 1 Kọr 11.23-25)
26In ye mẹ fịarị ogbo, Jizọsị nwẹnị fịturu ọkị, tẹ ịmịẹtẹ kẹ Tamụnọ ḅẹẹ tẹ, anị paịn tẹ kẹ ò ḍukamẹnjịapụ ma pịrị. Ori mẹẹ, “Ọmịnị ọkị tẹ fị, mie ì oju mẹ.”
27Anịtẹso ọ̀ mọngị mẹ ọkị tẹ ịmịẹtẹ kẹ Tamụnọ ḅẹẹ tẹ anị kẹ ịn pịrịm. Ori mẹẹ, “Ọmịnị-mgba anị ḅuu; 28#Pks 24.8; Jer 31.31-34mie ị̀ ọmbie mẹ, tẹ Tamụnọ kẹ ori ọḅọkụ mẹ mịẹ kụrọmarị ye mẹ, ị̀ ọmbie tẹ tọnwa atomi asi wẹrịso gotẹ ọsụ-sara ye mẹ. 29À ḍuko ọ́ pịrịarị, à ḅarị jen-maaịn kẹ mị iru mẹ ḅuu ḅịa, nwenii ị̀ Ḍa ḅe Ama-da tẹ ḅẹrẹtọn-arị anga mẹ ḅụ àrị ọmịnị na ịwọ iru mẹ ḅuu sakị la ḅa.”
30Anịtẹso ịn gbọrụ nume-su tẹ mẹnjị paka so Olivu Tụndụ mẹ mum.
Jizọsị Ḍukom Pita Ò Piki Ḅa
(Mak 14.27-31; Luk 22.31-34; Jọn 13.36-38)
31 #
Zẹk 13.7
Anịtẹso Jizọsị nwẹnị ịn ḅẹẹ, “Mị gbọrụ ḍin mẹ ḅụ, ọmịnị-mgba ì koroma mangị-so ḅa, kẹ gotẹ ọkọ ḅẹẹarị, Fịafịa Ḍiri mẹ ḍuko tẹ, ‘Tamụnọ anana-ḍikiḍikiḅọ ḅe ḅaa tẹ anana ogbo mẹ gala-gala ḅa.’ 32#Mat 28.16Kụma Tamụnọ fịị ḅụ ị̀ saakịma sakị, yẹrị tarị mu, ọmịnị amụ mu la-a ogbo, Galili la ḅa.”
33Pita nwẹnị ẹkwẹn pakama tẹ Jizọsị ḅẹẹ, “Yẹrị kụma, gbala-gbala àrị í koroma so ḅịa, kirikọn-apụ mamgba nwẹnị ọkọ mịẹ sọ.”
34Jizọsị nwẹnị Pita ḅẹẹ, “À ḍuko ị́ pịrịarị, mịnẹ mị ḍin ḅụ tarị ọḅọkọ amụ paan-a ogbo, ị́ tẹra sakị kẹ ḅẹẹ ḅa mịnẹ í ì nimi-a!”
35Pita pakịrịm, “Gbala-gbala, yẹrị ọkọ sime ye ḍuko ḅịa, arị ị́ ḅụụ sọ tẹ fịị ḅẹ sọ!”
Tẹ Jizọsị ḍukamẹnjịapụ ma ḅụ osi apụ mamgba sọ anị gberie mẹ ḍukom.
Jizọsị Gẹtịsimani Ḍụọ Ḅụ Tẹkẹm
(Mak 14.32-42; Luk 22.39-46)
36Anịtẹso Jizọsị ò ḍukamẹnjịapụ ma kẹ ọ̀ ḅụụ sụa tẹ Gẹtịsimani nwẹn-sịn anga mum, tẹ ori ịn ḅẹẹm, “Ọ́ mịanga lẹgị-sime tẹ yẹrị mu osi saḅa-anga tẹkẹ.” 37Ọ̀ nwẹnị Pita na Zẹbidi maa owiapụ-awọmẹ ma na ọkị ọ̀ ḅụụ sụa mu. Opu kururu na tẹmẹ-naịn-naịn na ọ̀ ḅụụ sọm. 38Tẹ ori ịn ḅẹẹm, “Ì ḅioḅẹngbọ ponomarị kururu mẹ ḅaka ḅara ẹrẹsị anị ị̀ ḅaa ḅẹ-yearị. Ọ́ mịanga sime tẹ ị̀ na koruu.”
39Ọ̀ nwẹnị kẹlẹ mẹnjị tọrọkọ mu, tẹ amịna ḅụụ sẹma-kiri-gbin, tẹ iḅo tẹ tẹkẹ, “Ị̀ Ḍa, anị inetẹ mịẹ ḅarị ḅẹḅẹ, ị̀ ḅara ḅụ mị kururu kọpụ mẹ siin! Anịsọ à ḅii ḅara-a, kụma ị́yẹrị ḅii ḅara.”
40Anịtẹso Jizọsị pịkịma ò ḍukamẹnjị tẹra apụ ma dama-mu tẹ ini ẹrịm ịn monoarị; tẹ ọ̀ nwẹnị Pita ḅẹẹ, “Ndẹẹ ọmịnị tẹra apụ ma inetẹ gbọrụ sakị kịngẹ sọ kẹ mono-a tẹ ị̀ na koru-a ḅara? 41Ó koru tẹ tẹkẹẹ, mịẹtẹ ọ́ daaḍiki ḅio sọ ḅịa ḅara. Tẹmẹ ḅe minini wararị, kụma meni-oju mẹ ịnyọ nyana-a.”
42Jizọsị nwẹnị jen gbọrụ sakị kẹ mẹnjị sọ-mu tẹkẹ, “Ị̀ Ḍa, ị̀ ḅara ḅụ ị́ nwẹnị mị kururu kọpụ mẹ sin ḅẹ ọkụ ofori, arị anị ḅio sime ye ḅuu sikima, ḅẹḅẹ ị́ tọn ye mịẹ.” 43Ọ̀ nwẹnị jen gbọrụ sakị kẹ pịkịma ḅo tẹ ẹrị mịnẹ ò ḍukamẹnjịapụ ma mono ḅọrọ so tẹ, ịn ḅarị inetẹ ịna atọrụngbọ finji-a.
44Jizọsị nwẹnị sin ịn koroma so, tẹ mẹnjị mu tẹra sakị karama ye kẹ tẹkẹ, tẹ paa gbọrụ ẹkwẹn mẹ kọn. 45Anịtẹso ọ̀ pịkịma ò ḍukamẹnjịapụ ma dama-mu tẹ ḅẹẹm, “Ọ́ paa mono tẹ ịnyọsararị? Ḍikii! In Tomḅọ Tụḅọ ḅe saḅama si-mịẹapụ kụrọ ḅara-ḅio suu ḅẹ sakị mẹ la tẹ. 46Ọ́ saakịị, ó yee wa so. Ḍikii, ḅie ị̀ kẹ dẹrịmarị tomḅọ ḅe mịanga!”
In Jizọsị Kunm
(Mak 14.43-50; Luk 22.47-53; Jọn 18.3-12)
47Jizọsị paa ẹkwẹn-arị ogbo, Judasị ò Ḍukamẹnjị Oyi Maa apụ Finji ma ḅẹ gbọrụḅọ gbọrụ opu tomina-ogbo na ḅom; ịna ḅụ ja apụ okologie ọlọm, ja apụ pịkị mgbele dogim; agbamịẹapụ ma na omongiapụ ma na ịn kẹ fịrịmam. 48Jizọsị kẹ dẹrịma ḅọ ḅe mị elekima mẹ ḍuko tomina-ogbo mẹ pịrị wẹrị tẹ: “À ḅẹlẹma ḅara ḅụ ekpe kẹ fịnama ḅarị ḅọ ḅe anie ó ḅiiarị tomḅọ ḅee. Ọmịnị ò kuun.”
49Judasị nwẹnị da-da mẹnjị mu Jizọsị la tẹ ḅẹẹ, “Ye-tolumaḅọ, dein ị́ na simee,” tẹ nwẹnị ḅẹlẹma ḅara ḅụ ekpe kẹ ọ̀ fịnama.
50Jizọsị nwẹnị pakịrị, “Ikiaḅọ, sarasarama í gotẹ ḅo ye mịẹ.”
Anịtẹso ịn mẹnjị mu Jizọsị kun tẹ ori ọlọ kụrọmam. 51Jizọsị na sime apụ ma ḅẹ gbọrụḅọ nwẹnị ori okologie wọrọ-pakama-ḅo tẹ kẹ Sịḅịda-Agbamịẹḅọ ḅe omoniḅọ ḅeri pẹlẹ sin. 52Jizọsị nwẹnị ọ̀ ḅẹẹ, “Í okologie mẹ kẹ sin lubulu mẹ ḅio suu wẹrịị. Ogie sin-arị apụ mamgba ogie fịị mie ịn kọn ḅarịye. 53Í nimi-a, àrị inetẹ ị̀ Ḍa ḅe tẹkẹ tẹ ori anị gbọrụ kiri oyi maa enjẹlị ọmụ-ogbo finji nẹngị ye kẹ fịrịma tẹ in ḅo ḅarasụa ị̀ pịrị ḅẹ ḅara? 54Tẹ anị nwẹnị anị ḅara paka kụma, ndẹẹ Fịafịa Ḍiri mẹ ḍukom mịnẹ anị ọkọ paka ḅa ḅẹẹ ye mẹ mịẹ tẹ ye sọ ḅẹ ḅara?”
55 #
Luk 19.47; 21.37 Anịtẹso Jizọsị ẹkwẹn tomina-ogbo mẹ pịrịm, “Ọmịnị okologie na mgbele na ọlọ tẹ paka-ḅo ì kun ḅẹm aro, gbala yẹrị ama oloko kan tẹ mangịarị ḅọ ọkụ? Ene-ḅaaene-ḅaaene à kọkọ Tamụnọ-warị mẹ ḅio lẹgị-lẹgị tẹ ye toluma, tẹ ọmịnị ì kun-a. 56Kụma mie mẹmgba paka tẹ, mịẹtẹ ịkịankoroapụ ma Fịafịa Ḍiri mẹ ḅio kẹẹ koroma wararị aị ma karakara aị sọ ḅẹ ḅara.”
Anịtẹso ò ḍukamẹnjịapụ mamgba ò koroma mangị-som.
In Jizọsị Kẹ Sịẹ-Kobiri Mẹ Tọrọkọ Mum
(Mak 14.53-65; Luk 22.54-55,63-71; Jọn 18.13-14,19-24)
57Jizọsị kun apụ ma nwẹnị ọ̀ kẹ Kayafasị, Sịḅịda-Agbamịẹḅọ ḅe, warị mu, anie Oloko toluma apụ ma na omongi apụ ma na kobiri wararị anga mẹ. 58Pita tombi kẹ tomi ma pịrị-pịrị mu Sịḅịda-Agbamịẹḅọ ḅe onu ḅọkọ mẹ lam. Ọ̀ nwẹnị sọ-mu tẹ ḅọkọ-koruapụ ma na lẹgị, ò ye paka ḅẹ ḅara nimi ḅẹ gotẹ. 59Agbamịẹapụ ma na bebe ḅẹrẹ-siri mẹ na ini inetẹ ḅara, inetẹ ḅara mịẹtẹ iruo ye kẹ Jizọsị sịḅị sẹịn tẹ ini ọ̀ ḅaa ḅẹ apụ ḍọkịm; 60kụma ini inetẹ gbọrụḅọ-sọ ḍọkị-ẹrịa, karakara ye tọnwa-apụ paka mu tẹ ịna ḅịḅị sọ iruo aị, iruo aị kẹ ọ̀ sịḅị sẹịnm ḅẹ sọ. Kunoma ḅụ maa apụ tolu-sịẹ 61#Jọn 2.19tẹ ḅẹẹm, “Ḅị tomḅọ ḅe ḅẹẹm, ‘Àrị inetẹ Tamụnọ-warị mẹ kaan-sara tẹ tẹra aḍin ḅụ anị nama sịẹma ḅa.’ ”
62Sịḅịda-Agbamịẹḅọ ḅe nwẹnị saakị sịẹ tẹ Jizọsị gbela, “Ịn kẹ nwẹn ị́ sịḅị sẹịn-arị aị ma ḅụ ị́ pakịrị ḅẹ ye ofori?” 63Kụma Jizọsị nwẹnị gbọsime. Sịḅịda-Agbamịẹḅọ ḅe nwẹnị siin ẹkwẹn ọ̀ pịrị, “Mịọkụ à ḍumo wararị Tamụnọ ḅe ẹrẹ kẹ ye kẹ ị́ karị tẹ: ḍuko wa pịrị, ị́yẹrị Mẹsaya, Tamụnọ Tụḅọ ḅe ḅẹḅẹ.”
64 #
Dan 7.13
Jizọsị nwẹnị ọ̀ pakịrị, “Anie ị́yẹrị ḍuko ḅara. Kụma à ḍuko ọmịnị-mgba pịrịarị: mị sakị mẹ ḅụ saakị mu ó Tomḅọ Tụḅọ ḅe ẹrị ḅa, ọ̀ Kụrọmamgba Nyanaḅọ ḅe ama-ḅara anga lẹgị-sime wararị, tẹ So-tọrụ ḅụ oḅuto ọgọnọ sime tẹ ḅoarị!”
65 #
Lẹv 24.16
Sịḅịda-Agbamịẹḅọ ḅe miemẹ naa ye ḅụ ọ̀ nwẹnị amịna kapa kan tẹ ḅẹẹ, “Tamụnọ fie-sima ẹkwẹn! Wa ḅarị jen ye nimi tẹ ḍuko ḅẹ apụ ḅii-a! Mị gbọrụ sakị mẹ ḅụ ọ̀ kọn Tamụnọ fie-sima ẹkwẹn mẹ ọ́ naa tẹ! 66Ndẹẹ ọmịna kuroma?”
Ịn nwẹnị pakịrị, “Ḅẹrẹ ọ̀ ḅara si tẹẹ, ọ̀ fịị nyanam.”
67 #
Ayị 50.6
Anịtẹso ịn fịla kẹ ọ̀ tọrụ isi tẹ ò fomum; tẹ ini tẹ ḅara finji ọ̀ tọrụ ḅọrọ apụ ma 68ḅẹẹm, “Mẹsaya, ḅịrị ẹrị wa pịrịị! Í fomu ḅọ mẹ tọnma ḅoo!”
Pita Jizọsị Pikim
(Mak 14.66-72; Luk 22.56-62; Jọn 18.15-18,25-27)
69Pita onu mẹ ḅio etela-ogbo lẹgị wararị ogbo, Sịḅịda-Agbamịẹḅọ ḅe fịrịmẹnjị-eremịna-awọmẹ ma ḅẹ gbọrụḅọ ḅo tẹ ọ̀ ḅẹẹm, “Ị́yẹrị sọ Galili ḅẹ Jizọsị ḅe na simem.”
70Kụma ọ̀ nwẹnị inimgba tọrọkọ anị pịkị, tẹ pakịrị, “Í ḍukoarị ye mẹ fiearị ye tiye-o, tiye-o à nimi-a,” 71tẹ ọ̀ nwẹnị mẹnjị paka onu ḅọkọ mẹ ḅụ ḅọrọ sọ-mu anga mẹ la. Jen fịrịmẹnjị-ẹrẹḅọtụḅọ ori ẹrị tẹ anịanga sime atomi ma ḅẹẹm, “Ori na Nazarẹtị ḅẹ Jizọsị ḅe na simem.”
72Pita pịkị anị pịkị tẹ pakịrịm, “À ye karị ị̀ ḅụụ pịrịm, anị tomḅọ ḅe à paa ò nimi, nimi!”
73Sakị kẹlẹ ḅọrọ tẹso, anịanga sịẹsime sime owiapụ ma ḅo Pita ḅẹẹm, “Piki-pikiye-ofori, ịna ḅụ ḅẹ gbọrụḅọ. Ḍiki ya, ị́ ẹkwẹn-arị ḅara mẹ sọ í ḍuko-pakamarị!”
74Anịtẹso Pita nwẹnị ḅẹẹ, “À ye karị ị̀ ḅụụ pịrị tẹ karakara mẹ ḍukoarị! Yee Tamụnọ fomu-ḅara ḅo ị̀ la, à paa iruoarị ḅẹḅẹ! Anị tomḅọ ḅe àrị ò nimi-a!”
Anịtẹso anị gbọrụ sakị ḅụ ọḅọkọ nwẹnị paan, 75tẹ Pita nwẹnị Jizọsị ḍuko ọ̀ pịrị ḅọrọma tẹ ye mẹ kẹ ḅiokoroma: “Tẹrẹmẹ ọḅọkọ paan, ị́ tẹra sakị kẹ ḅẹẹ ḅa mịnẹ í ì nimi-a.” Ọ̀ nwẹnị mẹnjị paka tẹ tẹmẹ-la ḅara kẹ owu.
Currently Selected:
Matiyo 26: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria