Matiyo 15
15
Atẹngịapụ Ma Tolumaye Mẹ
(Mak 7.1-13)
1Anịtẹso Farịsiiapụ ma na Oloko Tolumapụ ma na ḅẹ ja apụ nwẹnị Jeruselemu ḅụ sime tẹ Jizọsị dama-ḅo, tẹ ò gbela, 2“Tiye mịẹtẹ í ḍukamẹnjịapụ ma wamịna atẹngịapụ ma koroma-so wa pịrị wararị ama anga-anga aḅara ma koko-a? Ịn karakara ḅara kẹ ịna aḅara sịkịrị, sịkịrị-a tẹ ye fịarị!”
3Jizọsị nwẹnị pakịrị, “Anịsakị ọmịnị ḅọrọ tiegotẹ Tamụnọ oloko mẹ kan, kan tẹ ọmịnị ḅarana tolumarị ye rẹ ḍukamẹnjịarị? 4#Pks 20.12; Dit 5.16; Pks 21.17; Lẹv 20.9Kẹ gotẹ ọkọ ḍukoarị, Tamụnọ ḅẹẹm, ‘Ị́ ḍa na í iyingi na kụn’ tẹ ‘Nume mgbọ sin tẹ kẹ amịna ḍaḅọ, anịanịa iyingiḅọ woriḅọ-woriḅọ ini mḅọ ḅaa.’ ” 5Kụma ọmịnị tolumarị mịnẹ tomḅọ kẹ ḅarasụa mḅọ ḍaḅọ, anịanịa iyingiḅọ, pịrị ḅẹ ye, tẹ mḅọ “Miemẹ sime Tamụnọ pịrịm” ḅẹẹ 6kụma, mḅọ kẹ ḍaḅọ ḅe kụn kụn ye ḅarị ofori. Mị ḅọkọ mie ọ́ ḅọrọ tẹ Tamụnọ tọn koroma ye mẹ kẹ ḅarịye sịn-a ye, mịẹtẹ ọmịnị ọmịna ḅara kuḅu ḅẹ tolumaye koko ḅẹ ḅara. 7Ọmịnị anie mịẹ kịnị ḍie atomii! Ayịzaya ọmịna ḅụ koro ịkịan mẹ kura ḅara ḍikii!
8 #
Ayị 29.13
Tamụnọ ḅẹẹm, “mịna atomi ma, ḅịḅị apara ngẹrị mie ịn kẹ ị̀ kụn-arị,
kụma ịna aḅioḅẹngbọ ị̀ ḅụụ ḅele la jụ iḅerea.
9In sunsin ị̀ pịrịarị nwẹn ḅẹẹ ye mẹ sọ papaa ye,
in tomi tọn koroma aị kẹ ì oloko ma kiri ḍima tẹ tolumarị mẹ ẹrẹsị!”
Mịẹtẹ Tomḅọ Fịafịaḅọ Sọarị Aị Ma
(Mak 7.14-23)
10Anịtẹso Jizọsị tomina-ogbo mẹ sịn ọ̀ ḅụụ pịrị tẹ ịn ḅẹẹm, “Ó poki tẹ anị fiearị ye naa! 11Tomḅọ mịẹ tẹ mḅọ Tamụnọ tọrọkọ fịafịaḅọ sọarị ye, mḅọ kẹ ḅịḅị-ḅio sụa fịarị ye-a; anie nakara mḅọ ḅịḅị-ḅio paka-ḅoarị ye rẹ mie mḅọ kẹ Tamụnọ tọrọkọ fịafịaḅọ sọmarị.”
12Anịtẹso ò ḍukamẹnjịapụ ma ọ̀ dama-ḅo tẹ ḅẹẹm, “Ị́ kọkọ nimi, mịnẹ í ḍuko ye mẹ Farịsiiapụ ma ḅụụ-ḅẹsọm?”
13Jizọsị nwẹnị pakịrị, “Ị̀ Ḍa So-ḅio simearị ḅọ ḅe ḅarana ḍiḅi-a sịn goyegoye, in suku-na-suku-na anị nụnụ pakama-ḅo ḅa. 14#Luk 6.39Ọmịnị ịn bala ma! Ini ma anie tọrụngbọ-pụụntẹ-apụ tẹ jen tọrụngbọ-pụụntẹ-apụ tọrọkọ-tarị apụ; tẹ tọrụngbọ-pụụntẹḅọ jen tọrụngbọ-pụụntẹḅọ tọrọkọ-tarị sakị goyegoye, ini maa apụ ma mu ḅịkị olulu ḅio sọ ḅa.”
15Pita nwẹnị ẹkwẹn pakama, “Ị́ nwẹn ḍukoarị ye mẹ puu finji wa pịrịị.”
16Jizọsị nwẹnị ịn ḅẹẹ, “Amụ ọ́ paa ye nimi osi apụ ma nẹngị-a. 17Anị fiearị ye ọ́ naa-a aro? Ḅẹẹye-ḅẹẹye tẹ tomḅọ ḅịḅị-ḅio sọ-mu ye, mu ye ḅọrọ mu mḅọ ịla ḅio koroarị, tẹso, anị pịkị mḅọ oju ḅio paka-ḅoarị. 18#Mat 12.34Kụma tomḅọ ḅịḅị-ḅio paka-ḅoarị aị ma, mḅọ ḅioḅẹngbọ mie arị sime tẹ paka-ḅoarị, tẹ mịna aị ma mie Tamụnọ tọrọkọ mḅọ kẹ fịafịa-aḅọ sọmarị aị ma. 19Kẹ gotẹ ọkọ ḍukoarị, mḅọ ḅioḅẹngbọ ḅụ mie si akuroma, tẹ mḅọ sukuruma mu kịnị ḅaa na, sẹfị na, ja si amịẹaị na ḅụ suuarị aị ma sime tẹ paka-ḅoarị; furu na, iruo na ja apụ wori-sima na sọ, paa anị gbọrụ ḅara mẹ. 20Mịna aị ma mie tomḅọ kẹ fịafịa-a ḅọ sọmarị aị ma. Kụma Juu-ḅẹ-apụ ma ḅiiarị ḅara kẹ ḅara sịkịrị-a tẹ ye fị rẹ tomḅọ kẹ Tamụnọ tọrọkọ fịafịa-a ḅọ sọma-a.”
Gbọrụ Ẹrẹḅọ Nyana Minini
(Mak 7.24-30)
21Jizọsị nwẹnị anịanga ḅụ so Taya na, Sayịdọnị na opu ama ma na kpeki anga mu. 22Kenanị ḅẹ ẹrẹḅọ anịjụ anga simem. Á nwẹnị Jizọsị dama-ḅo tẹ oloku ḅụ ọ̀ ḅẹẹ, “Devidi Tụḅọ! Ọkụrụkụrụ nyana ị̀ pịrịị. Oru ḅalafama ḅara kẹ ị̀ ẹrẹḅọtụḅọ ọlọ koroma wararị.”
23Kụma Jizọsị ḅịḅị fie á pịrị-a. Ò ḍukamẹnjịapụ ma ọ̀ dama-ḅo tẹ ḅẹẹm, “Sisi, á ḅẹẹ á so! Á wa ḍukamẹnjị-mẹnjị tẹ oloku wamịna ḅụụ fụkamarị!”
24Anịtẹso Jizọsị nwẹnị pakịrị, “Izirẹlị ḅẹ atomi, tẹ fatẹ anana ma, kịngẹ mie ini ị̀ kẹ fịrịma apụ.”
25Ori ọkọ ḍuko sakị ẹrẹḅọ ma ḅo ọ̀ ḅụọ suku á ḅụụ sẹma-kiri-gbin tẹ nwẹnị ḅẹẹ, “Ị̀ nyanaḅọ, paa ḅarasụa ị̀ pịrịị!”
26Jizọsị nwẹnị pakịrị, “Awọmẹ fị ḅẹ fịye kẹ wakị obiri pịrị mẹ kuraye mịẹ ye-a.”
27Ẹrẹḅọ ma nwẹnị pakịrị, “Ị̀ nyanaḅọ, anie karakara ye, kụma obiri ma sọ, paa warị nyanaḅọ ḅe ye fịarị dẹbịlẹ ḅụ kiri kọn tẹ siin-koro afịaị ma fị fịm.”
28Mie ḅụ Jizọsị nwẹnị á pakịrị, “Ẹrẹḅọ, ị́ nyana minini ḍụḅam! Í ḅiiarị ye mẹ anị mịẹ ị́ pịrị tẹ ye sọ ḅa.” Tẹ anị gbọrụ kiri á tụḅọ ma nwẹnị gwọọ.
Jizọsị Tọnwa Atomi Gwọm
29Jizọsị anịjụ mẹ ḅụ sọ-mu Galili Tọrụ akaka ḅụ mẹnjịm. Tẹ ọ̀ gbọrụ tụndụ kpọlị tẹ lẹgị-simem. 30Opu tomina-ogbo-ogbo, ekeliapụ na, tọrụngbọ-pụụntẹ-apụ na, ngụrọ-kọnapụ na, oḅu amẹẹ na, pịkị tọnwa ja obi apụ na ịn nwẹn ọkị-ḅo Jizọsị ḅụọ suku koromam; tẹ ọ̀ nwẹnị ịn gwọ. 31Tomi ma ḅo oḅu amẹẹ ma ẹkwẹn-arị ye na, ngụrọ-kọnapụ ma gwọ ye na, ekeliapụ ma mẹnjịarị ye mẹ na, tọrụngbọ pụụn sime apụ ma ye ẹrịarị ye mẹ na, ẹrị tẹso ịn ḅụụ-bua tẹ, Izirẹlịapụ tẹkẹarị Tamụnọ ḅe tokinim.
Jizọsị Fịye Kẹ Tọnwa-tọnwa Atomi Pịrị Fịm
(Mak 8.1-10)
32Jizọsị ò ḍukamẹnjịapụ ma sịn ọ̀ ḅụụ pịrị tẹ ḅẹẹm, “Mịna atomi ma àrị in ḍiki-sịḅị-kụrụkụrụarị, kẹ gotẹ ọkọ ḍukoarị tẹra aḍin ịn nwẹn kẹ ị̀ na sime tẹ, mịọkụ ịn ḅarị fịye nyana-a. À ḅii-a àrị ịn nwẹn ye fị-a ḅara mẹ kẹ ịn ḅẹẹ tẹ in so, in so warị muarị ogbo in ḅofa naịn-ḅọrọ etela ogbo.”
33Ò ḍukamẹnjịapụ ma nwẹnị ò gbela, “Mie kịnị sọ anga-a yọ mẹ ḅụ ndẹẹ wa mị inweni-ogbo mẹ na iḅi ḅẹ fịye ḍọkị-ẹrị ḅẹ anga?”
34Jizọsị nwẹnị gbela, “Ọ́ fịturu nda akpo nyana?”
Ini mẹẹ, “Sọnọma akpo na boowa inji na.”
35Mie ḅụ Jizọsị inweni-ogbo mẹ ḅẹẹ tẹ in kiri-ḅio lẹgịm. 36Anịtẹso ọ̀ fịturu sọnọma akpo ma na inji mẹ na ọkị tẹ ịmịẹtẹ kẹ Tamụnọ ḅẹẹ tẹ arị paịn-paịntẹ kẹ ò ḍukamẹnjịapụ ma pịrị, tẹ ini nwẹnị kẹ tomi ma pịrị. 37Inimgba fị furo ḅinmam. Anịtẹrẹmẹ ò ḍukamẹnjịapụ ma tomi ma fị kọnma aị ma tan sọnọma akana ḅinmam. 38Ye mẹ fị owiapụ ma kịẹn-ḅịḅị, ereme na, awọmẹ na kẹ sụa kịẹn-a ḅara ḅụ, kịnị oyi ẹndẹ.
39Anịtẹso Jizọsị tomi ma ḅẹẹ tẹ in so tẹ ori arụ ḅụkụlọ tẹ so Magadanị ama pakịrị anga mum.
Currently Selected:
Matiyo 15: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria