Lẹvitikọsị 15
15
Oju Ḅụ Paka-ḅoarị Fịafịa-a Aị
1KỊNỊNYANAḄỌ ḅe nwẹnị Mozizi na Erọnị na ḅẹẹ, 2“Ọmịnị Izirẹlịapụ ma ḅẹẹ: ḅẹẹ owiḅọ-owiḅọ mḅọ oju ḅụ saraye paka-ḅo sakị-sakị, ori oju ḅụ sara paka-ḅo ye mẹ fịafịa-a. 3Anịsakị miemẹ anie ori oju ḅụ paka-ḅo ye mẹ gotẹ ọ̀ fịafịa-a mẹ ḅẹ oloko mẹ; ye mẹ ori oju ḅụ sara, sara paka-ḅoarị-o, ori oju ḅụ anị kiki tẹ sọ, anie mẹ, anie ọ̀ ḅụụ ḅio ḅụ Fịafịa-a ye, 4Monoye goyegoye tẹ ye ḅụụ ḅụ sara paka-ḅoarị ḅọ ḅe ḅọlọlọ anga, ḅọlọlọ anga, ḅarị fịafịa ḅịa; anịsakị ye goyegoye tẹ ọ̀ kẹ lẹgị ye, lẹgị ye, ḅarị fịafịa ḅịa. 5Ḅẹḅọ-ḅẹḅọ tẹ ḅụụ kẹ ò monoye lama ḅọ lama ḅọ, amịna akapa sịkịrị, tẹ minji ḅiri tẹ amịna oju sịkịrị ḅa, tẹ fịafịa-a ḅara sime nwenii mu ḅoḅiri-so la ḅa. 6Ḅẹḅọ-ḅẹḅọ tẹ oriḅe tẹ ye ḅụụ ḅụ sara paka-ḅoarị ḅọ ḅe lẹgị tẹ saakị ye ọgọnọ lẹgị ḅọ lẹgị ḅọ, amịna akapa sịkịrị tẹ minji ḅiri tẹ amịna oju sịkịrị ḅa, tẹ fịafịa-a ḅara sime nwenii ḅoḅiri-so la ḅa. 7Anịsakị ḅẹḅọ-ḅẹḅọ tẹ oju kẹ ori ḅe tẹ ye ḅụụ ḅụ sara paka-ḅoarị ḅọ ḅe lama ḅọ, lama ḅọ, amịna akapa sịkịrị tẹ minji ḅiri tẹ amịna oju sịkịrị ḅa, tẹ fịafịa-a ḅara sime nwenii mu ḅoḅiri-so la ḅa. 8Anị ḅọ ḅe tẹ ye mẹ ḅụụ ḅụ sara paka-ḅoarị ḅọ ḅe fịla kẹ fịafịa wararị gbọrụḅọ oju sarasara, mḅọ amịna akapa sịkịrị, tẹ minji ḅiri tẹ amịna oju sịkịrị ḅa, tẹ fịafịa-a ḅara sime nwenii ḅoḅiri-so la ḅa. 9Ḅẹẹye-ḅẹẹye tẹ ịn kẹ nama ọgọnọ dẹẹ tẹ lẹgịarị ye ọgọnọ ḅụ ori ḅe tẹ ye ḅụụ ḅụ sara paka-ḅoarị ḅọ lẹgị tẹ dọkụ ḅẹḅẹ, anị ḅarị fịafịa ḅịa. 10Anịsakị ḅẹḅọ-ḅẹḅọ tẹ oju kẹ ḅẹẹye-ḅẹẹye ò suku-ḅio sime ye lama ḅọ, lama ḅọ, fịafịa-a ḅara sime nwenii mu ḅoḅiri-so la ḅa. Ori ḅe tẹ ọkọ sime ye dogi ḅọ, dogi ḅọ mḅọ amịna akapa sịkịrị tẹ minji ḅiri tẹ amịna oju sịkịrị ḅa, tẹ fịafịa-a ḅara sime nwenii ḅoḅiri-so la ḅa. 11Ori ḅe tẹ ye ḅụụ ḅụ sara paka-ḅoarị ḅọ ḅe amụ minji kẹ amịna ḅara sịkịrị-a tẹ ḅara kẹ lama ḅẹ, lama ḅọ, mḅọ amịna akapa sịkịrị ḅa, tẹ minji ḅiri tẹ amịna oju sịkịrị ḅa, tẹ fịafịa-a ḅara sime nwenii mu ḅoḅiri-so la ḅa. 12Lịka kẹ tẹmẹ ḅẹlẹ na, ẹfẹrẹ na tẹ ori ḅe tẹ ḅụụ ḅụ ye sara paka-ḅoarị ḅọ ḅe ḅara kẹ lama ye, lama ye ini anị ḅaa ḅa; anịsakị ịn sịn kẹ kara ye-sụa ye goyegoye minji ḅio ini anị sịkịrị ḅa.”
13Ori ḅe tẹ ye ḅụụ ḅụ sara paka-ḅoarị ḅọ ḅe oju ḅụ sara sime ye mẹ kiki tẹ ḅarị sara paka-ḅo-a ḅẹḅẹ, ọ̀ sọnọma aḍin kịẹn tẹ kẹ amịna ḅụụ ḍiki ḅa, ọ̀ ḅụụ mịẹ fịafịama gotẹ, tẹ amịna akapa sịkịrị ḅa, anịsakị mḅọ mẹnjịarị minji ḅio ḅiri tẹ amịna oju sịkịrị, tẹ fịafịa ḅa. 14Anịsakị nine aḍin karama ene mẹ ḅụ ọ̀ nwẹnị nwẹẹrẹsị amẹngbọ, anịanịa asambịrịma olosịkịya amẹngbọ ọkị tẹ kẹ ḅo kobiri Akpụrụ-warị mẹ ḅọkọ ḅụ KỊNỊNYANAḄỌ ḅe tọrọkọ arị kẹ agbamịẹḅọ ḅe pịrị ḅa. 15Tẹ agbamịẹḅọ gbọrụ ye kẹ si sin agba mịẹ tẹ osi ye kẹ dọkịma-agba mịẹ ḅa; anịsakị agbamịẹḅọ ḅe KỊNỊNYANAḄỌ ḅe tọrọkọ ḅụ si-wẹrịso pịrị ḅẹrẹ fama ọ̀ pịrị ḅa ọ̀ ḅụụ ḅụ sara paka-ḅo ye mẹ gotẹ.
16“Gbọrụ owiḅọ nwẹnị ẹrẹḅọ na gboloma-a ḅara kẹ saraye sarasara, mḅọ minji ḅiri tẹ minji kẹ amịna bebe oju sịkịrị, tẹ fịafịa ḅara sime nwenii ḅoḅiri-so la ḅa. 17Anịsakị kapa goyegoye na, oju apara goyegoye tẹ saraye mẹ la ye, la ye ịn minji kẹ anị sịkịrị ḅa, tẹ anị fịafịa-a ḅara sime nwenii mu ḅoḅiri-so la ḅa. 18Owiḅọ nwẹnị ẹrẹḅọ na gboloma tẹ saraye sarasara, ini maa apụ mamgba ḅiri tẹ minji kẹ amịna aḅụụ sịkịrị tẹ fịafịa-a ḅara sime nwenii mu ḅoḅiri-so la ḅa.”
19“Ẹrẹḅọ sakị ẹrịarị tẹ ọmbie árị oju ḅụ sararị, sakị gbarị-a ḅara kẹ árị ẹrị-ẹrị ḅara ẹrịarị ḅẹḅẹ, sọnọma aḍin á nwẹn kẹ á pilema mẹ ḅụ sime ḅa, tẹ ḅụụ kẹ á lama ḅọ, lama ḅọ fịafịa-a ḅara sime nwenii mu ḅoḅiri-so. 20Árị ma fịafịa-a sakị ḅụ á ḅọlọlọ anga goyegoye ḅarị fịafịa ḅịa; kẹ lẹgị lẹgị ye tẹ á kẹ lẹgị ye goyegoye sọ ḅarị fịafịa ḅịa. 21Anịsakị ḅẹḅọ-ḅẹḅọ tẹ ḅụ kẹ á monoye lama ḅọ, lama ḅọ amịna akapa sịkịrị, tẹ minji ḅiri tẹ mḅọ oju sịkịrị tẹ fịafịa-a ḅara sime mu ḅoḅiri-so la ḅa. 22Ḅẹḅọ-ḅẹḅọ tẹ ḅẹẹye-ḅẹẹye tẹ ḅụụ kẹ á kẹ lẹgị ye lama ḅọ, lama ḅọ amịna akapa sịkịrị, tẹ minji ḅiri, tẹ mḅọ oju sịkịrị, tẹ fịafịa-a ḅara sime nwenii mu ḅoḅiri-so la ḅa. 23Anị ḅọrọ monoye mẹ-o, anịanịa ḅẹ ye, ḅẹ ye tẹ á kẹ lẹgị ye, lẹgị ye ori oju anị la-la, ọ̀ fịafịa ḅịa nwenii mu ḅoḅiri-so la ḅa. 24Owiḅọ nwẹn sin tẹ owiḅọ, tẹ árị na gboloma ḅọ, gboloma ḅọ, árị ma pilema wararị mẹ mịẹtẹ sọnọma aḍin ḅụ ọ̀ fịafịa ḅịa anịsakị monoye tẹ ọ̀ kẹ mono ye goyegoye fịafịa-a ḅara sime ḅa.”
25“Ọmbie nwẹnị gbọrụ ẹrẹḅọ amụ so ẹrị-a sakị ḅụ tọnwa ene kẹ à ḅụụ ḅụ sara, anịanịa so ẹrị, á kẹ so ẹrị-ẹrị aḍin ma ḅọrọma, á paa pilema ma-muarị, á so ẹrịarị ene ma ḅụ á wẹrịtẹ pilema ḅara, á fịafịa-a ḅara sime ḅa. 26Monoye tẹ á so ẹrịarị ene mamgba ḅụ á kẹ mono ye goyegoye á so ẹrịarị sakị á monoye pilematẹ sime ḅara sime á pịrị ḅa; lẹgịye tẹ á kẹ lẹgị ye goyegoye fịafịa ḅịa, á so ẹrịarị sakị á pilematẹ fịafịa-a tẹ sime-ḅara. 27Anịsakị ḅẹḅọ-ḅẹḅọ tẹ ḅụụ kẹ mịna aị ma lama ḅọ, lama ḅọ ḅarị fịafịa ḅịa, tẹ minji kẹ mḅọ akapa sịkịrị, tẹ minji ḅiri tẹ fịafịa-a ḅara sime nwenii mu ḅoḅiri-so la ḅa. 28Kụma á warị sọ tẹ (anie ḅarị pile-a) ḅẹḅẹ, á sọnọma aḍin kịẹn á ḅụụ pịrị ḅa, anị sakị mẹ ḅọrọ tẹ ḅẹḅẹ, á fịafịa ḅa. 29Nine aḍin karama eneḅaka mẹ ḅụ á nwẹẹrẹsị amẹngbọ, anịanịa asambịrịma olosịkịya amẹngbọ ọkị ḅa, tẹ arị kẹ ḅo Kobiri Akpụrụ-warị mẹ ḅọkọ mẹ ḅụ agbamịẹḅọ ḅe pịrị ḅa. 30Agbamịẹḅọ ḅe nwẹnị arịḅẹ gberie kẹ si sin agba mịẹ ḅa, tẹ osi ye kẹ dọkịma-agba mịẹ ḅa agbamịẹḅọ ḅe nwẹnị KỊNỊNYANAḄỌ ḅe tọrọkọ á ḅụụ sara paka-ḅo fịafịa-a ye ḅẹrẹ fama á pịrị ḅa.”
31Mị-ḅara mie ọ́ kẹ Izirẹlịapụ ma wẹrị ḅelema ḅarị ḅara ịna fịafịa-a mẹ ḅụ, anieofori ịn ḅofa ịna fịafịa-a mẹ kẹ ị̀ Ọḅọkụ-Igbe koko Akpụrụ-warị mẹ tẹ ịna ogbo-ḅio simearị ye mẹ pilema tẹ fịị.
32Miemẹ anie sime ori ḅe tẹ oju-kiri ḅụ ye sara paka-ḅoarị ḅọ ḅe na, ẹrẹḅọ na gboloma-a ḅara kẹ saraye sararị ḅọ ḅe na, tẹ anị ḅụ ḅo fịafịa-a apụ sọ arị apụ ma pịrị oloko mẹ; 33anị sime so-ẹrị pilema obi kọn-arị ẹrẹḅọ ma na sọ pịrịm: aniemẹ fiearị ye, anị sime ḅẹẹ owiḅọ-owiḅọ, anịanịa ḅẹẹ ẹrẹḅọ-ẹrẹḅọ tẹ oju ḅụ ye sarasara paka-ḅoarị ḅọ mẹ na, owiḅọ ḅe tẹ fịafịa-a ẹrẹḅọ na gboloma ḅọ ḅe na pịrịm.
Currently Selected:
Lẹvitikọsị 15: KBTP
Highlight
Share
Compare
Copy
Want to have your highlights saved across all your devices? Sign up or sign in
(C) The Bible Society of Nigeria
