Jọsụwa 8
8
Ịn Ayị Ọkị tẹ Anị Famam
1KỊNỊNYANAḄỌ ḅe nwẹnị Jọsụwa ḅẹẹ, “Ḅalafa, anịanịa ḅụụ-tukutuku ma; owu mẹ sọarị owiapụ mamgba ọkị ị́ ḅụụ sụa, tẹ saakị tẹ iwo Ayị muu. Ḍikii, à Ayị ḅẹ amadaḅọ ḅe na, ori atomi na, ori opu ama na, ori ama na kẹ ị́ ḅara-ḅio ị́ pịrị tẹ. 2Ị́ ị́ kẹ Jeriko na, anị ḅẹ amadaḅọ na mịẹ ḅara kẹ Ayị na, anị ḅẹ amadaḅọ na mịẹ ḅa; anị ḅẹ ngọ ma na, opu anama ma na mie ọ́ fọịn ọkị ọmịna ḅụụ pịrị ḅarịye; ọmịnị opu ama mẹ ọḅụjụ ḅọị sime anị ẹbịị.”
3Anieḅụ Jọsụwa na, owu mẹ sọarị owiapụ mamgba na iwo Ayị mu ḅẹ ḅara kẹ saakịm; tẹ Jọsụwa nwẹnị kụrọtẹ ḅiokpọ ḅara kẹ owu-sọ ḅara-ḅaatẹ kịnị tẹra apuku na jei ẹndẹ na (30,000) fịrịma mu ḍin ḅụ. 4Ọ̀ tọn ịn pịrịm, “Ḍikii ọmịnị opu ama mẹ ọḅụjụ ḅọị sime anị ẹbị ḅa, ọmịnị opu ama mẹ ḅụ ḅele ḅaka ma, kụma ọmịnị-mgba ọmịna ḅụụ tẹlẹma wẹrị; 5anịsakị yẹrị na, ị̀nịna sime atomi mamgba na mẹnjị opu ama mẹ mu ḅa. Ịn wẹrịtẹ tarị sọ mịẹ ḅara, ịn paka wa dama-ḅo sakị, wamịnị ịna tọrọkọ ḍumo-mangị kọn ḅa; 6anịsakị ịn wa ḍuka paka-ḅo ḅa, nwenii wa opu ama mẹ ḅụ ịn nụnụ so ḅa; kẹ gotẹ ọkọ ḅẹẹarị, ịn ḅẹẹ ḅa, ‘Ịn wẹrịtẹ tarị sọ mangị ḅara, ini ịna ḍumo-mangị kọn-arị wamịna aḅụụ.’ Anie wa ịna aḅụụ ḍumo-mangị kọn ḅarị ḅara. 7Anịtẹrẹmẹ ọ́ ḅọị sime tẹ ẹbịarị anga mẹ ḅụ ọ́ saakị paka-ḅo tẹ opu ama mẹ ọkị ḅa; gbala KỊNỊNYANAḄỌ ọmịna Tamụnọ ḅe anị kẹ ọmịna ḅara ḅio ọ́ pịrị ḅa ẹrẹsị. 8Anịsakị ọmịnị opu ama mẹ ọkị sakị ọ́ fịnị kẹ opu ama mẹ ḅụ sụa ḅa, KỊNỊNYANAḄỌ ḅe wẹrịtẹ ḅẹẹ tẹ ḅara, ọmịnị à tọn ọ́ pịrị ḅara ḍiki mịẹ.” 9Anieḅụ Jọsụwa ịn fịrịma pakama ịn ḅọị sime tẹ ẹbị ḅarị anga mẹ mum, tẹ Bẹtẹlị na Ayị na ogboku, ịrụa Ayị ḅụ tuuideriarị pakịrị ḅụ simem; kụma anị ḍin mẹ Jọsụwa kẹ tomi ma ogbo-ḅio simem.
10Jọsụwa nwẹnị ḅaaso ḅio saakị tẹ tomi ma pekele-ḍiki ọkị, tẹ Izirẹlị ḅẹ omongiapụ ma na tomi ma tọrọkọ tarị tẹ Ayị mum. 11Owu-sọarị owiapụ mamgba tẹ ọ̀ ḅụụ sọ apụ ma na ori na iwo sọma mu opu ama mẹ tọrọkọ kpekim, tẹ nwẹnị Ayị ḅẹ ọgọnọ-jụ pakịrị mẹ ḅụ sime, pokolotẹ kparụrụ wararị tụndụ-ogboku ini na Ayị na ogboku emi. 12Ọ̀ nwẹnị owiapụ oyi maa ẹndẹ finji na, kịnị oyia asi na pembe apụ ọkị, tẹ ịn kẹ Bẹtẹlị na, Ayị na ogboku, opu ama mẹ ḅẹ ịrụa-ideriarị-anga mẹ ḅụ koroma. 13Mị-ḅara mie ini ọmụgbin-apụ ma koroma ḅara, sịḅịda itu mẹ opu ama mẹ ḅẹ ọgọnọ-jụ emi, anịsakị anịḅẹ ọḅụ koru itu mẹ opu ama mẹ ḅẹ ịrụa-ideriarị-anga emi. Kụma Tụndụ-ogboku mẹ ḅụ mie Jọsụwa anị ḍin kẹ sime ye. 14Ayị ḅẹ amadaḅọ miemẹ ẹrị tẹso, ori na, ori atomi mamgba na anie opu ama mẹ ḅẹ owiapụ ma, nwẹnị fọnya mịẹ tẹ ḅaaso ḅio tuuideri ịkpa ḅio ḅẹ ele mẹ da-mu anga mẹ ḅụ owu ḅụ Izirẹlị na bịama ḅẹ mu; kụma ò nimi-a mịnẹ kịnị opu ama mẹ ọḅụjụ ḅọị sime tẹ owu kẹ ọ̀ paka ḅẹ ẹbịarị. 15Jọsụwa nwẹnị gbala ini ọ̀ nẹngịma tẹ ḅara kẹ ịna tọrọkọ ye mịẹ, tẹ gbala ḍumo-mangị kọn ịkpa mẹ da-mu. 16Anieḅụ tomi mamgba tẹ opu ama mẹ ḅio sime apụ ma ini ịn ḍuka ḅẹ ḅara kẹ ịn sịn ḅo gbolomam, tẹ ịn Jọsụwa ḍukarị ḅara mẹ nwẹnị opu ama mẹ ḅụ ịn nụnụ ḅelema. 17Ayị, anịanịa Bẹtẹlị ḅụ Izirẹlị ḍuka-a tẹ kọn kpọkpọ gbọrụ owiḅọ sọ ofori; ini opu ama mẹ finji koroma tẹ Izirẹlị ḍukam.
18Anịtẹso KỊNỊNYANAḄỌ ḅe nwẹnị Jọsụwa ḅẹẹ, “Ị́ ḅara-ḅio simearị ḅẹkẹrẹ mẹ sụn-pakama Ayị daa; kẹ gotẹ ọkọ ḅẹẹarị, arị anị kẹ ị́ ḅara ị́ pịrị ḅa.” Jọsụwa nwẹnị ḅẹkẹrẹ mẹ tẹ ọ̀ ḅara-ḅio sime ye mẹ sụn-pakama opu ama mẹ da. 19Ḅọị sime tẹ owu kẹ ama mẹ paka ḅẹ ẹbịarị apụ ma nwẹnị ịna sime anga ḅụ fọnya saakị paka-ḅo, tẹ ori ọ̀ ḅara sụn-pakama gbọrụ sakị, in mangị opu ama mẹ ḅio sọm, tẹ anị ọkịm, tẹ ịn nwẹnị fọnya mịẹ tẹ fịnị kẹ opu ama mẹ ḅụ sụa. 20Anieḅụ Ayị ḅẹ owiapụ ma tọrụ pịkị ọḅụ ḍiki sakị, ḍikii opu ama mẹ ḅẹ onwi turee-tureema iwo mu so la tẹ; ịn ḅarị pịkị kụrọ nyana-a kẹ ḍumo-mangị kọn mị etela, anịanịa anị etela da, kẹ gotẹ ọkọ ḅẹẹarị, ḍumo-mangị kọn ịkpa mẹ mu atomi ma ọḅụ pịkị ịn ḍuka apụ ma jụụm. 21Jọsụwa na, Izirẹlị mẹmgba na ẹrịm mịnẹ ḅọị sime tẹ owu kẹ ama mẹ paka ḅẹ ẹbịarị apụ ma opu ama mẹ ọkị tẹ, tẹ opu ama mẹ ḅẹ onwi mẹ turee-tureema iwoarị tẹso, ịn nwẹnị anịtẹrẹmẹ ọḅụ pịkị tẹ Ayị ḅẹ owiapụ ma ḅaa. 22Osi apụ ma nwẹnị opu ama mẹ ḅụ sime tẹ ḅo ịn da-paka, mị ḅara, ḅụ ini Izirẹlị ogboku ḅụ simem, ja apụ mị pakịrị emi anịsakị ja apụ anị pakịrị emi; tẹ Izirẹlị in ḅaa nwenii kọn tẹ ḍumo ḅọ, anịanịa mangị-so kpọkpọ gbọrụḅọ-sọ ofori. 23Ayị ḅẹ amadaḅọ ḅe kụma ịn ḍumo tọrụ ḅụ ori ọkị tẹ ọ̀ kẹ ḅo Jọsụwa pịrịm.
24Izirẹlị ịkpa mẹ kuḅu ini ịn ḍuka anga ḅụ okologie kẹ Ayị ḅẹ apụ mamgba ḅaa tẹ kirikọn kunoma gbọrụḅọ-sọ ḅaa tẹso, Izirẹlị mẹmgba pịkịma Ayị mum tẹ okologie kẹ ama mẹ ḅaa famam. 25Inimgba tẹ anị ene fịị apụ owiapụ na, ereme na, kịnị puku, oyi ẹndẹ finji (12,000) anie Ayị ḅẹ apụ mamgba. 26Gbala Jọsụwa kẹ ḅẹkẹrẹ mẹ ọlọtẹ sụn-pakama ḅara mẹ, ori anị nụnụ ọḅụ da-a nwenii ini ịkatakirikọn-a-ḅara kẹ Ayị ḅẹ apụ mamgba ḅaa famam. 27Anị opu ama mẹ ḅẹ opu anama na, ngọ ma na kịngẹ mie Izirẹlị inina fịya-a apụ aị ḅara ḅụ ọmụ ḅio fọịn ọkị aị, KỊNỊNYANAḄỌ ḅe ẹkwẹn-ḅịḅị mẹ tẹ ọ̀ wẹrịtẹ tọn Jọsụwa pịrị ḅara ḅụ. 28Anị ḅara mie Jọsụwa kẹ Ayị dọkịma ḅara, tẹ anị kẹ si-aị nguma kpoli sara sọma gbamasom anị wẹrịtẹ sime ḅo mịmgba sọ la ḅara.
29Ò Ayị ḅẹ amadaḅọ ḅe kpọ-sololom gbọrụ opu sịn ọgọnọ ḅụ nwenii ḅoḅiri-so lam; ịrụa mẹ ḅẹ tuuideri ḅụ, Jọsụwa tọnm tẹ ịn nwẹnị opu sịn mẹ ọgọnọ ori oju mẹ koroma ḅo, tẹ anị kẹ opu ama mẹ ogigo-ḅọkọ ḅụ wakị koroma, tẹ gburo-gburo aḍụḅarị opu kiri tan anị ponoma tunduruma, aniemẹ tẹ anịjụ sịẹ sime ḅo mịmgba sọ la ye mẹ.
Ini Oloko Mẹ Gom Ẹbalị Tụndụ Ḅụ
30 #
Dit 27.2-8
Anịtẹso Jọsụwa Ẹbalị Tụndụ ọgọnọ ḅụ gbọrụ agbamịẹ-anga nama KỊNỊNYANAḄỌ Izirẹlịapụ tẹkẹarị Tamụnọ ḅe pịrịm. 31#Pks 20.25Mozizi, KỊNỊNYANAḄỌ ḅe fịrịmẹnjịḅọ ḅe wẹrịtẹ tọn kẹ Izirẹlịapụ ma pịrị tẹ, anị wẹrịtẹ Mozizi Oloko Ḍiri mẹ ḅio kẹẹ wararị ḅara, “Pẹlẹ-a aḍụḅarị tẹ gbọrụ tomḅọ sọ amụ arị ọgọnọ ḅụ ikulele kẹ mịẹ namakọrịye saakị-gelema-a gbọrụ agbamịẹ-anga”; tẹ ịn nwẹnị anị ọgọnọ dọkịma-agba mịẹ KỊNỊNYANAḄỌ ḅe pịrị, ịn pịkị gbọrụḅụụ-sime-agba mịẹm. 32Tẹ anịjụ, Izirẹlịapụ ma tọrọkọ, ọ̀ ḍụḅarị ma ọgọnọ ḅụ gbọrụ ḅụụ kẹ Mozizi Oloko mẹ kẹẹm, aniemẹ tẹ Mozizi kẹẹ ye mẹ. 33#Dit 11.29; 27.11-14Izirẹlị mẹmgba, igoniapụ-o, ama-kuḅu ini iyi apụ-o, ịna omongiapụ na, fịrịmẹnjị-opuapụ na, ịna ḅẹrẹkọn-apụ na ini na.
Ọḅọkụ-Igbe mẹ ḅẹ maa dama-dama wararị akaka ma ḅụ tọrụ kẹ Livayị furo ḅẹ agbamịẹapụ ma tẹ KỊNỊNYANAḄỌ ḅe Ọḅọkụ-Igbe mẹ dogi apụ ma da tẹ sịẹsimem; ịn kẹ maa anga ḍiya ḅẹ gbọrụ pakịrị Gẹrịzimu Tụndụ tọrọkọ sịẹsimem, ini ḅẹ osi pakịrị Ẹbalị Tụndụ tọrọkọ sịẹsimem, Mozizi KỊNỊNYANAḄỌ ḅe fịrịmẹnjịḅọ wẹrịtẹ tarị sakị mẹ ḅụ tọn tẹ ḅara, mịnẹ ini Izirẹlịapụ ma boma. 34Miemẹ ḅọrọ tẹso, Jọsụwa Oloko mẹ ḅẹ ẹkwẹn-aḅịḅị mamgba go famam, boma mẹ-o, wori-nume mẹ-o, Oloko Ḍiri mẹ ḅio arị wẹrịtẹ kẹẹ wararị ḅara mamgba. 35Mozizi tọn aị mamgba ḅụ ẹkwẹn gbọrụmgbọ tẹ Jọsụwa Izirẹlị ḅẹ kobiri-ogbo mẹmgba na, ereme ma na, ḍọkọḍọkọ-awọmẹ ma na, igoniapụ tẹ ini ogboku anga apụ ma na tọrọkọ ḅụ go-a ye ofori.
Currently Selected:
Jọsụwa 8: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria