Jọsụwa 4
4
Ye Kẹ Kịnị Ḅiokoroma Aḍụḅarị Sịẹma Tẹẹ
1Opu sịẹ mẹmgba Jodanị mẹ saḅa-koro faam tẹso, KỊNỊNYANAḄỌ ḅe nwẹnị Jọsụwa ḅẹẹ, 2“Oyi maa owiapụ finji ọkịị tomi ma ḅụ, gbọrụ furo goyegoye ḅụ gbọrụ owiḅọ 3tẹ tọn ịn pịrị, ‘Agbamịẹapụ ma aḅụọ sịẹsime gbọrụ anga mẹ ḅụ mị anga Jodanị mẹ ogboku ḅụ, oyi maa aḍụḅarị finji ọkị tẹ arị dogi ọkị tẹ kẹ mu mị ḍin ó sime ḅẹ anga ḅụ koroma.’ ”
4Anịtẹso Jọsụwa nwẹnị Izirẹlị ḅẹ atomi ma ḅụ oyi maa owiapụ finji ma sịn, furo gbọrụ owiḅọ-owiḅọ inima tẹ ọ̀ tọn tẹ apụ ma, 5tẹ Jọsụwa nwẹnị ịn ḅẹẹ, “Ọ́ mẹnjị KỊNỊNYANAḄỌ ọmịna Tamụnọ ḅe Ọḅọkụ-Igbe mẹ tọrọkọ ḅọrọ Jodanị mẹ ogboku ḅụ, tẹ ọmịna aḅụụ gbọrụḅọ gbọrụḅọ gbọrụ ḍụḅarị ḍụḅarị dogi mḅọ apana ọgọnọ, Izirẹlị ḅẹ atomi ma afuro ma kịẹn-ḅịḅị wẹrịtẹ la ḅara. 6Mịna aḍụḅarị ma elekima sọ ḅa ọmịna ogboku, ḅo ḅarị sakị ḅụ ọmịna awọmẹ ó gbela ḅẹ sakị, ‘Arị aḍụḅarị ma arị ọmịna ḅụụ tiye fie?’ 7Anịtẹso ó ḍuko ịn pịrị ḅa mịnẹ Jodanị mẹ ḅẹ aminji ma pẹlẹ-som KỊNỊNYANAḄỌ ḅe Ọḅọkụ-Igbe mẹ tọrọkọ; anị Jodanị mẹ saḅa-ḅọrọ sakị, Jodanị ḅẹ aminji ma pẹlẹ-som. Anieḅụ mịna aḍụḅarị ma ye kẹ kịnị aḅio kuroma aḍụḅarị sọ Izirẹlị ḅẹ atomi ma pịrị gbamaso ḅa.”
8Izirẹlị ḅẹ owiapụ ma Jọsụwa tọn ḅara mịẹm, tẹ Jodanị mẹ ogboku oyi maa aḍụḅarị finji ọkịm Izirẹlị ḅẹ atomi ma afuro ma kịẹn-ḅịḅị wẹrịtẹ la ḅara, KỊNỊNYANAḄỌ ḅe wẹrịtẹ ḍuko Jọsụwa pịrị ḅara; tẹ ịn nwẹnị arị dogi saḅama tẹ arị kẹ ịn sime anga mẹ ḅụ koromam. 9Jọsụwa pịkị oyi maa aḍụḅarị finji ọkị tẹ kẹ Jodanị mẹ ogboku Ọḅọkụ-Igbe mẹ dogi agbamịẹapụ ma aḅụọ ma sịẹsime anga mẹ ḅụ sịẹmam, tẹ arị anịjụ paa emi ḅo mịmgba lam. 10Anị kẹ gotẹ ọkọ mịẹ ye, agbamịẹapụ ma tẹ Ọḅọkụ Igbe mẹ dogi apụ ma Jodanị mẹ ogboku mẹ ḅụ sịẹsime nwenii ḅẹẹye-ḅẹẹye tẹ KỊNỊNYANAḄỌ ḅe tọn Jọsụwa pịrịm ò ḍuko tomi piri nwẹn ḅẹẹ ye goyegoye faam, Mozizi wẹrịtẹ tọn Jọsụwa pịrị ḅara mamgba.
Fọnya ḅara ḅụ tomi ma saḅa-ḅọrọm. 11Tomi mamgba saḅa-ḅọrọ fama tẹso, KỊNỊNYANAḄỌ ḅe Ọḅọkụ-Igbe mẹ na, agbamịẹapụ ma na nwẹnị mẹnjị tomi ma tọrọkọ ḅọrọ. 12Rubẹnị owiapụ-awọmẹ ma na, Gadi owiapụ awọmẹ ma na, Manasẹ furo mẹ kẹ maa anga ḍiya ḅẹ gbọrụ anga mẹ na, ọmụ-aị ọlọ tẹ mẹnjị kirikọn-apụ ma tọrọkọ ḅọrọm, Mozizi kẹ ịn ḅẹẹ ḅara ḅụ. 13Ḅụụ tẹlẹma ọmụgbin pịrị tẹ ọmụ-aị ọlọ wararị kịnị sọnọa puku pembe apụ KỊNỊNYANAḄỌ ḅe tọrọkọ nwẹnị owu gotẹ mẹnjị ḅọrọ Jeriko ḅẹ ele ma ḅio mu. 14Anị ene mẹ ḅụ, KỊNỊNYANAḄỌ ḅe Jọsụwa saakị gelemam Izirẹlị mẹmgba tọrụ ogbo ḅụ; ịn nwẹnị ḅalafa na, kụn na, mangịma na nyana ọ̀ pịrị, ịn wẹrịtẹ ḅalafa na, kụn na, mangịma na nyana Mozizi pịrị ḅara ò ḍumo-ene mamgba ḅụ.
15KỊNỊNYANAḄỌ ḅe nwẹnị Jọsụwa ḅẹẹ, 16“Tọn agbamịẹapụ ma tẹ karakaraye mẹ ḍie-pakamarị Ọḅọkụ-Igbe mẹ dogi wararị apụ ma pịrị ịn Jodanị mẹ ḅụ paka-ḅo.” 17Jọsụwa anịẹrẹsị tọn agbamịẹapụ ma pịrịm, “Ó Jodanị mẹ ḅụ paka-ḅoo.” 18KỊNỊNYANAḄỌ ḅe Ọḅọkụ-Igbe mẹ dogi wararị agbamịẹapụ ma Jodanị mẹ ogboku mẹ ḅụ paka-ḅo tẹso, tẹ agbamịẹapụ ma aḅụọ-kuḅu ma saakị mu kpongbo-kiri la gbọrụ sakị Jodanị mẹ ḅẹ aminji ma pịkịma ịna sime kiri ḅom tẹ seri anị ḅẹ akaka mamgba gbaịnm, anị tarị sime-ḅara.
19Tarị akalụ mẹ ḅẹ oyi aḍin karama ene ḅụ mie tomi ma Jodanị mẹ ḅụ paka-ḅo ye, tẹ nwẹnị Giligalị ḅụ kobiri sime, Jeriko akaka ịrụa-saakịarị-anga mẹ ḅụ. 20Arị oyi maa aḍụḅarị finji ma tẹ ịn Jodanị mẹ ḅụ dogi pakama-ḅo aị ma, Jọsụwa kẹ Giligalị ḅụ sịẹmam. 21Ọ̀ nwẹnị Izirẹlị ḅẹ atomi ma ḅẹẹ, “Ọmịna awọmẹ, ‘Mịna aḍụḅarị ma tiye fiearị mọ?’ kẹ ịna aḍapụ gbela sakị tọrọkọ ḅo ḅarị sakị ḅụ, 22anịsakị ọ́ mịẹ tẹ ọmịna awọmẹ nimi ḅa, ‘Izirẹlị samụnọtẹ kiri ọgọnọ ḅụ mẹnjị mị Jodanị mẹ saḅa-ḅọrọm.’ 23Anị kẹ gotẹ ọkọ mịẹ ye, KỊNỊNYANAḄỌ ọmịna Tamụnọ ḅe Jodanị mẹ ḅẹ aminji ma samụnọma ọ́ pịrị nwenii ọ́ mẹnjị saḅa-ḅọrọm, KỊNỊNYANAḄỌ ọmịna Tamụnọ ḅe kẹ Awụ Tọrụ mẹ tẹ ọ̀ samụnọma wa pịrị nwenii wa mẹnjị saḅa-ḅọrọ ye mẹ samụnọma ḅara. 24Mịẹtẹ tomikiri mẹ ḅẹ atomi mamgba nimi ḅẹ ḅara mịnẹ KỊNỊNYANAḄỌ ḅe ḅara mẹ opu kụrọ nyana wararị; mịẹtẹ ọ́ KỊNỊNYANAḄỌ ọmịna Tamụnọ ḅe mangịma gbamaso ḅẹ ḅara.”
Currently Selected:
Jọsụwa 4: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria