Jowẹlị 2
2
Igurube Ma KỊNỊNYANAḄỌ Ḅe Ene Mẹ Ḅẹ Ḅeri-nụnụye Sọm
1Ọdụ mẹ ofuroo; oloku Zayọnị ikelemaa,
Tamụnọ fịafịa tụndụ mẹ.
Juda ḅẹ apụ, yee ọmịna oju sẹkị!
KỊNỊNYANAḄỌ ḅe ḅẹrẹkọn ama mẹ pịrị ḅarị ene mẹ kpeki tẹẹ.
2Anị ene mẹ kanakana tẹ kpiti ḅa,
pịkị kurukuru tẹ oḅuto nyana ḅa.
Tọnwa-tọnwa ḅẹ ọmụapụ ḅoarị,
kanakana ḅo tụndụ ma gbaịn-arị ye ọkụ.
Gbala-gbala jene-jene anị kịkaye amụ paka-a,
tẹ pịkị ḅarị jen kẹ paka ḅịa gbala-gbala.
3Ini ịna tọrọkọ-jụ sime ye goyegoye gulugulumarị, gbala fịnị ọkụ;
ịna ọḅụjụ ḅụ, in ye goyegoye ḅaa-famarị;
Ịna tọrọkọ-jụ ḅụ, amakiri mẹ Ideni Ḍụọ iḅi ḅara iḅim,
kụma ịna ọḅụjụ ḅụ, gbọrụ piri sọ ofori ḅẹ ịkpa kịkarị.
Ịna atọrụ gbarịarị gberie-sọ ofori.
4 #
Mịẹ 9.7-9
Ḍiki-tọrụ ḅụ ịn kịkarị aị asụ amẹẹ;
ịn ọmụgbin-asụ amẹẹ mangị ḅara mangịarị.
5Ịn tụndụ ma ọgọnọ-jụ ḅụ sime tẹ ḍosiarị sakị,
ịn kirimẹnjị-ọmụarụ fie ḅara fiearị;
ịn poloarị ḅara dọkịmarị osuka ọkụ.
Ịn ọgbụrụ-sụn tẹ simearị ḅara opu ọmụ-ogbo tẹ
tẹlẹma ọmụ pịrị wararị ye ọkụ.
6Ịn ḅoarị ḅara mẹ, ḅẹḅọ-ḅẹḅọ tẹmẹ-naịn-naịnarị,
tọrụkuḅu goyegoye bosoloarị.
7Ọmụapụ kịka ḅara ịn nwẹn kẹ owu pakarị;
ịn ọmụgbin-apụ kịka tẹ onu ma kpọlịarị.
Inimgba da-daa mẹnjị tọrọkọ-tọrọkọ muarị,
tẹ pịkị jen anga da-a.
8Ịn jụmọ-jụmọ tọrọkọ-pẹlẹma-a.
In gbiima mu ịn ẹmgbẹsẹ wararị aị tolu-ḅọrọarị,
tẹ gberie-sọ inetẹ ịn dasịẹma-a.
9In gbiima mu opu ama mẹ bịan-arị,
ịn mangị mu onu ma ḍosi saḅarị;
ịn warị ma kpọlị iwoarị,
tẹ furuapụ kịka tẹ ikiḅa-aḅọkọ ma ḅụ ḅọrọ sọ-muarị.
10 #
Mịẹ 8.12
Ịn tọrọkọ-tọrọkọ muarị sakị, kiri mẹ jikearị;
So-tọrụ mẹ ḍụrụkụarị.
Ịrụa mẹ na akalụ mẹ na ḅo kanakanarị,
tẹ lolia ma ḅarị jen kẹ ḅịya-a.
11 #
Mịẹ 6.17
KỊNỊNYANAḄỌ ḅe tọn ori ọmụ-ogbo pịrịarị tẹ ịn so-alagba fie ḅara fiearị.
Ọ̀ ḅịḅị pokiarị ọmụapụ ma tọnwa-apụ,
tẹ ịn pịkị opu kụrọ nyanam.
KỊNỊNYANAḄỌ ḅe ene mẹ ḅalafama la ḅara ḍikii!
Tụḅọ fịị-a so ḅẹ anị ḅụ?
In Juda Ḅẹ Apụ Sịnm In Si Ḅụ Pịkịị
12KỊNỊNYANAḄỌ ḅe ḅẹẹm,
“Kụma mịọkụ mẹ ḅụ sọ
ọ́ tẹmẹ-la ḅara kẹ si ḅụ pịkị tẹ pịkịma ị̀ ḍọkụma-ḅoo;
ó ḅuru-ịmọ tẹ owuu, pịkị kururuu.”
13Ọmịnị ọmịna aḅioḅẹngbọ mamgba kẹ si ḅụ pịkị tẹ mẹ ḍie pakamaa,
ọmịnị ọmịna akapa kan ḅụ-a.
Ọ́ pịkịma KỊNỊNYANAḄỌ ḅe tẹ ó sunsin pịrịarị Tamụnọ ḅe ḍọkụma-ḅoo.
Ori iḅi ḅioḅẹngbọ nyana wararị, tẹ ọkụrụkụrụ pịkị ọ̀ ḅụụ ḅin wararị.
Ò ye-inemarị tẹ ò minini ye mịẹarị.
Sakị mamgba ọ̀ tẹlẹma tẹ si-wẹrịsoarị, fomu-ḅara kẹ kịnị pịrị-a.
14Tụḅọ nimi? Ẹbịsịya KỊNỊNYANAḄỌ ọmịna Tamụnọ ḅe
ò kuroma ḍima tẹ tọnwa ḍiḅi-aị pakama sara tẹ kẹ ó boma ḅa.
Anịtẹso ọmịnị inetẹ mgbọlị-fịaị na iru na kẹ agba mịẹ ọ̀ pịrị ḅa.
15Zayọnị ḅụ ọdụ mẹ ofuroo,
ḅuru-ịmọ tọn pakama tẹ kịnị mamgba sịn ḅo kobirii!
16Tomi ma kobiri ḅo gbolomaa,
tẹ ịn mịẹ fịafịama kobiri mẹ pịrịị;
omongiapụ ma ọkị-ḅoo,
awọmẹ ma kobirii,
pịkị ḍọkọḍọkọ-awọmẹ sọ.
Ịwọma simearị ama-na-ere-na sọ
ịna kala-ḅio koroma so tẹ ḅo nyanam.
17Yee agbamịẹapụ ma tẹ fịrịmẹnjị
KỊNỊNYANAḄỌ ḅe pịrịarị apụ ma agbamịẹ-anga mẹ na
ḅọrọ Tamụnọ warị mẹ sọarị yọ mẹ na ogboku tẹkẹ tẹ ḅẹẹ:
“KỊNỊNYANAḄỌ, ị́ atomi ḍiki-sịḅị-kụrụkụrụụ.
Wa ḅelemaa mị ḅụụ-jịrị mẹ ḅio; ḍụkụ tẹ igoniapụ ma wa ḍiki-sima ma. Ndẹẹ jen sịẹ wa kombo tẹ gbela ḅẹ ḅara,
‘Ọmịna Tamụnọ ḅe ọ̀ tọ-anga emi?’ ”
Tamụnọ Mịẹ Tẹ Amakiri Mẹ Siin Iḅiọkụma Iḅi Fịaị So-pakamam
18Anịtẹso KỊNỊNYANAḄỌ ḅe ori amakiri mẹ ọ̀ ḅụụ yela ḅara ḍie pakamam;
ori ọkụrụkụrụ nyana ori atomi pịrịm.
19Ori ịn pakịrịm:
“Mịọkụ à mgbọlị-fịaị na, iru na, pulo na kẹ ọ́ pịrị ḅẹ-yearị,
tẹ arị ọmịnị na iḅi ḅa.
Ja asịẹ ḅarị jen kẹ ó ḍiki-sima ḅịa.
20Àrị ọmịna ogboku ọmụ-ogbo mẹ ḅelema ḅa,
anie ọgọnọ-jụ sime tẹ ḅo aị ma;
tẹ ịn ḅẹ jaị dee mu ịkpa mẹ ḅio suu ḅa.
Àrị ịna tọrọkọ-sụn aị ma dee Fụn-Tọrụ mẹ ḅio suu ḅa,
tẹ ịna ọḅụjụ ḅo aị nwẹnị Mẹdịterenanị abajị mẹ ḅio fịị ḅa.
Ịna fịtẹ-oju ma nwẹnị fụrụ ḅa.
Àrị ịn ḅaa guluguluma ḅa ịn kẹ ọ́ mịẹ aị mamgba ẹrẹsị.
21Ḍụọ kọrị akiri, ọ́ ḅalafa ma,
kụma ó ḍerekuu, pịkị ḅioḅẹlẹẹ.
KỊNỊNYANAḄỌ ḅe mịẹ ọ́ pịrị aị mamgba ẹrẹsị.
22Nama amẹẹ, ọ́ ḅalafa ma.
Osuka-fị-akiri ma ịwọ fama wararị;
sịn ma arịḅẹ asịnmgbọlụ sụarị,
tẹ tọnwa ịla asịnmgbọlụ na girepu asịnmgbọlụ na sụa sararị.
23Zayọnị ḅẹ apụ, ó ḅioḅẹlẹẹ,
ó ḍerekuu, KỊNỊNYANAḄỌ ọmịna Tamụnọ ḅe mịẹ ọ́ pịrị ye ḅụ.
Ori ọmịnị na iḅi ḅẹ ḅara kẹ ḍụọ soku sakị ḅẹ eene kẹ ọ́ pịrị tẹẹ;
ori ịwọ eene ọsụma sara ọ́ pịrị tẹẹ,
pịkị ḍiḅi-aị ịwọma pakarị sakị ḅẹ eene mẹ sọ,
tarị anị mịẹ-mịẹ ḅara ḅụ.
24Mgbọlị-fịaị gugu-gugu ayọ ma ḅụ mgbọlị-fịaị ḅin ḅa;
ye pọnjị anga ma ḅẹ otolo ma ḅụ sọ,
iru na pulo na waa-waa sara ḅa.
25Igurube ogbo ma ó ḍiḅi pakama ḅo aị ma
fị siin akụra ma ḅụ ọ́ fama aị ma,
à kẹ siin ọ́ pịrị ḅa.
Yẹrị anie mị ọmụ-ogbo mẹ kẹ ọ́ fịrịma ye.
26Mịọkụ ọ́ tọnwa fịaị nyana tẹ fị ḅa, tẹ anị ọmịnị na iḅi ḅa.
Ọ́ KỊNỊNYANAḄỌ ọmịna Tamụnọ ḅe tokini ḅa,
anie ḅụụ-buama-aị mịẹ ọ́ pịrị ḅọ ḅe.
Kịnị ḅarị jen kẹ gbala-gbala ị̀ atomi ma ḍiki-sima ḅịa.
27Anịtẹso, Izirẹlị, í nimi ḅa mịnẹ àrị ị́ ogboku emi,
tẹ yẹrị, KỊNỊNYANAḄỌ ḅe, anie ị́ Tamụnọọ, anịsakị jụmọ ofori.
Kịnị ḅarị jen kẹ gbala-gbala ị̀ atomi ḍiki-sima ḅịa.
KỊNỊNYANAḄỌ Ḅe Ene Mẹ
28Miemẹ ḅọrọ tẹso, à ḅaka ḅara kẹ ị̀ Tẹmẹ kẹ ḅẹḅọ-ḅẹḅọ ḅụụ ḅio su ḅa:
ọmịna owiapụ-awọmẹ na eremịna-awọmẹ na
ì oku ḍuko wasama ḅa;
ọmịna omongitẹ owiapụ ḍawọ kọn-kọn-kọn ḅa,
tẹ ọmịna asawọ ma ịkịan ẹrị-ẹrị-ẹrị ḅa.
29Anị sakị mẹ ḅụ, à pịkị ḅaka ḅara kẹ ị̀ Tẹmẹ kẹ fịrịmẹnjịapụ ma aḅụụ ḅio sọ su ḅa, owiapụ na ereme na.
30Àrị anị ene mẹ ḅẹ ḅeri nụnụ elekima ḍie-pakama ḅa So-ḅio na pịkị Kiri ḅio na ḅụ;
ọmbie ọsụ na, kọrị-fịnị na, onwi oḅuto na paka ḅa.
31 #
Mat 24.29; Mak 13.24,25; Luk 21.25; Mịẹ 6.12,13 Ịrụa mẹ kanakana ḅa,
tẹ akalụ mẹ ọmbie ḅịya ḅara kẹ awụ ḅịya ḅa,
tẹrẹmẹ KỊNỊNYANAḄỌ ḅe ori atomi kọn ḅarị ḅalafama ene mẹ ḅo ḅa.
32 #
Fịr 2.17-21
#
Rom 10.13
Kụma KỊNỊNYANAḄỌ ḅe ḅara ḅarasụa ḅii apụ mamgba ḅọrọma ḅa.
Anie KỊNỊNYANAḄỌ ḅe ḅẹẹ ḅara mẹ,
‘Jeruselemu ḅụ simearị ja apụ mangị-so ḅa;
yẹrị sẹlẹ-ọkị tẹ apụ ma fịị-a so ḅa.’ ”
Currently Selected:
Jowẹlị 2: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria