Ayịzaya 56
56
Tamụnọ Atomi Ma Ḅụ Sịẹ-sịẹ Mamgba Sime ḅa
1KỊNỊNYANAḄỌ ḅe ori atomi ḅẹẹarị: “Kịnị-inoma ofori ye na kuraye na mịẹẹ, kẹ gotẹ ọkọ ḍukoarị, ala-a àrị ọ́ ḅọrọma ḅa.”
2“Sakị mamgba Ịnyọsara-Ene mẹ kokoarị tẹ anị kẹ papaa ye mịẹ-a apụ ma arị in boma ḅa. Gbọrụ siye sọ mịẹ-a apụ ma arị in boma ḅa.”
3Jen sịẹ ḅẹ ḅọ tẹ ḅo amịna ḅụụ kẹ KỊNỊNYANAḄỌ ḅe atomi ma na gboloma tẹ ḅọ ḅẹẹ ma mịnẹ: “KỊNỊNYANAḄỌ ḍụkụ tẹ arị ori atomi na sunsin ọ̀ pịrị ḅịa.”
Pootẹ owiḅọ gbala-gbala kuroma ma mịnẹ mḅọ inetẹ awọ iyi ḅịa ẹrẹsị mḅọ inetẹ Tamụnọ atomi ma ḅẹ ḅọ sọ ḅịa. 4KỊNỊNYANAḄỌ ḅe ọkọ sime tomḅọ ḅe ḅẹẹarị, “Ị́ Ịnyọsara-Ene mẹ koko ḅụ ḅọrọ tẹ ị̀ kụn-arị ḅẹḅẹ, pịkị ị̀ ḅụụ-ḅẹlẹarị ye mịẹ tẹ ḅioḅẹngbọ-kẹ-sịrẹrẹ-niḅi ḅara sime tẹ ị̀ ọḅọkụ mẹ wẹrịarị ḅẹḅẹ, 5anie ḅụ ini ị́ ẹrẹ kẹ ḅiokoroma ḅa ị̀ warị ḅio ḅụ, pịkị ị̀ atomi ma ogboku ḅụ, ọkị mu í owiapụ-awọmẹ na eremịna-awọmẹ na nyana ye kẹ ị́ kẹ ḅiokoroma ḅẹ sakị nẹngị ḅa. Gbala-gbala kịnị ị́ kẹ ḅioḅọrọma ḅịa.”
6Tẹ KỊNỊNYANAḄỌ ḅe jen asịẹ ḅẹ apụ ma tẹ ḅo ori atomi ma ḅụ sọarị apụ ma, anie ọ̀ ḅẹlẹma tẹ fịrịmẹnjị ọ̀ pịrịarị apụ ma, anie Ịnyọsara-Ene mẹ koko tẹ ḅioḅẹngbọ-kẹ-sịrẹrẹ-niḅi ḅara kẹ ori ọḅọkụ mẹ wẹrịarị apụ ma ḅẹẹarị: 7#Mat 21.13; Mak 11.17; Luk 19.46“Arị ọ́ kẹ Zayọnị ḅo ḅa, ị̀ fịafịa tụndụ mẹ, ị̀ tẹkẹ warị mẹ ḅio ḍereku kẹ ọ́ pịrị, tẹ pịkị ị̀ agbamịẹ-anga ọ́ mịẹarị agba ma daa-ọkị ḅa. Ịn kẹ ị̀ Warị mẹ sịn ḅarịye anie tomikiri ḅẹ asịẹ mamgba ḅẹ atomi ma tẹkẹ warị.”
8Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe, anie amịna atomi Izirẹlị kẹ kun-ḅara ḅụ pịkị ama ḅo tẹ ḅọ ḅe, minini tẹ mịnẹ ọ̀ paa jen-apụ sọ kẹ ḅo ịna ḅụ sụa ḅa.
Izirẹlị Sịḅịdapụ Ma Ịn Ḅẹrẹ-pẹlẹ Ịna Ḅara-sima Tẹ
9KỊNỊNYANAḄỌ ḅe kịnị tọrụ nimi-a apụ asịẹ ma ḅẹẹ tẹ in piri-ḅio-ḅẹ anama kịka tẹ ḅo ori atomi kanị guluguluma. 10Ori mẹẹ, “Sịḅịdapụ mamgba, kịnị ọkịarị ini ì atomi ḅeri nụnụ ḅẹ apụ ma, ịna atọrụngbọ pụụn wararị! Gberie-sọ in nimi-a. Oloku-oloku-a warị-koru-obiri amẹẹ mie ịn kịkarị — koro mono ma ḅọrọ tẹ ḍawọ kịngẹ mie ịn mịẹarị. Ịn kpọma mono ḅẹlẹma ḅara ḍikii! 11Fị ye fị ye pọkọ-ta-a obiri amẹẹ mie ịn kịkarị, anie kẹ ịn pịrị tẹ gbala-gbala ini na iḅi-iḅi ye ofori apụ. Mịna sịḅịdapụ ma in yefieye naa-a. Ịna ḅụ ọrụḅọ-ọrụḅọ amịna ḅụụ-ḅẹlẹ ye mịẹarị tẹ mḅọ na iḅi ḅẹ ye ḍọkịarị. 12Mịna iru ḅuu apụ ma ḅẹẹarị, ‘Ó yee wa iru kalịye ḅuu wa, tẹ wa inetẹ nyana ḅẹ ye mẹmgba ḅuu siin! Ḅaa ḅụ wa iḅi mịmgba wa sime-ḅara nẹngị ḅarịya!’ ”
Currently Selected:
Ayịzaya 56: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria