Ayịzaya 55
55
Tamụnọ Ọkụrụkụrụ Kẹ Ori Atomi Daarị
1 #
Mịẹ 21.6; 22.17 KỊNỊNYANAḄỌ ḅe mẹẹ:
Minji ḅu pọkọ-tarịarị ḅọ goḅọ-goḅọ ḅoo, mie minji!
Ọmịnị igbigi nyana-a apụ, ó ḅo mbịaka fẹ fị!
Ḅoo! Iru na ndo-minji na fẹẹ
ị́ gbẹẹ ḅẹ gbọrụ igbigi sọ ofori!
2Tiye ẹrẹsị ó furo ḅin ḅịa ye gotẹ igbigi famarị?
Tiye ẹrẹsị ọmịnị ọ́ kọrị ḅo igbigi kẹ papaa
fama tẹ ḅuru paa ọ́ tarịarị?
Ọmịnị ì poki tẹ à ḍukoarị ye mịẹ;
anịsakị ó ḅioḅẹlẹ ḅara kẹ fịye mamgba
ḅụ iḅitẹịn fịye fị ḅa.
3 #
Fịr 13.34
Mịọkụ ó pokii, ị̀ atomi, tẹ ị̀ ḍọkụma-ḅoo;
ọmịnị ị̀ ḍọkụma-ḅoo, tẹ ó ḍumo nyana ḅa!
À sime alama ḅarị ọḅọkụ kẹ ọmịnị na fị ḅa
tẹ à minini Devidi pịrị aboma ma kẹ ọ́ pịrị ḅa.
4Arị ọ́ kẹ sịẹ-sịẹ ma sịḅịdaḅọ na ịn mịẹ ḅẹ
ye tọn-arị ḅọ na sọma tẹ,
tẹ ọ̀ ḅụụ ḅụ à ḅọrọ tẹ ị̀ kụrọ kẹ in ḍie tẹ.
5Mịọkụ ọ́ jen asịẹ sịn-ḅo ḅa;
sakị ḅẹ gbọrụ sakị ḅụ ini ó nimi-a,
kụma mịọkụ ịn mangị-ḅo ọmịna ḅụ sọ ḅa!
Yẹrị, KỊNỊNYANAḄỌ ọmịna Tamụnọ,
Izirẹlị tẹkẹarị Fịafịa Ḅọ ḅe
mịẹ tẹ miemẹ paka ḅa;
à kụn na ebube na kẹ ọ́ pịrị ḅa.
6Ọ́ pịkị KỊNỊNYANAḄỌ ḅe da tẹ ọ̀ tẹkẹẹ,
mịọkụ ò kpeki wararị sakị mẹ ḅụ.
7Yee si-sịḅịḅio-sụapụ ma ịna ḍumo kọn ḅara mẹ ḅụ ḅara-siin,
tẹ ịn ḅẹrẹ kuromarị ḅara mẹ ḍima.
Yee ịn tọrụ pịkị KỊNỊNYANAḄỌ, wamịna Tamụnọ ḅe da;
ori ọkụrụkụrụ nyana wararị tẹ sarama si-wẹrịsoarị.
8KỊNỊNYANAḄỌ ḅe mẹẹ: Ị̀ akuroma na ọmịna akuroma na kịka-a,
ì etela ma pịkị ọmịna etela ḅụ kịrịm.
9So mẹ Kiri mẹ ḅụ gele-faa ḅara,
anie ì etela ma na kuroma ma na sọ
ọmịna aị ḅụ gele-faa ḅara.
10 #
2 Kọr 9.10
Ị̀ ẹkwẹn ma eene-mgbọ na eene na kịkarị,
anie So-tọrụ koro ḅo kiri pisimarị aị ma.
Ịn mịẹ tẹ ḍiḅi aị ma so-pakarị
tẹ ḍiḅi ḅẹ mgbọlị na fị ḅẹ fịye na nyanarị.
11Anị ḅara mie à kọn-arị ẹkwẹn mẹ sọ sime ḅarị ḅara
anị à tọn tẹ anị mịẹ ḅẹ ye gbarị ḅịa;
à gotẹ anị kẹ fịrịma ye goyegoye anị mịẹ ḅa.
12Ó ḍereku kẹ Babịlọnị ḅụ paka-so ḅa;
dein ḅụ mie ini ọmịna tọrọkọ-sụn tẹ
ọ́ kẹ paka-so ḅarịye.
Tụndụ ma na gele-akiri ma na nume oloku pakama ḅa,
tẹ sịn ma ḍereku kẹ oloku ḅa.
13Ọmị osuka mịọkụ ḅụ so-pakarị yọ mẹ Sayịpẹrẹsị asịn so-paka ḅa;
nangị kiri mẹ ḅụ matụlụ nwẹn-sịn asịn ma so-paka ḅa.
Miemẹ kẹ ḅiokoromaye sọ mu ḅẹẹ-sakị ḅẹẹ-sakị la ḅa,
kẹ yẹrị KỊNỊNYANAḄỌ ḅe mịẹ tẹ ye mẹ kẹ ḅiokoroma.
Currently Selected:
Ayịzaya 55: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria